Рубрикатор

Культура Ксения Шишканова: «ЛОМАНТНЕНЕНЬ ЛЕЗДАМОСЬ МОНЬ СЕДЕЙСЭ»
Ксения Шишканова: «ЛОМАНТНЕНЕНЬ ЛЕЗДАМОСЬ МОНЬ СЕДЕЙСЭ»

2018 иенть Россиянь Президентэсь Владимир Путин яволявтызе Волонтёронь ды доброволецэнь иекс ды а стяко, эдь минек масторось тедеде ютавты спортонь покш мероприятия – Футболонь коряс масторлангонь чемпионатонть. Те шкастонть волонтёртнэнь ды доброволецтнэнь важодемаст карми пек эрявиксэкс, эдь минь карматано вастомо пек ламо омбо масторонь инжеть ды налксицят. Ялатеке Волонтёронь иекс те иесь яволявтозь аволь ансяк Чемпионатонть кувалма. Россиясо волонтёронь движениянтень совасть малав 7 миллионт эрицят, ды сынь свал анокт лездамс апак учонь зыянов тевс понгозь ломантненень. Эште Вольтер, XVIII пингень Франциянь философось-просветителесь ды поэтэсь, кортась: «Ули мелеть ловомс эсь прят ломанекс – лездак лиянень».

 

Те лувонть эсь эрямонь смустекс лови Лямбирень райононь Александровка велень 10-це классонь тонавтницясь Ксения Шишкановаяк. Ксения – волонтёр. Сон те тевентень эзь тонавтне косояк ды арси, лиянень лездамонь мелесь, васняяк, улезэ седейсэнть. «Волонтёрокс молить сеть ломантне, конатнень оймесэ палы лия ломанень вечкемань толнэсь, – ёвтни тейтерькась. – Монь ялган ютксо истят ломантнеде пек ламо. Школасо минь класснэк яксетяно ветерантнэнь, сыре ломантнень, ськамост эрицятнень, инвалидтнэнь туртов лездамо. Шлятано кияксост, вальматнень, яксетяно ярсамопелень, надобиянь рамамо. Ськамост эрицятненень ды сэредицятненень сехтеяк пек эрявить лембечись ды кортамотне. Монь туртов сыненст лездамось канды мельспаро».

Ксения аволь ансяк эсь велень волонтёр, сон 2017 иестэ саезь совась Саранск ошонь Футболонь коряс масторлангонь чемпионатонь Волонтёронь центрантень ды ней аноксты эсь прянзо те мероприятиянтень. Тейтерькась каясь яволявтома Саранскоень волонтёронь интернет-сайтэнтень, зярс ютась колмо тестт ды интервью. Шишканова тонавтни англань кель омбоце классто саезь ды арси, сонзэ содамочинзэ сатыть омбо масторонь инжетнень марто кортамсто. Ней Ксюша учи результаттнэнь. Тонавтницясь уш а весть ульнесь волонтёрокс футболонь, хоккеень матчтнесэ, эрьва кодамо акциятнесэ ды мелят сайсь колмоце тарка «Волонтёр года» республикань пелькстамосонть.

Ксения школасояк активистка, сон панжсь соцсетьсэ «лопине», косо ёвтни эсь тиринь школадонзо. Тейтерькась, англань кельденть башка, сисем иеть тонавтнесь мокшонь кель ды а весть лиснесь те предметэнть коряс райононь олимпиадатнень изницякс ды ульнесь республикансетнень участницакс. Ялатеке Ксения пек парсте содасы эрзянь келенть, эдь сонзэ покштянзо-сырькаензэ, тетязо-авазо – весе эрзят. Сынь чачсть-кассть Орданьбуень Кельвядни (Мурза) велесэ. Ксения вишкапингстэ саезь кармась чарькодеме ды тонавтнеме эрзянь келенть, нейгак роднянзо-раськензэ марто велесэяк-кудосояк бажи кортамс эрзякс, штобу а стувтомс ды а тапамс валтнэнь мокшонь келенть марто. Ксениянь туртов ней кавто кельтне теевсть тиринь келекс.

Сыця кизэнть Ксения Шишканова учи талнозь. Бути сон понги Футболонь коряс масторлангонь чемпионатонь ошонь волонтёртнэнь юткс, те карми пек покш уцяскакс. Ксюша омбо масторонь инжетнень эрзякскак-мокшокскак, бути эряви, тонавтсынзе кортамо. Нама, сонзэ васенце тевезэ – лездамс тенст, ялатеке весе волонтёртнэ кармить бажамо вастомс инжетнень ды налксицятнень «Шумбрат!» гайгиця валсонть.

М.ДЕВЯТОВА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...