Рубрикатор

Культура КОДА ЭРЯТ, ЭРЗЯНЬ ВЕЛИНЕ?
КОДА ЭРЯТ, ЭРЗЯНЬ ВЕЛИНЕ?

Эрьва ломаненть ули тиринь ёнксозо, косо сон чачсь, кассь, косо ёвтызе васенце валонзо. Кинь-бути те тиринь ёнксось – гайтев ды свал шалныця ошось. Лиятнень жо ды, паряк, седе ламотнень туртов – те сэтьме, певтеме паксятнень ды виртнень, мазыйдеяк мазый пертьпелькстнэнь марто велесь. Ансяк вана а кирдеви тесэ ломанесь, а виртнень-паксятнень мазычисэ, а оймес а кельгиця ванькс коштсонть. Весень терди-мани ошось.

 

Статистикань пачтямотнень коряс, меельце комсь иетнень перть Россиянь картанть лангсто ёмасть колоньгемень тыщадо ламо велеть. Течи тосонь эрямо лувдонть ёвтнить чаво, пельскаладозь кудынетне, лиятнесэ жо истятнэяк а муевить. А эштё зяро велинеть, косо эрицятнеде ансяк 2-8 ломанть!

Иеде иес чамиця велетне ламолгадыть минек республикасонтькак. Ды васенце тувталокс теньсэ ламосо, паряк, ашти важодема таркатнень арасьчись. Тень коряс од ломантне кадыть тиринь кудост ды туить велетнестэ ошов. Ды токи те седе пек сеть велетнень, конат аштить васоло покш оштнень эйстэ.

Орданьбуе ёнксонь Кеченьбие (Жабино) велесь ашти пек мазый таркасо. Теке марто пек васоло оштнень эйстэяк (30 вайгельпень тарка Орданьбуе ошонть ды малав 160 вайгельпеть Саранскоенть видьс). Паряк, тень кувалма иестэ иес эрицятне аламолгадыть (неень шкане тесэ 300 ломантькак а лововить), пек чуросто марявить эйкакшонь гайтев вайгельтне. Аламонь-аламонь велесь чами.

А эдь овсе лият тевтне ульнесть 20-30 иеде икеле. Сестэ эрямось тесэ алкукс лаказь лакась. Эйкакштнеде ды од ломантнеде ульнесть ламо, эрицятне роботасть колхозсо, ды эрьва семиясо кемсть: веленть ули вандынь чизэ.

Мон монсь чачинь-касынь те велесэнть. Ды мелезэнь свалшкас кадовсь весёла ды мелявкстомо эйкакшпорам. Кодамокс ульнесть телень шкатне! Эзть маряво пициця якшамотнеяк. Чинь перть эйкакштне ды од ломантне кирякстнесть сокссо ды салазкесэ. Нучк-пачк яксилинек весе лейтнень-латкотнень, кузнилинек пандотнень. Ледстневить кизэнь шкатне, зярдо ломантнень шалтось эзь оймакшно тесэ а чить, а веть. Эрьванть ульнесь эсензэ тевезэ: эйкакштне налксесть-чийнесть ушосо, седе покштне ды покштятне-бабатне котьмасть кудонь ды пирень тевтнесэ, тетянок-аванок топавтсть колхозонь тевтнень. Пек ответственнойкс весень туртов ульнесь сюронь урядамо шкась, зярдо роботатне ветявсть чинек-венек. Нама, техникась ульнесь аволь неень шкатнень коряс, бажасть весементь кенеремс сёксень пиземетнеде икеле. Семиянек весе роботасть паксясо ды тинге лангсо. Цёрынькатне тетяст ды леляст туртов лездасть комбайнасо, тейтерькатне жо аваст марто тинге лангсо сортовасть пурназь сюронть. А кодамо тантеекс марявсь колхозонь столовойсэ пидезь ямось! Те танстесь а стувтови зярдояк.

Пек ламо сеть шкатнестэ ульнесть од ломантнедеяк. Сынст туртов сехте паро шкакс ульнесь чокшнесь ды весь. Позда чокшнестэ саезь валскес веленть келес марявсть сынст пеедькшнемаст, куротнесэ тесэ-тосо, чувтотнень алга, аштесть од ломанть. Телень якшамотнестэ жо весе пурнавильть клубс. Дискотекав якильть аволь ансяк Кеченьбиень цёратне-тейтертне, ламо сыльть шабра Орозбие (Урусово) велестэнтькак. Клубось эрсиль пешксе.

Советэнь шкатнестэ Кеченьбиень клубось ульнесь веленть куншкасо аштиця икелень церьковасонть. 1991 иестэнть сонзэ одс теизь церьковакс, а клубонть алов максовсь лия покш кудо. Ульнесь сон, кода кортыльть эрицятне, пиретнень песэ (прявт ульцянть удало). Эсь ютковаст те куронть течияк лемдить пирепекс (алкукс – Од линия), ды клубось нейгак ашти тесэ.

1999 иестэ клубонь прявтокс аравтозель Елена Петровна Головина (сон важоди нейгак). Самонзо марто культурантень велесэнть максовсть од вийть. Клубонь зданиясь аламодо витневсь-вадрялгавтовсь, кармасть ютавтневеме эрьва кодат мероприятият. Од иень бал-маскарадось, «Сёксень балось», «Слабое звено», «А ну-ка, парни!», «Огонёк» пелькстамотне пурнасть аволь ансяк од ломантнень, ламот сыре эрицятненьгак. Од ломантне покш мельсэ учость чокшненть самонзо, штобу ваномс, мезе мельстуиця сынст учи клубсонть те чокшнестэнть.

Покш сюкпря Елена Петровнанень, течияк сон эсь тевензэ топавты кода эряви. Ансяк вейке талновты, ней кенярксонть савкшны каземс аволь од ломантненень, а седе сыретненень. Вейсэ эсь лездыцятнень (велень активенть) марто, козо совить велень администрациянь прявтось Вера Васильевна Чалдаева, библиотекаресь Любовь Михайловна Теплякова, фельдшерэсь Любовь Васильевна Исайкина, магазинсэ микшницясь Вера Васильевна Слепцова ды лиятне, вадрялгавтыть-весёлгавтыть велесэ эрямонть. Ды кода тешкстыть эрицятне, неть ломантне а максыть ёмамс велентень. Иень перть малав эрьва кенярксчинтень сынь ютавтыть мероприятия. Истя, эрьва ие Мастясто весе веленек пурнавить теленть ильтямо. Мероприятиясь ютавтови веленть куншкасо, тезэ пурнавить однэк-сыренек. Цёратне эсь виест невтить гирятнень кепсемасо, аватне – нурька морынетнень морсемасо. Однэк-сыренек пелькстыть кескавсо кирнявтнемасо, пиксэнь ускомасо, салазкесэ ардтнемасо. Весень каванить тантей пачалкседе, ды веленть келес гайгить мазый моротне.

Эзь стувтово Кеченьбиесэ тундонь ильтямонь коеськак. Велень вейке песэнть (лиясто верепесэ, лиясто алопесэ) эрьва кодамо тюсонь парсейнесэ мазылгавтови чувтонь покш тарад ды сонзэ марто сыргить веленть кувалт. Тарадонть марто ютамсто ломантне ламолгадыть, пурнавозтне морыть эрзянь ды рузонь мазый гайтев морот, нурька морынеть, каванить вейкест-вейкест тантей прякадо ды позадо. Велень омбоце пентень ломантнеде пачкодить уш байтяк. Тарадонть марто лисить велестэнть ды ёртсызь сонзэ паксяс, косо видезь сюро. Эрьва семиясь кудов мартонзо саи парсейне марто вишка тарадке. Кортыть, те тарадось иень перть вансты кудоюртонть зыяндо.

Покш мероприятият ютавтовить Авань чистэнть, Сыре ломантненень алтазь чистэнть, Од иенть вастомсто ды лия кенярксчитнестэ. Эрьва ие маень 9-це чистэ Кеченьбиень эрицятне пурнавкшныть войнасо чавовозтненень кеврунгонть ваксс торжественной мероприятияс, кона алтавкшны Изнямонь чинтень. Кеченьбиестэ войнав туекшнесть 250 ламо ломанть, 200 эйстэст ульнесть тюрематнесэ, 147 солдатт максызь эрямост масторонть кис. Течинь чине велесэнть кадовсь Ине Отечественной войнань вейке ветеран – Калигин Степан Ефимович. Неть читнестэ (январень 28-це чистэ) сонензэ топодсть 92 иеть. Весе минь, «Эрзянь правда» газетань теицятне, арсетяно тензэ кеме шумбрачи ды эрямс эштё ламо иеть!

Кеченьбие велень эрьва эрицянть седеензэ течи пултазь пулты уроз эйкакшокс веленть эйстэ веёно аштиця малав овсе од школась. Панжозель сон 1998 иень сентябрянь 1-це чистэ. Кирьпецень од школанть строямонзо весе велесь учось ламо иень перть (семс ульнесь тесэ таштыне начальной школа, 5-11-це классо тонавтницятненень жо савкшнось якамс шабра Орозбие велев). Ды, окойники, учовсь, топавтовсть ламонь мельтне-бажамотне. Школась ульнесь основной (1-9-це класстнэнь туртов), ды васенце иестэнть парта экшс тесэ озасть 58 тонавтницят, конатнень эйстэ 11 састь 1-це классос. Ансяк вана те кенярксось ульнесь а куватень. Колхозось велесэнть каладсь, ломантне кадовсть роботавтомо, эйкакштне иеде иес яла седе аламолгадсть ды школав якицятнеде кармасть овсе аламо. Кемень иень ютазь, 2008 иестэ, Кеченьбиень школась пекстазель. Эйкакштнень (сестэ эйстэдест ульнесть колоньгеменьшка) кармасть автобуссо усксеме шабра Орозбие велев. 2017 иень сентябрянь 1-це чистэ Кеченьбиестэ парта экшс озасть ансяк вете эйкакшт. А вана ютыть эштё зярыя иеть ды школав якицятнеде а улить овсе.

Неень шкане Кеченьбиесэ зярс роботыть велень администрациясь, медпунктось, библиотекась, клубось, улить магазинт, эрямось эсь койсэ моли. Ломантне котьмить кудоютконь тевсэст: малав весе, кинь улить виест, кирдить ракшат, ветить хозяйства. Ламот цёратне (ды аволь ансяк одтнэ) важодема таркатнень арасьчинть кувалма ардтнить роботамо Московов ды лия покш оштнес. Эсь семиятнень трямга эрявить ярмакт. Эзизь стувто тесэ покштяст-бабаст тевентькак: понань лембе кемсэ карсить весе масторонть. Нама, истят кедьчелькевтнеде тесэ ней уш кадовсть аволь ламо. Иестэ иес эрицятне сыредить ды аламолгадыть, од ломантнеде жо течияк малав овсе арасть. А мезе учи те эрзянь велиненть комсь иень ютазь? Ёмамо? Вана мезе лангсо арсема минек масторонь прявттнэнень. Арсема миненек, од ломантненень.

Ю.ЕРЕМИНА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...