Рубрикатор

Культура ОТКРЫТКАТНЕ МИНЕК ЭРЯМОСОНТЬ ЭЙКАКШПОРАНЬ КЕНЯРКСОВ ЛЕДСТНЕМАТНЕ
ОТКРЫТКАТНЕ МИНЕК ЭРЯМОСОНТЬ ЭЙКАКШПОРАНЬ КЕНЯРКСОВ ЛЕДСТНЕМАТНЕ

Ледстнян эйкакшпорам, зярдо минь пурнынек эрьва-кодат артовкст (открыткат), кучнинек эйсэст ялганок-оянок туртов Союзонть келес ды омбо масторов. Монь ульнесь натой Германиясто Од иень открыткам, конань тень кучокшнызе тосонь немецень тейтерька. Каштанчисэ тень кувалма аштинь куватьс. Весемезэ, некак, пурнакшнынь сядошка артомкат, конатне алтазельть Од иентень, Советэнь Армиянь ды Мартонь 8-це читненень. Минь эйсэст полавтнинек вейке-вейкенек юткова, чийнилинек почтав од савкстнэнь мельга, ды сынст мазычист нейгак сельмень икеле. Сехте пек тень вечкевкшнесть художникенть Владимир Зарубинэнь открыткатне. Пек янксян, эзинь вансто те шкас, ней бу невтневлинь эйкакшон туртов. Зярошка эйсэст, монь койсэ, ульнесь лембечи, мазычи, парочи, вечкема ломантнень туртов ды артыцянь покш докачи. Владимир Иванович Зарубинэнь артомкатне-каземкатне ютазь пингень 70-80-це иетнестэ сакшность ломанень эрьва кудос. Зарубинэнь Од иень открыткатнень артылинек «ёлкань» стенгазетатнес. Сынст гуашьсо артылизь лавкатнень витринатнень суликатнес. Зарубинэнь открыткатнень лангсо геройтне – мазый ды седейс токиця нумолнэть, урнэть, сеельнеть, овтынеть, Ловняськеть, Якшаматят, Ловатят. Кодамо мельспаро ульнесь седейсэть вишкапингстэ, зярдо ваннылить неть артовкстнэнь, ды кодат седеень талновтыця ледстнемат сынь чачовтыть ней!

 

Ёвтнян аламошка те артыцядонть. Владимир Иванович Зарубин чачсь 1925 иестэ, ютызе весе Ине Отечественной войнанть. Теде мейле прядсь артыцянь-мультипликаторонь курсат, роботась аниматорокс «Союзмультфильм» киностудиясо. 25 иес Зарубин ялганзо-оянзо марто нолдась 103 мультфильмат, сон артсь эйкакшонь ламо книгат. Сехте пек вечксь артомо почтань открыткат ды конвертт. Эрямонзо перть кедь алдонзо лиссть покш кенярксчитненень алтазь 250 артовкст-каземкат ды 70 конвертт.

Зарубин пек вечксь артомс ракшат, ды те тевесь тензэ ульнесь оймсема лувокс. Сонзэ арасель мелезэ теемс заказт Маень 1-це чинтень ды политикань лия кенярксчитнес. Артомс жо Од иень открыткат сонензэ ульнесь покш мельспарокс. Эрьва артовксонть, васняяк, куватьс арсилизе, зярыяксть полавтнилинзе ракшатнень чачост, тюсост, сценкатнень. Владимир Иванович арсесь, сонзэ мизолдовтыця артовкстнэнь вельде ломантнеяк кармить седе чевте оймекс.

АРТОВКСТНЭ ЭРЗЯНЬ КЕЛЬСЭ

Полавтовсь эрямось ды ней полавтовсть открыткань каземань лувтнеяк. Минь пек аламо карминек кучнеме сёрмат ды артовкст-каземкат почта вельде. Те тенек маряви пек стакакс. Седе шожда сёрмадомс СМСка, кучомс «цецинеть» эли «ламбамо тортке» социальной сеттнень вельде. Ялатеке улить истят ломанть, конатне вечкить каземе открыткат почта вельде, ды те лувонть лемезэ – «посткроссинг». Седе сеедьстэ неть ломантне кучнить открыткат а содавикс ломантнень туртов весе масторлангонть келес ды мейле учить, зярдо тенст истя жо кияк кучи «шумбракстнемань валт». Койсэнь, седе паро кучнемс артовкст-каземкат роднятнень-раськетнень туртов, малавикстнэнь, покштятнень-сырькайтнень туртов. Те сыненст карми алкуксонь кенярксокс, ды, пароль бу, те лувось вельмевель весе масторонть келес, теевель, кода кортыть, «модноекс» эли популярноекс.

Истят жо мельть-арсемат чарыть-велить Саранск ошонь эрицянть Василий Паршуткинэнь превсэяк. Сон аволь ансяк теде арси, бажи топавтомс мелензэ. Василий арсесь кучнемс неень шкань технологиятнень коряс теезь мазый артовкст-каземкат малавиксэнзэ туртов эрзянь кельсэ. Цёранть ундоксонзо Покш Березник ёнксонь Госагыр велестэ, тосо чачсть-кассть тетязо-авазо. Василий чарькодьсы эрзянь келенть, машты кортамояк, ансяк аволь истя, кода бу тензэ эряволь. Меельце шкастонть ламо шка ютавты тиринь келень тонавтнеманть туртов.

«Эрзянь кельсэ сёрмадовкс марто сувенирэнь тейнемань коряс мелесь тень сась умок. Икелев казнинь ялган-оян туртов симема чакшт Пургазонь чачонзо ды Сура леенть мазычинзэ марто. Ней, арсян, роднян-раськень туртов вечкевить тиринь кельсэ открыткатне, – ёвтни Василий Паршуткин. – Монь роботам сюлмавозь дизайнонть, полиграфиянть ды рекламанть марто, секскак арсемс истят открыткат, теемс макетт монь содамочинь улить. Артовкстнэнь лездась теемс Болгариясто вейке художница, сонензэ вечкевить эрзянь мифологиянь персонажтне, ды тейтересь артсь тень колмо ракшат: овтыне, сярдо ды ривезьке. Сынь сехте сеедьстэ вастневить эрзянь ёвкстнэсэ. Открыткатне лиссть мельстуицят, сёрмадынь лангозост «Од иенть марто!» ды ламо казинь эйстэст те Од иестэнть. Ней вана арсян теемс артовкст-каземкат чачома чис, Отечествань ванстыцянь ды Авань читненень. Аволь умок теинь мазый открытка Вечкицянь чинтень, лангсонзо сёрмадозь: «Мон тонь вечктян!». Ули мелем сёрмадомс паро арсемат артомкатнень лангс аволь ансяк эрзянь кельсэ – мокшонь кельсэяк».

Тешкстасынек, Василий весе артовкстнэнь-каземкатнень эрзянь кельсэ тейни эсензэ ярмак лангс. Открыткатне нолдавить пек вадря конёв лангсо ды офсетэнь печатенть вельде, конась седе парсте невти тюсонть. «Бути уш мезеяк ушодат тееме, эряви теемс парсте», – корты Паршуткин.

Монь койсэ, мелесь-арсемась пек паро. Кучомс ды каземс тиринь кельсэ сёрмадовкс марто артовкс малавикс ломантнень, роднятнень-раськетнень, ялгатнень-оятнень туртов – лувось кенярдовтыця. Учан, паряк, шкань ютазь монгак почтань ящикстэ тарган истямо казне лембе тиринь вал марто!

М.ДЕВЯТОВА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...