Рубрикатор

Культура Инна АНДРИЯНОВА: «МОНЬ СЕМИЯМ – МОНЬ СЮПАВЧИМ»
Инна АНДРИЯНОВА: «МОНЬ СЕМИЯМ – МОНЬ СЮПАВЧИМ»

Роман ды Инна Андрияновтнень семияст чачсь 17 иеде теде икеле. Роман Покш Игнатбуе ёнксонь Хухорева велестэ, Инна – Саранскоень од тейтерь. Сакшныль шабра Горки велев покштянзо-сырькаензэ содавтомо, тосо вастовстькак. Вастневсть вейсэ колмо иеть, мейле налксесть свадьба. Васня Андрияновтнень чачсь Кирилл цёрынест, зярыя шкань ютазь – Ангелина тейтерькаст. Сынст вечкемань историяст а пек явови лия истямо жо семиятнень эйстэ. Сынь вейкест-вейкест вечкицят, вейсэ мелявкстнэнь топавтыцят, бажить эрямс неень шканть марто велувсо. Роман важоди индивидуальной предпринимателекс, сон строи кудот, одкстомты квартират. Инна – торговой представитель вейке покш компаниясо. Кирилл цёраст тонавтни республикань Ёроков эйкакштнень туртов лицеень кеменце классо, Ангелина тейтерькаст мелят тусь васенце классос Саранск ошонь 119№ прогимназияв.

 

Роман ды Инна ломантне мобильнойть, сынь а кадныть тевест вандыс, кавонест ветнить машинат. «Минек эряза эрямосонть, арсян, автомобильтеме ковгак, – ёвтни Инна. – Эрятано минь Саранск оштонть веёно, Озерной посёлкасонть. Эйкакштнень валске рана эрявить ускомс ошов тонавтнеме, мейле чокшне ветямс секцияв, ардомс лавкав – монень пек лезды машинась. Сон – ялгинем. Монь роботасояк автомобильтеме ковгак а кенерят. Бажан кенеремс тееме весементь, мезе икелень путынь теемс те чистэнть. Арсян, акенерицятне – ансяк нузякс ломантне».

Инна ланга сёрмадомсто пек ладить истят содавикс валтнэ: «Спортсменка, активистка ды алкуксонь мазыйка». Те валрисьментень эште эряви поладомс: паро ава, ни, кудазорава, паниця-пидиця. Андрияновтнень семияст а весть яксесь «Папа, мама, я» школасо ютавтовиця спортонь мероприятиятнес, мелят прогимназиясонть макссть вейсэ ГТО-нь норматнень. А кодат пулот коды ды причёскат тейни Инна Ангелина тейтерьканзо туртов – дивазеват! Авась свал вешнемасо, сон эрьва чистэ бажи содамс таго-мезе од, мейсэяк дивавтомс семиянзо, малавиксэнзэ. Сонзэ паневкстнэнь-пидевкстнэнь рецепттнэнь сайнить эстест весе шабранзо ды ялганзо-оянзо. Минек газетань ловныцятнень туртовгак Инна ёвтась зярыя куроксто паневиця тантейкань рецептт, ловнодо сындест седе тов.

Андрияновтне, кода уш ёвтынек, эрить Озерной посёлкасонть. Теде икеле сынь нилешка иеть эрясть тетяст-аваст марто. Мейле рамасть пелькудо Полежаевень ульцясонть. Тесэ тенст савсь печтямс покш зыян: шабратне палсть, ды толось кирнявтсь сынст пельксэнтеньгак. Апарось ульнесь покш. Инна вишка эйкакш марто кудосо ськамонзоль ды сонензэ савсь ёртнемс вальмава курмотнень-кармотнень. Шкань ютазь Андрияновтне одов витнизь-петнизь эрямо таркаст, мейле миизь ды ветешка иеде теде икеле састь Озерноев. Семиясь васняяк рамась тосонь эрькенть чирестэ модань участка, мейле ушодсть путомо кудо. Стявтсть эрямонь пизэнть Андрияновтне кавонест. Сынсь тейсть дизайн-макет, строясть кудонть цела ие юткошкасто. Васняяк ламо савсь теемс Романень, зярдо уш кудонть саизь лато алов (теньсэ лездасть роднятне-раськетне), сестэ Иннаненьгак сатотсь. Сон штукатурясь стенат, педявтнесь шпалерт, артсь, лездась мирденстэнь сталмотнень кепсемстэ. Кудось лиссь пек мазыекс ды парокс. Эйсэнзэ кавто этажт. Кодаткак дизайнерт сонзэ теемстэ сынь эзть тердтне. Весемесь теезь эсест мелест, вановтост коряс ды покш вечкема марто.

Мирдть-полат чувность кудонть ваксс пире, строясть теплица, путсть умарьчувтот. Теплицасонть Инна касты куярт ды помидорт. Роман тейсь эсензэ кедьсэ мангал, ды сынь пек вечкить оймсема читнестэ инжетнень марто пидемс мезеяк тантейне. Тешкстама, Андрияновтнень кудост свал панжадо ялгаст-ояст ды родняст-раськест туртов. Истят панжадо ойме, инжень вечкиця-вастыця семият эште эрявить вешнемс!

ТАНТЕЙ ЯРСАМКАТ АЗОРАВАНТЬ ПЕЛЬДЕ

Инна ломанесь – роботыця, тевтеме а аштиця, ялатеке семиянть эряви андомс-симдемс чизэнзэ зярыяксть. «Монсетне пек вечксызь парсте ярсамонть, весе тантей кургинеть, – ёвтни тейтерь-авась. – Оймсема читнестэ, нама, арсян тенст пидемс-панемс мезеяк од ды дивавтыця. Рецепттнэнь сайнян Интернетстэ эли лиясто арсян монсь. Роботасто самодо мейле вечкан пидеме мезеяк куроксто теевиця-паневиця.

Ули истямо свалшкань рецептэм, лемезэ «Сараз ды модамарть тартар соусонть марто». Эрявить саемс саразонь полдынеть ды нилев керсезь ванськавтозь модамарть. Сынст ваднемат соуссо. Соусось тееви истя: саемс велькс, майонез, човамс пейнечурька ды сыра. Каямс меленк коряс специят, порцька, сал. Саразонть ды модамартнень башка путомат пачалгос ды ёвкстамат духовкас. Саразонь полдынетне пиить вейке часонь перть. Модамаресь карми анок 40 минутадо мейле.

Варчинк теемс лавкасто рамазь слоённой чапаксонь прякинетнень. Чапаксонть аламодо кепедстинк лембе таркасо. Керседе эйстэнзэ квадратт. Потмозост путодо пряка топот. Сынст мон тейнян сеньстэ, мезе ули холодильниксэ. Керсян сыра марто колбаса, бути ули топо, тейнян изюм марто. Лиясто умарть керсян ды човорясынь варения марто. Истяяк паро. Духовкасонть прякинетне улить анокт 15 минутадо мейле.

Весе уш, нама, содасызь драникень пидема лувонть. Монь сон истямо. Модамартнень човасынь тёркань пачк, юткозост каян мясорубкань пачк нолдазь чурька, аламошка велькс эли майонез ды вейке ал. Рестасынь драниктнень пси чиньжарамонь ойсэ. Сынь пек тантейть псистэ ды велькс марто. Лангозост почодан копёр.

Ули вейке тортонь рецептэмгак. Монсь арсия. Эряви рамамс крекер вишка печеният. Човорямс вельксэнть сахар ды банан марто блендерсэ. Каямат крекертнэнь юткс, весементь парсте човоряма, мейле вачкама пандынекс ды лангонтень човама шоколад. Мон те тортонть эйсэ тейнян эрьва кодамо

фигурка ладсо. Саемга, февралень 23-це чистэ цёрам туртов теинь танк. Мартонь 8-це чистэ стряпинь эйстэнзэ «8» цифра».

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...