Рубрикатор

Культура ВАСИЛИЙ ЕЛЬМЕЕВЕНЬ ВАЛДО ЛЕМЕНЗЭ ЛЕДСТНЕМГА
ВАСИЛИЙ ЕЛЬМЕЕВЕНЬ ВАЛДО ЛЕМЕНЗЭ ЛЕДСТНЕМГА

Неть читнестэ А.С.Пушкин лемсэ республикань Раськень библиотекасо тешкставсь Россиянь содавикс учёноентень, РСФСР-нь наукань заслуженной деятелентень, РФ-нь высшей профессиональной образованиянь почётонь роботникентень, философиянь ды экономикань наукатнень докторонтень, Санкт-Петербургонь университетэнь профессоронтень, минек ёнкссо чачозентень-касозентень Василий Яковлевич Ельмеевнень 90 иетнень топодемась.

 

Васняяк покш залонтень пуромозтненень невтезель сонензэ алтазь документальной фильма. Мокшонь цёранть эйкакшпингезэ ютась Рузаевка ёнксонь Сузгарье велесэ. Тетязо-авазо, Яков Герасимович ды Дарья Петровна, ульнесть сокицят-видицят. 1945 иестэ Василий Яковлевич «ветес» Саранскоень педагогической училищанть прядомадо мейле поладызе тонавтнеманзо Ленинградонь А.А.Жданов лемсэ государственной университетэнь философиянь факультетсэ. Теде мейле эрямозо ды важодемазо кодгемень ламо иес кеместэ сюлмавсь те вузонть марто. Сон ламо тейсь социальной развитиянь ды управлениянь стакачитнень коряс, обществанть ды ломантнень ютксо сюлмотнень кемекстамга. Социологиянь ды социальной философиянь ёнкстнэсэ сон тейсь исследовательской покш проектт масторонь регионтнэнь ды трудовой коллективтнесэ социальной развитиянь проектированиянь ды планированиянь коряс.

Василий Яковлевичень важодевксэнзэ содавикст аволь ансяк минек масторсо, сонзэ томбалеяк. Ламотнень ледстнематнес сон кадовсь аволь ансяк кода содавикс тонавтыця, учёной, истя жо научной исследованиянь паро организатор. В.Я.Ельмеев анокстась ды нолдась 380 печатной роботат, ютксост 20 монографият: «Наука и производительные силы общества», «Проблемы социального планирования», «Основы экономики и науки», «Воспроизводство общества и человека», «Прикладная социология», «Философские вопросы теоретической социологии» ды ламо лият.

Сон пек парсте содылизе тевензэ, ламот бажасть пельдензэ тонавтнемс. Василий Яковлевич анокстась ды лездась идемс кандидатонь ды докторонь 80 диссертацият. Сонзэ тонавтницятне важодить Россиянь ды омбо масторонь университеттнэсэ, исследовательской центратнесэ.

А стяко В.Я.Ельмеев кочказель Санкт-Петербургонь университетэнь почётной профессорокс, ульнесь наукань ды искусствань Петровской академиянь, Россиянь социальной наукань академиянь, Раськеютконь организационной ды управленческой наукань академиянь действительной членэкс.

Сонзэ паро тевтнень, валдо лементь минек историясонть ванстомадо пуромозтнень икеле кортась МР-нь Культурань, национальной политикань, туризмань ды архивень тевень министрась А.М.Чушкин.

Эрзя-мокшонь раськень Регионъютконь общественной организациянь прявтонтень, Н.П.Огарёв лемсэ Мордовской госуниверситетэнь филологиянь факультетэнь деканонтень, профессоронтень Ю.А.Мишаниннэнь прась уцяска теевемс мартонзо содавиксэкс ды улемс паро оякс.

Ютазь пингень кавксоньгеменце иетнестэ А.А. Жданов лемсэ ЛГУ-нь аспирантурасо тонавтнемстэ Юрий Александрович несь яволявтома, косо тешкстазель В.Я.Ельмеевень профессортнэнь туртов семинаронь ютавтомадо. Эштё се шкане мокшонь од цёранть саизе покш каштанчи минек ёнксонь истямо содавикс ломаненть коряс. Ю.А.Мишанинэнь валонзо коряс, Василий Яковлевич ульнесь минек эрзянь-мокшонь раськеденть ламонь содамо бажицякс, койтнень-кирдатнень ды культуранть ванстыцякс. Учёноесь ламо ловнось ды тонавтнесь эрзя-мокшонь кезэрень мифологиядонть. Сонзэ чарькодемга ды лиятненень теде пачтямга учёноесь пурнась содамочить кезэрень восточной ды индоевропейской кельтнень коряс. Седейшкава тонавтнесь ды ванстсь кудосонзо минек раськень фольклоронть ды кезэрень викшневкстнэнь-кодавкстнэнь. Сон алкукс вечксь эсь раськензэ, зярдояк эзь визде ёвтамс, косто сонзэ ундокстнэ.

Теде башка, сон, ков сатотсть виензэ, пурнась перьканзо минек ёнксонь ломантнень, маштсь лездамо весе тензэ пшкадицятненень. Кода мерсь Ю.А.Мишанин, сон эзь яво ломантнень эрзякс эли мокшокс, весень вечксь седейшкава ды весенень арсесь ансяк паро. Башка мель явсь ёроков од ломантненень, бажась сынст теемс содавиксэкс Ленинградонь се шкань содавикс ломантнень-прявттнэнь марто. Невтемакс, сон ульнесь оякс ине скульпторонть С.Д.Эрьзянь содыцянзо марто ды бажась, штобу седе ламо ломанть чарькодевлизь ды вечкевлизь минек раськень ине ломаненть ды сонзэ кедьсэ теевкстнэнь.

В.Я.Ельмеев аволь ансяк сонсь сеедьстэ сакшнось тиринь ёнксов, истя жо свал мартонзо ускиль инжеть. Сон невтнесь минек республикань пертьпельксэнь мазый таркатнень, музейтнень.

Те вастовомантень сазь Рузаевка ёнксонь эрицятне ёвтнесть пурнавозтненень, кода сон эрьва иестэ сакшнось тетянзо-аванзо кудонть варштамо, тиринь велень эрицятнень марто вастовомо. Сонзэ мельс пек тукшность тиринь кельсэ моротне, аноколь сынст кунсоломо певтеме.

Сузгарьянь неень шкань эрицятне тешкстызь сонзэ домка содамочитнень: раськень оршамопелень эрьва тешкссэнть минек покштятнень-бабатнень эрямодост ёвтнеманть.

Ризксэнтень, 2010 иень июльстэ Василий Яковлевичень эрямозо сезевсь, ней алкуксонь мокшонь цёрась кадовсь ансяк малавиксэнзэ ды ламо сонзэ содыцятнень ледстнематнес.

В.ЮДИНА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...