Рубрикатор

Культура ТИРИНЬ КЕЛЕСЬ ГАЙГСЬ МОКШАН ВЕЛЕСЭ
ТИРИНЬ КЕЛЕСЬ ГАЙГСЬ МОКШАН ВЕЛЕСЭ

КОСО АНСЯК А ЭРИТЬ ЭРЗЯТНЕ ДЫ МОКШОТНЕ! САМАРАНЬ, ОРЕНБУРГОНЬ, УЛЬЯНОВСКОЕНЬ ОБЛАСТЬСЭ, МОСКОВСО, САНКТ-ПЕТЕРБУРГСО, ЕКАТЕРИНБУРГСО... ВАНА ПЕНЗАНЬ ОБЛАСТЬСЭ УЛИ РАЙОН, КОНАНЬ ЛЕМЕЗЭ МОКШАНСКОЙ. ТЕСЭ ЭРИТЬ ЭРЗЯТ, МОКШОТ, РУЗТ, ТАТАРТ. ЦЕЛАНЕК РАЙОНСОНТЬ ЭРИТЬ 27 ТЁЖАТ ЛОМАНТЬ. ЭСЕНЗЭ МОКШАН ВЕЛЕСЭНТЬ – 12 ТЁЖАТ.

 

Тешкстасынек, Мокшанской районось – велень хозяйствань. Тесэ важодицятне кастыть сюро, модамарь. Яксить скал мельга. Нурькинестэ меремс, Мокшанской районось эри вандынь чиде арсезь. Самай тесэ ютавтозель «Этношкола» регионъютконь проектэсь, конань анокстызе Финнэнь-угрань раськень культурань Равчирень куншкакурось.

– Те проектэсь эри уш кеменде ламо иеть, – ёвтни Финнэнь-угрань раськень культурань Равчирень куншкакуронь прявтось Р.И.Акашкина. – Те шканть перть минь ульнинек масторонь ламо оштнесэ. Нучк-пачк ютнинек Равчирень оштнень. Косо ульнинек, эрьва косо эйсэнек вастсть мельспаросо. Минь

республикань томбале эриця эрзятненень ды мокшотненень ёвтнетяно кезэрень койтнеде-кирдатнеде, историядонть. Ды, нама, кельтнеде. Истят вастовоматнесэ минь кандтано эрзянь ды мокшонь ойменть.

… Пензань областень Мокшанской райононь Мокшан велень искусствань эйкакшонь школась. Течи сон пешксе ломанде. Актовой залс пурнавсть школань тонавтницятне, сынст тонавтыцяст, велень эрицятне. Сынст марто вастовомас састь учёнойтне О.И.Налдеева, Т.А.Ломакина, РФ-нь Сёрмадеень вейсэндявксос совицясь Раиса Орлова, студенттнэ Артем Мамаев, Ольга Бышаева.

Мокшан велесэ «Этношколанть» презентациясь ушодовсь ёвтнемастонть, кода эрить эрзятне ды мокшотне Мордовиясо, кода кельтне тонавтневить республикань школатнесэ... Р.И.Акашкина пурнавозтнень теинзе содавиксэкс эрзянь ды мокшонь койтнень-кирдатнень марто. МР-нь Культурань, национальной политикань ды архивень тевень министерстванть пельде ёвтась поздоровт, арсесь кеме шумбрачи, уцяска. Учёнойтне О.И.Налдеева ды Н.А.Скворцова ёвтнесть М.Е.Евсевьев лемсэ ды Н.П.Огарёв лемсэ вузтнэде, кода тесэ эрить ды тонавтнить студенттнэ.

Презентацияс сыцятненень пек мельс тусть Раиса Орлова поэтессанть стихотворениятне. Сынь – вечкемадо, тиринь ёнксто, пертьпельксэнь мазычиде.

– Мон сеедьстэ вастневан сеть эрзятнень ды мокшотнень марто, конат эрить республикань томбале. Неть вастовоматне казить покш кеняркс. Ды, нама, лисить од стихотвореният. «Этношкола» проектэнть эрямонзо перть косо ансяк араселинь! Ульнинек Ульяновскоень, Пензань, Оренбургонь областтнесэ… Тень а стувтови вастовомась, кона ульнесь Самарань областень Тольятти ошсо. Ловнынь зярыя стихотвореният. Те аволь весе. Пурнавозтне эште вешить ловномс. Лембе вастовоманть кисэ ёвтасть покш сюкпря.

Кодамо кенярксчи моровтомо?! Сынь ульнесть. Пурнавозтнень кецявтызь Мордовиянь заслуженной артисткась Татьяна Ломакина, пединститутонь студенттнэ Артем Мамаев, Ольга Бышаева. Сынь морасть эрзянь, мокшонь, рузонь морот. Ды истя парсте! Сынст кунсоловлить ды кунсоловлить.

Мейле инжетне невтсть мастер-класс. Литературань коряс ветясь Раиса Орлова, хореографиянь коряс – Лидия Березина, фольклоронь коряс – Т.А.Ломакина.

Л.Д.Левина тонавтсь эйкакштнень артомо, художникень тевенть вечкеме. Саранск ошонь краеведениянь музеень сотрудникесь Юлия Комарова тонавтсь вишкинетнень «Мокшанка» някань тееме. Кецявты – ламонень тень теемс удалась.

Башка тешкстасынек Л.Д.Левинань мастер-классонть. Сон тонавтсь эйкакштнень, кода рисовамс пертьпельксэнть. Васняяк Людмила Дементьевна пурнынзе краскатнень. Сынст сон аравтнинзе башка таркас. Ансяк теде мейле ушодсь картинань артомо.

– Артыцянь тевесь а шождатнестэ, – ёвтни Л.Д.Левина. – Сон изняви сетненень, кить вечксызь артыцянь тевенть ды кинень Пазось макссь артомс пертьпельксэнть. Нурькинестэ, улемс артыцякс.

Л.Д.Левинань валонзо коряс, сон тонавтсь ламо од ломанть, кить теевсть содавикс артыцякс аволь ансяк Мордовиясо, сонзэ томбалеяк.

Истя уш лиссь, «Этношкола» проектэнть презентациясо Мокшанской райононь администрациянь прявтось Н.Н.Тихомиров арасель, ялатеке Финнэнь-угрань раськень культурань Равчирень куншкакуронь прявтось Р.И.Акашкина Николай Николаевичень казизе «Масторава» книгасо, истя жо паро книгасо казезь Пензань областень Мокшанской райононь администрациянь культурань, физической культурань ды спортонь коряс отделэнь прявтось Ю.С.Бочкарева.

… Мокшан велестэ сыргинек позда чокшне. Ильтясть эйсэнек веленек. Сынь тердсть минек самс эште концерт марто.

Пётр ЗИНОВЬЕВ.

Пензань областень

Мокшан велесь

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...