Рубрикатор

Культура ЯКШАМКОВОНЬ 25-це ЧИСЬ – ТАТЬЯНАНЬ ЧИ!
ЯКШАМКОВОНЬ 25-це ЧИСЬ – ТАТЬЯНАНЬ ЧИ!

Якшамковсто ули истямо чи, конась мазылгавтозь кеняркссо, кодамо-бути тундонь ёжосо. Те – якшамковонь 25-це чись – Татьянань чись, Студентэнь чись. Мекс самай те чистэнть весе Татьянатне тешкстыть лемень чинть? Ванносынек христианской историянть. Якшамковонь 25-це чистэнть (од стиленть коряс) Рузонь Православиянь Церьковась ледстни Татиана Римская майсицянть (мученица).

Татиана чачсь Римень содавикс семиясо. Тетязо колмоксть кочкавкшнось консулокс. Сон ульнесь салавань христианинэкс ды кастсь-трясь тейтерензэ Пазнэнь кемицякс, церьковав яксицякс. Кемгавксово иень топодемадо мейле Татиана эзь лисе мирденень ды вейке храмсо служась Пазонтень, постовась ды молитва марто яксесь сэредицятнень мельга ды лездась нужас понгозтненень. 226-це иестэнть тейтересь кундазель пазонь кемицятнень лангс каявоматнень шкасто. Сонзэ кармавтызь туемс христианстванть эйстэ, ансяк Татиана эзь карма тень тееме ды чинек-венек ознось. Сестэ кармасть чавомо иневанькс тейтеренть, сельмензэяк таргизь.

Ансяк сон покш вий марто цидярдынзе весе чавоматнень-покордамотнень, теке шкастонть ознось эсензэ нарьгицятнень кисэ, штобу панжовлинзе Пазось сынст оймень сельмест. Омбоце чистэнть Татиана лангсо одс кармасть нарьгамо. Теде мейле ёртызь чопода таркас, косо сон ознось веньперть. Ушодовсь од чись, ды Татианань одс ветизь судс. А ёвтави, кода дивазевсть нарьгицятне, сынь эзть кеме сельмезэст: зяро чавоматнеде мейле сон лиссь икелест овсе шумбракс ды седеяк мазыекс. Майсицянть тагояк пек чавизь ды пекстызь чопода таркас. Таго сонензэ састь ангелт ды лецизь. Валске марто тейтеренть ливтизь арена лангс ды нолдасть лангозонзо пек кежей лев. Идем ракшась жо вечкенесь сонзэ ды нолсесь пильгензэ. Теде мейле судьянть кармавтоманзо коряс керязель тейтеренть прязо. Христиантнэ совавтызь Татианань святцас кода Пазнэнь кемемань кисэ маштозекс. Те чистэнть православиянь весе храмтнесэ ютавтовить кенярксчинь службат, ловновить акафистт Иневанькс Татиананень.

Историясонть истя лиссь, якшамковонь 25-це чистэ, Татьянань чистэнть, васоло 1755 иестэнть Елизавета Петровна инязоравась тешкстась Московонь университетэнть панжомадо Указ. Самай се шкастонть саезь Иневанькс Татианась ловови студенттнэнь ванстыцякс, сыненст лездыцякс. Эряви тешкстамс, «Татиана» кезэрень лемесь грекень кельстэ ютавтови кода «устроительница». Официальна Студентэнь чись тешкстави 2005 иестэнть саезь, зярдо тешкстазель «О Дне российского студенчества» Президентэнь Указось.

Истя, якшамковонь 25-це чистэ эсест лемень чист тешкстыть весе Татьянатне. Минек течинь героинятне кандтнить те мазый лементь. Сынь ёвтнить тенек, кода путызь тенст те лементь, кода тешкстыть кенярксчинть, мезе кецявты эрямосост.

 

Татьяна ШИРМАНКИНА:

Минек малавиксэнек-раськенек ютксо арасель вейкеяк Татьяна. Монень те мазый лементь максызе крёснавам. Апак сёпо ёвтаса, мон пек вечкса Татьянань чинть. Видьстэ меремс, аволь весе кирдить мельсэст, зярдо чачома чим, а те покшчиденть содыть весе. Секскак чинь-чоп гайги телефоном: весе ёвтыть поздоровт, лембе мельть-арсемат. Татьянань чись теевсь минек семиянь покшчикс. Ладявозь коенть коряс те чистэнть инжекс сакшныть эйкакшон-нуцькан, сынь кенярдовтыть монь мельстуиця казнесэ, те пек кепеди ёжомарямом.

Монськак целанек бажан топавтомс «Татьяна» лементь смустензэ, кода устроительница, покровительница. Эрямом перть арсян весенень шумбрачи, эрямосо уцяска, важодемасо од изнявкст ды ансяк паро тевть.

Татьяна Ширманкина важоди Мордовия Республикань Культурань, национальной политикань, туризмань ды архивень тевень министерствань межнациональной ды межконфессиональной отношениянь кевкстематнень коряс отделэнь консультантокс. Кода видькстась Татьяна Тимофеевна, важодемась веши ламо вийть ды шка. Сон роботы республикань общественной организациятнень марто, топавты методической, грантонь ды пелькстамонь коряс тевтееманть. Истя жо ламо тевть сави топавтомс 2014-2020 иетнес «Гармонизация межнациональных и межконфессиональных отношений в РМ» государственной программанть эрямос совавтоманзо коряс. Министерствась эрьва иестэ аноксты-ютавты пек ламо эрьва кодат мероприятият. Тедеде, МР-нь Прявтонть В.Д.Волковонь Указонзо коряс, республикасонок васенцеде ютавтови «Шумбрат» раськень фольклоронь кенярксчись.

Татьяна Ширманкина – уцяскав ава. Сонзэ кавто эйкакшонзо ды уш улить нуцькинензэяк. Тейтерезэ, Светлана, важоди Финнэнь-угрань раськетнень культурань Равчирень центрасонть; цёразо, Иван, – «Ватт» фирмасо электромонтёр. Цёрась сон пек ёроков: вечки морамо, якси «Заречье» Культурань кудов, Саранск ошсо вейкеяк покш кенярксчи а ютавтови сонзэ моровтомо. Сон истя жо вечки седямо баянсо ды гармошкасо.

Татьяна Тимофеевнань Матвей нуцьказо яки 2-це классос, аволь умок сон саизе омбоце тарканть стихотворениянь ловномань коряс республикань пелькстамосонть. Вишка Василисанень ансяк ниле ковт.

Татьяна Ширманкина авась пек эряза, ёроков, ве минутаяк истяк а аштеви ве таркасо. Покш мель яви спортонтень, ардтни сокссо, велосипедсэ. Пек вечки морамо. Тешкстызе, шкинемань те сяткинесь сатотсь тензэ аванзо пельде, тонась эрямонзо перть морсесь Пакся Тавлань «Норовава» ансамблясонть. Татьяна Тимофеевна бажи седе сеедьстэ сакшномс тиринь велев, кизна эрьва оймсема читнестэ тосо. Видькстась, велесэ сонзэ ули кизэнь кудынезэ ды банязо. Сон озавтни эмежть ды цецят. Сонськак моли мазый цецине ёнов – ёлганя рунго ды свал мизолдыця, канды кеняркс ды паро ёжо весе малавиксэнзэ туртов.

Татьяна АДУШКИНА:

– Монь лемдимизь Татьянакс покштянь сазоронзо лемсэ. Весе, кить сонзэ содылизь, кортыть, обуцянь коряс мон пек молян ёнонзо: истя жо куроксто муян кель-вал ломантнень марто ды кортангак сонзэ ладсо – састыне, апак капша, видьстэ.

Монь койсэ, эрьва ломанентень эряви содамс эсензэ лемень смустенть ды ангелэнь чинть. Грекень кельстэ «Татьяна» лемесь ютавтови кода «устроительница, учредительница». Монь туртов якшамковонь 25-це чись, васняяк, иневанькс Татиана майсицянть ледстнемась, омбоцекс, Студентэнь чись. Эдь мон тонавтнян Н.П.Огарёв лемсэ МГУ-нь филологиянь факультетсэ, колмоце курссо.

Те кенярксчись пек весёла. Мельспаро марямс те чистэнть поздоровонь лембе валт малавикстнэнь пельде. Те покшчинть минь свал тешкстатано эсенек семиясо, вечкевикс мирдем марто. Коень коряс те чистэнть мон панян торт. Нама, казнетькак кандыть тень. Ансяк сехте покш мельспаро ды мелень витема казить малавиксэнь-вечкевиксэнь гайневтемаст. Нейгак кирдеви мельсэнь, зярдо ульнинь вишкинекс, авам валске рана сыль удома таркам ваксс ды ёвтыль лембе поздоровт Татьянань чинть кувалма. Тетям жо сыргиль мартон школав ды ютамонь перть морыль тень морот, ёвтниль стихотвореният Татьяна ланга.

Татьяна чачсь-кассь Покш Березник ёнксонь Симкинской Лесничества посёлкасонть. Эрясть вирьсэ, косто ниле вайгельпеть ялго якась школанть видьс, тонавтнесь мик колмо школасо. Университетэнть прядомадо мейле эрзянь тейтересь бажи молемс важодеме школав тонавтыцякс. Юткошкасто покш мельсэ ловны, моры факультетэнь ансамблясо.  

Татьяна МОКШАНОВА:

– Татьянакс лемдимим тетям. Зярдо кавтаськеть чачинек, шабратне кармасть лемдемань коряс превть ёвтамо: Руслан ды Людмила, Ромео ды Джульетта, Рево ды Люция... Вейке шабра бабась, конань лемезэль Елена, ансяк пингензэ перть тензэ мерильть Оля, истя арсесь: «Лемдинк Олякс ды Андреекс» (мирдензэ лемезэль Андрей). Тетянок кежензэ ламот савтнизь. Сыргась районов ды велявтсь конёв марто, косо сёрмадозельть: Александр ды Татьяна. Минек кудораськесэ весе вете эйкакштнень туртов лемтнень путнинзе тетям. Минденек седе покштне – Галина, Любовь ды Юрий.

Те покшчись ансяк мельспаро канды: ялган-малавиксэнь пачтить монень байтяк лембе валт. Бути кие мекскак а сюлмави мартон секе чистэнть, мейле гайневтить ды ёвтыть паронь арсемаст. Монсь натой вечкан, зярдо кияк стувты шкастонзо пачтямс покшчинть кувалма валонзо ды седе мейле тень теи – истя кенярксов шкась прок кувалгады, таргави зярыя чис. Студентэкс улемань иетнестэ те кенярксчись, чарькодеви, ульнесь кавтонькирдань кенярксчикс.

Улить Татьяна ялган, кить чачсть якшамковонь 25-це чистэ. Студентэнь шкатнестэ сынст натой колмонькирдань покшчист ульнекшнесь. Арсян тенст шумбрань-паронь чи, покш ды вишкине кеняркст, весе мелест топавтовост!

Те чистэнть свал леди мелезэнь Самара ёнксонь Шенталань поэтэнть Татьяна Игнатьевань валморозо:

 

ТАТЬЯНИН ДЕНЬ

Татьянин день – день юности моей,

Мне в этот день подарки мать дарила,

И мы, до ночи засидевшись с ней,

О самом сокровенном говорили.

 

Рассказывала мама о любви,

А я о принце сказочном мечтала:

Вот он придёт и, руки взяв мои,

Посмотрит на меня, вздохнёт устало

 

И скажет: «Как же я тебя искал,

О, сколько я бродил по белу свету,

Ведь в глубине души я твёрдо знал,

Что ждёт меня единственная где-то.

 

Татьяна, милая моя Татьяна…»

А мать шутила: «До Татьяны погоди,

Тебе пока Татьяной зваться рано,

Всё у тебя, Танюшка, впереди…»

 

Эрси, казнетькак тень казнить те чистэнть. Монськак вечкан казнень тейнеме.

Монь туртов якшамковось – целанек вейке кенярксчи, истя ламо эйсэнзэ покшчитнеде: Од иеть-Роштоваткак, чачома чимгак, малавикс ломанень чачома чисткак, Россиянь Печатень чиськак, лияткак. Татьянань чись вана эйстэст меельцекс сакшны, прок ильти мартон вечкевикс якшамковонть.

Юткошкасто вечкан эйкакшон марто ошонь мазый таркатнева якамо. Вечкан эрзянь палянь викшнеме. Валморонь сёрмадомо вечкан (эно валморотне а учить юткошка, куш зярдо ойметь сыргозтьсызь-сыремтьсызь). Вечкан ялган марто пуромкшномо-вастневкшнеме. Ютксост улить студентткак. Арсян тенст сехте паро ёжот печтнемс, паро сельмс-чамас понгонемс ды овтонь-сярдонь вий!

Татьяна ХОЛОПОВА (ПЫРЕСЕВА):

– Истямо лем кочкась тень Маша покш сазором. Шабрасонок эрясь Таня ялгазо. Тетям-авам эзть содаяк, цёрыне эли тейтерне чачи, сазором лементь уш икелепелев ёвтызе! Татьянань чинть пек вечкса. Нама, аволь эрьвась соды, зярдо чачома чим. Танянь чистэнть ламот ёвтыть лембе валт. Мирдем кази цецят, а стувтнить ёвтамс паро валт театрасо важодемань коряс ялган. Монень мельспаро.

Эряви меремс, Татьяна 13 иень перть важоди Эрзянь ды мокшонь раськень драмань театрасо актрисакс. Сон налкси ламо спектаклясо, кода покштнень, истя жо эйкакштнень туртов. Чачсь Татьяна Орданьбуень Мурза велесэ. Школань прядомадо мейле тонавтнесь Н.П.Огарёв лемсэ МГУ-нь национальной культурань факультетсэ (ней институт). Лиссь мирденень. Кастыть Саша цёрынест, конанень сисем иеть. Юткошкасто Татьяна тевтеме а ашти, яви мель спортонтень: кизна ардтни велосипедсэ, тельня – сокссо, вечки экшелямонть.

«Эрзянь правда» газетань редакциясо важодить колмо Татьянат – прявт редакторонь тевтнень топавтыцясь Горохова Татьяна Петровна, общественно-политической отделэнь корреспондентэсь Аксенова Татьяна ды культурань отделэнь корреспондентэсь Маторкина Татьяна.

Татьяна МАТОРКИНАНЬ туртов те чись кавтонькирдань кенярксчи. Тевесь вана мейсэ, сон чачсь те чистэнть! Малавиксэнзэ лем тензэ кочкасть православной ковкерьксэнть коряс (эряви меремс, васолбабазояк Татьяна). Сеть шкатнестэ Татьянань кенярксчись ульнесь аволь истямо содавиксэкс, ней жо тевесь ашти лиякс. Ламот дивсить, зярдо ёвтыть лембе валт именинатнень марто, сон жо ёвты тенст: течи чачома чизэ. Поздоровонь валтнэ седеяк ламолгадыть.


Те кенярксчинть кувалма ули меленек ёвтамс седейшкавань валт весе Татьянатнень ды студенттнэнь туртов. Кадык Иневанькс Татьянась вансты эйсэнк ды лезды тенк, свал невтьсы эрямосо виде кинть. Кадык эрямосонк лисить дивань тевть, топавтовить весе меленк-арсеманк. Кеме шумбрачи, валдо уцяска, пси вечкема, икелев молема тевть ды весементь сехте вадрянть!



 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...