Рубрикатор

Культура Е.ПУЛОВ: «Бажатано невтемс алкуксонь спектакля»
Е.ПУЛОВ: «Бажатано невтемс алкуксонь спектакля»

Якшамковонь 27-це чинь 11.00 ды 13.00 частнэстэ МР-нь Някань государственной театрасо вишка ваныцятнень туртов невтеви Г.Латышевань ёвксонзо коряс «Каша из топора» од спектаклянь премьерась. Путыцязо – театрань художественной руководителесь, МР-нь культурань заслуженной роботникесь Е.Н.Пулов. Евгений Николаевичень туртов те васенце невтема, конань варчасы путомс сцена лангсо. Валонзо коряс, театрань прявтось Е.Я.Романовский зярыя шкадо икеле максызе те пьесанть. Ды вана ней спектаклясь анок ды учи ваныцянзо.

 

– «Каша из топора» путовксось минек театранть туртов карми лия ёнов а молицякс. Мекс? Сцена лангсо кармить налксеме кавто актёрт ды вейке няка. Финалсонть няканть полавтсы актриса. Истямо лувось сась монь мельс. Е.Я.Романовский эзь моле каршо те од эскельксэнть коряс. Видьстэ ёвтаса, вейсэндямс драматической искусстванть ды някань театрань искусстванть стака. Ламонь арась важодемань опытэст аштемс сцена лангсо ваныцятнень икеле (аволь кода шаршав удало някатнень марто), – ёвтни Е.Н.Пулов.

– Кить налксить рольтнень?

– Матрёна патянть налкси МР-нь заслуженной актрисась Наталья Королева, Солдатонть – Игорь Буянкин, Иринка Урозкенть, кона кадовсь ававтомо ды три эйсэнзэ Матрёна патясь, – Анастасия Жулькевская. Сон – од актриса, сась тенек аволь умок, те карми васенце покш ролезэ. Музыканть сёрмадызе Ирина Рахманова актрисась, художникесь-путыцясь – Наталья Кочнева.

– Евгений Николаевич, мезде те ёвксось?

– Сеске мерян, те ёвксось аволь седе, кода пидесть каша, ярсасть ды аштить-кецнить. Сюжетэнь коряс весемесь лиякс. Ульнесь мелем невтемс эрямонь видечинть. Покш ломантне таго-зярдо истя жо ульнесть вишкинекс, эйкакшокс, ансяк стувтсть теде. Покш ломантнень эйстэ ашти, кода улемс паро, чевте седей ломанекс, кода ванстомс ойменть. Секскак финалось карми аволь драматической. Ваныцясь сонсь чарькодьсы, карми вейке семия эли арась. Кевкстемась кадови панжадо.

Семиянь стакачитне свал улить минек эрямосо. Кода театрань сцена лангсо тонавтомс эйкакштнень кеме семиянь лувонтень? Актёртнэнень сави важодемс, весе ёжомарямотнень невтемс чачост лангсо. Те ёвксось аволь истямо шождыне, кодамокс маряви, кеман, сон токасынзе ваныцятнень оймест. Бажатано невтемс алкуксонь спектакля, сцена лангсо эрямонь видечинть.

– Евгений Николаевич, кода неень шкань эйкакштне вастыть някань путовкстнэнь?

– Эйкакштнень марто а эряви эльнемс-кольнемс ды соланясто кортамс. Бути тон кортат мартост кода покш ломантнень марто, сестэ кунсолыть.

Сынь ваныть: тон невтят эсь ёжомарямот, сэредьксэть, а виздят сельведтнень эйстэ. Зяро лембе тенст максат – зняро максыть тонетькак! Нама, аволь шожда кирдемс эйкакштнень 45 минутань перть. Бути важодят весе седейсэ – тевесь удалы.

Някань театрась невтни путовксонзо аволь ансяк эсенек театрасо, ардтнетяно эйдень кужова, школава ды районтнэва. Начальной классо тонавтницятнень туртов невттяно вейке спектакля, седе покш класстнэнь туртов кочкатано лия. Театрасо эрьва субутасто ды недлячистэ невтнетяно кавтонь-кавтонь спектаклят. Зярдо путовкссонть ули паро музыка, технической ёндо кодамояк муевкс, зярдо някась теезь парсте-мазыйстэ (турвинензэ ды сельминензэ важодить) – сестэ ваныцятне кадовить мельспаросо. Театрась – те покш важодема, конань вейсэ топавтыть зярыя ломанть: режиссёр, кукловод, художник, музыкант ды седе тов.

– Евгений Николаевич, кодамо ёжосо важодтядо някань театрасо раськень драмань театрадонть мейле? Мейсэ явови те важодемась?

– Драмтеатрадонть мейле тесэ важодемась седе мельстуиця, эдь тесэ актёронтень няканть вельде мереви невтемс ламо мезенть. Тонадомс тенень драмадонть мейле стака. Мелезэнь тукшны важодемс актёртнэнь-кукловодтнэнь марто, максан тенст драматической актёронь ёрокчи. Тонавтан а пелемс сценадонть, невтемс эсь прянть, лиякс ёвтаса, «миемс» эсь прянть ваныцянтень. Нама, стака няка вельде невтемс прят ды ёжот. Ширма удало важодемась – те вейке тев, лия тевесь – зярдо сцена лангсо кавто актёрт. А сёпса, покш сценанть кис тошнакалян. Мелят налксинь прявт роль «Гулливер в стране лилипутов» спектаклясонть. Тень кисэ тешкстымизь «Цёрань сехте вадря роль» номинациясонть. Някань театранть ули мезень кисэ шнамс. Тесэ путовить виев спектаклят, актёртнэ тешкставить театрань пелькстамотнесэ. Аволь умок ардтнинек Сыктывкаров Някань театрань раськеютконь фестивалев, косто ускинек кавто дипломт: «Лучший интерактивный спектакль» ды «Лучшая мужская роль» (Иван Чиндяйкин). Те кецявты. Минь важодтяно аволь стяко.

Т.МАТОРКИНА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...