Рубрикатор

Культура Лидия ЦАПЛИНА: «Эрьва лезксэсь кенярдовты»
Лидия ЦАПЛИНА: «Эрьва лезксэсь кенярдовты»

Саранск ошонь округонь Пролетарской ёнксонь Тейтерь-авань советэнь прявтось, «Дом культуры «Луч» муниципальной бюджетэнь учреждениянь методистэсь Лидия Сергеевна Цаплина пингензэ алтызе мокшэрзянь раськень культуранть ды покштятнень-бабатнень койтнень-кирдатнень, тиринь кельтнень ванстомантень. Покш путовксозо минек республикасо тейтерь-авань вейсэндявкстнэнь виевгавтомантень, ков сатыть виензэ, лезды семиятненень.

 

Тешкстасынек, Лидия Сергеевна сонськак чачсь-кассь ламо эйкакшонь триця семиясо, Рузаевка ёнксонь Трускляй велесэ. Шкань ютазь сынст семиясь сась эрямо Рузаевка ошов. Важодемань пингензэ ушодызе 17 иесэ Трускляй велень кавксо иень школасо. Вишкапингстэ содасы целковоенть питнензэ, 1969 иестэ савсь тензэ важодемс Рузаевкань Электровакуумной машиностроениянь заводсо цоколень пурныцякс. Весе юткошканзо алтась Рузаевкасо ютавтовиця эрьва кодамо кенярксов тевтненень.

Лидия Сергеевна свал бажи содамочитнес. Предприятиясо иень перть важодемадо мейле кирдсь экзамент Мордовиянь культурно-просветительской училищасо, конань парсте прядомадо мейле тердизь важодеме, кода сестэ лемдевсь, Республикань профсоюзонь художественной самодеятельностень кудос методистэкс. Кода кортыть, ютынзе те организациясонть служебной малав весе кузтематнень, политмассовой отделэнь инструкторонь тевстэ ушодозь, пачкодсь прявтонь полавтыцякс.

1988 иестэ заочна прядызе тонавтнеманзо Н.П.Огарёв лемсэ МГУ-нь филологиянь факультетсэ «Русский язык и литература» специальностенть коряс.

Масторонть ды республиканть туртов а шожда 1995 иестэнть саезь ушодсь важодеме Саранск ошонь округонь Пролетарской райононь администрациянь культурань отделэнь прявтокс. Малав кеветее иеть весе виензэ, содамочинзэ макссь сенень, штобу Светотехстрой эрямонь районсонть ломантне аволь ансяк парсте важодевельть, истя жо оймсема шкаст ютавтовольть седейшкава. Лидия Сергеевна мукшнось кить-янт кода одтнэнь, истя сыретнень седейтнес. Сон пурнась перьканзо истят ломанть, кинень а ялатеке мезе тееви шабрань, кудонь, ульцянь, ёнксонь эрицятнень семиясо.

Машты кенярдомо лиятнень изнявкстнэнень, венстеме кедь кажос понгозтненень. Ков сатыть виензэ, лезды, мартонзо терди ялганзо, малавиксэнзэ. Лидия Сергеевнань валонзо коряс, ансяк вейсэнь вийтнень вейсэндязь, вейке-вейкенень лездазь изнявить стакачитне. Сеть семиятнесэ, косо тетятне-аватне кодамо-бути тувталонь коряс а явить сатышка мель эйкакштненень эли жо кирдить стакачить шумбрачинь коряс, сыненсткак бажи венстямс кедь Пролетарской ёнксонь Тейтерь-авань советэнь прявтось. Ледстясынек, те общественной тевенть Л.С.Цаплина вети 2000 иестэ саезь. Зяро эрьва кодат лезэв ды паро вастовомат ютавтозельть малав комсь иень перть! Невтемакс, аволь васенце ие уш вейсэ МР-со Российской седеймарямонь ды шумбрачинь фондонь прявтонть Л.В.Никонова марто «Мордовский республиканский клинический перинатальный центр» МР-нь ГБУЗ-нть юрсо нолдасть тевс проект, конань коряс максыть лезкс пек одсто чачтыцятненень.

Истят семиятненень эряви эрьва ёндонь лезкс. Васняяк, аватненень лездыть кемемс эсь вийтнес, невтить тенст, те кажосонть сынь аволь ськамост. Ёжомарямост витемга, ютавтнить мельстуиця концертт, вейсэ анокстыть кенярксчитнес, максыть тенст эрьва кодат превспутомат. Сынськак аватне кедест а нолдыть, эрить ояксчисэ. Сеть, кинь эйкакшост уш покшт, лиятнень вишкинест туртов кодыть эрьва кодат лембе оршамопельть.

Лидия Сергеевна седейшкавань сюкпрянь валт ёвты медицинань наукань докторонтень, профессоронтень, МР-нь заслуженной врачонтень, Перинатальной центрань прявтонтень А.В.Герасименконень ды сонзэ полавтыцянтень Л.В.Ледяйкинанень, кить лездыть тенст неть паро тевтнень топавтомасо.

Истя жо свал анокт вейсэ важодеме МР-нь культурань заслуженной роботникесь, «Литова» эрзянь авань вейсэндявксонь ды «Ламзурь» фольклоронь-этнографиянь ансамблянь прявтось Р.Б.Щанкина, Пролетарской райононь администрациянь Аволь совершеннолетнейтнень тевест ды сынст праваст ванстоманть коряс содействиянь комиссиянь прявтось Н.В.Максимова, Саранск ошонь округонь Советэнь депутатось, 25№ школань прявтось О.В.Падерова, Мордовия Республикань 2№ поликлиникань врачось Г.С.Куприянова, «Электровыпрямитель» ОАО-нь Тейтерь-авань советэнь прявтось Н.Н.Сураева ды пек ламо лиятнеяк.

Лидия Сергеевнань бажамонзо вельде кодат тевть ансяк эзть ютавтовкшно, зярдо сон ульнесь Пролетарской райононь администрациянь культурань отделэнь прявтокс. Малав весе сынь поладовить нейгак. Сынст ютксо: Ине Отечественной войнань ушодовомань нусманя датантень, Ине Изнямонь чинтень алтазь мероприятиятне, ветерантнэнь кудо икеле «Ветеранский дворик» акциятне, Авань кенярксчитненень чокшнетнень ютавтомась, Семиянь, вечкемань ды кемемань чистэнть вейс пурнавкшномась, эрзянь содавикс народной писателентень К.Г.Абрамовнень, МР-нь народной, заслуженной писателентень, поэтэнтень, прозаикентень, МР-нь Писателень вейсэндявксонь правлениянь прявтонтень А.М.Дорониннэнь ды эрзянь содавикс поэтессантень ды публицистэнтень Р.С.Кемайкинанень (Маризь Кемальнень) алтазь покшчитне, Пролетарской райононь предприятиятнесэ важодицятнень чествовамост ды истя седе тов.

Иестэ иес ламолгадыть Пролетарской райононь эрицятне, кить участвовакшныть «Ведявань налксемат» ды «Роштовань кудо» мероприятиятнесэ.

Лидия Сергеевнань ушодксонзо коряс вейсэ Н.В.Максимова марто пурназель «Я и Общество» клубось, ков совасть сеть, кинень эште эзть топоде 18 иеть, ды истят эйкакштнень трицятне-кастыцятне. Содазь, самай те шкастонть кемекстави од ломаненть обуцязо, сон тонавтови культурань сюпавчитнень вечкеме, патриотической ды нравственной лувонть чарькодеме. Сынст ютксо – эрямонь шумбра лувонть тевс нолдамось, апаро тевтнеде (симемадо, таргамодо) ванстомась.

Профилактикань неть мероприятиятне ютавтовить мультимедийной уроктнень, «кругловой столень», конференциянь лувсо, интересной ломань марто вастовоматнень вельде.

«Деловая женщина» клубось вейсэнди ламос бажиця тейтерь-ават-прявтт, кить, эсь тевест парсте топавтомадо башка, истя жо муить шка общественной роботань ветямс ды кинень течи а шожда – лездамс. Меельце вастовомась, конась ютавтозель 2018 иенть ушодовомсто, лемдезель «Кевкстема депутатонтень». Сындест ульнесть ламо, максовсть те клубонтень совицянтень – Саранск ошонь округонь Советэнь депутатонтень О.В.Падерованень.

Вана истямо оймамонь а содыця, весенень кенярксонь ды паро ёжомарямонь казиця тейтерь-авась Лидия Сергеевна Цаплина. А стяко сонензэ максозь ламо казнеть, конатнень ютксо «Заслуженный работник культуры Республики Мордовия» почётонь лемесь, Россиянь Тейтерь-авань вейсэндявксонь почётной медалесь ды Почётонь грамотась. Текенень поладсынек, сон кавто тейтерень ава ды вете нуцькань баба. Кемеви, сатыть виензэ эштё теемс пек ламо тиринь райононть, республиканть ды масторонть лезэс. 

В.ЮДИНА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...