Рубрикатор

Культура «Вечкан эрямонть весе седейсэ...»
«Вечкан эрямонть весе седейсэ...»

 
Неть валтнэнь сёрмадынзе эсь стихотворениясонзо 80-це иетнестэ Н.П.Огарёв лемсэ Мордовской госуниверситетэнь филологиянь факультетсэ тонавтнемстэ Валентина Захватова (ней Богатырская). Тешкстасынек, сонзэ васень стихотворениянзо печатазельть «Эрзянь правда» тиринь газетасонть. 
Нама, сестэ валдо чачо, сэнь сельме мазыйка ды ёроков од тейтересь эзь арсе, те меленть карми кирдеме превсэ ды седейсэ эрямонь перть. Аволь ансяк эрзянь отделениясонть, весе курссонть Валентина васняяк явовсь видечинь вечкемасо, видьстэ сельмс мелензэ-арсеманзо ёвтамосо, эрямосонть ламо паро тевс бажамосо. Ледстневи, минь, ялгатне, вемельсэ сонзэ кочкакшнынек группань комсоргокс, филологиянь факультетсэ сон ульнесь наукань коряс секторонь прявтокс. Сеть шкатнестэ студентэнь стройотрядсо васня ульнесь комиссарокс, мейле пурнызь командирэкс. Кодашка покш мельспарозоль, зярдо Валентина Захватова совась стройотрядонь сехте паро командиртнэнь юткс, кинь казекшнизь Финляндияв молемань путёвкасо.

 


ВЕСЕМЕСЬ 
УШОДОВСЬ СЕМИЯСО 

Алексей Николаевич ды Татьяна Михайловна Захватовтне, Чаунза ёнксонь Покш Маризь велень эрицятне, ютасть а шожда, теке шкасто сюпав, эрьва кодамо ледстневиця тевсэ эрямо. Пингень прявт тевекс мирдесь ды нись аравтсть колмо эйкакшост шумбрасто кастоманть, алкуксонь ломанекс сынст ливтеманть. Ды те тенст удалась! Валентина семиясост ульнесь веженсь эйкакшокс, вишка пингстэ саезь вечксь школынесэ налксеме, касозь, уш содась – сон карми улеме тонавтыцякс. Паро, зярдо эйкакш пингень арсемась топавтови ды ломанесь эрямонь перть седейшкава карми тееме сень, мезесь канды тензэ покш кеняркс. Валентина Алексеевна истямо ломантнень ютксто. Алкукскак, тевень парсте топавтомань, стакачиде а пелемань обуцясь, кода содатано, кемекстави эйкакшпингстэ. Эште школасо тонавтнемстэ Валентина Захватова (Богатырская) аволь ансяк общественной роботань ветямосо явовсь ялгатнеде, истя жо савсь тензэ ламо лездамс тетянзо-аванзо туртов кудоютконь тевтнень топавтомасо. Теде башка, юткошкасто сон ялганзо марто важодсь питомниксэ, якасть тосо касовкстнэнь мельга, а лововияк, зяро эрьва кодамо чувтот кастовсть сынст важодемаст вельде, конат кандыть лезэ минек пертьпельксэнтень те шкас. 

ЭРЬВА ТЕВЕНТЕНЬ КУНДЫ ЭРЯЗАСТО 

Неть валтнэ истя жо пек ладить Валентина Алексеевнанень. Косо бу аволь саво тензэ важодемс, нурька шкас сон невтилизе, мезе сонзэ вийсэ топавтовикс. Прявттнэ сеске редилизь сонзэ ламонь тееме бажамонзо ды макссть тензэ келей ки. Невтемакс, важодемань пингензэ ушодызе 1985 иестэ Ицял ёнксонь Лесокомбинатонь кавксо иень школасо рузонь келень ды литературань тонавтыцякс. Валентина Алексеевна васенце жо иестэнть невтизе прянзо аволь ансяк кода тевензэ вечкиця паро тонавтыцякс, истя жо весе одонть ды лезэвенть тевс нолдыцякс. Малав эрьва уроконтень совавтсь од ёнкст, маштсь эйкакштнень седейсэ кирвазтемс ламонь содамонтень бажамонь толнэнть. 

Иень ютазь сонзэ тердизь комсомолсо важодеме, ладизь Ицялонь ВЛКСМ-нь райононь комитетс секретарекс, тонавтниця од ломантнень ды пионерэнь отделэнь прявтокс. Колмо иень перть те ответственной тевсэнть важодемстэ зяро паро ушодкст теезельть од ломантнень марто, конатнень сон поладынзе «Дом пионеров» организациясонть прявтокс улемстэ. 

Кода уш вере пачтинек, Валентина Алексеевнанень савсь важодемс ламо таркасо: школасо, комсомолсо, седе тов Ицялонь педагогической училищасо, Кемлянь аграрной колледжсэ, ней Н.П.Огарёв лемсэ Национальной исследовательской Мордовской государственной университетэнь вуздо икеле анокстамонь ды средней профессиональной образованиянь факультетсэ, эрьва ков сон васня сась рядовой тонавтыцякс. Аламо шкань ютазь, ёрокчинзэ редязь, кастсть эйсэнзэ служебной кузтемаванть, эрьва косо ульнесь прявтонь полавтыцякс. Вана нейгак, университетсэ важодемстэ, Валентина Алексеевна пелькстамонть (конкурсонь отборонть) ютамодо мейле полады деканонь полавтыцянь тевенть. 

ВЕСЕ 
СОДАМОЧИТНЕНЬ – ТОНАВТНИЦЯТНЕНЕНЬ 

Валентина Алексеевна Богатырская эрямостонзо ламо шка яви содамочинзэ кастомантень. Те аволь ансяк ламо эрьва кодамо литературань ловномась, истя жо сонськак аноксты публикацият раськеютконь научно-образовательной журналтнэс, совась тонавтнемань-методической книгань сёрмадыцятнень юткс. Вейсэ педагогической наукань докторонть, профессоронть, Н.П.Огарёв лемсэ Национальной исследовательской Мордовской госуниверситетэнь довузовской подготовкань ды средней профессиональной образованиянь факультетэнь деканонть М.И.Ломшинэнь марто нолдасть тонавтнемань зярыя научно-методической пособият. 

2016 иестэ В.А.Богатырская Н.П.Огарёв лемсэ МГУ-нть пельде ульнесь «Деловой приём учителей – 2016» общероссийской мероприятиясонть, конань ютавтызь Образованиянь виевгавтомань Раськеютконь Академиясь, Московонь Предпринимателень Ассоциациясь, Тонавтыцянь раськеютконь слётонь оргкомитетэсь. 
Ламо казнетнень ютксо В.А.Богатырскаянь туртов питнеекс марявить «Учитель года Республики Мордовия – 2000» республикань пелькстамосонть изнямось, МР-нь Образованиянь министерствань Почётонь грамотасо каземась. Сонензэ максозь тонавтыцянь высшей категориясь. Эдь неть казнетне кортыть аволь ансяк тонавтницятненень домка содамочинь максомадо, истя жо ялгатнень ютксто профессиянь коряс сехте парокс улемадо. Виде, образованиянь сферасо колоньгеменде ламо иень перть парсте важодеманть кисэ сон аволь весть лиснесь изницякс ламо эрьва кодамо пелькстамотнесэ. А стяко казезь РФ-нь Образованиянь ды наукань министерствань Почетонь грамотасо, «Куратор глазами студентов» довузовской факультетэнь грамотасо, косо истя жо лиссь васенце таркас. 

В.А.Богатырская – уцяскав тейтерь-ава. Сонзэ каштанчизэ – Станислав цёразо, кие эсь шкасто прядызе Саранскоень кооперативной институтонь «Финансы и кредит» факультетэнть ды ней важоди специальностень коряс предпринимателень а шожда тевсэнть. 
Неть читнестэ В.А.Богатырская тешкстызе юбилеензэ ды сонзэ лемс ёвтавсть ламо паронь арсемат, конатненень вейсэндявтано миньгак, «Эрзянь правда» газетань коллективесь. 
Валентина Алексеевна! Кадык эрямось кази Тыненк кеме шумбрачи, уцяска, важодемасо од изнявкст ды весе арсезенть топавтома! 

В.ЮДИНА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...