Рубрикатор

Культура Свал бажи лездамс лиянень
Свал бажи лездамс лиянень

Улить ютксонок ломанть, конат дивавтыть эсь маштомачисэст. Пазось казинзе сынст эрьва кодамо ёрокчисэ. Саемга, течинь инженек – Юлия Демяшкина. Сон сёрмады стихть, машты стамо, сёрмады проектт, важоди эйкакштнень марто. Ды кона шкане кенери весементь топавтомо? Аволь сэрей, чова рунго, мазый, теке няка. Эйкакшонь лагерьсэ улемстэ а сеске чарькодят, Юля – сынст вожатоест, маряви, истямо жо эйкакш, кона сась оймсеме. Эйдетне эйсэнзэ кунсолыть ды вечкить.

Чачсь Юля Демяшкина Дубёнка буень Кобалесэ. Сырнень медаль марто прядызе школанзо. Сась тонавтнеме М.Е.Евсевьев лемсэ МГПИ-нь омбо масторонь келень факультетэв. Ней тонавтни 4-це курссо. Специальностезэ – «Немецень ды англань келень тонавтыця».

 

Юля, стака ульнесь велень школадо мейле тонавтнемс омбо масторонь келень факультетсэ?

– Тесэ минек марто кармасть важодеме истямо лувсо: васня седе домкасто ютынек весе школань программанть, мейле карминек тонавтнеме вузонь программанть. Стакачись мейсэль? Арасель кортамонь практика. Тесэ ламо явтано мель омбо масторонь кельсэ кортамонтень. Студентэнь аволь покш практиканок ютась ошонь 40№ школасо. Тосо ульнинек тонавтыцянь лездыцякс, ваннынек тетрадть, ветинек классонь част, ванынек классонть мельга. Монень макснесть 9-це класс. Практиканок эштёяк карми.

Юля, ёвтнек лагерьсэ эйкакштнень марто важодемадо.

– Мон улян минек вузонь «АХЕ» педагогической отрядсо. Истя, важодинь вожатоекс Сивиньсэ «Живи, родной язык!» этнокультурной лагерьсэ. Тосо монсь нилексть оймсинь кода эйкакш, секскак содылия кода-мезе. Ютазь кизна ардтнинек Москов ало «Объединённое королевство» лингвистической лагерев. Ветинек англань келень урокт ды мастер-класст. Лингвистической лагерьсэ лия структурась ды важодемась. Монень пек тусь мельс, эйкакштне активнойть, ульнесь покш программа, конань эрявсь топавтомс. Налксинек мартост, тонавтнинек. Эйдетне васня сёрмадсть тестт, мейле явозельть 16 курова. Вейке ковонь перть мон важодинь сехте вишкинетнень марто.

Кода содатано, тонь проектэсь изнясь форумсо. Кодамо проект анокстыть ды косо ютась форумось?

– «iВолга-2017» Равчирень федеральной округонь од ломанень форумось ютась Самара ёнкссо. Тосо невтинь «Счастливый день» проект. Сон алтави эйкакштненень, конат сэредить ДЦП-сэ. Сон карми топавтовомо Кириллэнь ды Мефодиень церьковасо. Панжовить колмо площадкат: арт-терапия, артомань ды сёвоньстэ, пластилинстэ ичемань. Ней кочкатано психологиянь ды дефектологиянь факультетстэ волонтёрт. Мельспаро, улить ютксонок ломанть, конат весе седейсэ бажить лездамс эйкакштненень.

Проектэсь «Добровольчество» направлениясо сайсь колмоце тарка. «Фонд содействия развитию институтов гражданского общества в  ПФО» вейсэндявксось максы ярмакт. Сёрмадомс проектэнть аволь шожда. Эрявсь теемс весе сметанть, весементь, мезе эряви проектэнтень: календарной план, эрьва кодамо мероприятият, конат топавтовить проектэнть лувсо. Сюкпря ёвтан О.В.Зеткинанень, кона лездась тень проектэнть сёрмадомсто. Проектэнть топавтсынек мартсто-июньстэ. Эрявить 30 лездыцят-волонтёрт.

Эряви меремс, Юлия Демяшкина сови Мордовиянь Православной од ломанень союзс, косо сон волонтёр-активист. Те истямо вейсэндявкс, кона пурны православной од ломантнень.

– Минь анокстатано просветительской ды культурной кенярксчить, вастовомат. Аволь умок ютавтынек «Пересвет» православной од ломанень регионъютконь форум. Тозо сакшность од ломанть ПФО-нь эрьва кодамо регионсто. Топавттано эрьва кодамо социальной программат. Ламо мероприятият эйкакштнень туртов, кинь арасть тетяст-аваст. Ули «Доброделание» клуб. Андыть кудовтомо ломантнень. Ули «Школа православного волонтёра», церьковасо богослужениясо минь важодтяно волонтёрокс. «Социальной проектированиянь школасонть» сёрмадтано социальной проект. Понгинь тов кавто иеде икеле. Зярдо сынь тонавтнеме, ульнесь мелем муемс оймень коряс малавикс ломанть. Бажинь лездамс лиятненень. Минь сеедьстэ ардтнетяно лия ёнксов форумов: Башкирияв, Удмуртияв, Димитровградов, Пензав, Тверь ды Москов ёнксов. Минек  Саранскоесь – те ПФО-со православной од ломантнень марто важодемань коряс координационной центра. Тесэ ютыть сехте покш мероприятиятне.

Юлиянь эштё вейке вечкевикс, оймень коряс тевезэ – стамось. Школавгак эзь яксе, ветешка иесэ уш налксесь салмукстнэнь-суретнень марто. Аволь налксесь, стась оршамот няканзо туртов. Авазо Нина Васильевна важоди школасо технологиянь тонавтыцякс. Сон вишка шкасто ламо мезес тонавтызе тейтерензэ: кодамо, викшнеме, стамо.

Юля аволь весть изнякшнось технологиянь коряс райононь, республикань олимпиадасо. 11-це классо тонавтнемстэ ардтнесь Санкт-Петербургов, косо недлянь перть мольсь технологиянь коряс школань тонавтницятнень весероссиянь олимпиада. Тосо ульнесь тестирования, проектэнь идема, моделирования.

Саранскойсэ од тейтересь прядсь промышленной технологиянь ды услугань сферань техникум. Тосо кавто иень перть тонавтнесь портноекс-закройщицакс.

Юля, кода кенерить тонавтнеме кавто таркава?

Кой-зярдо савкшнось аштемс техникумсо позда чокшнес. Кудов сайнинь заданият. Тонавтнинь чить пединститутсо ды техникумсо. Зярдо карминь тонавтнеме техникумсо, ютась  «World Skills Russia» конкурс. Макссть тенек материал. Тосо од ды паро оборудованиясь. Манекен лангс стынек паля ды пиджак. Конкурсось ютась кавто чить валскестэ саезь чокшнес.

Ды тесэяк Юлия Демяшкина прянзо невтизе паро ёндо. «Технология моды» номинациясонть техникумсо саизе васенце тарканть, республикасо – омбоце. Дипломной важодемазо ульнесь эрзянь стилизованной паля, тейсь викшневкст ды пряс путома. Юлянь кудосояк, нама, ули стамонь машинказо. Юткошкасто сты эстензэ оршамопельть. Аванзо ды бабанзо туртов – юбкат, халатт. Ялгатне пшкалить тензэ оршамопелень витнемстэ-стамсто. Тейтересь тейни шкатулкат, някат, конатнень паро мельсэ казни малавиксэнзэ туртов. Лангозонзо ванозь, Катя сазорказояк кармась явомо мель стамонтень. Зярс сонензэ ансяк кавксо иеть, сты няканень оршамот, мазыйстэ лиснить кедензэ алдо конёвонь теевкстнэ.

Кода а ёвтамс Юлиянь эштё вейке ёрокчидензэ? Те – стихень сёрмадомась. Сон ушодсь сынст сёрмадомо васня рузонь кельсэ. Мейле, 4-це классо тонавтнемстэ – эрзякс. Валонзо коряс, эрзякс кортамо тонадсь школасо, кудосо кортасть рузкс. Стихензэ нейгак лиснить «Чилисема», «Сятко» журналтнэсэ, вейсэнь пусмосо. Варштынк, кодат мазыйть сонзэ стихензэ.

* * *

Пазось свал эри минек седейсэ,

Эри оймесэ, эри превтнесэ,

Эри кемемань чевте вановтсо,

Эри палыця валдо штатолсо.

 

Пазось ваны састыне мельганок,

Пазось эрьвантень лездамо анок,

Ветни минек китнева-янтнэва —

Стакачитнева ды кеняркстнэва.

 

Сон кази од мельть ды од

                     арсемат,

Мелявтомат ды сэпей янксемат,

Кучи тенек эрявикс ломантнень, 

Мейле пельдест – кулятнень,

             сёрматнень… 

 

Эрьва ломаньсэ эри Пазонок, 
Моли мельганок, моли каршонок,

Эрьва вановтсо, эрьва эскелькссэ,

Эрьва вайгельсэ, эрьва зэхельсэ.

 

Ансяк ваномс эряви седейсэ, 
Неемс эрямонть оймень

            сельмтнесэ,

Нолдамс сень, кинь Пазось

             теть кучизе,

Лездамс сенень, кинь зыян муизе.

 

Те кись стака, ды эрьвань эсензэ –

Молемс Пазонтень вишка

            эскелькссэ…

Ды мон састо сюконян Пазонтень — 

Сон ветимим валдо эрямонтень.

 

Юля варчинзе виензэ немецень кельстэ ютавтомасо. Истя, ютавтсь эрзякс кавто стихть Маттиас Клаудиус немецень поэтэнть.

Паро тевензэ кисэ Юлия аволь весть тешкстазель: РФ-нь Образованиянь ды наукань министерстванть пельде грантсо, лиссь ёроков од ломантнень премиянь лауреатокс. Студентэнь Раськеютконь чистэ казезель МР-нь Прявтонть пельде Благодарностьсэ. Ды минь кемтяно, те ансяк ушодкс. Эрзянь тейтересь аволь весть кецявтсамизь минек.

Т.Маторкина

 

 

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...