Рубрикатор

Культура Од иень троллейбусось кази кеняркс
Од иень троллейбусось кази кеняркс

Аволь умок Саранск ошонь Администрациясь яволявтокшнось сехте мазый Од иень троллейбусонь ды автобусонь пелькстамо. Троллейбустнэнь -автобустнэнь ветицятне ды кондуктортнэ весе вийсэст мазылгавтсть салонтнэнь, ды ютазь недлястонть ёвтазельть изницятне. Нама, сынь кочказельть а стяко, тевень кисэ. Ансяк Саранскоень Химмашсто Юго-Западов ардтниця пассажиртнэнь ули эсест изницяст­­ – те 1116 № TROLZA троллейбусось, конась роботы 15 маршрутканть.

Те троллейбусось аволь одтнэстэ, сон ардтни ошонь китнева уш ламо иеть. Од иеденть икеле мазылгавтовкшны эрьва кодамо налкшкесэ, цитнезеви эрьва кодамо тюссо ды тееви теке ёвксонь персонажокс – сюро марто сярдынекс. Алкукскак, сюронзояк улить ды сон а соды оймсема валскестэ саезь позда чокшнес. Улить «сярдыненть» эсензэ азоронзояк – Якшаматясь ды Ловняськесь, лиякс меремс, ветицясь ды кондукторось. Галина Вениаминовна Сапожникова кондукторось ды Виталий Николаевич Чугунов водителесь вейсэ важодить сисем иеть ды, кода кортыть, эрить оймеде оймес. Виталий Николаевич весемезэ роботы «Горэлектротранссо» кавксо иеть. Эйстэст сисем иетнень сон ардтни 15 маршрутканть. Те троллейбусось важоди ансяк роботамо читнестэ, мейле оймси кавто чить ды таго трудямо. Сыречинзэ кувалма, видькстатано, яла каладыяк. Ансяк депонь механиктне куроксто витнесызь.

Троллейбусонть, сонзэ ветицянть ды кондукторонть важодема валскесь ушодови 5 чассто ды прядови чокшнень 11 чассто. Тенст максови колмошка част оймсема шка, сестэ, зярдо ошонть келес пассажиртнэде седе аламо. Галина Вениаминовна свал бажи ломантнень совамодо икеле шлямс-нардамс салононть, пек а вечки рудазов киякст. Цела чи маршрутсо сон кенери аволь ансяк билетэнь миеме, истя жо троллейбусонть ванськавтомояк. Химмашсо меельце лотксема таркасонть ломантне весе лисить, ды кольцянть икеле оймсемстэ кондукторось колмо минутас тенсесы ды ёрвалдсы потмонть. Галина Сапожникова – аволь ансяк ваньксчинь вечкиця ломань, сон мизолдыця, кортыця ды сонзэ шожда обуцянзо свал неян мартонзо ардомсто. Кода корты Галина Вениаминовна, пассажиртнэ эрьва кодат эрсить, кие валске рана а удови, кинь кудосо-роботасо кодаткак мелявкст, ансяк зярдо мартост кортат-теят паро ладсо, мизолдозь, сестэ сыньгак бажить кежей обуцяст кекшемс ды кельме седеесткак солы. Кондукторонтень сави улемс лиясто психологокс, лиясто медикекс, лиясто экскурсоводокс. Сапожникова «Горэлектротрансос» самодо икеле ламо иеть важодсь ламповой заводсо, тосояк ды тесэяк, кода ёвтни Галина Вениаминовна, эряви васняяк вечкемс ломантнень, те обуцявтомонть ковгак. Нать, те ёнксось сась тензэ тетянзо Вениамин Тюринэнь пельде, конась роботась икелень «Советская Мордовия» газетасонть фотографокс.

Од иеденть икеле, декабрянть ушодовомсто, Галина Вениаминовна ды Виталий Николаевич зярыя иень перть уш наряжакшныть троллейбусонть. Налкшкетнень, гирляндатнень, мишуранть сынь рамсить эсест ярмакто. Эйстэст пурнавсь цела коллекция. Пек мазый троллейбусось, чокшне ланга ды читькак эйзэнзэ совазь, канды кеняркс ды паролгавты ёжомарямо. Виталий Чугунов корты, сынь мазылгавтыть троллейбусонть аволь изнявксонь кисэ – пассажиртнэнь туртов, кадык кенярдыть ды арсить, ардыть теке «ёвксонь сярдынесэ». Ломантне сеедьстэ ёвтнить сюкпря те мазычинть кисэ, те – кондукторонть ды ветицянть туртов алкуксонь покш казне.

Сыця иестэнть 15 маршрутонь 1116№ троллейбусось, графикень коряс, карми роботамо Од иень васенце чистэ. Кода ёвтни Галина Сапожникова, те уш аволь васенцеде. Лиясто савкшны роботамс декабрянь 31-це чистэ пелевес ды вастомс Од иенть дежуркасо. Январень 1-це чистэ, кода невти эрямось, пассажиртнэде валске рана пек аламо, бути 6-7 чассто кияк арды инжестэ. Троллейбусось малав обедс ардтни чавосто, мейле карми пештявомо мизолдыця, пижниця-сеериця пассажиртнэде. Галина Вениаминовна арси Од иестэнть наряжамс прянзо мишурасо, ветицясь, келя, паряк, орши прязонзо Якшаматянь шапка. Истя сынь кармить кепедстеме ды седеяк кастомо эсест ды ардыцятнень Од иень ёжомарямонть.

М.Девятова

 

 

Новости

20 лучших водных ревизоров Мордовии продолжат свою работу в Артеке
Сегодня в Саранске прошло заседание регионального штаба Всероссийской
экологической акции «Вода и здоровье». Там были названы имена 20 лучших
водных ревизоров республики, которые станут участниками федерального этапа
акции «Вода и здоровье»
Подробнее ...
 
Директор спортивной школы попросил депутата ГД Александра Воробьева помочь мордовской биатлонистке
 9 июня депутат Госдумы РФ, член Комитета Госдумы по
аграрным вопросам Александр Воробьев встретился с жителями
Мордовии на личном приеме. Люди обращались по разным вопросам
– в сфере ЖКХ, обеспечения лекарствами, помощи в получении жилья
и другим.
Подробнее ...
 
Молодогвардейцы - победители «Школы парламентаризма«посетили высшие законодательные органы страны
Первым пунктом экскурсии для ребят из Мордовии стал Совет Федерации Федерального
Собрания Российской Федерации, внутренний интерьер и дизайн которого поразил их своей
красотой и величием. Экскурсовод познакомила ребят с особенностями здания, провела по
главным местам Совета Федерации. Ребятам также удалось побывать в большом зале
заседаний, увидеть своими глазами рабочие места сенаторов и кресло председателя
Валентины Матвиенко. Также молодогвардейцы узнали, как проходит подготовка к
заседанию и собственно
сама
работа
заседаний.
Подробнее ...
 
Путин казизе Мордовиясто семиянть «Родительская слава» орденсэ

Июнень 1-це чистэ, Эйкакшонь ванстомань раськеютконь чистэ, РФ-нь Президентэсь Владимир Путин казинзе ламо эйкакшонь триця семиятнень «Родительская слава» орденсэ. Покш казнесэ тешкстазель Мордовиянь Зубова-Полянань райононь Ширингуши велень Урсовтнень кудораськесь. Покш промксонтень истя жо тердевсть РФ-нь ёнкстнэнь прявттнэ, косто састь семиятне, сынст ютксоль МР-нь Прявтось Владимир Волковгак.

Подробнее ...
 
Эрзянь моротне гайгсть омбо масторсо

Швейцариянь Тоггенбургс пурнавкшность Европасто ды масторлангонь эрьва кодамо масторсто исполнительть. Тосо ютась «Природный голос» раськеютконь вокальной фестиваль. Россиянь вейкине представителекс тосо ульнесь Мордовиянь «Мерема» фольклорной группась, конась эсь морамосонзо токакшнынзе седеест ваныцятнень Финляндиясо ютавтозь теке фестивальсэнть. Ды швейцарецтнэ тердизь Екатерина Модинань прявтсо «Мерема» группанть эстест. Эдь сынст творчестваст пек лади музыкальной форумонь форматонтень. Фестиваленть лиятнень ёнов амолемачись сеньсэ, весе вокалисттнэ – хортнэяк, солисттнэяк, невтить национальной фольклор седямопелень тевс апак нолда.

Подробнее ...