Рубрикатор

Культура Чемпионатонть анокстамга
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Владимир Волков тешкстась, Чемпионатонтень анокстамонь тевтне прядовома лангсот. Неень шкас анокт тренировамонь площадкатне, стадиононть маласо кинь развязкатне, аэропортов кись, одкстомтозь канализациянь, ведень максомань систематне ды теплотрассатне. Прядовома лангсот аэропортонь терминалтнэнь витнемань тевтне. Февралень 14-це чистэ саезь тесэ ушодовить авиарейстнэ.

Мордовиянь Прявтось тешкстась, Чемпионатонтень анокстамось лездась республикантень топавтомс социальной ламо тевть. Одкстомтозь общественной транспортось, медицинань лезксэнь максомань автопаркось, витнезь ошонь зярыя больницят. Неень шкане витневить чугункань кинь вокзалонь комплекстнэ Саранскойсэ ды Рузаевкасо.

Теке марто республикань Прявтось тешкстынзе сеть объекттнэнь, конатнесэ эрявить капшавтомс тевтнень. Неть: футболонь стадионось ды Инсар леень набережноесь. Седе эрязасто строямат «Юбилейной» микрорайонсонть аштиця полициянь отделэнь, поликлиникань зданиятнень, ламо квартирас кудотнень.

Республикань лидерэсь истя жо кортась туризмань инфраструктурадонть ды сувенирэнь продукциянь келейгавтомадонть. Минек республикань эрьва велесь явови лиятнеде кодамо-бути эсь продукциясо ды культурань койсэ-кирдасо.

Владимир Волков тешкстызе, Мордовиянь визитэнь карточкакс улезэ инжетненень паро мелень явомась.

«Кода содатадо, Мордовияв сыть кавксо командат. Эрьвась лиятнень ёнов а молиця ды эсензэ коензэ-кирданзо марто. Эрьва инжентень миненек эряви явомс башка мель. Арсян, весень мельс туить мокшэрзянь ярсамопельтне. Минек сехте покш задачась – теемс эрьвантень кенярксчи: кода Мордовиянь эрицятненень, истя жо инжетнененьгак», – мерсь Мордовиянь Прявтось.

Владимир Волков истя жо яволявтсь, Чемпионатонть шкасто ули мель ютавтомс Саранскойсэ карнавал, эдь Мордовияв сыть Португалиянь, Колумбиянь, Перунь ды Панамань сборнойтне.

«Оргкомитет Россия – 2018» АНО-нь операционной директорось Дмитрий Годунов тешкстызе, анокстамонь ды строямонь тевтнень прядомадо мейле васенце мель карми явовомо Чемпионатонь ютавтомань тевтненень. Башка мель явома болельщикень фестивалентень. Истямо мероприятиянть ютавтомазо пек а шожда. Ламо шка явови сервисэнь, безопасностень ды медицинань обслуживаниянь кевкстематненень. Неть тевтнень кувалма Саранскойденть кармить содамо масторлангонть келес.

Заседаниянь шкасто примазель мель: теемс Мордовия Республикасо оперативной штаб, конась карми ваномо Чемпионатонтень анокстамонь ды ютавтомань тевтнень мельга.

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...