Рубрикатор

Культура Этнической ды региональной СМИ-нь 1-це Медиафорумось
Этнической ды региональной СМИ-нь 1-це Медиафорумось

Сёксень меельце читнестэ, сундерьковонь 26-28-це читнестэ, Московсо ютась этнической ды региональной СМИ-тнень Медиафорум. Те ульнесь васенце форум, кона пурназель  Межэтнической гильдиянть ды Москов ошонь Национальной политикань ды регионъютконь сюлмавксонь департаментэнть вийсэ. Масторонь прявт ошс пуромкшность делегатт малав ниленьгемень регионсто:  Кавказсто, Равчирестэ,  Сибирьстэ, Юграсто, Крымстэ ды лия таркасто. Программась, конань анокстызь  промксонь  пурныцятне,  келеель ды домкаль. Васенце чись алтазель «Москва этническая» этноэкскурсиянтень. Московсо ламо таркат, музейть, косо невтеви те эли тона раськенть чачозо. 

Омбоце чистэ Форумс сыцятне пачколесть Ламофункциянь миграциянь куншкакурос, косо теевсть содавиксэкс сень марто, кодамо лувсо юты Россиясо мигранттнэнь вастомась.  Миграциянь центрань важодицятне тешкстасть, эрьва чистэ сынст кенкштнева совить тёжадо ламо ломанть. Тесэ сыцятнень туртов максыть миграциянь картат, ансяк а сеске. Васняяк ванносызь документэст, мейле сынь ютыть медицинань ваннома-обследования, ды бути  ломанесь эзь уско кодаткак ормат, юты лия нупальтнес. Седе тов сынст учи рузонь келень коряс экзамен. Зярдо весемесь ютави, ансяк сестэ максови эрявикс конёвось. Сонзэ марто омбо масторсто сыцясь апак пеле ушоды вешнеме важодема тарка.

Теке чистэ журналисттнэ пачколесть Ломоносов лемсэ МГУ-с, косо Елена Леонидовна Вартанова профессорось, Журналистикань факультетэнь деканось ловнось лекция: «Цифровое общество и человек медийный». Сон пачтясь неень шкань журналистиканть ёжодонзо, яволявтсь статистикань цифрат. Елена Леонидовна тешкстась: «Россиясо СМИ-тнеде, конат лиснить официальна, весемезэ 278 065, эйстэдест 2200 лиснить национальной кельсэ, седе ламо печатной СМИ-тнеде, эйстэдест – 1500». Учёноенть талновты се, кода Интернетэсь «лепшти» газетатнень ды журналтнэнь. Ней мик телевиденияськак кадовсь удалов. Васенце таркасо – Интернет-ресурстнэ.

Промксонь колмоце чись алтазель Пленарной заседаниянтень ды колмо секциянь важодематненень. Секциятнесэ ванновсть истямо кевкстемат:  «Этноконфессиональная тематика в СМИ»,  «СМИ на языках народов России», «Детские и молодежные СМИ». Весе вастовоматне ютасть «Рэдиссон Ройал Москва» гостиницань Конгресс Парксо.

Чарькодеви, неть вастовоматне максыть ламо лезэ, эрьвась бажась ёвтамс эсь ризксэнзэ, талноманзо, мелявксонзо. Марят, зяро улить ламо паро тевть, конатнень теить минек сёрмадыця оянок. Сынь кенярдозь пачтить ды ёвтнить, кода теемс национальной журналистиканть седе виевекс, гайтевекс.

Меельце шкасто седе ламо федеральной СМИ-тне кармасть явомо мель национальной темантень. Истя, «Аргументы и факты» газетась нолды башка номер, лемезэ «Столичность», косо ёвтневи эрьва кодамо раськень ломантнеде. Тешкстаса, Московсо эрить 160 ламо национальностть. «Вечерняя Москва» газетась истя жо нолды башка номер, косо ёвтни сеть эрьва кодамо раськень покш читнеде, тевтнеде, конат топавтовить прявт ошсонть.

Регионтнэсэ Национальной журналистикась весе вийсэнзэ, монь койсэ, кирди прянзо. Мезе рединь, те Форумсонть улезь, малав весень талновтыть неке кевкстематне. Арась эрявикс финансонь лезкс, пекставить газетатне ды журналтнэ, вишкинеть тиражтне, стака лисемс эрявикс радиочастотас.

Неть ды лия кевкстематне кепсевсть Госдумань Национальностень тевтнень коряс комитетэнь прявтонть И.И.Гильмутдиновонь марто вастовомстояк.

Теке чистэнть «Геликон-опера» театрасо ютавтозель «СМИротворец-2017» пелькстамосо изницятнень каземаст. Невтезель покш концерт.

Форумось казсь ламо вастовомат. Фируза Саадиевна Султанова – «Соколенок» эйкакшонь журналонь прявтось, сакшнось Московов Дагестансто, Махачкала ошсто. Раськезэ пек кезэрень – сон табасаранка. Табасарантнэ эрить Табасаранской,  Хивской ды  Дербентской районтнэсэ,   Дербент,  Дагестанские Огни, Каспийск ды Махачкала оштнесэ. «Дагестансо эрить ниленьгеменде ламо раськеть, – ёвтни Фируза Саадиевна. – Минек ули истямо ёвтамо: Вере пазось кескав мартоль, косо ульнесть эрьва кодамо кельть, самай сестэ, зярдо сон ливтясь Кавказонь пандотнень велькска, лиссь зыян – кескавось вариясь. Ды кельтне, конат ульнесть кескавсонть, весе певерсть. Секс Дагестансо эрить ламо раськеть, тесэ гайгить эрьва кодамо кельть: аварской, чеченской, цахурской,  каратинской, лезгинской, лакской,  агульской ды лият».

Авась мельспаросо пачтясь эсь важодема лувдонзо. «Соколенок» журналось лисни кавксо кельсэ: «Лачен» – аварской кельсэ, «Лачин» – даргинской, «Къарчыгъа» – кумыкской, «Кард» – лезгинской, «ЧIавалачин» – лакской, «Ппази» – табасаранской, «Лашын» – ногайской, «Лачын» – цахурской. Васенце номертнэ нолдазельть 1981 иестэ Расул Гамзатов Дагестанской АССР-нь народной поэтэнть бажаманзо коряс.

Журналсонть печатавить  эйкакшонь стихотвореният, ёвтамот, валмеревкст, содамоёвкст. Пачтяви покш читнеде ды кенярксчитнеде, конатне ютавтовить республикасонть. Журналонь  лопатнень лангсо максовить сюпав артовкс марто фольклоронь ёвтамот. Сэрей пандонь масторось пек сюпав превей ёвкстнэсэ.

Икелень шкатнестэ журналтнэнь тиражост покшоль. Стака шкатне, конат састь 90-це иетнень марто, стакалгавтызь редакциятнень эрямосткак. «Зярдо мон 2000 иетнестэ кундынь те тевентень, – ледстни Султанова, – тиражось  пек вишкинель. Ней сон седе ламолгадсь. Минь якатано эйдень кужотнева, школатнева – кортнетяно эйкакштнень, тетятнень-аватнень марто келенть питнейчидезэ, се зыяндонть, кона учи минек, бути ёмавтсынек келенек». Редакторонть валонзо коряс, келентень явови асатышка мель, седе чумот теньсэ покштне, конатне а бажить тонавтомс эйкакшост тиринь келентень, панжомс раськенть виев ёнксонзо, невтемс койтнень-кирдатнень мазычист. «Лисни истя, рузонь келентькак а пек парсте содасынек, эсенсентькак тапатано-янгатано», – тешксты авась.

Ризнэвти сеяк, пек аламо питне максыть неень шкань творческой ломантненень: поэттнэнень, артыцятненень, сёрмадыцятненень. Секскак, седеяк пек цёратне, кадыть те профессиянть ды туить микшнемань-рамсемань тевентень. «Ютксост, – ризны Фируза, – пек ёроков ломанть, конатне кастовлизь-сюпалгавтовлизь минек культуранть, кепедевлизь седе покш тёкшс. Ней жо, ярмаконь аразде, сави тенст вешнемс седе кшив тарка».

Медиафорумось, карматано кемеме, топавтсынзе национальной журналисттнэнь вешемаст, витьсынзе сеть лавшо таркатнень, конат лиссть лангс меельце шкатнестэ. Васняяк эряви полавтомс этнической СМИ-нь лангс государстванть вановтонзо ды кемекстамс-виевгавтомс сонзэ лезксэнзэ. «Весе вешематне, конат совасть те промксонть меельце резолюцияс,  ванновить 2017 иень ацамковсто Государственной Думасо», – яволявтсь  Ильдар Гильмутдинов, РФ-нь Президентэнть юрсо Межнациональной сюлмотнень коряс советэнь членэсь, Россиянь Госдумань Национальностень коряс комитетэнь прявтось.

Светлана Пивкина

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...