Рубрикатор

Культура Сабанцелень патриотт
Сабанцелень патриотт

«Илинк стувтне тынь веленк!» – истя лемезэ моронть ды сонзэ лангс снимазь клипенть, конань арсизь-анокстызь Отяжеле ёнксонь Сабанцеле велень кавто эрицятне, эсест велень патриоттнэ ды тиринь келень вечкицятне – Александр Тикшайкин ды Владимир Титяпкин. Велесэ тенст мерить Болыш Сашка ды Туктарь Овка.  Арсян, а ули кенгелемакс, бути мерян, те моронть лангс клипесь «сорновтызе» Интернетэнть ды седейс токинзе ламотнень, аволь ансяк эрзянь келень содыцятнень, рузтнэньгак. Васенцеде кунсолыцятне моронть маризь «Шумбрат, Мордовия!» фестивальсэнть. «Илинк стувтне тынь веленк!» композициянть ськамонзо саизь фестивалень Гала-концертэнтень Отяжелень райононть пельде. Те моросонть лангс ливтевить неень шкань покш ды сэредстиця мелявкстнэ – тиринь велетнень ёмамось, эрицятнень покш ошов туемась ды малавикс ломантнень чуросто содавтомась. Минек ульнесь меленек седе келейстэ содамс, кить неть ломантне, конатне истя вечксызь тиринь ёнксонть ды «пиить-палыть» кисэнзэ. Ловнодо эйстэдест те материалсонть.

Мекс мон сёрмадан эйстэдест вейсэ? Неть кавто цёратнень сюлми ламось. Аволь ансяк вейке велесэ чачомась-касомась, вейке школань прядомась ды вишка пингстэ вейке китнева-янтнэва яксемась. Сынст ульнесть некеть тонавтыцяст, роднятненьгак-раськетненьгак касомасост-кепетемасост ульнесь покш таликаст. Тиринь велентень вечкемась, нать, сась тенст тетяст-аваст пельде, конатне весе эрямост эризь, нейгак эрить Сабанцелесэ ды Пумбрасо, ды зярдояк эзть тукшно лия ёнксов паро эрямонь вешнеме. Владимирэнь тетязо, Юрий Степанович Титяпкин (сон уш арась, тусь эрямостонть), ульнесь тонавтыцякс, ветясь история Сабанцелень школасо. Сонзэ уроктне нейгак икелень тонавтницятнень мельсэть-превсэть. Авазо, Анастасия Михайловна, теке жо велесэнть ветясь географиянь урокт, ней сон уш пенсиясо. Сашань тетянзо, Николай Васильевич Тикшайкинэнь, весе трудонь биографиязо сюлмавозь «Путь Ильича» Сабанцелень икелень колхозонть ды мейле Отяжелень лесничестванть марто. Авазо, Нина Евгеньевна, пенсиязонзо важодсь лавкасо. Покш вечкема эсест келентень тенст кадсть малавикс покштяст-сырькаест, конатне сёрмаскак а содыльть, ялатеке сынст ёвтнематне, ёвкскетне-кавкскетне, нурька морынетне эйкакш порасто совасть пряудемс ды ней, касозь, седеяк талновтыть.

Неть цёратне, тешкстаса, Александр ды Владимир, аволь ве иень. Титяпкин Тикшайкиндэ покш кеменьшка иеде. Ялатеке эйсэст вейсэнди эйкакш порасто саезь спортонть марто ялгаксчись. Александр шожда атлетикань коряс Мордовиянь чемпион, спортонь мастеркс кандидат, Владимир а весть сайнесь васенце таркат Мордовиясо олясто тюремасонть. Сынь кавонест школадо мейле кочкасть вейке ВУЗ – М.Е.Евсевьев лемсэ МГПИ-нь физвоспитаниянь факультетэнть, конань прядомадо мейле Владимир васняяк а куватьс роботась Саранскойсэ МВД-сэ, мейле сась Отяжелень райононь полициянь отделс ды роботы тосо течинь чис. Ней сон – Россиянь МВД-нь ММО-нь 5-це № полициянь отделэнь (конась ашти Отяжелесэ) прявтонь полавтыця, полициянь подполковник ды, илядо дивсе, МР-нь культурань заслуженной роботник. Те лемесь максозь Титяпкиннэнь а стяко. Малав 20 иеть эли, паряк, седеяк ламо, Отяжелень райононь весе покш мероприятиятне ды «Шумбрат, Мордовия!» раськень творчествань республикань фестивалень концерттнэ а ютнить Владимир Юрьевичтеме. Ушодовсь жо весемесь «Афганское эхо» моронь фестивальстэнть, косо колмоксть сайнесь васенце таркат. Сонзэ пек вечксызь ваныцятне-кунсолыцятне. Аволь ансяк мазый, чевте, оймень сыргозтиця вайгелензэ – залонть марто вейсэндявоманть кисэ. Моронзо свал эрявикст самай те шкантень ды ломантненень. Сынь минек шкань эрямодонть, талноматнеде, сэредькстнэде. Кода уш чарькодиде, Владимир аволь профессиональной морыця, сон эзь прядо музыкань консерваторият ды академият. Ялатеке эйсэнзэ, кода кортыть, «абсолютной слух», ды, нать, те талантось сонензэ сась верде, Пазонть пельде.  Владимир морси эйкакш порасто саезь. Ютазь пингень 80-це иетнестэ Сабанцелень клубсо эрьва ие ютавтнесть самодеятельностень отчётонь концертт, ды вейке истямо кенярксов чистэ школасо тонавтницясь, Пумбра велень цёрынесь  Владимир Титяпкин маризе Демис Руссосонь «Идут года» рузкс моронть, конань морызь велень эстрадань артисттнэ. «Морызь истя, монь натой превеньгак чаракадсть, – ледстни Владимир. – Рунгован теке коткудавт чийнезевсть, ды сестэ чарькодинь, ули мелем морамс ды аволь кодаяк, а штобу кунсолыцян седеест талнозевельть, кода монь се концертсэнть. Кудосо яла репетицият тейнилинь. Сырькаем раксесь: «Тон овсе морамо а маштат, вана покштят кода рангстыль – вальматнеяк зэрнесть!» Алкукскак, покштям, Батяркин Михаил Семёнович (авань тетязо), вадрясто морыль. Сон фронтсо танкистэкс ульнесь ды весть ушодсь морамо танксо. Оршизе шлёмонзо, ды комсешка минутат весе рациятнень эфирсэ гайнесь покштянь вайгелезэ. Сон эзь фатяяк, кода кнопканть лепштизе. Мейле, нама, понгсь тензэ командирэнть пельде. Эфирэнь саеманть кисэ ильтякшнызь «очередтэме нарядс», паро морамонть кисэ жо яволявтозельть тензэ Сюкпрянь валт. Миненек весенень покштянь пельде, нать, паро вайгельтне сатотсть».

Титяпкинэнь роднянзо-раськензэ ютксо а морси ансяк сехте нузяксось. Парт вайгелест Подмаревтнень, конатне савить тензэ ялаксокс – аванзо сазоронь цёрат. Елена Зайцева, патянзо тейтерезэ, тейтерькс Подмарева, морси «Умарина» республикань моронь ды киштемань ансамблясонть. Сергей лелянзо цёразо, Денис Титяпкин, налкси КВН-нь Высшей Лигасо ды морси «Приказ 390» Россиянь УФСИН-нь командасо. Авазо, Анастасия Михайловна, школасо важодемстэ морсесь «Грустиночка» авань ансамблясонть. Аванзо патязояк, Клавдия Михайловна Волоснова, мазый ды виев вайгелень кандтниця, сонзэ Сабанцелень эрицятне марсесызь тесэнь Михаил Архангелэнь церьковань службатнесэ.

Владимир аволь ансяк невтнизе прянзо республикань художественной самодеятельностень концерттнэсэ, сон а весть ульнесь Санкт-Петербургсо ютавтовиця «Белые ночи Санкт-Петербурга» эрьва иень музыкань фестивалень участникекс. Малав ветешка иеде теде икеле Владимир косто-бути маризе Александр Тикшайкинэнь од моронзо Сабанцеледе, ды сестэ ушодовсь, кода мерить, сынст вейсэнь творчествась.

Александр Тикшайкин стихотвореният кармась сёрмалеме эйкакш порасто. Ковгак сынст эзинзе кучне, эдь сынь ульнесть аволь журналтнэнь туртов. Эйсэст Саша ёвтнесь шабра атятнеде-бабатнеде, ульнесть тосо ламо пеедькшнемат. Сёрмадсь васняяк рузонь кельсэ, мейле эрзякскак варчизе прянть. Кой-конатнень лангс арсесь музыка, сестэ уш сон тонавтнесь гитарасо седямо, ды лиссть морот. Васняяк сонсь морась роднянзо-раськензэ икеле, тиринь велень концерттнэсэ, райононь творчествань мероприятиятнесэ.  Физической культурань факультетэнть прядомадо мейле Саша сась эрямо тиринь велев, зярыя иеть роботась школасо тренерэкс, мейле строясь кудо Отяжелес, ней важоди «Композит» ООО-нь прявтокс.

Тикшайкинэнь вайгелесь истя жо а берянь, нать, Анна Кузьминична сырькаензэ пельде. Од порасто мазыйстэ ды гайтевстэ морсиця тейтерьканть натой саиксэлизь тонавтнеме Казанень консерваторияв. Ансяк тетязо эзизе нолда. Кодат морсемат, вачодо бу а куломс. Эдь мольсть ютазь пингень стака 30-це иетне.

Сашань моротнень тематикась эрьва кодамо: тиринь ёнксто ды тетядонзо-авадонзо, вечкемадо, Ине Отечественной войнадо, Пазнэнь озномадо, вечкевикс физвоспитаниянь факультеттэнть, эйкакш порань ледстнематнеде, зярдо эште ульнесь СССР-сь. Зярс анокт кеменьшка морот эрзянь ды рузонь кельсэ, лангозост сёрмадозь фонограммат, кудосо жо блокноттнэсэ ды пряпотсонть эште ламо апак топавто арсемат. Александр а весть кучнинзе рузонь моротнень содавикс продюсертнэнь туртов, ансяк тосто а куш-а каш. Теке марто эсензэ ёнкссо сёрмадовксонзо вечкевсть ламонень. «Колокола» моронть Владимир Титяпкин морызе мелят «Шумбрат, Мордовия!» фестивальсэнть, ды морось гайнесь Отяжелень Андрей Первозванной Апостолонь Храмонть панжомсто. «Гимн физвоза» композициясь ней уш кармась Отяжелень спортсментнэнь вишка гимнакс, конань сынь морсить вейсэ Физической культурань роботникень чинть тешкстамсто. «Илинк стувтне тынь веленк!» мородонть башка, Сабанцеле веледенть ули эште вейке морост, лемезэ – «Сабанцеле». Сон содавикс ламонень, ули интернет-сайттнэсэяк. «Илинк стувтне тынь веленк!» моронть Тикшайкин сёрмадызе тедедень кизна, корязонзо Александр ды Владимир аволь умок анокстасть клип. Те сынст васенце варчамост. Сонзэ снимизе Отяжелень видеооператорось Денис Козодольский.  Видьстэ меремс, лиссь аволь клип – а покшке фильма тиринь веледе ды сонзэ сыця шкань талноматнеде. Сюжетэнть цёратне арсизь сынсь, фильмань геройтне – Сабанцеле велень эрицятне. «Клипсэнть невтевить велень кудотне, кой-конатнесэ уш кияк а эри, лиятнес сакшныть ломантне ансяк кизна, – ёвтни Александр Тикшайкин. – Минь сниминек велень ульцятнень, эрькетнень, школанть, сырькайтнень, тетянок-аванок, конатне минек свал учить инжекс. Моросонть кортамось моли сёкседенть, кода чувтотнень лангсто прыть лопинетне, истя миньгак, касозь, каднотано тиринь веленек. Морось энялды а стувтнемс чачома ёнксонть, юткошкасто сакшномс содавтомо роднянок-раськенек. Удалась-арась сёрмадовксось, теде кадык эсь мелест ёвтасызь кунсолыцятне».

Тешкстама, фильманть снимамс цёратненень ярмактнень явинзе  «Сабанчеевский» ООО-нь прявтось Дмитрий Николаевич Игушкин, конась истя жо талны-мелявты тиринь Сабанцеле велензэ кисэ, уш ламо иеть теи весементь сонзэ а ёмамонть ды касоманть-кемекстамонть туртов.

Неть кавто цёратне, моротнень морамодо ды сёрмадомадо башка, бажить лездамс тиринь ёнксонтень лия тевсэяк. Тедеде кизна Тикшайкин ды Титяпкин вейсэ Сабанцелень ды Пумбрань цёратнень марто ванськавтызь вирень кавто лисьмапрятнень: «Колкиненть» ды «Пиче виренсенть». Сынсь тейсть лисьматнень лангс стольть ды озамкат, путсть од крёстт. Сыця кизэстэнть арсить те паро тевенть поладомс, эдь веленть маласо виртнесэ улить ламо стувтозь ды умок апак ванськавто лисьмапрят. Кода кортыть цёратне, а мезть учнемс лезкс киньгак пельде, эряви ушодомс паро тевень тееманть эсеть ёндо, ды те ули невтемакс-тердемакс весенень.

Марина Девятова

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...