Рубрикатор

Культура Саранскойстэ – Сурскоев
Саранскойстэ – Сурскоев

Финнэнь-угрань раськетнень культурань Равчирень куншкакурось поладызе «Кой» этношколань проектэнть. Неть читнестэ Саранскойстэ покш делегация якась Ульяновск ёнксонь Сурское посёлкав. Вастовомась ютась райононь Культурань кудосо. Тей сакшность ошонь школань тонавтницятне ды тонавтыцятне.

Васняяк шумбракстнемань вал марто весе пурнавозтненень пшкадсь Финнэнь-угрань раськетнень культурань Равчирень куншкакуронь важодицясь Т.Т.Чекушова. Сон пачтясь «Кой» проектэнть эрявиксчидензэ. Мастер-класстнэ ютыть Россиянь эрьва кодамо ёнкссо.

 

Теде мейле вал сайнесь Н.П.Огарёв лемсэ МГУ-нь Национальной культурань институтонь средней профессиональной образованиянь отделениянь прявтось Н.А.Скворцова. Сон пачтясь, минек вузонть ули башка статусозо, Россиясо истямо вузтнэде ансяк 29. Эрямо таркань коряс кодаткак стакачить а улить. Тесэ 16 общежитият, ламотне юткстост одт. Пандомс кисэст ламо а эряви. Теде башка, кие парсте тонавтни, сетненень пандови покшолгавтозь стипендия.

М.Е.Евсевьев лемсэ МГПИ-нь физической культурань факультетэнь деканось, педагогической наукань кандидатось А.В.Кокурин ёвтнесь пединституттонть. Тесэ эрьванть учить кавксо факультетсэ. Университетэнть ды пединститутонть коряс невтезельть фильмат.

Национальной культурань институтонь студенттнэ анокстасть пародояк паро концерт. Аволь весть сцена лангс лиснесть Екатерина Макушкина, Марина Рогожина. Истя жо морась МР-нь заслуженной артисткась Татьяна Ломакина. Ламо цяпамот алтавсть «Смайл» неень шкань киштемань ансамблянтень. Од ломантне невтсть лия ёнов а молиця киштемат.

Теде башка, эйкакштнень туртов ютавтозельть морамонь, киштемань, декоративно-прикладной творчествань коряс мастер-класст. Саемга, Национальной культурань институтонь тонавтыцясь В.В.Ковалёва невтсь, кода теемс эрзянь ды мокшонь оршамопельтнес каркс. Сон кодави сисем сурсо! Нама, аволь шожда, аволь сеске тонадат кодамо. Ансяк те мастер-классось тусь мельс кода вишкинетненень, истя жо покштнененьгак.

Ламо эйкакшт явсть мель киштемань коряс мастер-классонтень. Сонзэ ветясь Национальной культурань институтонь тонавтыцясь Екатерина Гулина.

Морамонь коряс мастер-класс ютавтсь М.Е.Евсевьев лемсэ МГПИ-нь музыкальной образованиянь ды тонавтомань методикань кафедрань доцентэсь Т.А.Ломакина.

Паро инжекс те вастовомасонть ульнесь «Комолькай» эрзянь раськень ансамблясь. Аватне сакшность Хмелёвка велестэ. Сурской районсо сон вейкине эрзянь веле. Ансамблядонть ёвтнесь сонзэ художественной руководителесь Наталья Александровна Куликова:

– 2018 иестэ минек ансамблясь тешкстасы 60 иень юбилеензэ. Кадык эрятано аволь Мордовиясо, ялатеке бажатано ванстомс эсь культурань сюпавчинек: тиринь келенть, моротнень, койтнень-кирдатнень. «Комолькайсэ» морсить 16 ломанть. Сынст иест 30 саезь 75.  Мельспаро, ули баянистэнек – А.Д.Ховрин. Репетициянок ютыть велень клубсо.

– Наталья Александровна, косо морсетядо?

– Морсетяно эсенек велесэ, эрьва кодамо кенярксчитнесэ (Авань чи, Велень чи, Од ие ды седе тов). Паро мельсэ тердтнить эйсэнек райононь кенярксчитнев ды лия велев. Аволь весть морсинек Ульяновск ошсо «Шумбрат» покш чисэнть, якинек Кузоватовабуень Кивать велев, косо ютнекшни «Масторавань морот» фестивалесь. Минек шабра районось – Дубёнкань. Секскак аволь весть морсинек тынк кедьсэ. Мартонк кирдтяно ялгаксчи.

– Кие лезды тенк ардтнемс концерттнэс?

– Сюкпря райононь прявттнэнень, свал тенек лездыть.

– Кодат морот улить «Комолькаень» репертуарсо?

– Минь морсетяно эрзянь ды рузонь морот. Эрзянь моротнень ютксо улить истямо морот, конатне ванстовсть ансяк минек велесэ. Ламо моронок свадьбань, одирьвань саемань теманть коряс. Вечкевить тенек С.М.Люлякинань моронзо. Мартонок морыця вейке авась чачсь Мордовиянь Аловелесэ, сон усксь тенек сынст велень морот.

– Наталья Александровна, тынь умок морсетядо «Комолькайсэ»?

– Ансамблянть ветян 36 иеть. Весе эрямом ютась те коллективсэнть. Аватнень вайгелест мазыйть, виевть, гайтевть. 2018 иень март ковсто таго карматано идеме ансамблянть народной лемензэ. Оршамопеленек умонь, тенст 30 иеть. Кадык сынь таштот, ансяк эсенек. Миненек а тукшныть мельс неень шкане стазетне.

– Инескеть, ёвтнеде Хмелёвка веледенть.

– Хмелёвка велесь покш. Неень шкане тосо эрить ламо сыре ломанть. Ули школанок, ков усксить эйкакшт шабра велетнестэ. Тосо ветяви эрзянь кель. Ули «Умаринка» эйкакшонь ансамбля. Тонавттано эйсэст, кадык поладсызь валдо тевенек.

Т.Маторкина

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...