Рубрикатор

Культура Сабанцелень церась – КВН-сэ
Сабанцелень церась – КВН-сэ

Седеезэть мельспаро, зярдо неят покш экрансто эли минек масторонь телевидениянь каналтнэстэ содазь ломань. Ды аволь кодамояк минень-сюнонь «муськевтиця» передачасто – КВН-нь Высшей Лигасто. Самай тосо налкси Россиянь ФСИН-нь КВН-нь «Приказ 390» сборноесь ды сонзэ участникесь – Отяжеле ёнксонь Сабанцеле велень эрзянь цёрась Денис Титяпкин.

Денис чачсь-кассь Сабанцелесэ, ансяк зярыя иень ютазь тетязо-авазо тусть эрямо Отяжелев, тосо сон прядызе школанзо ды тусь тонавтнеме Ульяновскоев ВДВ-нь Суворовонь училищав. Денис, кода алкуксонь цёра, седе тов служась армиясо ды истямо войскасо, конатне лововить минек Вооружённой Виень элитакс – ГРУ-нь спецназонь 3-це бригадасо. Велявтсь армиядо мейле тиринь ёнксов, прядсь кавто ВУЗ-т: Саранскоень Кооперативной институтонть ды Воронежень Россиянь ФСИН-нь институтонть. Федеральной службась марявсь тензэ седе малавикс, ды Титяпкин кочкизе роботамо таркакс Мордовия Республикасо Россиянь УФСИН-нь Башка режимень 10-це ИК-нть, козонь ладязель караулонь прявтокс. Малав ие, кода Денис полавтызе важодема тарканзо, ды ней сон служи Московсо ФСИН-нь Управлениясо.

Эште Воронежень институтсо тонавтнемстэ, сисемшка иеде теде икеле, Денис варчизе прянзо КВН-сэ. Те налксемась тензэ вечкевсь, сон а пели аштемс-кортнемс сцена лангсто, цёранть шожда обуцязо, муи кель-вал весень марто ды, нама, пек вечки пеедькшнеме. Кода эно сонтемензэ КВН-сэ! Дока налксицянть неизь-редизь ды Денисэнь саизь «Приказ 390» ФСИН-нь сборнойс. Ней од цёрантень сави кенеремс эрьва ков: роботамояк, налксемеяк. 2016 иестэ сынст командась понгсь Высшей Лигас, ды Денис васенцеде лиссь покш сцена лангс. Налксематнень, косо прянзо невтизе Денискак, а весть невтнизь Россиянь Васенце каналсо мелят ды тедеде. Титяпкин ды сонзэ командась истя жо налксесть «Голосящий КиВиН-сэ» ды ютазь недлячистэ Москов ошонь мэрэнь Кубоконть кис.

Денис «Приказ 390» командасонть васенце таркатнесэ, ды мазый рунго, спортонть марто ояксчисэ эриця цёранть, конась пек вечки яксемс тренажёронь залс, телеоператортнэяк секе-тев бажить саемс кадрас. Титяпкин аволь ансяк налкси, ней морыяк сборноенть марто вейсэ. Ды аволь ансяк КВН-сэ морси, вечки ськамонзояк, Бакич Видяень моронзояк тонавтнинзе. Пазось макссь паро вайгель цёрантень. Ды целанек сынст семияськак весе морамонь вечкиця. Парсте морыть вишка ялаксонзо – Юлия ды Маша. Юля Медицинань институтсо тонавтнемстэ свал ульнесь «Студентэнь тундонь» участницакс. Маша тонавтни зярс школасо ды морси «Шумбрат, Мордовия!» фестивальсэнть. Теке жо фестиваленть свалшкань участникесь Денисэнь тетянзо ялаксозо – Владимир Титяпкин. Райононь мероприятиятнень участникекс ламоксть ульнесть эште лия браттнэ, Подмаревтне. Елена Подмарева – роднязо-раськезэ морси «Умарина» ансамблясонть. Денисэнь авазояк вечки морсеме, ансяк вана тетязо, Сергей Юрьевич, аламодо явовсь – сон вечки киштнеме.

Титяпкинтнэнь семиясь Денис марто КВН-нь налксематнень бажи ваномс педе-пес, а менсти вейкеяк эфир. Икелев гайневтить Сабанцелесэ эриця сырькайтненень. Сынст туртов эдь нуцьканть телевизорсто неемс ­­­– алкуксонь кенярксчи.

Эсенек ёндо минь арсетяно Дениснэнь эште а весть невтемс прянть КВН-сэ, саемс команданть марто васенце таркатнень ды каштансто кандомс эрзянь цёрань лементь.

М.Девятова

 

 

 

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...