Рубрикатор

Культура Волонтёртнэ – чевте седей ломанть
Волонтёртнэ – чевте седей ломанть

Аволь умок Россиянь Президентэсь Владимир Путин сёрмадстсь Указ Доброволецэнь (волонтёронь) чинть тешкстамодо эрьва иень декабрянь 5-це чистэнть. Волонтёртнэ – неть ванькс ойме марто ломанть, конатне питневтеме лездыть эрьва кодамо ситуациясо, ды пек паро, сынст покш тевест редизе государствась.

Течи минек редакциянь инжесь – умонь волонтёрось, философиянь наукань кандидатось, доцентэсь Людмила Викторовна Митякина. Сон ламо иеть важодсь Мордовиянь государственной университетэнь башка образованиянь Институтонь преподавателекс, общественной тевезэ ульнесь профкомонь прявт, теке учреждениясонть панжсь ды зярыя иеть ульнесь «Филантроп» интеллектуалонь клубонь прявтокс. Седе мейле панжсь Кочкуровань районсо «Селяночка» велень клуб. Ламо иеть Людмила Викторовна тейнесь вейсэнь тевть «Милосердие» Ассоциациянть, «Российский фонд милосердия и здоровья» Мордовиянь отделениянть марто.

Мелесь теемс паро, лездамс вакссот эрицятнень-аштицятнень туртов, нать, чачи ломаненть марто. Людмила Митякина (тейтерькс Азоркина) ушодызе волонтёронь лезэв тевенть Кочкуровань райононь Од Мурза школань кавксоце классо тонавтнемстэ. Те ульнесь ютазь пингень 70-це иетнестэ. Ульяна Андреевна сырькаезэ энялдсь нуцькиненстэнь сёрмадомс сёрма Тамбов ёнксов Полина тейтерензэ туртов. Седе мейле сон сеедьстэ сёрмалесь истямо сёрмат велень сёрмас а содыця сырькайтненень-покштятненень, конатнень сынь кучилизь эйкакшост, родняст-раськест туртов Советской Союзонь оштнева ды велетнева. Людмилань паро тевензэ кисэ велень эрицятне куватьс ёвтнесть сюкпрянь валт аванстэнь Татьяна Ильиничнанень ды эстензэ тейтерькантень. Неть валтнэ ульнесть казнеде питнейть.

Те кенярксчинь кандомась маласо эрицятнень ды овсе асодавикстнэнь туртов кармась Людмилань кикс-янокс весе эрямонзо перть. Школасо сестэ ульнесть «Тимуронь командат», ды Люда Азоркина ялганзо марто яксесь лездамо велень ветерантнэнень ды ськамост эрицятненень.

Студентэкс улемстэ Людмила ульнесь студотрядонь активистка, важодсь стройкасо, роботась стака эйкакштнень марто, кизна ульнесь эйдень лагертнесэ воспитателекс. Теке марто тонавтнесь кавто таркава – университетэнь филологиянь факультетсэ ды общественной профессиянь факультетсэ. Тонавтнеманть прядомадо мейле зярыя иеть ульнесь «Мордовский университет» газетань корреспондентэкс, седе тов редакторокс. 1985 иестэ васенцеде пурназель «Ялгат» интернациональной стройотрядось, конань кучокшнызь роботамо Болгарияв. Сонзэ комиссарокс ладязель Людмила. Сестэ самай ушодовсть сюлмотне Саранскоенть ды Ботевградонть ютксо, огарёвецтнэ жо ульнесть сынст васенце сюлминекс.

Людмила аволь ансяк роботась редакциясо, сон тонавтнесь аспирантурасо ды сёрмадсь кандидатонь диссертация – «Социальный статус старшего поколения современного российского общества». Аспиранткантень савкшнось ардтнемс натой Финляндияв ды ваномс, кода Миккели ошсонть волонтёртнэ важодить сыре ломантнень марто. Се шкастонть сонзэ пряс сась мель панжомс тиринь ВУЗ-сонть «Филантроп» сыре ломанень вейсэндямонь интеллектуальной клуб. Людмила арсесь практикасо варчамс эсь диссертациянзо теориянть. Клубонть васенце членэкс кармасть математикань факультетэнь васенце деканось В.И.Сорокина, юридическоень – А.И.Гусева, строительноень – С.О.Левков. Клубонтень кармасть яксеме содавикс учёнойтне, университетэнь ветерантнэ: А.И.Александров, Е.Ф.Балашова, Д.И.Еремеев ды ламот лият. Сынст девизэкс ульнесь валмеревксэсь: «Возьмёмся за руки, друзья, чтоб не пропасть поодиночке».

Клубось роботась малав кавксо иеть, эйсэнзэ ютавтневсть кортамот, лекцият, диспутт, конатнень анокстыльть сынсь клубонтень совицятне: сёрмадыцятне, артыцятне, культурологтне, психологтне. А ёвтавияк зяро ульнесть вастовомат, акцият, презентацият. Инжекс тенст сакшность студенттнэ ды тонавтницятне. Кой-кить эйстэст мейле кармасть клубонь волонтёрокс.

«Филантроп» клубось се шкастонть кармась добровольчествань раськень общественной каземань Конкурсонь лауреатокс, конань арсизе социальной лезксэнь максомань Федеральной фондось. Студенттнэ-волонтёртнэ образованиянь системань управлениянь кафедрань доцентэнть Людмила Викторовна Митякинань прявтсо ютавтнесть эрьва кодамо акцият, топавтсть проектт. 2005 иестэ Ине Отечественной войнасо Изнямонь 60 иетнень топодемантень сынь анокстасть «Нить длиною 60 лет…» проект, конань коряс яксесть республикань школатнева, ютавтнесть тосо историянь олимпиадат, пелькстамот ды невтнесть ветерантнэнь туртов концертт.

Студенттнэ невтнизь пряст «Живые голоса истории» раськеютконь патриотонь пелькстамосонть, Л.В.Митякина клубонть важодемадо ловнось отчётт Московсо патриотонь гражданской форумсонть. Университетсэ жо Людмила Викторовна ловнось лекцият «Добровольчество» курсонть коряс ды вейсэ студенттнэнь марто анокстась эрьва кодамо доброволецэнь акцият.

Те чевте седей авась ульнесь «Милосердие» Ассоциациянть эряза участник, топавтызе «Добровольцы Мордовии – старшему поколению» проектэнть, конань коряс сон ветясь мастер-класст геронтопсихологиядо, анокстась брошюра, косо ёвтневи, кода эряви кортамс сыре ломантнень марто.

Людмила Викторовнань седеезэ талнось эсензэ велень эрицятнень кувалмаяк, ды зярыя иеде теде икеле Митякина панжсь «Селяночка» вастнемань-кортнемань клуб Кочкурбуень Од Мурза велесэ. Тозонь кармасть сакшномо весе пенсионертнэ. Вейсэнь вийсэ ютавтозельть зярыя мероприятият, чокшнеть, мастер-класст парсейсэ викшнемань коряс, экскурсият Саранскоев, тешкстасть чачома чить ды кенярксчить. Л.В.Митякина ды социальной роботань кафедрань доцентэсь Т.В.Черкасова тонавтсть сыре ломантнень компьютерэнтень чарькодеме. Анокстакшность клубонь члентнэнь кедьсэ викшневкстнэнь, ставкстнэнь, теевкстнэнь выставка. Роштовасто «Согреем одиноких» акциянть юрсо кодасть Кочкуровань сыре ломанень ды инвалидэнь кудонь-интернатонь эрицятненень понань цюлкат. Тень кувалма администрациясь кучсь тенст сюкпрянь сёрма, конасонть кортави: «Тынь казиде сыре ломантненень аволь ансяк лембе кодавкст, истя жо кемемачи ды кеняркс».

Людмила Викторовна истя жо «Российский фонд милосердия и здоровья» Мордовиянь отделениянь зярыя проектэнь арсиця ды топавтыця.   Митякина доброволецэсь нейгак а соды оймсема, аноксты экологиянь кавто проектт ды мельсэнзэ-превсэнзэ эште ламо од арсемат.

Марина Девятова

 

Новости

Конституциясь – прявт закон

Исяк, декабрянь 12-це чистэ, тешкставсь Россиянь Федерациянь Конституциянь чись – минек масторонь государственной прявт кенярксчитнестэ вейкесь.

1993 иень те чистэнть минек масторсо кемекстазель РФ-нь Конституциясь. Весе текстэсь максозель «Российская газета» изданиясонть 1993 иень декабрянь 25-це чистэ. 1994 иестэ, Россиянь Президентэнть Указонзо коряс, декабрянь 12-це чись ёвтазель государственной кенярксчикс. Зярыя иень перть те чись ульнесь официальной оймсема чикс. Ансяк 2004 иень декабрясто Госдумась совавтсь полавтомат РФ-нь Трудонь кодексэнтень. Оймсема чись полавтовсь, а сонсь кенярксчись кандозь Россиянь ледстнемань читнень юткс.

Подробнее ...
 
Косто рамамс куз?

Декабрянь 15-це чистэнть республикасонть панжовить кузтнэнь ды пичетнень микшнемань базартнэ. Саранскойсэ тень туртов кемекстасть 22 площадкат (микшнема таркатнеде жо весемезэ 77).

Подробнее ...
 
Краснослободскойсэ – од прявт

Ноябрянь 29-це чистэ Краснослободскоень муниципальной районсо ютась Депутатонь райононь советэнь 13-це  сессиясь. Мордовиянь Прявтонть В.Д.Волковонь кармавтоманзо коряс сессиянть роботасо примась участия Мордовиянь Правительствань Председателесь В.Ф.Сушков. Чинь повесткасонть ульнесь вейке кевкстема: райононь од прявтонть кочкамось.

Подробнее ...
 
Фан-зона

Саранскойсэ Футболонь коряс масторлангонь чемпионатонть ютавтомсто прявт ошонь куншкакуросо карми улеме фан-зона.

Подробнее ...
 
Кочкадо сехте мазый район

Саранскойсэ ютавтови онлайн-вайгелень максома, сонзэ вельде редяви, ошонь кона районось весемеде мазыйстэ наряжазь Од иень кенярксчитнес. Теде пачтясть ошонь Администрациясто.

Подробнее ...