Рубрикатор

Культура Ю.ДЕДИНА: «НАЛКСЕМС ДЫ АЛТАМС ЭСЬ ПРЯНТЬ ВАНЫЦЯНТЕНЬ – актёронтень те сехте эрявикс»
Ю.ДЕДИНА: «НАЛКСЕМС ДЫ АЛТАМС ЭСЬ ПРЯНТЬ ВАНЫЦЯНТЕНЬ – актёронтень те сехте эрявикс»



Октябрянь 25-27-це читнестэ Саранскоев гастроль марто сакшнось Чувашиянь рузонь драмтеатрась. Сынь невтсть ниле путовкст. Кеменде ламо иеть те театрасонть налкси эрзянь тейтерь-авась Юлия Дедина. «Венецианские близнецы» спектаклядонть икеле минь вастовинек ды кенеринек кортамс сонзэ марто. Актрисась ёвтни тенек, кода сон кочкизе те профессиянть, ёвтни вечкевикс важодемадонзо, эрямодонзо. 
Юлия Дедина чачсь Орданьбуень Кеченьбуе (Кечушево) велесэ. Школань прядомадо мейле тусь тонавтнеме Чебоксаров. Мекс тов? Тосо эрить роднянзо-раськензэ. Тетянзо марто сынь максызь документтнэнь колмо вузга. Мейле уш кочкизь меельценть – Чувашиянь Культурань ды искусствань государственной институтонть. Гайневтсть аванстэнь, кона сизесь учозь, зярдо прядовить весе якамост. Истя тейтересь кармась тонавтнеме «Актёр драматического театра и кино» специальностенть коряс.

 
– Юлия, стака ульнесь васенце шкастонть веледе мейле? 
– Стакаль тов понгомс тонавтнеме. Ютынь колмо турт. Тевесь мейсэ? Мон вестькак араселинь театрасо. Ансяк эйкакшпингстэ саезь бажинь улемс балеринакс. Аздан мекс. Минь кавтошка иеть эринек Москов ало. Ды тетям-авам сайнимизь мартост театрав. Монень сестэ ульнесть колмошка иеть. Сестэ ванынек «Щелкунчик» балетэнть. Те шкас а содан, паряк, те кодаяк монь пряс-оймес кадовсь-совась эли мезесь. Свал бажинь улемс балеринакс, мельспаросо телевизорга ванынь балет. Зярдо касынь, актёронь профессиядо эзинь арсе. Тетям, Александр Анатольевич, важодсь клубонь прявтокс, авам, Лидия Викторовна – тонавтыця. Тетям кулось, эзинь кенере меельце курсонть прядомо. Сон монень пек лездась. Тонавтнема шкасто сакшныль весе экзаментнэс. Аштесь кувалман каштанчисэ. Ульнесь творческой ломанекс, теке артист, маштсь пародировамо. Минек родсо улить творческой ломанть. Покштям седясь баянсо, сазорозо – балалайкасо. 
Институтсо тонавтнемась ульнесь кува стака, кува – мельстуиця. Истя лиссь, 2006 иестэ весе курсонок саизь важодеме «Знак Почёта» Государственной орденэнь рузонь драмань театрав. Од ломанть театрасонть арасельть. Репертуарось таштоль. Театрасо минек вастымизь пек вадрясто. Зярдо сынек, весе шождасто лекстясть, кецязевсть. Режиссёрось, кона минек вастымизь, А.Г.Васканян, весемеде пек кецясь. Сеске путызе мартонок Ю.Грушасонь «Любовь, джаз и чёрт» постановканть. Тосо монень понгсь прявт роль. Спектаклясь од ломанень, мельстуиця. Мейле седе тов тагояк паро рольть ульнесть. Л.Толстоень «Анна Каренина» (Кити), И.Тургеневень «Вешние воды» (Джемма), ней а невтнетяно сонзэ, вейке актёрось тусь эрямосто. Вечкевикс спектаклятне: Т.Уильямсонь «Стеклянный зверинец» (Лаура), Н.Скороходонь «Человек рассеянный» (Адель Хитрова), тень весе актёртнэ вечкинек, учинек, зярдо сон карми, Н.Гоголень «Женитьба» (Агафья Тихоновна). Те путовкссонть превсэ кодаяк эзь кирдеве тень текстэсь. Марявсь шождакс, ансяк келесь стака. Мейле кода-бути сась. Зярдо якат сценанть ланга, налксят действиятнень – валтнэ сеске ледить мельс. 
Чувашиянь народной артистэсь В.А.Красотин свалшкань режиссёронок. Истя жо эрьва ие сакшны спектаклянь путомо Екатеринбургонь режиссёр. 
– Юлия, тонь арасель мелеть вуздо мейле туемс Московов? 
– Ульнесть истят арсемат, туемс Московов эли Санкт-Петербургов. Минек курсонь зярыя ломанть тусть, ансяк тевест эзь лисе, профессиональной театрав эзть понго. Важодить кодамояк вишкине театрасо, налксить аволь покш рольть. Мон арсян, Чебоксарсо эли Саранскойсэ, актёртнэнень ули ков касомс. Московсо истя ламо театрат, келей репертуар, ансяк вана понгить-арась тонеть главной рольтне? Эсь прянть невтемс тосо пек стака. Кадык, кода кортыть, провинциальной театра, ансяк тесэ таштави важодемань опыт, косояк лиясо истя а удалы! Минек ули косо касомс, невтемс прят, тонавтнемс. Те актёронть туртов сехте эрявикс. Налксемс ды алтамс эсь прянть ваныцянтень. 
– Тынк театрась сеедьстэ ардтни гастролев? 
– Минь сеедьстэ эрьва ков ардтнетяно. Пек вечкевить гастрольтне. Умок араселинек Саранскойсэ. Мон свал апак лотксе кевкстнян: зярдо мольтяно Саранскоев? Пек бажинь самс тей.

Весть сакшнынек спектакля марто Алатырев ды Орданьбуев. Те монь тиринь ёнксом! Кеченьбуень тонавтницятне, малавиксэнь сакшность ваномо. Саранскойсэ Нацтеатрань залось седе вишкине, ваныцятне аштить пек маласо. Минек седе покш залонок ды ломантне аштить ве ёно. Театранк вечкевсь. Ялган мерсть, тынк ваныцясь лия, аволь кода Чебоксарсо. Лиякс невти прянзо. Сеске маряви, аволь кудосотано. Саемга, Чебоксарсо минек кодамояк шуткась а юты, тесэ жо весе пейдить. Ды мекевланг. Таркатнесэ, косо минек ульнесь реакция, тесэ – каштмолема. Паряк, тесэ лиякс ваныть эрямонть лангс, лиякс арсить. Содатадо, мон мельспаросо мезеяк налксевлинь тынк актёртнэнь марто. Ванынь спектакляст, зярдо сакшность тенек гастролев. Виев труппась! 
– Юлия ули талнома сцена лангс лисемадо икеле? 
– Талнома свал ули. Кортыть, берянь се актёрось, кона а талны, лисни, сонзэ а токши спектаклясь. Мон пек талнан, зярдо содан, сыть ваномон малавиксэнь ды ялган. Меельце шкане ломантне сакшныть театрав. Те кецявты. Сакшныть ламо од ломанть. Икеле истя арасель. Лисни, минь аволь стяко важодтяно! Тагояк мерян, профессиянок сехте вадря! 
– Эрси ютко шкат самс тиринь ёнксов, Мордовияв? 
– Зярдо арасть репетицият ды спектаклят, мирдем марто свал ардтано велев. Минек сехте ламо важодемась пецясто, субутасто ды недлячистэ. Неть читнестэ невттяно спектаклят. Велесэ эйсэнек учи авам. Сон Саранскойсэ прядсь физикань-математикань факультет. Важоди начальной классонь тонавтыцякс. Сон моньгак тонавтсь. Мертядо, жалясь? Вешсь пельдень! Авам покш критикем. Сакшны спектаклянь премьератнес, свал ёвтасы мелензэ, мезе истя, мезе аволь. Велесэ свал якан эсень школав. Те иестэнть мерсть ютавтомс Велень чинть, Кеченьбуентень топодсть 400 иеть, мон ульнинь ветицякс. Теде икеле сёрмадыя сценариенть, якинек Орданьбуев, тосо кемекстызь. 
Эряви меремс, Юлия сеедьстэ сёрмали тиринь школанзо туртов кенярксчинь сценарийть. Од иестэ бажи ютавтомс Куз вакссо покшчи, косо налкси Ловняськенть. Велень эйкакштненень ускси казнеть. 
Теде башка, эсензэ театрасояк Юлия Дедина эрьва ие ютавты Куз вакссо невтема. Прявт режиссёронть марто вейсэ путсть ёвкс. Чебоксарсо сон ютась режиссурань коряс квалификациянь кастомань курсат. Ней бажи Московсо молемс истямо жо курсав. Актрисанть валонзо коряс, эряви тонавтнемс ды касомс седе тов. 
Кавто иеде икеле Юлия чачтась. Сонзэ ули тейтернезэ. Тетязо-авазо макссть чуросто вастневиця лем – Евдокия, Дуняша. Чачтомадо мейле, кавто ковонь ютазь лиссь роботамо. Эйденть марто сеедьстэ ашти мирдезэ, кона пек лезды вечкевикс нинзэ туртов. Юля ёвты тензэ ламо сюкпрянь валт. Ды ули мезень кисэ, аволь эрьва цёрась чарькоди актёронь профессиянть. Эрьва чи ютыть репетицият, мейле чокшне – спектаклят. 
Юлиянь репертуарозо покш. Улить комедият ды драмат. Маряви, сонензэ изнявить эрьва кодат рольтне. Сон машты невтеме виев образт. Аволь стяко зярыя спектаклятнесэ налкси прявт рольть. Актрисанть зярс арасть покш казнензэ. Седеяк питней ваныцятнень вечкемась. Минь кемтяно, те эрямонь вечкиця, чевте седей, валдо ломаненть весемесь икеле! 
Т.МАТОРКИНА

 

Новости

Турчак заявил о запуске конкурса социальных проектов первичных отделений «Единой России»
В ближайшее время стартует конкурс социальных проектов первичных
отделений «Единой России», лучшие проекты смогут претендовать на
грантовую поддержку Партии. Об этом сообщил секретарь Генсовета Партии
Андрей Турчак, выступая на пленарном заседании форума первичных
отделений «Единой России» в Северо-Кавказском федеральном округе.
Подробнее ...
 
20 лучших водных ревизоров Мордовии продолжат свою работу в Артеке
Сегодня в Саранске прошло заседание регионального штаба Всероссийской
экологической акции «Вода и здоровье». Там были названы имена 20 лучших
водных ревизоров республики, которые станут участниками федерального этапа
акции «Вода и здоровье»
Подробнее ...
 
Директор спортивной школы попросил депутата ГД Александра Воробьева помочь мордовской биатлонистке
 9 июня депутат Госдумы РФ, член Комитета Госдумы по
аграрным вопросам Александр Воробьев встретился с жителями
Мордовии на личном приеме. Люди обращались по разным вопросам
– в сфере ЖКХ, обеспечения лекарствами, помощи в получении жилья
и другим.
Подробнее ...
 
Молодогвардейцы - победители «Школы парламентаризма«посетили высшие законодательные органы страны
Первым пунктом экскурсии для ребят из Мордовии стал Совет Федерации Федерального
Собрания Российской Федерации, внутренний интерьер и дизайн которого поразил их своей
красотой и величием. Экскурсовод познакомила ребят с особенностями здания, провела по
главным местам Совета Федерации. Ребятам также удалось побывать в большом зале
заседаний, увидеть своими глазами рабочие места сенаторов и кресло председателя
Валентины Матвиенко. Также молодогвардейцы узнали, как проходит подготовка к
заседанию и собственно
сама
работа
заседаний.
Подробнее ...
 
Путин казизе Мордовиясто семиянть «Родительская слава» орденсэ

Июнень 1-це чистэ, Эйкакшонь ванстомань раськеютконь чистэ, РФ-нь Президентэсь Владимир Путин казинзе ламо эйкакшонь триця семиятнень «Родительская слава» орденсэ. Покш казнесэ тешкстазель Мордовиянь Зубова-Полянань райононь Ширингуши велень Урсовтнень кудораськесь. Покш промксонтень истя жо тердевсть РФ-нь ёнкстнэнь прявттнэ, косто састь семиятне, сынст ютксоль МР-нь Прявтось Владимир Волковгак.

Подробнее ...