Рубрикатор

Культура Музеесь васты инжеть
Музеесь васты инжеть

И.Д.Воронин лемсэ Мордовиянь краеведениянь музеесь тедедень августонь меельце читнестэ ютась од, мазый зданияс – Музеень-архивень комплексэс, конась ашти Мокшэрзянь подворьянть ды А.С.Пушкин лемсэ культурань ды оймсемань парконть ютксо. Комплексэсь неяви пек васолдо ды дивавты эсензэ мазычисэнзэ. Сон теке кезэрень пингень замок, ды тов совамсто маряви, теке соват ёвксонь балс: цивтёрдыця залонть валдомты покш люстра, верев ветиця кузтемаванть, арсят, каршот валгить каштордыця платиясо дамат, весемесь тосо артозь сырнесэ ды паролгавты ёжонть ваньксчисэнзэ.

Ютазь оймсема читнестэ минь эйкакштнень марто арсинек ютавтомс недлячинть седе лезэвстэ ды молемс те мазый музеентень. Чипаенть каршо Музеень-архивень комплексэсь седеяк цитнесь ды эйкакштнень туртов сон истя жо марявсь дивань таркакс. Совамсто анокстынек ярмакт, ансяк кассасо билетёрось минек кенярдовтымизь – зярс музеентень нолдыть питневтеме, секс мекс весе экспозициятне апак анокста ды музеесь важоди аволь весе вийсэнзэ. Келя, пурнамо-сэрнямо эйсэнзэ кармить эште Од иес. Миненек истя жо питневтеме макссть бахилат ды ильтимизь васенце нупалентень. Тешкстаса, минденек башка ульнесть эште кеменьшка тонавтницят тетяст-аваст ды тонавтыцяст марто. Сынст музейганть ветнесь экскурсовод, ды эйкакштне эште бажасть молемс кодамонь-викшнемань мастер­-классов. Тень кисэ эряви пандомс башка ярмакт.

Минь жо арсинек ванкшномс музеенть ськамонок ды мельспаросо совинек залонтень, косо анокстазь Мордовиянь футболонтень алтазь выставка. Сон карми пек вечкевикс цёрынькатненень, конатне налксить футболсо. Тесэ невтезь Мордовиянь содавикс футболисттнэнь формаст, бутсаст, автограф марто оскаст. Ламо экспонатт, конатнень пельде кармат содамо сыця иестэ ютавтовиця Футболонь коряс мирэнь чемпионаттонть: «Мордовия Арена» строявиця стадиононть макетэзэ, талисманось – Забивака верьгизнэсь, сувенирт, ручкат, блокнотт, флаг, фотографият. Мезе кенярдовты, музейсэнть мереви снимсемс эсь прянть ды экспонаттнэнь питневтеме. Тесэ кияк а сёвны тень кисэ. Арсян, истя карми седе товгак. Эдь ламот эйстэнек неть фотографиятнень мейле невтнесызь социальной сеттнесэ, ды, сынст ваннозь, музеев сыцятне седеяк ламолгадыть. Ошонь инжетнеяк кармить бажамо варштамс весементь эсь сельмсэст.

Футболонь выставкадонть мейле совинек омбоце нупалентень, косо невтеви Мордовиянь ЗАГС-тнэнь 100 иень важодема кист. Тесэ ламо одирьвань ды женихень платият­-костюмт, свадьбань фотографият, альбомт. Косто эште несынк, кодамо оршамопельсэ урьвакстокшнось содавикс артыцясь Ф.В.Сычков ды кодамо мазый ульнесь сонзэ нинзэ венчамо платиязо.

Музеень фойесэнть анокстазь содавикс полководецэнть, адмиралонть Феодор Ушаковонь ланга экспозиция. Тесэ невтевить кораблятне, конатнесэ командовась Ушаков, портретэнзэ, бюстонзо, се шкань матростнэнь формаст, фотографияст, сонзэ лемс строязь соборонть макетэсь.

Омбоце этажсонть, овсе кузтеманть вакссто, ушодови кезэрень пингень мебелень выставка. Стольтне-стултнэ, чавачамотне, шифоньертнэ, частнэ, банкеткатне, буфеттнэ, сервизтнэ ютасть реставраторонь-мастерэнь кедьга ды эрьванть эсензэ историязо.

Теке жо этажсонть анок выставкась, конась ёвтни кезэрень эрзятнень, мокшотнень эрямодост. Ташто музейсэнть эйкакштненень вечкевиль кезэрень кудопотмось. Сон невтеви одсонтькак, ансяк седе келейстэ-сюпавсто. Истя жо тесэ анокстазь баняпотмо, кардаз, невтевить ламо кудоютконь, паксянь кедьёнкст, конатне ней уш а вастневить велетнесэяк. Седеяк ламо тесэ оршамопелень экспонаттнэде. Улить натой эрзянь ды мокшонь тейтерень мирденень лисемань платият, конатненень 150 иеть. Монь эйкакштненень вечкевсь экспозициясь, косо невтевить мекшень кудынетне, кемень кевердема ёнкстнэ, сёвоньстэ теезь кедьгетне, гончаронь кругось ды алашань пряловажась, конань эйкакштне сеедьстэ лемдить динозавракс.  Кода мерсь музеень ванстыцясь, те залсонть сехте пек снимавтнить мекшень кирдиця атиненть вакссо, конась ашти озадо тарадсто-тикшестэ теезь шушонть (шалашонть) икеле. Мейсэ сон вечкеви весенень, кияк а соды, ансяк монсетнеяк бажасть ландямс ваксозонзо ды теемс фотография. Теде мейле экскурсиясь прядовсь, ансяк эйкакштне макссть вал самс тей кизна, зярдо пешкедить весе залтнэ. Мон жо арсян-кеман, музеень прявттнэ а стувтсызь стявтомс тей эйкакшпингень ёвксом-мельспаром – ракшатнень марто телень вирьсэ экспозициянть, конань потмова теке прыль лов.

М.Девятова

 

Новости

Од иень ярмунка

Од иень кенярксчитнеде икеле, ацамковонь 22-це чистэ, Саранскойсэ ютавтови ярмунка, косо кармить микшневеме эрьва кодат товарт ды велень хозяйствань продукция.
Ярмункасонть кармить Мордовиянь микшнемань сферань, общественной питаниянь, перерабатывающей промышленностень ды велень хозяйствань предприятиятне.

Подробнее ...
 
Турчак: Власти компенсируют гражданам затраты на покупку приставок для цифрового ТВ

Правительство РФ и региональные власти предусмотрели исчерпывающий набор компенсирующих мероприятий при переходе с аналогового на цифровое телевещание для малозащищенных слоев населения. Также в региональных бюджетах предусмотрены денежные компенсации или закупка необходимого оборудования. Совет по развитию цифровой экономики при Совете Федерации представит на ПМЭФ-2019 свой рейтинг цифровизации регионов и предложит механизм поддержки лучших региональных практик. Об этом заявил вице-спикер Совета Федерации, секретарь Генерального совета «Единой России» Андрей Турчак по итогам второго заседания Совета по развитию цифровой экономики в Новосибирске.

Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...