Рубрикатор

Культура Юбилей марто, Валентина Владимировна!
Юбилей марто, Валентина Владимировна!

Эрямонь перть эрьвантень эйстэнек уцяскась кази пек ламо ломань марто вастовомат. Веенстнэнь пельде минь тонавтнетяно, омбонстнэнь вельде варчави нардевчинек, лиятне жо теевить паро оякс-ялгакс, кинень апак пеле пшкадят куш кодамо тевень коряс, улезэ те важодеманть эли «эсенек» эрямонть. Истя лиссь, зярыя иеде теде икеле мон сынь важодеме «Эрзянь правда» газетав, общественно-политической отделс, конань прявтсо В.В.Юдина. Видькстан, Валентина Владимировнань марто минь сеске муинек кель-вал. Самай сон лездась тень теемс журналистикасо васенце эскелькстнэнь, макссь превть-ёрокчи. Ды вана те шкастонть саезь кармась тень вадря тонавтыцякс ды лездыцякс аволь ансяк сёрмадомань тевсэнть, истя жо эрямонь ламот кевкстематнесэяк.

Тиринь газетань ловныцятне вадрясто содасызь Валентина Юдина журналистэнть. Сон эрямонь тевензэ сюлмизе журналистиканть марто, 30 иень перть важоди тиринь «Эрзянь правда» газетасонть. Те шканть перть сонзэ перанзо алдо лиссть пек ламо сёрмадовкст – кулят, зарисовкат, корреспонденцият, стакачиде ёвтниця статьят… Сон шождасто, вадря кель-валсо сёрмады эрямонь весе ёнкстнэде.

В.В.Юдинань валонзо коряс, седе пек мельсэнзэ кирдевить сеть материалтнэ, конатнень вельде сон лездась ломантненень, шождалгавтынзе сынст стакачист. А мезть сёпомс, материалонь ламот геройтнень марто сон кирди кеме сюлмот, лиятнень марто теевсь вадря оякс. Сеедьстэ гайневти сёрмадовксонь геройтненень, кевкстни, кода тонат эрить, паряк, мейсэяк тенст эряви лездамс. Сынст ютксо ламо эйкакшонь триця семият, тетяст-аваст вановттомо кадовозь эйкакшт, стакасто сэредиця ломанть… Сеть, кинень сехте пек эряви лезксэсь, чевте валось ды мелень явомась. А мезть сёпомс, а эрьвантень те удалы. Ёвтаса, Валентина Владимировна – Пазнэнь кемиця ломань, ризны-палы седеезэ эрьванть кисэ, кие понгсь кодамояк стакачис, весе вийсэнзэ бажи лездамс. Сон машты эрьванть кунсоломо ды чарькодеме, максомо превс путомат ды тонавтомат истя, штобу а покордамс ломаненть.

Валентина Юдина – СМИ-нь Заслуженной роботник, казезь Мордовия Республикань Почетонь грамотасо, МР-нь Государственной Собраниянь, Печатень министерствань Почетонь грамотатнесэ ды Благодарносттнесэ ды ламот лия казнесэ. Сон ламоксть лиснесь изницякс республикань журналистэнь ламот конкурстнэсэ.

Валентина Юдина (тейтерькс Кечайкина) чачсь-кассь Покш Березник ёнксонь Вейсэ посёлкасо. Тетязо-авазо, Владимир Михайлович ды Василиса Андреевна, трясть-кастсть колмо эйкакшт: Михаил, Людмила ды Валентина. Весе сынь муизь эсь таркаст эрямосонть, эрьванть эйстэст кеме семият, превей эйкакшт, нуцькат.

Школанть прядомадо мейле Валентина мольсь тонавтнеме Н.П.Огарёв лемсэ университетэнь филологиянь факультетэв. Тонавтнемась тейтерентень вечкевсь, прянзо невтизе ансяк вадря ёндо, ды те эзь кадово вановттомо. Колмоце курсонть прядомадо мейле Валентинань кучизь тонавтнеме Ленинградов, тосонь госуниверситетэнь журналистикань факультетэв. Тонавтнемань перть практика ютась рузонь ламот газетатнесэ. Кадсть эйсэнзэ тоско важодемеяк. Ансяк сон велявтсь тиринь ёнксов, малавиксэнзэ ваксс. Сась «Эрзянь правдав» ды се шкастонть саезь важоди теске.

Валентина Владимировна – эрямонь вечкиця, кенярдыця ава, сельмесэнзэ свал налксить кенярксонь сяткинеть, чамастонзо а ёмси мизолксось. Сон покш мель марто кунды од тевс, свал бажи кинень-бути лездамс. Чинь-чоп а оймакшны телефонозо, гайневтить малавиксэнзэ-содавиксэнзэ, лиясто овсе а содавикс ломанть, весенень эряви мейсэ-бути лездамс. Ды те сонензэ а стака, мекевлангт, канды тензэ покш кеняркс. Валентина Владимировна а соды сизема, свал ков-бути капши-чии! Сон а аштеви ве таркасо, покш мель яви общественной тевтеемантень. Валентина Юдина – республикань Журналистэнь вейсэндявксонь правлениянь член, сови «Надежда» эйкакшонь социальной приютонь попечительской советэнтень. Ризны-палы седеезэ тов понгозь пиштяка эйкакштнень кисэ. Свал талнома марто корты тосо кастовиця тейтерькатнеде ды цёрынькатнеде. Лезды тенст, ков сатыть виензэ.

Нама, Валентина Юдина сайсь тёкшт аволь ансяк профессиянь тевтеемасонть. Сон – вечкиця ды вечкевикс ни, кавто тейтерень ава ды мелень явиця баба. Сон весе седеензэ ды вечкеманзо алты малавиксэнзэ туртов. Виктор Николаевич мирдензэ марто чачтсть-кастсть кавто тейтерть – Марина ды Маша. Сынь кавонест уш покшт, мирдень кедьсэть, эрить Московсо. Марина прядызе Московсо Иван Фёдоровонь лемсэ Печатень университетэнть. Маша – Г.В.Плеханов лемсэ Россиянь Экономикань университетэнть. Покш кеняркс Валентина Владимировнанень казить кавто нуцькинензэ – Сонечка ды Арина. Талны-мелявты Валентина Владимировна: нуцькинензэ касыть веёно, паряк, улевельть сёлмонзо – эрьва чистэ ливтяволь варчамост-вечксемест. Оймсема читнестэ сеедьстэ ардтни Московов малавиксэнзэ содавтомо. Кодамо седейлембе марто сон ёвтни сехте вечкевикс ломанензэ ланга!

Неть читнестэ В.В.Юдина тешкстызе юбилеензэ. Сонзэ лемс ёвтазь ламо паронь арсемат ды лембе валт. Кемтяно, весе сынь топавтовить.

 

Валентина Владимировна, «Эрзянь правда» газетань коллективесь арси теть кеме шумбрачи, валдо уцяска, семиясо ды важодемасо ансяк кеняркст, сельмесэть свал палост сияждыця толнэть. Кадык Пазось вансттанзат апаро тевтнеде, кази теть часия ды весементь сехте паронть!

Т.Аксенова

* * *

Нама, эйкакшпингстэ ламось ней а ледстяви тенек, течи минь вантано эйкакшонок лангс (Маринань 2 иесэ София тейтерезэ, Мариянь – 3 ковонь Арина тейтерезэ) ды чарькодтяно, зяро апак удо ветнеде, талноматнеде-мелявкстнэде, паряк, а кармить содамо минек эйкакшкенек, ансяк вечкемась, конань казить тенек минек тетянок-аванок, кадови седеезэнек свалшкас.

Минек вечкевикс аванок! Тонь седееть – сехте чевте ды сехте ванькс! Арась истямо ломань, конась бу пшкадевель тонеть ды аволь маря лезкс, арась истямо кевкстема, конань марто бу минь виздевлинек пшкадемс тонеть. Тон – минек сехте уцяскав эйкакшпоранок ды сехте лембе кудонок, авань чевте кедть ды виде превс путомат. Минек сехте покш уцясканок – улемс тынк, тетянь марто, тейтерекс. Тонь марто минь свал карматано вишка тейтерькакс!

Минек вечкевикс аванок! Чачома чи марто! Икеле тонь учи эштё пек ламо! Тынь тетянь марто тримизь-кастымизь минек, путынк эйзэнек превенк, ойменк ды седеенк. Эзиде вансто шка ды максыде сехте вадрянть эйкакштненень. Минек ульнесь уцяскав эйкакшпоранок, шожда од шканок, ды нейгак эрьва чистэ тынь вакссонок, ды минь марятано тынк мелень явоманк ды кеме лавтовонк. Ванстодо эсь прянк! Уледе шумбрат! Кадык Пазось вансты весе масторонь семиятнень!

Марина ды Мария тейтеренк

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...