Рубрикатор

Культура Эрзя-мокшонь театрасо – премьера
Эрзя-мокшонь театрасо – премьера

Эрзянь ды мокшонь раськень драмань театранть туртов меельце читне ульнесть талновтыцят. Октябрянь 12-це чистэ тесэ панжовсь театрань сезонось. Ваныцятнень туртов невтезель М.Ладонь «Стакшинь история» мокшонь кельсэ путовксось. Те чистэнть актёртнэ анокстасть алкуксонь кенярксчи. Фойесэнть эрьва инженть каванясть пачалкседе, симдсть позадо. Ютась «История театра в лицах» перфоманс. Теде башка, невтезельть зярыя спектаклятнестэ нурька пелькскеть.

Октябрянь 13-це ды 14-це читнестэ ютась италиянь драматургонть К.Гольдонинь «Лгун» (кавто действиясо видечи ды манчема) од спектаклянь невтемась. Сонзэ путызе тердезь режиссёрось О.А.Куртанидзе.

Мельспароль важодемс актёртнэнь марто, сеске муинь мартост кель-вал. Труппась вечксы эсь важодеманзо. Весементь сынь теить вейсэ, теке вейке ансамбля ды те кецявты. Эрьвась эйстэст, кодамо бу роль аволь налксе, прявт роль эли омбоце планонь, путы весе мелензэ-виензэ. Сынь важодить паро мельсэ. Мон кеман, те карми аволь меельце спектакля, конань путса Нацтеатрасо. Арсян, эряви саемс классиканть эли неень шкань репертуаронть. Кадык «Лгун» спектаклясь карми аволь ансяк премьеракс, сон тееви театрань покш событиякс! – кортась О.А.Куртанидзе.

Сценань шаршавтне панжовсть ды икеленек лиссть Венециянь ульцятне-кудотне. Аштесь натой венч, конасонть геройтне укшность. Спектаклясонть ламо музыка, гайгить морот, сынст морыть сынсь актёртнэ.

Прявт героенть Лелионь (Лгун) налксить Павел Михайлов ды Дмитрий Мишечкин. Зяро жо манчема юты сынст пельде спектаклянь перть! Те манчемась кежть а савты, сон пейдевти. Ули мель тешкстамс Тимофей Чудаевень виев налксеманзо (доктор Баланзони). Сонзэ кавто тейтерензэ – Беатриче ды Розаура, кавонест туртов вечкевсь Лелио, сынь анокт тюрьгадомс кисэнзэ! А чарькодить, эйсэст манчить. Неть тейтертне тукшныть мельс Оттавионень ды Флориндонень, конат а потыть, аштить эсь уцяскаст кисэ. Актёронь кавто составтне эрьвась эсь ладсо невтизе героензэ. Арась мель киньгак сялдомс. Премьерась ютась парсте, залось пешксель ваныцядо, конат весе седейсэ цяпасть налксицятненень.

Октябрянь 15-це чистэ ульнесь МР-нь Заслуженной артистканть Нина Абросимовань творческой чокшнезэ, кона алтавсь сонзэ юбилеентень. Васняяк невтезель А.Галинэнь «Ретро» спектаклясь, косо актрисась налкси Нина Ивановнань. Мейле ушодовсь кенярксчись. Лембе валт ёвтась МР-нь Культурань, национальной политикань, туризмань ды архивень тевень министрань полавтыцясь С.Н.Баулина:

Пазонть пельде тынк эйсэ ули сяткине. Сценической образтнэнь вельде невтядо тенек авань аволь шожда уцясканть. Ваныцятне вечктядызь талантонк, ойменк кисэ. Арсян тенк творческой ламо проектт ды эрямонь кеняркст!

Паро валт алтасть Саранскоень промышленно-экономической колледжень важодицятне, косо Н.Абросимова ламо иень перть вети театрань студия. Истя жо вал сайнесь Национальной театрань прявтось С.И.Дорогайкина.

Казне анокстасть Нина Анатольевнань туртов роботань коряс ялганзояк. Анатолий Нуштайкин морась сонзэ туртов вечкемадо моро. Седе тов сцена лангс лиссь Лариса Гузеева (Л.Антипкина) ды ушодовсь «Давай поженимся» передачась. Мартонзо, нама, лиссть лия ветицятне Василиса Володина (Е.Исайчева) ды Роза Сябитова (Е.Гудожникова). Одирьвакс тердевсь юбиляршась. А уш кодат мирдть тензэ кочкасть! Вейкесь омбоцеде паро. Сынст налксесть В.Стороженко, Д.Мишечкин ды А.Анисимов. Вейкесь тонавтсь кирнявтнеме скакалка вельде, омбоцесь – тигрань дрессировамо, колмоцесь – румбань киштеме. Ваныцятне пейдсть сельведь марто, мезть кортамс, тень эрявсь неемс!

Сцена лангс тердезель Н.Абросимовань авазо Евдокия Николаевна. Сонзэ туртов эйкакшонзо ды нуцьканзо вейсэ морасть моро.

Т.Маторкина

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...