Рубрикатор

Культура Сёксь. Пушкин. Болдина
Сёксь. Пушкин. Болдина

Унылая пора!

          Очей очарованье!

Приятна мне твоя

          прощальная краса.

– Люблю я пышное

         природы  увяданье!

В багрец и золото

               одетые леса…

Неть весенень содавикс стихотворениянь строчкатнень рузонь ине поэтэсь Александр Сергеевич Пушкин сермадынзе вечкевикс Болдина велесэнть. Те а покшке велинесь малав 300 иеть ульнесь Пушкинэнь раськетнень имениякс. Сонсь поэтэсь сакшнось тей колмоксть ды эрясь тесэ весемезэ ветешка ковт.

Истя лиснесь, неть таркатнесэ сон эрсекшнесь седе сеедьстэ сексня, ды тесэ сермадозельть те мазый шкадонть сехте паро стихотворениянзо, повестензэ ды поэманзо: «Евгений Онегинэнь» меельце главатне, «Повести Белкина», «Медный всадник», малав весе сонзэ ёвксонзо. 1830 иень колмо ковтнес тосо сермадозельть малав ведьгемень эрьва кодамо жанрань произведеният, ды Пушкинэнь биографиясо те шкась кандтни «Болдинская осень» лементь.

Болдинав молема мелесь монень сакшны эрьва сексня, зярдо ушосонть чувттнэ артовить ожо-тюжа-якстере тюссо ды пертьпельксэсь пешкеди лопань прамонь каштордомасо. Тедеде минек экскурсиянок эйкакштне марто удалась. Чись манеель ды килангось Нижней Новгородонь енксов ульнесь мелень витицякс. Ардынек машинасо Мордовиянь колмо районга: Ромодановань, Ицялонь ды Покш Игнатовань. Дивавтымизь кичиретне, сехте пек «Смольный» раськень парконть пачк ардомась – зярошка тосо мазычи, седеесь кенярды! Ожо тюссо артозь чувттнэ теке чипаень палнэть, ардат вакскаст ды оймсят!

Болдинань музеентень-заповедникентень пачкодезь неят пек ламо машинат ды автобуст. Туристтнэде тесэ, нама, пек ламо сексня. Весень ули мелест неемс се поранть, конась истя кенярдовтсь  содавикс поэтэнть. Алкукскак, имениянть сад-пиретнева якамсто ежось пек паролгады, тесэ ламо-мезе кадовсь истямокс, кода ульнесь  се шкастонть, зярдо эрясь поэтэсь. Азортнэнь кудосонть, косо эрясь Александр Сергеевич Пушкин, ней музей. Ванстовсть флигелесь, весе паркось, мазый эрьктнень ды чувттнэнь марто. Лия зданиятне строязельть одс архивень документтнэнь мельс саезь. Стявтозель Успениянь церьковась, конань эште строякшнызе Александр Пушкинэнь покштязо 18 пингенть прядовомсто. Одкстомтозель эште вейке кудось Львовка велинесэнть, косо эрясь поэтэнть церазо А.А.Пушкин. Тосо жо ванстовсть церьковась ды церковно-приходской школась. Ней те кудосонть «Повести Белкина» произведениянь геройтнень музей. Тедеде миньгак пачколинек тозонь. Дивавтымизь тосо кезэрень кудонь курмотне-кармотне, пианинась, оршамопельтне, конатне ванстовсть зняро пингеть. Интерьерэсь теезь истя, кода сермады ланганзо эсь повестьсэнзэ Пушкин.

Болдинасо А.С.Пушкинэнь музейсэнть-заповедниксэнть анокстазь ламо экскурсият, мастер-класст эйкакштнень туртов. Васняяк, нама, эряви ютамс музейганть, косо невтезь поэтэнть эрямо шкань атмосферась, сонзэ кедьсэ сермадозь стихотворениятне, тесэ ламо портретт, артовкст. Пароль бу саемс экскурсия гид марто, тосонь евтницятне пек ламо содыть ды эйкакштне кунсолыть эйсэст кургонь автезь. Одкстомтозель парксонть азортнэнь панема-пидема кудось, баняст, алашань кардазось, сюронь кирдема таркась, слугатнень эрямо кудынетне. Парксонть кой-кона чувттнэ эште ледстнить сонсензэ  Александр Сергеевич Пушкинэнь.

Усадьбадонть аволь васоло панжозь «В мире пушкинских сказок» эйкакшонь музей, косо невтевить поэтэнть евксонь персонажтне. Ушованть ладсезь А.С.Пушкинэнь евкстнэстэ чувтонь кеврунготне ды сонсензэ поэтэнть скульптурась. Ули тесэ костюмернойгак, косо прокатс максовить тейтерь-авань, церань ды эйкакшонь кезэрень оршамопельтне.  Ламот бажить снимсевтемс кезэрень платиясо ды аламошкас велявтомс ютазь пингетнес.

Болдинасто ардомсто, эйстэдензэ ветешка  вайгельбестэ, минь рединек вейке велине – Пикшень эрзянь лементь марто. Тосо, келя, ули эрзянь раськень культурань ды бытэнь музей. Арсетяно, сыця иень сексестэнть минь таго пачкодтяно Болдина велев ды содавтсынек Пикшень велинентькак. Ансяк те уш карми од ды лия история.

М.Девятова                    

 

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...