Рубрикатор

Культура Н.А.Абросимова: «Актёронь профессиясь мельстуиця!»
Н.А.Абросимова: «Актёронь профессиясь мельстуиця!»

МР-нь Заслуженной артисткась Нина Анатольевна Абросимова ламо иень перть важоди Эрзя-мокшонь раськень драмань театрасо. Сон чачсь Покш Игнатбуень Ташто Кшуманця велесэ. 1985 иестэ семиянек састь эрямо Саранскоев. Сынст семиясо ниле эйкакшт: колмо сазорт ды вейке ялакс. Нина уш вишкапингстэ содась: карми артисткакс. Сон лембестэ ледстни се шканть, зярдо ялганек явсть мель художественной самодеятельностентень. Школанть прядомадо мейле яксесь Профсоюзонь культурань дворецэв, косо тонавтнесь Г.П.Камынина, Л.М.Денисова, В.В.Долгов педагогтнень кедьсэ. Седе тов Нина тусь тонавтнеме Казанень Культурань государственной институтонь режиссурань ды актёронь мастерствань факультетэв.

– Тонавтнемась пек тукшнось мелезэнь, вете иетне ютасть прок вейке чи. Минек ульнесть виев ды содавикс тонавтыцянок. Меельце курссо тонавтнемстэ тердсть эйсэнь Мордовияв «Ташто койсэ» спектаклясо налксеме. Эзинь саво, ульнесь дипломной спектаклям. Тонавтнемстэ важодинь театрасо ды гимназиясо, тоско эйсэнь кадсть, макснесть натой квартира… – ледстни актрисась.

Ансяк сон эзь кадово Казанев. Велявтсь тиринь ёнксов. Ды а янкси. Минек Национальной театрась ансяк пурнавсь. Тесэ ушодовсь мельстуиця покш важодемась.

– Нина Анатольевна, ледстнетядо васенце роленк?

– Нама, те а стувтови! 1991 иестэ Ю.ОНилэнь «Любовь под вязами» спектаклясо ульнесь васенце покш ролем. Сюкпря ёвтавлинь А.Пудиннэнь, кона тердимим тей. Актёронь профессиясь стака, теке марто пек мельстуиця. Минь, актёртнэ, театравтомо, сценавтомо а эрятано.

– Содазь, ламо иетнень перть налксиде ламо спектаклясо эрьва кодат рольть. Конатне кадовсть мелезэнк ды оймезэнк?

– Сеске весе а ледстявить. Таго жо ёвтаса Ю.О Нилэнь «Любовь под вязами» (Абби), Ж.-Б.Мольерэнь «Шумбрат, Сганарель», К.Абрамовонь «Васолдонь инже» (Палага), конань невтнинек кеветеешка иеть, Э.Портерэнь «Уроки радости» (Нэнси). Пек вечкеви тень В.Мишанинань «Босиком по облакам» спектаклясонть ролем (Дуся), мезе берянесь, путовксонть ней а невтнетяно, кодаяк а муеви налксеме вейке рольсэнть вишка тейтерне. А.Толстоень «Делец» (Фрейлен Дрошке), М.Ладонь «Очень простая история» (Зорька скал) ды лият. Тедеде путынек А.Галинэнь «Ретро» спектаклянть. Тосо налксян Нина Ивановнань, кона эрямонзо перть важодсь психиатрической больницясо. Режиссёрось ладизе истя, эрявсь невтемс, те стака роботась стяко эзь юта, героинясь пижни, кайсеви ломань лангс, сонзэ аволь шожда уцясказо. Те роленть коряс ёвтазельть эрьва кодат мельть-арсемат, кить – сялдсть, лиятне – шнасть.

Неень шкане театрась аноксты од премьера, те – К.Гольдонинь «Лгун» путовксось. Нина Абросимова тосо налкси Коломбинань. Нина Анатольевнань ламо ролензэ ёвкссо. Кода корты актрисась, сон пек вечки ёвкссо налксеме, героензэ сеедьстэ Яга Бабась, Ведьмакась ды лият.

– Ней од актёртнэнень седе шожда пряст невтемс, театрась тердтни режиссёрт, конат а пелить путнемс эрьва кодат спектаклят. Ульнесть истят шкат, минь аштинек тевтеме, – ледстни Н.Абросимова ды полады:

– Сюкпря Пазонтень, монь перька свал валдо, паро ломанть. Ульнесь истяяк, спектакляв эзть сае, мейле шкань ютазь кемекстатадызь рольс. Рольтне эрьва кодат. Конат стакасто максовить, конат максыть сёлмот.

Нина Абросимова, театрадо башка, 15 иень перть важоди Саранскоень промышленно-экономической колледжсэ. Тосо вети «Прикосновение» театрань студия. Тонавтницятнень марто путнить спектаклят. Эсь пряст невтнить эрьва кодамо фестивальсэ. Саемга, «Огни Рампы», «Сохраним этот мир» театрань коллективень фестивальтне. Сеедьстэ путнить классиканть.

– Эряви саемс истямо пьеса, косо ули смусть, ули паро содержания, тонавтома. Мезекс невтемс чаво спектаклят? Эйкакштнень марто важодемась тень вечкеви, мон мартост оймсян, пурнан вийть, – корты Нина Анатольевна.

Сон лембестэ ёвтни тонавтницядонзо. Сынст ютксто улить истят, кить колледжсэ тонавтнемадо мейле полавтызь мелест ды тусть актёронь киява, прядсть Московсо театрань училищат. Саемга, Илья Шумкин тонавтнесь Щепкинэнь высшей театральной училищасо, важодсь Малой академической театрасо. Михаил Зверев – неень шкане Рузонь драмтеатрасо од содавикс актёрось.

 – Миша монь тонавтницям. Сон ульнесь виздиця, сэтьме, мартонзо ламо важодинь, сон талантливой, эсь прянзо сеске невтизе. Бути ломаненть ули мелезэ важодемс, сон а нузялды ды моли икелев – весемесь лиси! Истя жо тешкставлинь Дарья Аросланкинань, Олеся Равиловань, Владимир Саликовонь ды ламо лиятнень.

Театрань искусствас покш путовксонть кисэ Нина Абросимова казезь ламо Почётонь грамотасо, Благодарностьсэ, 2017 иестэ сонензэ максозь «МР-нь Заслуженной артистка» лемесь.

– Нина Анатольевна, инескеть, ёвтнеде семиядонк.

– Монь ули тейтерем Алина, сон тонавтни Н.П.Огарёв лемсэ МГУ-нь ИНК-со, актрисакс эзь туе. Сон монь туртов аволь ансяк эйкакшом, сон – паро ялгам. Обуцянь коряс седе кеме, нардев, эрямонь вечкиця, свал ёвтасы мелензэ, мезесь истя, мезесь аволь. Мартонок эри авам Евдокия Николаевна, карми тензэ 81 ие. Иензэ лангс апак вано, авам эряза, тевтеме а ашти, превень максыця. Бути мейскак а кунсолосак, шкань ютазь чарькодят, сон видестэ кортась! Весе сазорнэк-ялакснэк эрятано покш ояксчисэ. Сынь сакшныть спектаклянь ваномо. Кецян, минек семиясь свал бажи улемс вейсэ. Вейсэнди минек ялаксонок.

Октябрянь 13-це чистэ Нина Абросимова тешкстасы 50 иень юбилеензэ. Арсетяно тензэ кеме шумбрачи, паро уцяска, мельстуиця рольть, важодемасо – од тёкшт!

Октябрянь 15-це чистэ 17:00 чассто Национальной театрасо невтеви А.Галинэнь «Ретро» спектаклясь ды карми «Удивительные люди и я» Нина Абросимовань творческой чокшнезэ. Садо ваномо!

Т.Маторкина

 

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...