Рубрикатор

Культура Путешествия Саранскойстэ Ессентукив
Путешествия Саранскойстэ Ессентукив

Ессентуки – ошось содавикс, сехте пек, нать, шумбрачинь паролгавтомань ведензэ кувалма. Советэнь шкасто тосонь санаториятне гайнесть Союзонть келес, ды арасель вейкеяк ломань, конась бу а яксевель сеть шкатнестэ тов оймсеме. Неень шканеяк Кавказонь Минералонь Ведень курорттнэ пек эрявикст, ды шумбрачинь паролгавтомо тов ардтнить одтнэяк­­-сыретнеяк. Ансяк питнетне тосо аволь ютазь пингень кондят. Паро, тедеде тосо эште эзть сае налог «коштонть кисэ». Сыця иестэнть тов самонть кисэ истя жо сави пандомс 50 эли 100 целковойть чизэнзэ.

Ансяк а карматано зярс кортамо берянде ды сыргатано те мазый, лембе ошонтень машинасо. Ардомс тов, ялгат, Саранскойстэ 1350 вайгельпеть ды кинтень эряви ютавтомс вейке чи ды ве. Ансяк а весе ветницятне цидярдсызь те килангонть ды ардсызь апак удо. Кись аволь шождыне. Секе-тев трассаванть вастат килангонь витницят, савкшнось аштемс «пробкасо» часошка ды седе ламо. Минь ардынек семиянек ды савкшнось секе-тев лотксемс ярсамо. Валске рана сыргинек 5 чассто ды пачкодинек Ставрополень ёнксов чокшнень малав 8 чассто. Удалов кадовсть Пензась, Саратовась, Волгоградось, Элистась ды Калмыкиянь пси паксятне. Удомо минь арсинек лоткамс Благодарный а покшке ошонтень, косо инжень кудонть кис савсь пандомс 2,5 тёжат.

Омбоце чинь валскесь ульнесь пиземев, марявсь, менельстэ ведесь валозь валы. Ессентукив ардомс тенек кадовкшность эште 300 вайгельпеть. Минеральные Воды ошканть уш весе китне пешксельть бутрав ведте. Ялатеке ардынек мелявкстомо ды обед ёнов пачкодинек санаторияв. Мейле уш телевизорга ванынек, кодамо ненастия сась Кавказов. Кавто-колмо чить савкшнось кекшнемс пиземеденть, ды таго ошонть вельксэс лиссь чипаесь. Сестэ уш минь ванкшнынек сонзэ мазычинзэ, пандотнень, парктнень, варчинек потморунгонь паролгавтыця эрьва кодамо ведтнень. Ессентукисэ весе ошось чувто потсо, парктнесэ аштить «Ессентуки №4» ды «Ессентуки №17» минеральной ведень бюветтнэ, косо ведесь максови питневтеме ансяк эсеть кружкас эли апокш кедьгес. Покш бутылкань саемс эряви пандомс 5 целковойть пельлитранть кисэ. Минь яксинек ведте симеме эрьва чистэ колмоксть, кода тенек мерсь врачось, ды истя жо мельспаросо оймсинек ды лексинек тосонь парктнень коштто. Тосонь коштось, алкукскак, тантей, сон истямо, нать, цветиця чувтотнень кувалма. Парктнесэ пек ламо урнэть, конатнень эйкакштне эрьва чистэ андсть кшиде ды пештинеде. Сынь кидеяк а пелить ды сеедьстэ сынсь вешить ломантнень кедьстэ ярсамопель. Ансяк Ессентукинь ды целанек Кавказонь Минералонь Ведень курорттнэнь тешксэст аволь урнэть – пандонь нармунтне – тумо атякштне.

Машинасо оймсемс пек паро. Минь ардтнинек весе КМВ-нть. Ульнинек Кисловодскойсэ, косо истя жо лезэв ведь марто ламо лисьмапрят. Якинек Пятигорскоень Машук пандонтень, косто ошось неяви теке кедь лангсо. Мельспаросо ардтнинек Кабардино-Балкарияв ды кузнинек Эльбрус пандонть пряс. Пертьпельксэсь эзимизь кенярдовто, пандонть прясо мольсь лов, секскак кузнинек, нама, канатонь кинть вельде, 3445 метрас. Европань жо сехте сэрей пандонть сэрезэ 5642 метрат. Кабардино-Балкариясь – пек мазый республика. Эльбрустонть а васоло ашти Чегем пандось, сонзэ ало чудить Нарзанонь покш лисьмапрят, модась жо пешксе мазый цецядо. Кадык зярыя метрадо седе верев аштить ловонь пандот.

Тосонь раськень ломантне пек парсте маштыть панеме-пидеме, ды минь мельспаросо варчнинек кабардинтнэнь-балкартнэнь ярсамопелест ды симемапелест. Эйкакштненень пек вечкевсть хичинтнэ – модамарьстэ теезь пачалксетне. А уш кодат шашлыкть тосо пидить – келеть нильсак!

Килангось тов малав весе юты пандо юткова, ущельятнева, ансяк дивсят минек масторонть мазычинзэ ды виензэ кувалма. Кодат ансяк ошт ды велеть эзинек нее, пейдинек­-дивсинек сынст лемест кувалма ды вастынек натой вейке эрзянь лем марто. Покш Балыклей велесь, конась ашти Волгоградонть ёнкссо, келя, ловови эрзянь велекс. Кендже-Кулак велинесь Ставрополень ёнкссо овсе аволь минек раськень, кадык лемсэнзэ улияк минек келень вал.

Оймсема шкась Ессентукисэ ютась теке вейке чи, ды сась шка туемс одов тиринь ёнксов. Мекев ардомсто вастынек Калмыкиянь паксятнестэ лишмень, скалонь ды ревень стадат, конатне апак пеле якасть китнень малава ды секе-тев, теке азорт, лиснесть трассантень. Чуросто вастневиця ломантне прясто пильгес вельтязельть сеськеде кекшемасо, тосо эйстэст июньстэ а кекшеват ковгак, а лездыть кодаткак пургсемкатне-ваднемкатне.

Чокшне ёнов минь пачкодинек ошонтень-героентень Волгоградов. Тосо арсинек печтямс венть таго инжень кудосо. Питнесь ней седе вишкинель – 1,5 тёжат целковойть. Валске рана саинек эйкакштнень экскурсияв ошканть. Якинек васняяк Мамаевень Курганов, Мастор-авантень кеврунгонть ваксс, путынек цецят Ине Отечественной войнасонть чавовозь солдаттнэнь вейсэнь калмонть лангс, неинек, кода тосо полавтови почетонь караулось.

Мейле ардынек Рав леенть чиресэ аштиця «Сталинградонь битва» музеентень-комплексэнтень, конась дивавты эсь покшолмасо ды тосонь войнань шканть невтемасо покштненьгак-вишкинетненьгак. Вана косо вельми седейсэнть алкуксонь патриотизма!

Мельспаросо ютась те путешествиясь минек масторонь ёнкстнэва ды, пароль бу, нама, истя ванкшномс тиринь масторонть педе-пев. Россиясо ули мезе невтемс туристтнэнь туртов ды а мезть яксемс оймсеме омбо масторга, зярдо тиринь масторсонтькак улить истямо мазычить!

Марина Девятова

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...