Рубрикатор

Культура Сыргить покш гастролев
Сыргить покш гастролев

«Большие гастроли» Весероссиянь программась ушодсь важодеме 2014 иестэ саезь. Сонзэ ютавтыцязо – гастролень тевтнень лездамост коряс Федеральной куншкакурось. Иеде иес Россиянь седеяк ламо театрат явить мель те программантень. Саемга, тедеде карми 81 регион, 230 театрат, сынь невтить 1900 спектаклят! Покш гастрольтне ютыть Калининградсто саезь Владивостоконть видьс. Те программанть вельде ваныцятнень туртов ютыть вечкевикс актёртнэнь марто вастовомат, сынь несызь эрьва кодамо театратнень сехте вадря путовкстнэнь, од премьератнень. Спектаклятне алтавить кода покштненень, истя жо вишкинетненень.

Минек республикась совась те программантень. МР-нь Някань государственной театрась сырги Удмуртияв. Тосо октябрянь 27-29-це читнестэ невтьсы М.Супонинэнь «Проделки Козы-Дерезы» спектаклянть. Мордовияв жо сы Марий Элэнь някань театрась, кона невтьсы А.Толстоень ды К.Коллодинь «Золотой ключик» ёвксонть.

МР-нь Рузонь драмань театрась гастролев моли Дзержинск ошонь драмань театрав. Тосо сынст учить ноябрянь 17-19-це читнестэ. Минек театрась невти 4 путовкст: Г.Горинэнь «Поминальная молитва» ды «Забыть Герострата», О.Голдсмитэнь «Ночь ошибок», Р.Сефень ды Т.Карелинань «Тайна Бабы-Яги». Теке жо шкане Дзержинскоень драмань театрась сы Саранскоев. Инжетне невтить колмо комедият: В.Катаевень «Квадратная радуга», М.Камолеттинь «Ревнивец», Н.Эрдманонь «Самоубийца» ды Г.Соколовонь «Финист – Ясный сокол» ёвксонть.

Ков сырги гастролев Эрзянь ды мокшонь раськень драмань театрась, минек туртов ёвтнесь сонзэ прявтось С.И.Дорогайкина.

– «Большие гастроли» регионъютконь программасонть минь аволь васенце ие. Ансяк тедеде Федеральной куншкакурось макссь тенек государственной лезкс. Истя, минек театрась моли Чебоксары ошонь Чувашиянь Рузонь драмань театрав. Те карми октябрянь 25-27-це читнестэ. Тосо невтяно зярыя спектаклят, истят кода: А.Островскоень «Не в свои сани не садись», А.Толстоень «Делец», Э.Портерэнь «Уроки радости», Ю.Кимень «Кто принцессу поцелует?». Теке жо читнестэ Чувашиянь драмань театрась невтьсынзе Саранскойсэ Э.Шмиттэнь «Отель двух миров», К.Гольдонинь «Венецианские близнецы», М.Камолеттинь «Боинг-Боинг» ды И.Широбоковань «Одни в городе или весёлые уроки ОБЖ» спектаклятнень. Сынь кочкизь, кодат спектаклят тенст эрявить, миньгак истя жо кочкинек сень, мезе вановлинек. Теде башка, кармить полавтомань гастрольть. Ноябрясто сы тенек Татарстанонь Альметьевск ошонь театрась, минь сыненст мольтяно мартсто. Истя жо спектаклянь невтеме мольтяно Самарав, Тольяттив, Жигулёвскоев. Нама, гастрольть эрявить. Невтемс эсь прянть, теевемс содавиксэкс лия театратнень марто, ладямс ояксчинь сюлмот режиссёртнэнь марто. Мелят ардтнинек Тамбов ёнксонь Мичуринск ошов. Ваныцятне пек лембестэ вастымизь! Зяро паро лембе валт тенек ёвтасть ды мейлеяк сёрмадсть.

Светлана Ивановна, зярдо тынк панжови театральной сезонось? Мейсэ кецявтсынк ваныцятнень?

– Эрзянь ды мокшонь раськень драмтеатрасо од сезонось панжови октябрянь 12-це чистэ. Невтьсынек М.Ладонь «Стакшинь история» мокшонь кельсэ путовксонть. Мейле, октябрянь 13-14-це читнестэ ули премьера. Ваныцятне несызь К.Гольдонинь «Лгун» од спектаклянть. Сонзэ режиссёрось О.Куртанидзе. Истя жо путынек эйкакштнень туртов ёвкс, те – А.Эриксононь «Андерсен-Фантазия» музыкань спектаклясь (реж. Л.Шахова). Премьерась ули октябрянь 15-це чистэ.

Теде башка пачтявлинь, общественной деятеленть, педагогонть, драматургонть Г.Я.Меркушкинэнь 100 иетненень анокстатано «Генерал Пуркаев» сонзэ пьесанзо коряс вейке пельксэнь невтема. Весень паро мельсэ учотано Эрзянь ды мокшонь раськень драмань театрасо!

С.И.Дорогайкина ёвтась, ули мелест ютавтомс драматургиянь конкурс. Сынь учить эрзянь ды мокшонь кельтнесэ сёрмадовкст.

Кода карминек содамо, Нацтеатрась моли «Кееда» раськень театратнень эйкакштнень ды од ломантнень туртов регионъютконь фестивалев. Сон карми ютамо октябрянь 1-6-це читнестэ Калмыкиянь Элиста ошсо. Минек театрась тосо невтьсы И.Черкашинэнь пьесанзо коряс «Злой Тэнгу» музыкальной ёвксонть (реж. Л.Шахова).

Т.Маторкина

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...