Рубрикатор

Культура Мордовиясо улемась макссь тензэ вийть
Мордовиясо улемась макссь тензэ вийть

«Эрзянь правда» газетась аволь весть сёрмалесь Михаил Седойкиндэ, кона эри Хабаровской краень Комсомольск-на-Амуре ошсо. Эрзянь цёрадонть материалтнэ киньгак эзизь кадо мельтеме. Михаил – I-це группань инвалид, тень лангс апак вано, морси сцена лангсо. Те кизэстэнть Михаил Григорьевичень пельде сась нурька сёрма, косо сон пачтясь Мордовияв самодонзо ды тердсь вастовомо. Те кулясь кецявтымим. Содан, сон ламо иень перть арасель тиринь ёнкссо, пек бажась самс, ансяк тень теемс ульнесь аволь шожда: пек васоло килангось, ламо шка саи самолётсо ливтямось, стака ардомс минек китнева ды лия учреждениятнева инвалидэнь коляскасо. Ды вана мелесь топавтовсь!

Вастовинек Михаил Григорьевичень марто гостиницасо, ков сон лотксесь Ирина Петровна нинзэ марто. А муевить валт, кодамо мельспаросо аштесь, зярдо велявтсь Дубёнка ёнксонь Кенде тиринь велестэнзэ.

Михаил Григорьевич, кода пачкодиде?

– Сюкпря, парсте. Мон араселинь Мордовиясо 24 иеть. Вана кода пачкодинек: васня ардынек машинасо Хабаровскоев, тосто кавксо часонь перть ливтинек Московов, мейле ливтинек Ульяновскоев, косо вастымизь Ваня братом ды саимизь Кендев. Велесэ весе шумбракстнить мартон, пшкалить, чаматне жо а содавить тень, стувтовсть… – ёвтнесь инжесь.

Мейле Михаилэнь тердизь Кенде велень покшчив, сон ютась Культурань кудосо. Ломантне шкадо икеле марясть сонзэ самодо, секскак анокстасть. Михаил морась ламо морот. Залось пешксель ломанде, аштесть натой стядояк. Эрьва морось вастозель лембестэ, ваныцятне цяпамсто стякшность, содавикс моротнень морасть мартонзо вейсэ. Марявсь, пелезэ залось ульнесть роднянзо-раськензэ. Эрьва кодамо ошсто сакшность двоюродной сазоронзо ды братонзо эйкакшост ды нуцькаст марто. Сынь свал кирдить Седойкинтнэнь марто ояксчинь сюлмот. Теде башка, Седойкинэнь инжекс тердтнизь Дубёнка ёнксонь райононь чив, косо сон истя жо морась.

Михаил Григорьевич, кода тенк Саранскоесь?

– Саранскоесь тунь а содави. Пек тусь мелезэнь. Кодамо ульнесь 70-це иетнень прядовомсто ды кодамо теевсь ней! Мазый, ванькс, ламо эрьва кодамо оймсемань таркат. Эрьва чистэ вете часонь перть ваннынек ошонть, тесэ эрить кавто лелян. Малавикстнэнень покш сюкпря, кияк эзимизь кадо ськамонок, свал ульнесть вакссонок. Тесэ коштоськак лия, аволь истямо летьке, кода минек. Пси, ялатеке лексеват. Кие бу содаволь, кода савлинь тей эрямо…

Ёвтнеде мезеяк Комсомольск-на-Амуре оштонть.

– Те ошось промышленной, улить авиационной (нолдыть неень шкань самолётт), судостроительной, нефтеперерабатывающей, металлургической заводт. Ярсамопелесь ды оршамопельтне тынк коряс седе питнейть. Мезе рединь, минек ошсо инвалидтнэнь туртов доступной средась седе виев, парсте ладязь.

Михаил Григорьевич а ашти тевтеме. Эсензэ ошсо пурнась «Позитив» ансамбля, косо морсить вете сокор ломанть, сон мартост важоди, тонавты морамо. Мелят ютавтсть 8 концертт, тедеде – уш 14. Ней Михаил пурны Хабаровскоев, косо сентябрянь 16-20-це читнестэ карми морамо. Тосонь филармониясо сон морси эрьва ие.

Мордовиясо улемась, малавикс ломантнень марто вастовоматне, нама, макссть сонензэ ламо вийть ды паро ёжо. Кудов велявтомадо мейле морынзе-сёрмадынзе «Гимн России», «Течёт река Волга», «Тонкая рябина», «Живи, Мордовия моя» моротнень эрзянь кельсэ.

Т.Маторкина

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...