Рубрикатор

Культура Мордовиянть ды ирландиянть вейсэнди ламось
Мордовиянть ды ирландиянть вейсэнди ламось

 

Февралень 1-2-це читнестэ Саранскойсэ ютась СМИ-тнень туртов информационной семинар. Европань Советэнть пельде тей сакшнось экспертэсь, Ирландиянь кельсэ Nuacht RTE телеканалонь программатнень редакторось Брендан Делап. Кавто чинь перть сон кортась Мордовиянь журналисттнэнь марто, евтнесь эсь важодемадонзо ды кевкстнесь минек национальной СМИ-тнень башка енкстнэде. Кода лиссь, Мордовиясь ды Ирландиясь ламосо малавикст. Теде Брендан Делап евтнесь «Эрзянь правдантень» интервьюсонть.

– Семинарсонть улемстэ мон неинь, мезесь вейсэнди минек. Ирландиясо прявт келесь – англань, эйсэнзэ кортыть седе ламо ломанть. Масторсонок ней эрить 4,5 миллионт ломанть ды ансяк 70200 эйстэст эрьва чистэ кортыть ирландиянь кельсэ. Ламот чарькодить тиринь келенть, ансяк а кортыть эйсэнзэ. Кода карминек содамо, Мордовиясо тевтне аштить малав истя жо: прявт келесь тесэ – рузонь, эрзянь ды мокшонь кельтнесэ ломантне кортыть седе сеедьстэ велесэ. Малавикстано СМИ-тнень коряскак: аволь покшт тиринь кельсэ газетатнень тиражост, национальной СМИ-тне лиснить государствань лезкс вельде ды седе тов.

– Кода ней аштить тевтне ирландиянь келенть марто?

– Ламо иеть Ирландиясь ульнесь Великобританиянь колониякс. Ды ансяк 90 иеде теде икеле теезь ирландиянь государствась. Ирландиянь келенть лангс те весе кадсь покш тешкс. 19-це пингестэ эйсэнзэ овсе а меревиль кортамс. Бути эйкакшось евтыль ирландиянь кельсэ вал кудосо эли школасо, эйсэнзэ чавильть. Ды неть койтне куватьс эзть изняво. Ломантнень превс чапозель мелесь: тиринь келесь а карми эрявомо, сон косояк а маштови тевс нолдамс. Бути жо ломанесь туиль Ирландиясто Англияв эли Америкав, тиринь келенть тензэ овсе эрявсь стувтомс. Истят арсематне эрясть ламо иеть. Невтемга, монь тетям-авам важодема таркасост свал кортыльть англань кельсэ, тиринь келест гайгиль ансяк кудосо. Бабам жо англакс овсе беряньстэ кортыль, ансяк весемесь, мезенть минь сермадылинек ды ловнылинек, ульнесь англань кельсэ. Арасель ирландиянь кельсэ ловномань ды сермадомань культура. Тень вадрясто невтить эмигрантнэнь кудов сермаст. Сынь сермадыльть США-сто Ирландияв англань кельсэ, кадык кудосост тиринь келесь ульнесь ирландиянь. Серматне ульнесть ильведькс марто, эдь сермадыцясь беряньстэ содылизе англань келенть, ансяк сермадомс ирландиянь кельсэ кой арасель. Весе тень вельде келенек емамо лангсоль.

Ней тевесь аламонь-аламонь полавтови. Ирландиянь государствань тееманть марто келень ванстомантень кармась явовомо пек покш мель. Кемекстазель закон, конань коряс ирландиянь келесь тонавтови весе школатнесэ. Ирландиянь келенть эряви содамс государственной учреждениятнесэ важодеманть туртов, келенть содамонть кисэ важодицянтень пандовить башка ярмакт. 2005-це иестэ примазель закон, конань коряс ушосо весе сермадовкстнэ, лавкань лемтне ды седе тов, полавтозь англань кельстэ ирландскойс. Масторсонок важоди колмо ломаньстэ комитет, кона арси Ирландиянь кельсэ од валт. Невтемга, e-mail валось ней ирландецэкс евтави лиякс.

Весе те канды лезэ келенть ванстомасо, ансяк тевтне полавтовить аволь истя куроксто, кода бу эряволь.

– Зярдо саи ушодксонзо Ирландиянь кельсэ журналистикась, ды кода ней важодить национальной СМИ-тне?

– Ирландиянь кельсэ васенце газетась кармась лиснеме 1881-це иестэ Бруклинсэ, сон нолдавиль 20-це пингень васенце иетнень самс. Те ульнесть ирландиянь келень вельмевтемань васенце терявтомакс. Газетасонть седе покш мель явовиль аволь кулянь пачтямонтень. Теицянзо васенце таркас путсть келень ванстоманть. Кулянь пельксэсь эйсэнзэ пек лавшоль, тесэ а невтевильть кодаткак пелькстамот, журналисттнэнь важодема лувось – виде тевенть кисэ аштемась. Тесэ печатавильть келень ванстомадо статьят, ломантне ванныльть газетанть, ансяк кияк эзь вешне тестэ кулят. Сондензэ стакаль меремс newspaper. Се шкастонть ютасть сядодо ламо иеть, ансяк весе шканть перть ирландиянь кельсэ газетатне нолдавильть келенть ванстоманзо кисэ. Сынь пек явовить лия газетатнеде, топавтыть лия путовкст.

Ней Ирландиясо лисить тиринь кельсэ эрьва недлянь кавто газетат. Вейкесь лиси башка ды сонензэ максовить госбюджетстэ субсидият. Омбоцесь – англань кельсэ газетань приложения. Сисем иень перть мон ульнинь васенце газетанть редакторокс. Эйсэнзэ кавто пелькст, вейкесь эйстэст алтави школасо тонавтницятненень. Сынст талновтыть лия кевкстемат, секс сермадомс сынст туртов эряви лиядо ды лиякс. Целанек жо ирландиянь кельсэ весе изданиятне ловить школасо тонватницятнень эсь целевой аудиториякс. Эдь покш ломантне седе сеедьстэ кортыть англакс, эйкакштне жо тонавтнить ирландиянь келенть школасо, сынь вадрясто маштыть эйсэнзэ сермадомо ды ловномо, секс газетатненьгак ловныть покш мельсэ.

Лиснить лия изданияткак (журналт, альманахт), ансяк сынст аудиторияст аволь покш сеть районтнэсэяк, косо эрить седе ламо ирландецт.

– Кода моли неть СМИ-тнень финансированияст?

– Ирландиянь кельсэ лисиця СМИ-тнестэ седе ламотненень максовить субсидият бюджетстэ. Те эрьва иень эли эрьва недлянь грантт. Зярдо важодинь газетасо, миненек правительствасто эрьва недлясто явовильть 7000 еврот газетань нолдамонтень, ней явовить 5000 еврот. Секс мекс ирландской келесь масторсонок ялатеке миноритарной, газетатнень ды журналтнэнь лисемась ды лангозост сермадстомась а кандыть покш ярмакт. Газетатнень тиражост, кода Мордовиясояк, 3-5 тыщат экземплярт. Бюджетэнь ярмактомо неть изданиятненень а кода эрямс.

Эште вейке асатыксэсь: неть изданиятне а пек вешевикст эрицятнень ютксо. Бути районсонть, косо эрить седе ламо ирландецт, соват лавкав, тосто свал муят тиринь газета. Лия таркатнесэ жо сынь аштить косояк сехте ало, а сеске муевить лия газетатнень ютксто. Сави вешнемс эли кевкстемс микшницянть кедьстэ ирландиянь кельсэ газета. Тень пек стака изнямс. Ульнесть арсемат саемс а покш питне газетатнень сайтс совамонть кис. Ансяк теяк а лезды, эдь ней интернетсэ пек ламо кулянь ресурст, конатне ванновить питневтеме. Минек сайтнэс жо ломантне овсе лоткить совсемеде.

Арсян, штобу газетанть рамсевельть, эряви сонзэ лиятнеде седе икелев нолдамс ды пачтямс ловныцянтень, кадык сон васенцекс пачтясынзе мельявовтыця кулятнень. Лиясто жо национальной газетатнесэ лиси умонь информация, конась уш киненьгак а эряви.

– Кода ветяви ирландиянь кельсэ радио- ды телевизионной вещаниясь?

– Неень шкане тиринь кельсэ радиось ули весе регионтнэсэ, косо эрить ламо ирландецт. Васенце терявтоматне истямо радионь панжомадо ульнесть 1960-це иетнестэ. 1972-це иестэ ирландиянь кельсэ радиось появась, ансяк сон ульнесь пиратской. Шкань ютазь макссть тензэ лицензия, эдь радиось эрявсь ломантненень. Сонзэ покш мельсэ кунсолыть сеть, кить кудосо кортыть ирландской кельсэ. Радиось пачти тесэнь кулятнеде, улить передачат спортто, музыкальной программат, евтневи фольклордонть, ютавтневиця фестивальтнеде. Ансяк ули вейке асатыкс. Закононь коряс ирландской радиосо а мереви нолдтнемс англань кельсэ морот. Од ломантнень ютксо жо вешевикс неень шкань поп- ды рокмузыкась, сон жо малав весе англань кельсэ. Секс од ломантне а кунсолыть минек радионть, сыненст седе вечкевить англань радиостанциятне.

Невтемга, Ирландиясо ули пек содавикс морыця – Энья. Сонзэ моротнень содасызь весе масторлангонь келес. Лиснесь васенце строчкас Британиянь чартнэсэ. Моронзо сермады англань кельсэ. Тень кувалма сынст а мереви нолдтнемс минек радиосонть. Те тейтересь чачсь ды кассь аволь васоло монь тиринь велем эйстэ, ирландецтнэ марить кисэнзэ каштанчи ды пек вечксызь морыцянть. Ансяк кемекстазь закононть кувалма моронзо а марсевить ирландской радиосонть. Мон арсян, СМИ-тненень эряви содамс аудиториянть вешеманзо ды ловомс сынст.

Ирландской кельсэ телевидениясь появась 1986-це иестэ. Теде мейле минек келесь кармась саеме седе покш тарка эрямосонть. Ушодовсь весемесь вана мейстэ. Ирландиясо телевидениянть кисэ эряви пандомс налог, лиякс меремс, рамамс лицензия передачатнень ваноманть туртов. Ломантне жо лоткасть телевидениянть кисэ пандомадо сень кувалма, мекс тосо арасть тиринь кельсэст передачат. Сынст кармасть озавтнеме тюрьмас, ансяк сынь эзть тандадо. Мертяно, текень учостькак. Эдь тесэ шалт кепететсь. Газетатнесэ кармасть сермадомо, кода лепштить тиринь келенть кисэ аштицятнень. Общественной мелесь ульнесь сынст ено. Истя удалась панжовтомс ирландской кельсэ телестудия. Ульнесть тень каршо молицяткак. Сестэ Ирландиясь лововиль Европасо аволь сюпав масторокс. Ды ламот кортасть, келя, ирландской телевидениянть туртов ютавтозь ярмактнень лангс седе пароль строямс больницят, школат. Кой-кить истя жо кортасть: мезекс вельмевтемс келенть, кона умок уш кулось.

Ирландской телестанциясь ульнесь государственнойкс, сон кармась пек виев СМИ-кс. Ломантне покш мельсэ ваныльть каналонть, шкань ютазь сон кармась независимойкс ды пек успешнойкс. Сехте покш изнявксозо арсян сеньсэ – ирландской келесь кармась моднойкс, полавтовсь сонзэ имиджезэ.

Мон важодян телестанциянь кулянь службасонть. Вейке коммерческой газетадонть башка, ирландской кельсэ важодиця СМИ-тненень, кода уш евтынь, максовить субсидият. Минек телестанциянтеньгак максы лезкс государствась, истя жо моли процент эрицятнень пельде телевидениянть кисэ пандоматнестэ.

Сень лангс апак вано, што государствась яви СМИ-тненень ярмакт, сон кона ендояк а эцни редакциятнень тевтнес, весе СМИ-тне независимойть, сыненст кияк а корты кода ды мезде сермадомс.

Маласо шкастонть масторсонок кармить парламентс кочкамот. Ды икеленек васенце путовксось – политической весе партиятнень вейкетьстэ невтемась, вейкетьстэ сынст туртов эфирэнь шканть максомась. Тень мельга пек пштистэ вантано.

– Кода моли ирландской СМИ-тнень туртов журналисттнэнь анокстамось?

– Содатадо, Ирландиясо седе ламо эрицятне кортыть англань кельсэ. Англань кельсэ лисиця СМИ-тнесэ седе покш конкуренция важодема тарканть кисэ, тов саить пек вадря журналистт, конатнень образованиядо башка ули опытэст. Ирландской кельсэ лисиця СМИ-тнесэ тевтне аштить лиякс. Тесэ васенце вешемась – келенть вадрясто содамось, журналистэнть содамочинзэ ды опытэзэ омбоце таркасот. Лисни ирландской газетатнесэ ды лия СМИ-тнесэ важодицятне седе малавикст лингвисттнэнень, аволь журналисттнэнень. Виде, университетсэнек улить факультетт, косо анокставить ирландской келень содыця журналистт. Ансяк сыненст аволь свал ули косо пурнамс васенце опытэнть.

– Кода аштить тевтне школадо икелень учреждениятнесэ ды школасо ирландской келень тонавтоманть марто?

– Ирландиясо улить кавто лувонь школат. Веенстнэ – те англань школат, конатнесэ ирландской келесь ветяви кода предмет, омбонстнэсэ весе предметтнэ ветявить ирландской кельсэ. Улить истят жо эйдень кужот. Икеле ирландской школатне ульнесть ансяк сеть регионтнэсэ, косо седе ламо эрицятне – ирландецт. Ней жо истят школат панжовить покш оштнесэяк. Чарькодеви, седе ламо эйкакштне якить англань школав. Ансяк улить ломанть, конатне сынсь а содасызь тиринь келест, эйкакшост жо максыть ирландской эйкакшонь кужос ды школас. Ды иеде иес истятнэде седе ламо. Тень вельде касы ирландской кельсэ лисиця СМИ-тнень аудиториясь. Тень минь марятано уш ней.

– Кодат мельть-арсемат бажиде пачтямс Мордовиянь журналисттнэнень? Мезе эряви теемс келенть ванстомга?

– Монь коряс, Мордовиясо тиринь кельтнень зярс виев лувост, ансяк сыненст эряви максомс седе ламо компетенцият тевс нолдамосо. Пек берянь, бути тынь кортатадо эсь кельсэнть кудосо, а вана университетэв эли важодема таркав молемстэ стувтадо эйстэнзэ. Кельтнень эряви нолдамс тевс эрьва косо. Зярдо кевкстнинь журналистэнк, ламотне видькстасть: седе сеедьстэ сынь саить интервью рузонь кельсэ. Теде башка, кельтнень ванстомасо покш таликазо государствань лезксэнть.

Ю.Камаева

 

 

 

Новости

Партийцы провели мониторинг реконструкции здания детсада и парковой зоны в селе Большие Березники
Ремонтные работы проходят в рамках партийных проектов «Новая
школа» и «Городская среда»
В 2019 году на ремонтные работы и строительство дополнительного
корпуса к Большеберезниковскому детсткому саду «Теремок» выделено
около 53 миллионов рублей в рамках партийного и национального
проектов. Всего в районе 424 ребенка дошкольного возраста, в райцентре
Большие Березники проживает 326 детей. В электронной очереди на
получение мест в дошкольном учреждении стоят 77 ребят. В Больших
Березниках ждут открытия реконструированного детского сада с
нетерпением. Окончание работ запланировано на 31 октября. Депутат
Государственного Собрания республики Александр Акайкин,
представители районной администрации ,местного отделения партии
остались довольны качеством проведенных работ. Строящийся новый
корпус детского сада рассчитан на 60 мест. Здесь будут размещены
ясельные группы. Уже практически закончены строительно-монтажные
работы.
Подробнее ...
 
В День физкультурника в спортивных сооружениях Мордовии прошли Дни открытых дверей
День физкультурника широко отпраздновали в Саранске и районах республики. В этот день в физкультурно-оздоровительных комплексах и бассейнах, построенных в рамках реализации федерального партийного проекта «Строительство физкультурно-оздоровительных комплексов» в Республике Мордовия прошли спортивные праздники.


 
Подробнее ...
 
«Почти половина россиян готова проголосовать за "Единую Россию"
По сообщению  информационного агенства  ИНТЕРФАКС - "Единая 
Россия", КПРФ и ЛДПР прошли бы в Госдуму нового созыва в случае, если 
бы парламентские выборы проводились в ближайшее воскресенье, 
свидетельствуют данные опроса "Левада-центра", поступившие в 
"Интерфакс".
Согласно результатам социологического исследования, среди 
участников опроса, готовых отправиться в этот день на избирательные 
участки и определиться с партией, за которую хотят голосовать, 44% 
респондентов отдали бы предпочтение партии власти.
Подробнее ...
 
«Единая Россия» поддержала создание в каждом федеральном округе учебных центров для волонтеров
В каждом федеральном округе России при поддержке «Единой России», МЧС
России и Министерства просвещения появятся учебные центры для волонтеров.
Они помогут им получить необходимые знания и умения для оказания
эффективной помощи людям во время чрезвычайных ситуаций (ЧС). Об этом
заявил секретарь Генсовета «Единой России», вице-спикер Совета Федерации
Андрей Турчак во время посещения учебного центра Всероссийского
студенческого корпуса спасателей (ВСКС) в Москве.
Подробнее ...
 
Локомотивы роста: В ходе семинара обсудили расширение доступа субъектов малого предпринимательства к закупкам крупнейших заказчиков
В Торгово-промышленной палате при поддержке рабочей группы проекта
«Единой России« «Локомотивы роста» состоялось заседание, в ходе которого
обсуждались возможности расширения предпринимательства к закупкам крупнейших заказчиков. На встрече обсудили
меры финансовой поддержки субъектов МСП, способы их участия в закупках,
систему информационного обеспечения и контроль деятельностью.
«Сейчас для нас одной из главных задач является развитие промышленного и
высокотехнологичного малого и среднего бизнеса. Для этого нужно помочь
предпринимателям участвовать в закупках, в том числе и через механизм
лизинга», - сказал координатор партийного проекта «Локомотивы роста» в
республике Юрий Левашкин.