Рубрикатор

Культура Павел Алёшин – эрзянь од артыця
Павел Алёшин – эрзянь од артыця

Саранскоень «Маска» арт-кафесэ панжовсь лия ёнов а молиця «Эрзянь этноромантизма» художественной выставка. Сонзэ авторось – Павел Алёшин. Те эрзянь од цёрась чачсь 1990 иестэ Нижней ёнксонь Лукояновабуень Атиньбиё велесэ. Зярдо сонензэ ульнесть кото иеть, семиянек тусть эрямо Нижней Новгород ошов. Школанть прядомадо мейле Павел тонавтнесь К.Минин лемсэ Нижегородской государственной педагогической университетсэ «Дизайн интерьера» специальностенть коряс.

 

Сон вишка пингстэ саезь вечксы артоманть. Теде башка, яви покш мель тиринь раськенть историянзо ванномантень, эрзятнень кезэрень пингень эрямонь тонавтнемантень, ловны ламо исторической литература.

2013 иестэ Павел зярыя важодеманзо невтнинзе Комисэ «Ыбица» Финнэнь-угрань этно-парксо, Раськень озкссо. Весе лиятнень невтни ансяк Интернетсэ. Сон – сэтьме, виздиця, аволь покшкавтниця ломань.

Мекс цёрась панжизе васенце выставканзо Мордовиясо? Тень чарькодьсак сонзэ картинатнень ванномсто. Од артыцянть творчествасо покш тарка саить эрзянь фольклоронь, мифологиянь тематне. Сон важоди эрьва кодамо жанрасо – сёрмады портретт, пейзажт, арты керамика ланга. Тевс нолды акварельть, ойтюст.

Неень выставкасонть невтеви 21 важодема. Сынь анокстазь меельце сисем иетнень перть. Выставкантень сакшность ламо ломанть. Павелэнь улить паро ялганзо минек республикасо. Тей Нижней Новгородсто истя жо сакшность Светлана Павловна авазо ды Настя сазорозо.

Кода ёвтнесь авазо, Павел вейке пель марто иесэ ушодсь артомо. Кедьсэнзэ свал ульнесь ручка эли карандашт. Мезе несь перьканзо – сень артсь. Те ульнесть скалт, тракторт, поезд… Эйкакшонть артовкстнэсэ ульнесть истямо невтевкст-элементт, кодаяк эзь кемеве, тень теизе эйде. Артомантень вечкемась кассь ды кемекстась. Ней сынст кудось, теке мерят, мастерской: эрьва кува ладсезь картинат, эскизт, краскат. Павелэнь малавиксэнзэ аштить кувалманзо мельспаросо, сон яви мель вечкевикс тевентень. Цёрантень пшкалить артомс портретэст. Теде башка, сон эзизе стувто тиринь келензэ. Малав весе, кить тукшныть эрямо ошов вишка шкасто, уш а кортыть эйсэнзэ. Павел, мекевлангт, кармась домкасто тонавтнеме эрзянь литературань келенть.

Выставкасонть мельспароль неемс «Масторава» эпосонь сюжеттнэнь. Тесэ ули «Тюштянь лишмезэ», кецявтыть «Тюштянь урьвакстома» артовкстнэ. Весе содасынек «Кавто цёрат тикше ледить» эрзянь моронть. Самай истямо лем марто картина невтеви выставкасонть. Кодамо-бути лембе ды кеняркс юты артовксонть эйстэ. Вана сон, морось, сельменек икеле! Кавто цёратнень кедьсэ пелюмат, удалост – кавто тейтерть. Истямо жо мазычи неят «Пиже садсо» картинасонть, косо морыть-седить раськень оршамопельсэ од ломантне. Эрьва картинасонть ули кодамо-бути смусть. Ваныцятне зярсыя аштесть «Масторавась аварьгадсь» артовксонть вакссо. Эрьвась арсесь, мекс сонзэ пилесэ тонгозь наушникть, чамаванзо чудить сельведть, велькссэнзэ – велень ташто кудо, удалонзо – ош. Сюлмизе неень шканть ютазенть марто. Выставканть панжомсто сонензэ макснесть ламо кевкстемат «Ине чувто», «Инязоронь кочкамо», «Пургаз» ды лия картинатнень коряс. Павел невтизе тенек Ратор леенть, артызе чокшнень Саранскоенть. Кода корты артыцясь, малав весе сюжеттнэнь саи мельстэ-превстэ.

Кевкстематнеде башка, нама, инжетне ёвтасть ламо паро валт.

– Сюкпря Павелнэнь мелень витиця артовкстнэнь кис! Сынь эждить ойме, кенярдовтыть сельме ды кармавтыть арсеме, мезесь пек питней. Неть артовкстнэсэ – минек раськенть кезэрень эрямопингезэ ды неень шкась, – кортась «Сятко» журналонь редакторонь полавтыцясь Людмила Ломшина. Эряви меремс, журналонь меельце номертнэсэ уш лиссть П. Алёшинэнь виев артовксонзо. Саемга, В.Радаевень «Тюштянень» ёвтамонтень иллюстрациясь. Цёрась варчни артомс литературань сёрмадовкстнэнь коряс эрзянь содавикс ломантнень.

Минек истямо од ломантнень коряс кирдят а ёвтавикс каштанчи ды мельспаро! Кемтяно, Павел поладсы эсь тевензэ, панжи эштё аволь вейке покш выставка, картинасонзо невтьсынзе эрзятнень эрямост. Бути кинь ули мелезэ ваномс выставканть, моледе, зярс сон важоди.

Т.Маторкина

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...