Рубрикатор

Культура Кочкизе Мордовиянть
Кочкизе Мордовиянть

Вана уш зярыя иеть Мордовиясо тевс нолдави «Оказание содействия добровольному переселению в Республику Мордовия соотечественников, проживающих за рубежом» государственной Программась. Сонзэ участниктне иеде иес ламолгадыть. Истя, 2016 иестэ те Программанть коряс минек республикав састь 260 соотечественникть. Теке марто Программась омбо масторонь ламот эрицятненень лездась топавтомс умонь мелест – самс эрямо Россияв. Топавтовсь те мелесь Таджикистанонь Исфара ошонь эрицянть Зиеваддинходжа Гиесовоньгак. Зиеваддин вейсэ Тахмина нинзэ марто кармасть те Программань участникекс, ды Саранскоесь теевсь сынст семиянть чачома таркакс –тесэ урьвакстсть.

 

Зиеваддин Гиесовонь свал ульнесь покш мелезэ эрямс Россиясо. Арсесь теде вишка пингстэ саезь. Ды зярдо лелязо кадызе тиринь кудонть ды тусь Россияв (сон ней эри Пензасо), сонзэ те мелесь овсе эзизе кадно. Весть сась лелянстэнь инжекс, ванызе, кода аштить тевтне. Ды уш сестэ, кода корты од ломанесь, сон арсизе, кодамо эрямопингень тев эстензэ кочки. Апак кавтолдо кемекстызе улемс стоматологокс. Эдь лечамс ломанть – те пек паро тев. Зярдо лелянть кедьстэ велявтсь тиринь кудов, Интернетстэ кармась вешнеме, косо тонавтыть те специальностентень. Истя, кочказель Мордовиясь.

– Саранскоесь монень вечкевсь сеске, – тешксты од ломанесь. – Ванькс, мазый, неень шкань ош. Тесэ эрить пек вадря ды седеймариця ломанть. Кодаткак сёвномат ды тюремат киньгак марто эзть лисне. Мон, мерят, тиринь кудосан.

Нама, васенце шкастонть Зиеваддиннэнь ульнесь пек стака. Рузонь келенть парсте эзизе сода, тонавтнеме жо понгсь рузонь группас, косо лия масторонь студентэкс ульнесь ськамонзо. Сонензэ савсь вадрялгавтомс аволь ансяк рузкс кортамонть, ламо вийть ютыльть специфической терминтнэнь тонавтнемантень. Ды, эряви меремс, сонзэ весемесь лисиль а беряньстэ. Таджикистанонь эрицясь натой лиснесь изницякс стоматологиянь проблематнень коряс научно-практической конференциясо.

Ульнесть стакачить аволь ансяк тонавтнемасонть. Эрясь од ломанесь студентэнь общежитиясо. Ярсамопеленть анокстась сонсь, мезенть икеле зярдояк теемс эзь савкшно. Ансяк мезе лангскак апак вано, од ломанесь свал муиль шка спортонь ды общественной тевтнень туртов. Саранскойсэ эсензэ туртов сон панжсь ламо од ёнкст: ульнесь «iВолга» форумонь участникекс ды вузсо эсь раськень эрицятнень туртов эрьва кодамо кенярксчинь арсицякс-пурныцякс. Паряк, а стяко 2015 иестэ Зиеваддиннэнь максозель «Иностранный студент года» лемесь.

Эряви меремс, од ломаненть прясо свал чарась мелесь, кода кармамс Россиянь свалшкань эрицякс. Васенце курссо тонавтнемстэ уш арсесь тесэнь гражданствань получамодо. Ансяк те меленть зярыя шкас савсь кадомс, васняяк эрявсь урьвакстомс. Зярыя шкань ютазь ни эстензэ сон усксь Исфарасто. Тахмина эсь тиринь ошсо вадря отметка марто прядызе школанть ды Медицинань колледженть, ды ней истя жо тонавтни Саранскойсэ Н.П.Огарёв лемсэ медицинань институтсо.

Вейке ды пельиеде икеле семиянть чачсь цёрынест, ды Гиесовтнень семиясь, кода соотечественникть, кармась госпрограммань участникекс.

– Неень шкане Мордовиясо минек уш аволь аламо роднянок, – корты Зиеваддин. – Эйкакшонть марто лездамо сась монь авам. Ней сон тейсь зярыя шкас эрямонь коряс конёвт, мейле истя жо бажи получамс Россиянь гражданства. Лелям ды тетям уш умок Россиянь эрицят.

Зиеваддин, тонавтнемадо башка, яви мель предпринимателень тевентень. Сонзэ ули эсензэ кафезэ, косо анокставить таджикень раськень ярсамопельтне. Истя жо од ломанесь ашти Таджикистансто сазь Студенттнэнь союзонь председателекс.

Неень шкане сехте покш бажамокс Зиеваддинэнь туртов ашти эсь семиянть туртов эрямо таркань рамамось. Ды сон кеми, бути ули бажамо, весемесь топавтови.

Ю.Еремина

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...