Рубрикатор

Культура Фестивалесь кецявтынзе ваныцятнень
Фестивалесь кецявтынзе ваныцятнень

Саранскойсэ омбоцеде ютась «Предания старины» Раськеютконь фольклорной фестивалесь-конкурсось. Тей сакшность морамо республикань районтнэстэ, Пенза, Самара, Н.Новгород, Тамбов ёнкстнэстэ, Удмуртиясто, Марий Элстэ, Башкортостансто ды Эстониясто. Васенце чистэнть кунсоловсть-ванновсть весе участниктне, кочкавсть номерт Гала-концертс. Теде башка, ютасть морамонь коряс мастер-класст, Советской площадьсэ снимасть «Предания старины» телепередача, косо эрьва ансамблясь невтсь эсензэ коензэ.

 

Гала-концертэнтень сакшность ламо ваныцят. Эрьва морыцясь вастозель лембестэ, виев цяпамосо. Кода лиякс? Тей пурнавсть гайтев вайгель морыцятне, седясть гармониятне, балалайкатне, гуслятне. Конкурсонть вешеманзо коряс, эрявсь невтемс эсеть ёнксонь морамонь койтнень, раськень койтнень-кирдатнень, киштематнень.

Сцена лангсо морась Мордовиясо чачозесь Карина Попова, сон ней тонавтни Саратовань государственной консерваториясо. Мельспароль ваномс эйкакштнень лангс: Пенза областень «Забавушка» коллективесь, Тамбовонь Артём Садчиков, кона морась частушкат. Ламо пейдевтизь ды цяпавтызь пурнавозтнень Ижевскоень дуэтэсь В.Князев ды Ю.Павлова. Удмуртиянь «Гербер» народной фольклорной ансамблясь истя жо токинзе ваныцятнень седеест. Парсте вастозельть Пенза ёнксонь «Умарне» коллективесь, Башкириянь «Яблонька» семиянь ансамблясь ды лиятне.

Изницятне казевсть. Номинациятне яволявтозельть морыцятнень иест коряс. Гран-принть максызь Эстониянь «Мадара» сету раськень ансамблянтень. Весе инжетненень паро валт ёвтась Саранск ошонь мэрэсь, «РФ-нь Финнэнь-угрань раськетнень ассоциация» Весероссиянь общественной движениянь прявтось П.Н.Тултаев.

 «Велень койть» фольклорно-этнографиянь ансамблясь сакшнось те фестивалентень Самарасто.

– Минек коллективесь од, сон пурнавсь кавто иеде икеле, морсить кавксо ломанть. Художественной руководителесь Анастасия Алёшина. Морсицятне весе эрзят. Покштянок-бабанок ульнесть эрзянь ломанть, секскак  эйсэнек эри эрзянь толось, пурнавинек вейсэ морсеме. Недлязонзо кавксть вастневтяно Эстетической воспитаниянь куншкакуросо, морсетяно морот. Кунсолотано кезэрень моронь сёрмадовкстнэнь, кочкатано, кинень кодамо вайгельсэ седе паро ули морамс. Кодамояк вейсэндявкссо ды организациясо а аштетяно. Минь минсь. Мезе тукшны мелезэнек – сень моратано. Оршамопельть статано минсь, сынь аволь вейкеть, эрьванть эсензэ. Музыкальной образования ули ансяк ветицянть, сон тонавтнесь Культурань институтсо, – ёвтнесь ансамблянь морсицясь Лариса Галкина. 

Седе тов кортамонть поладызе ансамблянь художественной руководителесь Анастасия Алёшина (од тейтеренть ундоксонзо Самара ёнксонь Клявлинабуестэ):

– Моратано ансяк сеть рузонь ды эрзянь моротнень, конатнень пурнынек Самара ёнксонь эрзянь велетнева. Тосо морамонь койтне явовить Самара областень рузонь велетнень эйстэ. Мейсэ? Ломантне кирдить мельсэст ды парсте содасызь эрзянь ды рузонь моротнень, сынь пешксеть музыкадо. Те пек интересна. Текстэсь рузонь, мелодикась жо ванстовсь эрзянь!

– Косо морсетядо?

– Самарасо тейнетяно эсенек концертт. Покш мель явтано фольклорно-этнографиянь концерттнэнень. Ансяк истямо морамонь конкурстнэде пек аламо. Тердтнимизь Оренбург ёнксонь Абдулинав. Тей вана сынек омбоцеде. Минсь, эсенек ярмак лангс. Ялатеке покш меленек ускомс кезэрень моротнень тов, косо сыненст максыть питне, косо сынь вечкевить ды чарькодевить кунсолыцятненень.

Т.Маторкина

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...