Рубрикатор

Культура «Од толонь чись» – Сызраньсэ
«Од толонь чись» – Сызраньсэ

Самара ёнксонь Сызрань ошсо ютавтовсь эрзя-мокшонь раськетнень  «Од толонь чи» регионъютконь фестивалесь. Сон ютавтови вана уш зярыя иень перть. Тедеденсесь алтазель «Мордовская национально-культурная автономия г.о. Сызрань» общественной организациянь кото иетненень. Сызранень драмань театрас сакшность пек ламо инжеть аволь ансяк Самарань областьстэ, истя жо лия регионтнэстэяк. Покш делегация якась Мордовиясто.

 

Паряк, ламонь вельми кевкстема: «Мекс эрзятнень ды мокшотнень кенярксчись алтави толонтень?». Тевесь сеньсэ, мокшэрзянь велетнесэ Од толонь чинть тешкстасть апрельстэ, зярдо кудонь ракшатнень теледенть мейле васенцеде ливтилизь паксяв, ванома таркав. Кудотнесэ каштомотне икелепелев ванськавтовильть куловтнеде. Толонть вельмевтильть кавто чувто петнень вейс-вейс човамосо, те толонть эйстэ кирвазтильть штатолт ды те од, ванькс толонть кандылизь кудов. Тесэ толось ванстовиль весе иенть перть. Ды, нама, те чинть тешкстасть кецязь ды келейстэ.

Фестивалень концертэнь программанть ушодовомадо икеле инжетне покш мельсэ ваннызь пурназь выставканть. Кедьёнкстнэнь ды оршамотнень вельде домкасто невтевсь эрзятнень ды мокшотнень культураст, койтне-кирдатне, эрямонь ладось. Стендтнэсэ фотографиятне ды сёрмадовкстнэ пачтясть пазтнэде, конатненень кезэрень эрзятне озность эрьва тевсэнть.

Теде мейле весе пурнавозтненень невтевсь видеофильма Мордовия Республикадонть. Инжетне покш мельсэ вансть, кода эрить сынст шабратне, эсь раськень ломантне. Фильмасонть ёвтневсь республикань Ёроков эйкакшонь куншкакуродонть, важодиця вузтнэде, инновациянь комплекстэнть ды Технопарктонть ды, нама, спортонь объекттнэде, конатнеде Мордовиясо а лововитькак зяро. Ваныцятне кортасть эсь ютковаст, келя, пароль бу сынсткак Сызраньсэ весемесь улевель истя парсте.

Седе тов ушодовсь фестивалень торжественной пельксэсь. Коень коряс панжизе сонзэ Сызрань ошонь эрзя-мокшонь автономиянь председателесь И.В.Кистанов. Сон лиятнень марто вейсэ кирвазтизе эрзянь раськень штатолонть ды лембе валт ёвтась весе пурнавозтнень лемс.

– Течи минек ошсо тешкстави покшчи. Те залсонть пурнавсть аволь ансяк Сызраньсэ эриця эрзятне ды мокшотне, ламо инжеть састь томбальдеяк. Мон меревлинь бу, весе минь сюпав раськень пелькс. Эдь течинь чис эрзятне ды мокшотне ванстызь тиринь келест, эсь культураст ды коест-кирдаст. Ды бути минек ютксо истямо ломанть кармить икелепелевгак, бути тенень кармить явомо мель эйкакшонок, ванстовить аволь ансяк кельтне ды раськетне, ванстови минек Россияськак, – тешкстызе Иван Кистанов.

Кода мерсь «Мордовский национально-культурный центр «Масторава» Самарань региононь общественной организациянь правлениянь председателесь Л.А.Колесникова, иеде иес фестивалень участниктне яла ламолгадыть. Ды кенярксчись кармась пек паро коекс.

Лембе валт пурнавозтненень истя жо ёвтась Сызрань ошонь Администрациянь прявтось Н.М.Лядин. Сон тешкстызе, Самарань областесь – ламо раськень регион, косо ояксчисэ эрить 157 раськеть. Сызрань ошсонть, кода целанек региононть келес, раськетнень ютксо ояксчинь кемекстамонтень, культуратнень ды кельтнень ванстомантень явови пек покш мель. Ды «Од толонь чи» регионъютконь мокшэрзянь раськень культурань фестивалесь ашти тенень паро невтемакс.

Мордовиянть пельде фестивалень азортнэнень ды инжетненень поздоровт ёвтась Эрзя-мокшонь раськетнень регионъютконь общественной организациянь исполкомонь секретаресь О.В.Дулкин.

–Течи минь тынк марто сынек пек паро ды эрявикс кенярксчис. Неень шкане тиринь кельтнень, койтнень-кирдатнень ванстомантень явови пек покш мель. Истямо мероприятият ютавтовить весе масторонть келес. Самара ёнксонть лиятнень эйстэ яви се, тесэ истямо мероприятиятнень ютавтоманть кис ашти руководстваськак ды пек лезды тенень. Кеман, «Од толонь чи» фестивалесь карми эрямо ламо-ламо иеть, Мордовиясь жо карми свалшкань участникекс, – тешкстызе Олег Дулкин.

Официальной пелькстэнть мейле ушодовсь концертэсь. Сонзэ программась сюпаволь ды мельстуицяль. Седейс токиця номерсэ пурнавозтнень кенярдовтызь Сызранень, Пенза ёнксонь, Самара ёнксонь Нефтегорской райононь, Тольятти ошонь ды Мордовиянь творческой коллективтне. Народной фольклоронь вечкицятне покш мельсэ аштесть эрзянь ды мокшонь кельсэ гайгиця моротнеде.

Сцена лангсо эсь ёрокчист невтизь: «Карусель» хореографиянь ансамблясь (Сызрань ошонь искусствань эйкакшонь 1-це № школась), «Забава» фольклоронь ансамблясь, Пенза ёнксонь Сосновоборской райононь «Лейне» фольклоронь ансамблясь, Тольятти ошонь «Лайме пора» ансамблясь. Алкуксонь кенярксокс инжетненень ульнесть Саранск ошонь «Mordens» национальной оркестрань номертнэ. Ды, нама, эсь кунсолыцятнень кенярдовтызь кенярксчинь азортнэ – Сызранень «Нармонь морыця» ансамблясь.

Ваныцятнень мельс пек тусть эрзянь ды мокшонь моротне, конатнень морызь РФ-нь заслуженной артисткась, Милославской лемсэ Равчирень государственной хоронь солисткась Людмила Дюдяева, Мордовия Республикань заслуженной артисткатне Анна Атласова ды Любовь Князькова.

Аволь васенцеде фестивалев сась Самара ёнксонь Нефтегорской райононь «Эрзяночка» вокальной ансамблясь, конась вана уш 18 иень перть кенярдовты эсь кунсолыцятнень эрзянь мазый моросо. Ды, эряви меремс, сынь аволь ансяк морсить эсь тиринь кельсэст, тонавтыть эрзянь келентень эсь райононь эйдень кужос якицятнень. Кода корты ансамблянь морыцясь Нина Панина, вишкинетне келенть тонавтнемантень явить пек покш мель. Теке марто Нина Николаевна пек мелявты, сынст райононь школатнесэ тиринь эрзянь келесь а тонавтови, секскак эсь тевентень ансамблянь аватне (эйстэдест сисем) тонавтыть нуцькаст, кавтотне уш морсить мартост.

Фестиваленть прядовомсто Сызрань ошонь эрзя-мокшонь автономиянь председателесь И.В.Кистанов ёвтась весенень покш сюкпря ды кармавтсь эрзятненень ды мокшотненень вечкемс ды ванстомс эсь келенть, культуранть, койтнень-кирдатнень.

 

Ю.Еремина

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...