Рубрикатор

Культура ТИРИНЬ КЕЛЕНЬ ЧИСЬ ВЕЙСЭНДИ РАСЬКЕНТЬ
ТИРИНЬ КЕЛЕНЬ ЧИСЬ ВЕЙСЭНДИ РАСЬКЕНТЬ

Апрелень 17-18-це читнестэ Мордовиясо ды целанек весе Россиясо келейстэ тешкставсь Эрзянь ды мокшонь келень чись. Исяк Эрзянь-мокшонь театрас пурнавкшность тиринь келень тонавтыцятне, эрзянь кельсэ сёрмадыця сёрмадейтне, журналисттнэ, поэттнэ, артисттнэ, художниктне, кельветийтне ды ламо лия творчествасо важодиця ломантне.

 

Коень коряс, тесэ чествовизь тиринь келень ветиця тонавтыцятнень, сетнень, кить аволь ансяк ванстыть эрзянь ды мокшонь кельтнень, истя жо сынь пиить-палыть, мелявтыть ды виензавтыть неть тиринь кельтнень. Мордовия Республикань нурька шкас Прявтонь тевень топавтыцянть В.Д.Волковонь пельде пурнавозтненень пшкадсь Культурань ды национальной политикань коряс министрась А.М.Чушкин. Школасо, эйдень кужотнесэ, вузтнэсэ тонавтыцятне максыть те тевентень весе виест, весе эрямост ды оймест. Эрзянь ды мокшонь кельтнень ванстомаст ды кемекстамост кисэ МР-нь Культурань ды национальной политикань министерствань «Межнациональной согласиянь» медальсэ казезельть И.Н.Рябов, Н.П.Огарёвонь лемсэ МГУ-нь эрзянь ды мокшонь келень кафедрань прявтось, В.П.Гришунина, теке университетэнь эрзянь-мокшонь кафедрань доцентэсь, О.И.Налдеева, пединститутонь тиринь келень ды литературань кафедрань прявтось, С.Н.Маскаева, пединститутонь теке кафедрань доцентэсь. Школасо тонавтыцятнень ютксо изницякс лиссть Н.И.Арапова, Дубенкань школань эрзянь келень тонавтыцясь, И.Т.Малахова, Ицялонь школань эрзянь келень тонавтыцясь. Саранск ошонь 4 № лицеень эрзянь келень тонавтыцясь А.А.Учеваткин кармась улеме «2017 иень эрзянь келень сехте вадря тонавтыця» конкурсонь изницякс.

Пурнавозтненень, Чушкиндэ башка, лембе валт ёвтасть Госсобраниянь Председателень полавтыцясь И.М. Москаев, Образованиянь министрань полавтыцясь И.К.Дугушкин, Эрзянь-мокшонь раськень межрегиональной общественной организациянь прявтось, университетэнь филфаконь деканось, профессорось Ю.А.Мишанин.

Сценанть лангсто кортыцятне састь вейкине мельс: эрзянь ды мокшонь кельтнень эряви ванстомс, кортамс эйсэст ды виензамс сынст седе товгак. Эдь тиринь келенть эйстэ отказамось ловови покштояк покш пежетекс ды вети ломаненть потмоёжонь беднойчинтень. Мекевлангт, ламо келень ды васняяк тиринь келень содамось теи ломаненть потмоёжонь коряс седе сюпавокс, превеекс ды уцяскавокс, теде башка, сон тонады лия раськень келень, культурань, коень-кирдань вечкеме, мезесь течинь чине вейкенек-вейкенек ютксо эрямсто пек а сатны.

Тешкстасынек, Мордовиядонть башка, Эрзянь келень чить ютавтовсть Самарасо, Ульяновскойсэ, Оренбургсо, Пензасо, Саратовасо, Калининградсо, Московсо, Санкт-Петербургсо ды ламо лия регионтнэсэ. Теде башка, апрелень 17-це чистэ Эрзянь келень чи А.С.Пушкинэнь лемсэ библиотекасо ютавтсь

Эрзянь келень идемань фондось, исяк 1000 иень вейсэндявомань площадьсэнть ютавтозель литературань марафон, косо школасо тонавтницятне ловность стихть эрзянь ды мокшонь кельтнесэ.

А.СИМДЯНОВ

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...