Рубрикатор

Культура ТИРИНЬ КЕЛЬТНЕНЬ ВАНСТОМГА
ТИРИНЬ КЕЛЬТНЕНЬ ВАНСТОМГА

Апрелень 13-це чистэ Равчирень финнэнь-угрань раськетнень культурань куншкакурось вейсэ республикань Культурань ды национальной политикань министерстванть ды Образованиянь министерстванть марто ютавтсть «Роль семьи и образовательных организаций в сохранении родного языка и культуры мордовского народа» лементь ало регионъютконь научно-практической конференция. Вастовомась ютавтовсь М.Е.Евсевьев лемсэ МГПИ-нть юрсо. Тесэ конференциясь ютавтови уш аволь васенцеде, ды педагогической институтось кармась кортамотнень туртов вадря площадкакс.

 

Конференциянть участникекс ульнесть эрзянь ды мокшонь кельтнень тонавтыцятне, эйдень кужонь важодицятне, вузтнэнь преподавательтне ды студенттнэ.

Вастовоманть панжизе Равчирень финнэнь-угрань раськетнень культурань куншкакуронь прявтось Раиса Акашкина. Сон тешкстызе, келя, конференциянь темась кочказь а стяко. Эдь эрьва раськенть сехте покш сюпавчизэ – келесь, конасонть сон корты, конасонть арси. Бути ванстови келесь, ванстовить раськенть койтне-кирдатне, ванстови культурась. Ды те весемесь ушодови семиясто.

– Миненек эряви теемс весементь, штобу эрзянь ды мокшонь кельтне ванстовольть, штобу сынь гайгевельть школатнесэ, эйдень кужотнесэ, од ломантнень ютксо. Ды прявт тевесь ашти эсенек эйстэ. Бути карми бажамонок содамс тиринь келенть, минек культурась карми эрямо, – тешкстызе Раиса Ивановна.

Тиринь эрзянь ды мокшонь кельтнень ванстомадо пурнавозтненень истя жо кортась Эрзянь-мокшонь раськетнень регионъютконь общественной организациянь исполкомонь прявтось Александр Лузгин. Сон ёвтнесь, течи эрзянь ды мокшонь кельтнень ванстомга покш робота ветяви аволь ансяк эсенек республикасо, истя жо лия регионтнэсэяк, косо эри мокшэрзянь диаспорась.

– Пек паро, неень шкане тиринь кельтнень тонавтомась ветяви Мордовиянь малав весе школатнесэ, покш робота ветяви эйдень кужотнесэ. Течи эрзянь ды мокшонь кельтнень тонавтнеманть туртов эрявикс литературасо минь топавттано весе диаспоранть. Ды, эряви меремс, тов книгатне максовить стякодо. Нама, роботась тесэ эштё пек ламо, аволь весе регионтнэсэ тевесь ветяви кода эряви. Сайсынек Ульяновской областенть. Тесэ эрзянь ды мокшонь культурной автономиясь вети покш робота. Неень шкане областень школатнесэ эрзянь ды мокшонь кельтнень тонавтнить 1200 ламо эйкакшт. А

вана Пенза ёнкссо тевесь овсе лия. Тесэ тиринь кельтнень тонавтнемась ветяви ансяк кавто школатнесэ (тонавтнить 55 ломанть). Секскак тиринь кельтнень тонавтнеманть коряс важодеманть ветяма седе домкасто ды арсезь, – мерсь Александр Степанович.

Кода ветяви роботась тиринь кельтнень тонавтоманть коряс минек республикань школатнесэ ды эйдень кужотнесэ, конференциянь участниктненень ёвтнесь МР-нь Образованиянь министерствань дошкольной, общей ды дополнительной образованиянь отделэнь прявт специалистэсь Надежда Салмова. Сон тешкстызе, течинь чине республикань пелест (50,4 %) эйдень кужотнесэ ветяви эрзянь ды мокшонь кельтнень тонавтнемась. Истя жо 101 школасо тиринь кельтнень тонавтнить 1-це классто саезь 11-це классос, 242 школасо – 2-це классто саезь 7-це классос.

Теде башка, конференциянть лувсо участниктне ёвтнесть эсь важодемадост ды арсематнеде кода седе вадрялгавтомс тиринь кельтнень тонавтнеманть, штобу минек раськетнень койтне-кирдатне ды культурась эрявольть свал.

Ю.ЕРЕМИНА

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...