Рубрикатор

Культура ЭРИ КЕЛЕСЬ, ЭРИ ВЕЛЕСЬКАК
ЭРИ КЕЛЕСЬ, ЭРИ ВЕЛЕСЬКАК

Мокшэрзянь раськень регионъютконь общественной организациянть ушодксонзо коряс кодат ансяк культурно-массовой мероприятият а ютавтневить. Ды аволь ансяк минек республикасо, сонзэ томбалеяк. Аволь весть ульнесть Самарань, Оренбургонь, Саратовань, Нижней Новгородонь, Екатеринбургонь ды масторонь лия региононь эрзятнень ды мокшотнень кедьсэ. Ней мокшэрзянь раськень регионъютконь общественной организациясо важодицятнень ушодксост коряс ютавтневить патриотизмань ды мужествань урокт, конатне алтазь Советской Союзонь Героенть, легендарной лётчикенть М.П.Девятаевень чачома чистэ 100 иетненень. Уш истямо урокт ютавтозельть Самарань, Ульяновскоень, Пензань, Московонь, Саратовань областень эрзянь ды мокшонь велетнесэ.

 

Кецявты, эйзэст сакшныть пек ламо ломанть: школасо тонавтницят, велень хозяйствань предприятиясо важодицят, эйкакшонь тонавтыцят, сетне, кить а стувтнить тиринь келест, койтнень-кирдатнень.

Аволь умок патриотизмань ды мужествань урок, кона алтазель Советской Союзонь Героенть М.П.Девятаевень чачома чистэ 100 иетненень, ютавтозель Саратовань областень Петровской райононь Оркина эрзянь велесэ. Мордовия Республикасто инжетнень вастынзе кши-сал марто Оркина велень «Кучугуры» тейтерь-авань фольклорной ансамблясь, косо морсить ды киштить аволь вейке кементь иеть М.И.Цаплина, Н.Л.Кшнякина, А.Ф. Мигачева, Е.Н.Саюшкина, Н.С.Живайкина, Н.А.Мазяркина. Ансамблянь художественной руководителенть А.С.Кузнецовонь валонзо коряс, самодеятельной артисттнэ аволь весть ульнесть «Равось – ояксчинь лей» этно-культурной экспедициясонть, мокшэрзянь раськень I-це ды III-це съездтнэсэ, конатне ютавтозельть Саранскойсэ.

– 2002 иестэ минек Оркина велесэ ютавтозель покш промкс, ков сакшность эрзят ды мокшот кавксо областтнестэ, – ёвтни А.С.Кузнецов. – Промксось ютась вадрясто, вейке омбоцень чарькодезь. Эйсэнзэ ванкшнынек-кепсинек эрзя-мокшонь раськенть эрямосо талновтыця кевкстематнень. Покш мель явозель тиринь келентень. Видьстэ мерян, эри келесь, карми эрямо велеськак.

Тешкстасынек, зярдо-бути Оркина велесэнть эрясть 7 тёжадо ламо ломанть. Ульнесь «Заветы Ленина» колхоз, косо важодсть велень весе эрицятне. Кирдсть тёжадо ламо скалт, малав 300 лишметь. Велень хозяйствань предприятиянь тракторонь-машинань парксонть ульнесть сизьгеменде ламо тракторт, автомашинат.

– Зярыя кементь иеть важодинь колхозонь прявтокс, – полады Александр Сергеевич. – Шкастонзо соксинек-виднинек паксятнень. Свал велькска топавтынек государствантень ловсонь, сывелень, сюронь миемань аравтлувтнень. Састь перестройкань иетне. Монь лия тевс кармавтымизь кундамс. Эзинь фатяяк, кода бойкасто микшнизь колхозонь техниканть, ракшатнень… Велесь кармась каладомо. Од ломантне ушодсть тукшномо Саратовав.

Куш Оркина эрзянь велесь ашти мазыйдеяк мазый таркасо, лушмосо, вирь потсо, пандо экшсэ, сон аволь истямо, кодамо ульнесь 20-25 иеде икеле. Ламо кудотне чавот. Ульцятнева китне ковгак а маштовить. Тунда ды сёксня лангаст а ардоват.

– Течи Оркина велесэнть эрицятнестэ ламотне пенсионерт, – ёвтни Новозахаркинань администрациянь прявтось О.С.Лушникова. – Лововить 530 ломанть. Вейксэ иень школасонть тонавтнить 24 эйкакшт. Тесэ жо, школасонть, важоди эйдень кужо, ков якить 17 эйкакшт. Минек администрацияс, Оркина веледенть башка, эштё совить эрзянь 7 велеть. Вельть явови Синенькие велесь, козонь чачсть содавикс сёрмадеесь А.К. Мартынов ды учёноесь Тимофей Маркелов. Сынст ледстнемга школасо

ютавтневить ловномань чокшнеть, косо тонавтницятне ёвтнить сынст эрямонь ды творчествань кидест.

Видькстатано, эрьвась, кие сы инжекс Оркина велев, сови тесэнь, бути истя можна меремс, краеведениянь музейс. Те коесь колазь арасель нейгак. Национальной информационной куншкакуросонть мезе ансяк арась: кезэрень оень пивтемка, сока, конань эйсэ сокасть паксятнень, озавтнесть ды таргсесть модамарь; тесэ невтневить сокст, конатнень тейнесть сынсь эрицятне; неявикс таркасо ашти сундукось, конань теекшнизь 1914 иестэ немецтне.

– Кода сынст ушодсть ильтямо минек областьстэ Казахстанов, эрицятненень явшесть сундуктнень, – ёвтни А.С.Кузнецов. – Эрзянь кельсэ книгатнень вансттано пек умок. Эдь велесэнек эрзянь келенть вечкеме тонавтсть 1932 иес.

– Теде мейле тиринь кельсэ урокт эзть ветяво. Тень лангс апак вано, велесэнть весе кортыть тиринь кельсэ, – полады Александр Сергеевич. – Ды истя поколениясто поколенияс. Кеман, сон а ёми. Карми эрямо свал.

Течи А.С.Кузнецов крестьянонь-фермерэнь хозяйствань азор. Мельганзо кемекстазь 2100 гектарт мода. Лангсонзо 17 ломантне кастыть сюро, чиньжарамо. Мелят эрьва гектарсто сайсть малав 30 центнерт сюро, чиньжарамо – 12 центнерт.

– Содатадо, тедеде сёксня Оркина велентень топодить 305 иеть ды национальной куншкакуронтень – 20 иеть, – ёвтни Петровской райононь администрациянь прявтось Д.В.Фадеев. – Неть кавто кенярксчитнень арсетяно тешкстамс вейке чистэнть ды келейстэ. Ютавттано «Шумбрат» регионъютконь фестиваль. Истямо, кодамо ютавтнить Ульяновской областьсэ. «Кучугуры» тейтерь-авань фольклорной коллективесь ды Оркина велесь эрить. Теньсэ, нама, покш таликазо А.С.Кузнецовонь. Сон эрьва ков кенерекшни. Вети хозяйства, мукшны шка культурно-массовой мероприятиянь ютавтнемскак. Пек мелявты тиринь келенть кис. Сёрмады эрзянь мороткак. Мельспарозо – гармониятне. Эйстэст сонзэ – 12.

…Оркина велень Культурань кудось. Тей пурнавсть зярыя велень школань тонавтницятне, велень эрицятне. Мокшэрзянь раськень регионъютконь общественной организациянь исполкомонь секретаресь, исторической наукань кандидатось О.В.Дулкин Мокшэрзянь раськень регионъютконь общественной организациянь прявтонть Ю.А.Мишанинэнь ды исполкомонь прявтонть А.С.Лузгинэнь пельде ёвтась поздоровт кенярксчинть кувалма. Арсесь кеме шумбрачи, ловномс тиринь кельсэ книгат. Мейле Оркина, Синенькие ды лия велень школань тонавтницятненень казсь тиринь кельсэ сёрмадозь книгат, Мордовиядо энциклопедия. Пурнавозтнень сон теинзе содавиксэкс Мордовиянть марто. Кодат заводт тесэ важодить, зяро вузт кенкшест панжтнить эрьва валске од ломантненень. Олег Владимирович тердсь школань тонавтницятнень, велень эрицятнень а стувтнемс тиринь келенть, кода тейсь

Советской Союзонь Героесь Михаил Петрович Девятаев. Сонзэ позывноезэяк ульнесь истямо – «Мордвин».

Мейле Культурань кудос пурнавозтне мельспаросо ванызь Мордовиядо ды Советской Союзонь Геройденть М.П.Девятаевде кинофильматнень.

Седе, кода тееви од ломанесь патриотокс, кода кемекстави национальной ёжомарямось, теде ды лиядо ёвтнесь запассо подполковникесь, «Мокшень правда» республикань газетань журналистэсь, кона аволь весть ульнесь Чечнясо пси бойтнесэ, В.В.Лазарев.

– Мон покш мельсэ ванынь фильматнень ды кунсолынь инжетнень ёвтнемаст, – видькстась Оркина велень эрицясь Н.А.Неревяткин. – Михаил Петрович Девятаевде марсинь. Фильманть ваномадо мейле седеяк ламо карминь содамо. Полонсо улемстэ эрясь лия фамилиясо. Мон – эрзян. Вана эйкакшон, конат эрить Саратовасо, парсте келенть а содасызь. Ансяк те а корты седе, келенек ёмамо лангсо. Арась, сон а ёми, карми эрямо свал.

Мейле велень «Кучугуры» фольклорной ансамблясь морась зярыя морот. Ютксост «Эх, эрзяночка моя» морось.

…Оркина велестэ сыргинек позда чокшне. Эрицятнень кудотнесэ палсть толтнэ. Ёжонок паро. Тесэ эри эрзянь келесь, тесэ эрить ломанть, конатне а стувтнить покштяст-бабаст койтнеде-кирдатнеде, историядонть.

Пётр ЗИНОВЬЕВ.

Саратовань ёнкс

 

Новости

Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...
 
Университетсэ кармить тонавтнеме 4600 студентт

Н.П.Огарёв лемсэ МГУ-нь примамонь комиссиясь панжинзе кенкшензэ абитуриенттнэнь туртов июненть прядовомсто. Неть читнестэ университетэнь ректорось С.М.Вдовин ёвтынзе примамонь комиссиянь икелепелень итогтнень. Васняяк Сергей Михайлович ёвтась сюкпрянь валт республикань СМИ-тненень университетэнть тевдееманзо весеме ёндо невтеманть кисэ.

Подробнее ...
 
Ветеранонь промкс

Августонь 15-це чистэ Саранскойсэ ютась Мордовиянь ветеранонь организациятнень активень промкс. Пурнавкшность малав 400 ломанть. Промксонь участникекс ульнесь Мордовиянь Прявтонь тевтнень нурька шкас топавтыцясь В.Д.Волков.

Подробнее ...