Рубрикатор

Культура Айсурай Раджабова: «САРАНСКОЕСЬ – ПЕК МАЗЫЙ ОШ»
Айсурай Раджабова: «САРАНСКОЕСЬ – ПЕК МАЗЫЙ ОШ»

Тиринь газетань ловныцятненень течи минь ёвтнетяно омбо масторонь од тейтеренть ланга. Сонзэ лемезэ Айсурай Раджабова. Те мазый

тейтересь тонавтни Н.П.Огарёв лемсэ Мордовиянь государственной университетэнь филологиянь факультетэнь васенце курссо. Чачсь Айсурай Туркменистан масторонь Дашогуз областень Болдумсаз посёлкасонть. Советской шкастонть сон лемдевсь Калинин ды Калининск. Сон ашти Амударья леенть лаймесэнть. Те велень хозяйствань виев регион, косо покш мель явови эмежтнень кастомантень.

 

Раджабовтнень семияст покш, сынь котонест. Тетядонзо-авадонзо башка, Айсураень кавто лелянзо ды вейке патязо, семиясонть сон сехте вишкине. Семиянь прявтось, Табжибай, важоди больницясо, сон врач. Авазо, Тазегуль (бути ютавтомс минек кельс – «од цеця»), важоди школасо тонавтыцякс.

Айсурай видькстась, школасо сон покш мель марто тонавтнесь рузонь келенть, теевсь содавиксэкс те раськень культуранть марто, ансяк зярдояк эзь арсе – понги минек масторов ды карми тесэ тонавтнеме. Тейтересь прядызе школанзо 2013 иестэ ды мольсь тонавтнеме «Бухгалтер и информатика» специальностенть коряс. Теке шкастонть сон важодсь гипермаркетсэ. Эдь семиясь покш, эрьвась бажась лездамс тетянстэнь-аванстэнь.

Айсурай видькстась, сынст посёлкань зярыя од ломантне тонавтнить Н.П.Огарёв лемсэ Мордовиянь государственной университетсэнть. Зярдо сынь сакшныть каникуласто тиринь кудов, покш мельсэ ёвтнить минек республикадонть, тесэ эриця ломантнеде, минек ёнксонь мазычиденть. Айсураень оймесэ чачсь покш бажамо: понгомс тонавтнеме Мордовиянь вузонтень. Секскак «Бухгалтер и информатика» специальностенть коряс тонавтнеманзо прядомадо мейле сон кучинзе документэнзэ Н.П.Огарёв лемсэ МГУ-в. Кодамо кеняркс саизе тейтеренть, зярдо неизе эсь лемензэ тонавтнеме понгозтнень ютксто! Вана истя Айсурай понгсь Мордовияв.

– Саранскоесь – пек мазый ош. Монень маряви, сон эрьва чистэ яла седеяк пек вадрялгады ды мазылгады. Мезесь каяви сельмс, тесэ стявтовить пек ламо эрьва кодамо объектт: од кить, кудот, стадионт... Нама, те сюлмавозь Футболонь коряс мирэнь чемпионатонть мартояк. Мордовиянь весе эрицятнень марто мон кенярдан те покш тевенть кувалма, – видькстась Айсурай. – Ломантне тесэ эрить чевте седейть, свал анокт лездамс. Пек кенярдан сень коряс, мон тонавтнян Н.П.Огарёв лемсэ университетсэнть.

Туркменистанонь тейтересь ёвтнесь, сонзэ ули покш мелезэ седе домкасто тонавтнемс рузонь келенть ды литературанть. Айсурай пек вечки ловномс рузонь классиктнень произведенияст. Нама, тонавтнеманть лувсо сон вастневи стакачи марто: аволь весемесь чарькодеви омбо масторонь тейтерентень. Неть стакачитнень лездыть витемс мартонзо тонавтницятне ды университетэнь преподавательтне. Сынь домкасто толковить а чарькодевиця весе кевкстематнень. Тень кисэ Айсурай ёвты тенст покш сюкпря.

Эряви ёвтамс, те мазый тейтересь пек вадрясто моры. Сон ламоксть лиснесь изницякс университетэнь, республикань ды раськеютконь эрьва кодамо пелькстамотнесэ. Малав эрьва пелькстамосонть Айсурай саи казнень тарка.

Истя жо сон морсекшни Саранскойсэ ютавтовиця этнодискотекатнесэ. Зярс Айсурай кенярдовты кунсолыцятнень туркменэнь моротнесэ, маласо шкастонть бажи тонавтнемс рузонь ды эрзянь-мокшонь мороткак.

Тиринь кудонть эйстэ ве ёно эрямсто, Туркменистанонь од ломантне а стувтнить эсест раськень койтнень-кирдатнень. Мекевлангт, бажить сынст сюпалгавтомс, теевить содавиксэкс рузтнэнь, эрзятнень, мокшотнень культураст марто. Бажить тонавтнемс минек раськень келенть. Айсурай ёвтнесь, Туркменистанонь од ломантне сеедьстэ пурнавкшныть вейс, кортыть тиринь кельсэст, ледстнить чачома ёнксост. Ды эрьва вастовомасто пидить эсест раськень ярсамопельть: плов, дограма, семене, суйт-ашы, буглама, тамдырлама.

Ней Айсурай аноксты кизэнь сессиянтень. Ды покш мельсэ учи каникулатнень, конатнестэ сон моли тиринь Болдумсаз посёлкав ды вастови вечкевикс семиянзо марто.

Т.АКСЕНОВА

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...