Рубрикатор

Культура Пингензэ алтызе тиринь газетантень
Пингензэ алтызе тиринь газетантень

– Тиринь Симкина веленек пек мазый таркасо ашти, сонзэ эйстэ а васоло пиче виресь, канды ведензэ Чернелейка леесь, кенярдовты сельме крута пандось. Ломантнеяк тосо эрить чевте седейть, лиянень паронь арсицят ды роботань вечкицят, – истя аволь умок тиринь ёнкстонзо ёвтнесь тенек Мария Ивановна Пирогова, кие «Эрзянь правдасо» важоди малав колоньгемень иеть. Алкукскак, кезэрень Симкина велестэнть, конанень аволь умок топодсть 310 иеть, лиссть ламо содавикс ломанть. Умонь шкасто саезь тосо эрить кеме обуця, эрьва тевень тееме маштыця, ламос бажиця алкуксонь кудазорт. Вейкесь юткстост – Астайкинтнэнь раськесь.

 

Мария Ивановнань тетязо-авазо пингень перть важодсть «Путь к коммунизму» колхозсонть. Иван Фёдорович ды Елизавета Фёдоровна трясть-кастсть колмо эйкакшт. Пек покшоль кенярксост Паша цёраст чачомадо мейле. Те ульнесь 1959 иестэ. Шкань ютазь Елизавета Фёдоровна мирденстэнь таго тейсь покш казне – мельга-мельцек чачсть Мария ды Анна тейтерест. Эрямаль ды кенярдомаль ояксчисэ эриця те семиянтень. Ансяк кажось сась апак учо. Иван Фёдоровичнень ульнесть ансяк 47 иеть, кода а шкастонзо саизе эрямосто апак учонь куломась. Елизавета Фёдоровна ансяк сонсь содась, кодат стакачить прасть лавтовонзо лангс. Колмо эйкакштнень эрявсь трямс-кастомс ды пильге лангс стявтомс. Сон ламо коршась довань сэпей ведтенть. Эзизе нолда прянзо виев обуця, ськамонзо колмо эйкакшонь триця авась.

Аволь ансяк эйкакштнень виде килангс аравтынзе, эштё тенст паро кудо путсь ды ялгатнеде мейсэяк бажась сынст а явомс. Эрьва покшчинтень тейтерькатненень мазый платият стыль, цёрантень од панар рамиль, штобу сынь аволизь маря пряст лиятнеде а седе нужачисэ эрицякс. Теке шкастонть, эйкакштне эрьва тевсэ лездасть аваст туртов, кудоютконь тевтне весе сынст

лангсольть. Кардазпотмо ракшатнень мельга якасть, кизэнь перть тикше анокстасть, пенгть теле лангс таштасть. Те эдь ней те велесэнть эрьва кудосо ули «сэнь» уштомапель, ды ведеськак малав эрьва азоронтень кудос сы.

Школаст прядомадо мейле эйкакштне вейке омбоце мельга тусть эрямо Саранскоев. Мария Астайкина (тейтерьксэнь фамилиязо) школасо тонавтнесь парсте. А стяко ломань ютксо кортыть, эйкакшпингень содамочитне пингень перть мейле тенст маштовить. Вана Мария Ивановнаненьгак келень коряс паро содамочитне лездасть редакциясо важодемстэ ильведькстэме тевензэ парсте топавтомасо. Истя, Саранскоень ГПТУ-нть парсте прядомадо мейле сон сась важодеме секретарекс-машинисткакс «Эрзянь правда» тиринь газетас. Эрямосонзо ульнесть паро полавтомат, вастызе вечкеманзо, лиссь мирденень. Эрзянь цёрась Сергей Пирогов се шкане важодсь республикасонок икеле молиця ДСК предприятиясонть. Одтнэнень эрявсь эрямо тарка. Мария Ивановнань зарплатась а покшоль, секскак савсь тензэ туемс важодеме Приборостроительной заводов. Тевень вечкицясь косояк а ёми, Мария Ивановнанень коллективеськак вечкевсь. Роботанзо топавтсь седейшкава. Васня саизь тонавтницякс, аламо шкань ютазь тензэ максызь омбоце, мейле колмоце разрядонть.

Кие соды, кода бу седе тов туевель эрямозо, бути авольть са ютазь пингень 90-це стака иетне. Икеле молиця предприятиясь ушодсь каладомо, ламот сестэ кадовсть тевтеме. Мария Ивановнанень прок сонсь Пазось лездась се шкане. «Эрзянь правда» газетантень сестэ эрявсть машинисткат, ды сон таго кармась важодеме тиринь газетасо.

Мария Ивановнань ды Сергей Ивановичень кавто эйкакшост: Ольга тейтерест ды Женя цёраст. Сынь тетяст-аваст кенярдовтсть школасо парсте тонавтнемасост, кунсоломасост. Эрямс бу ды кенярдомс… Нать, сонсь эрямось варчни те семиянть нардевчинзэ. Апак учо ормалгадсь Мария Ивановнань мирдезэ Сергей Иванович. Аволь кувать сэредемадо мейле сон тусь эрямосто…

Мариянень, кода аванстэньгак, ськамонзо савсь стявтомс пильге лангс кавонест эйкакштнень. Авась ламо обуцянь ёнксонзо саинзе аванзо пельде. Зярдояк а пеняци стакачитнень лангс, сонсь соды, кода тензэ максовсь тейтерензэ Ольгань вузсо тонавтнемазо, иень перть армиясто Женянь учомазо. Эдь авань седеесь весементь цидярдсы. Важодеме сон свал сы мельспаросо, мизолкс марто.

А стяко ламо иень перть вадрясто важодемань кисэ сонзэ казнетнень ютксо: МР-нь Правительствань Почётонь грамотась, РФ-нь Связень ды массовой коммуникациянь министерствань Почётонь грамотась.

Неть читнестэ Мария Ивановнань лемс сыть ламо поздоровт чачома чинзэ кувалма. Миньгак, «Эрзянь правда» газетань теицятне, вейсэндявтано паро валтнэс ды арсетяно тензэ кеме шумбрачи, эрямосо уцяска, мелень-арсемань топавтома ды седе ламо лембе, маней чить!

В.ЮДИНА

 

Новости

Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...
 
Университетсэ кармить тонавтнеме 4600 студентт

Н.П.Огарёв лемсэ МГУ-нь примамонь комиссиясь панжинзе кенкшензэ абитуриенттнэнь туртов июненть прядовомсто. Неть читнестэ университетэнь ректорось С.М.Вдовин ёвтынзе примамонь комиссиянь икелепелень итогтнень. Васняяк Сергей Михайлович ёвтась сюкпрянь валт республикань СМИ-тненень университетэнть тевдееманзо весеме ёндо невтеманть кисэ.

Подробнее ...
 
Ветеранонь промкс

Августонь 15-це чистэ Саранскойсэ ютась Мордовиянь ветеранонь организациятнень активень промкс. Пурнавкшность малав 400 ломанть. Промксонь участникекс ульнесь Мордовиянь Прявтонь тевтнень нурька шкас топавтыцясь В.Д.Волков.

Подробнее ...