Рубрикатор

Культура Саранскойсэ тешкстызь Новрузонть
Саранскойсэ тешкстызь Новрузонть

 

Мартонь 21-це чистэ Саранскойсэ тешкстызь Новруз покшчинть. Сонзэ анокстыцянзо-ютавтыцянзо – «Весероссиянь Азербайджанонь Конгресс» общественной вейсэндявксонь региононь отделениясь ды МР-нь Культурань ды национальной политикань министерствась. Минек республикасо те кенярксчинть тешкстамось теевсь паро коекс. Вана уш сисемецеде пурнавить эрьва кодамо раськень общественной вейсэндявкстнэ вейсэ мазый коенть тешкстамо.

 

Кенярксчись пурнынзе вейс Мордовиясо эриця ламо раськетнень: эрзятнень ды мокшотнень, рузтнэнь, азербайджанецтнэнь ды лия раськетнень. Весемезэ малав 120 ломанть. Те эштё весть невти, кодамо покш ояксчисэ эрить минек раськетне.

Новрузось ловови Од иень кенярксчикс, конань тешкстамо ушодсть пек умонь шкатнестэ. Чилисема ёнксонь мастортнэсэ сон – государственной покшчи. Те, саемга, Азербайджансо, Таджикистансо, Казахстансо, Узбекистансо, Киргизиясо, Туркменистансо ды лия мастортнэсэ. Новрузось – те чипаень, лембень, валдонь, тундонь кенярксчи, сонсь модась сыргози ды ушоды од эрямо. Весенень, кить сёвнозевсть вейкест-вейкест марто – те чистэнть эряви ладямс, стувтомс кежтнень ды апаротнень.

Азербайджанонь раськесь тешксты Новрузонть мартонь 16-21-це читнестэ. Анокстамо жо ушодыть ковдо икеле: шлить кудост ды ванськавтыть вальмалкстнэнь,  велявтыть долктнень. Седеяк покш мель явови ярсамопелень анокстамонтень. Эрьвантень сыть ламо инжеть. Секскак, азораватне видить товзюро, конань мейле путсызь столь лангс. Вакссонзо улест пидезь алт, плов, шурпа, сывель, долма; ламбамотнеде – пахлава, шакер бура, фруктат. Теде башка, столенть лангс путома штатолт, сынь кандыть башка смусть. Штатолось – те тол, конась вансты ломантнень сельмедемадонть. Коень коряс, кенярксчинь васенце чистэнть весенень улема кудосо. Ломантне кортыть: бути Новрузонь васенце чистэнть а улят кудосо, сестэ сисем иеть а несак тиринь кудот. Новрузонь васенце чистэнть веньперть палы тол, бути сон мади – те апарос.

Ломантнень мельсэ ашти кезэрень ёвтамо – Новрузонь тешкстамо читнестэ модантень валгить ангелт, конат казить парочи ды сэтьмечи, сынь совить ансяк сеть кудотнес, косо эрить ояксчисэ.

Новруз кенярксчинть кувалма пурнавозтненень поздоровт ёвтась Мордовия Республикань Культурань ды национальной политикань министрась А.М.Чушкин:

– Новрузось совась минек республикань культурань эрямонтень. Раськень кенярксчитне лездыть чарькодемс Мордовиясо эриця башка раськетнень культураст. Течи те покшчинть тешкстамо пурнавсть ламо раськень ломанть, те лезды ванстомс ды кемекстамс республикасонок сэтьмечинть ды вейкень-вейкень чарькодеманть.

Лембе вал марто пурнавозтненень пшкадсь МР-нь Культурань ды национальной политикань министрань васенце полавтыцясь А.И.Карьгин:

– Новрузось – те чилисема ёнксонь ламо мастортнэнь туртов алкуксонь покшчи. Те – тундонь чинь ды вень вейкендямо (равноденствие), лиякс меремс, Од иень ушодома. Тагояк ледстяса, Россиянть сюпавчизэ – ламо раськетнесэ. Сынст ванстомат. Минь паро мельсэ тешкстатано мартонк Новрузонть. Кецявты, вакссонк те чистэнть вишка эйкакшонк. Весе тынь ледстнетядо тиринь ёнксонь моронк, вечкевикс киштематнень. Мон арсян весень туртов ояксчисэ ды сэтьме эрямо!

«Весероссиянь Азербайджанонь Конгресс» общественной вейсэндявксонь региононь отделениянь прявтось Арзу Растун-Оглы Дуваяров мерсь:

– Новрузось минек туртов пек покш кенярксчи. Кияк а соды, зяро пингеть тешкстыть сонзэ. Весе содатано, Новрузось – пек кезэрень кенярксчи. Прявт меленек – ванстомс неть койтнень, а стувтомс. Ёвтнемс сындест эйкакшонок-нуцьканок туртов. Весень Новруз кенярксчинть марто! Кадык велькссэнк свал карми валдо менель ды чипай!

Новруз кенярксчисэнть гайгсть азербайджанонь ды рузонь морот. Сынст казизь Азербайджансто сазь морамонь группась ды Мордовиянь филармониянь артистэсь Вячеслав Зобков. Новрузонть тешкстамсто теезель эштё вейке коесь – кирвазтезель покш толпандя. Сонзэ велькска кирнявтнесть кенярксчинтень пурнавозтне. Эсь пачкаст ёвтасть истят валт: «Весе апаротне тонеть, а тонь кенярксчинть – монень». Кенярксчинь тешкстыцятне толковизь, толпандянть велькска кирнявтомсто толонтень максовить весе апаротне ды ильведевкстнэ, истя ломантне ванськавтыть эсь пряст Од иенть ушодовомсто.

Толонть мадемадонзо мейле од тейтертне ды цёратне пурнасызь куловонть ды почодсызь килангс. Течинь чис ванстовсть кенярксчинть тешкстамонь ламо лия койть. Азербайджанонь раськень ломантне бажить сынст ванстомс ды пачтямс эйкакшост-нуцькаст туртов.

Т.Аксенова

 

Новости

Конституциясь – прявт закон

Исяк, декабрянь 12-це чистэ, тешкставсь Россиянь Федерациянь Конституциянь чись – минек масторонь государственной прявт кенярксчитнестэ вейкесь.

1993 иень те чистэнть минек масторсо кемекстазель РФ-нь Конституциясь. Весе текстэсь максозель «Российская газета» изданиясонть 1993 иень декабрянь 25-це чистэ. 1994 иестэ, Россиянь Президентэнть Указонзо коряс, декабрянь 12-це чись ёвтазель государственной кенярксчикс. Зярыя иень перть те чись ульнесь официальной оймсема чикс. Ансяк 2004 иень декабрясто Госдумась совавтсь полавтомат РФ-нь Трудонь кодексэнтень. Оймсема чись полавтовсь, а сонсь кенярксчись кандозь Россиянь ледстнемань читнень юткс.

Подробнее ...
 
Косто рамамс куз?

Декабрянь 15-це чистэнть республикасонть панжовить кузтнэнь ды пичетнень микшнемань базартнэ. Саранскойсэ тень туртов кемекстасть 22 площадкат (микшнема таркатнеде жо весемезэ 77).

Подробнее ...
 
Краснослободскойсэ – од прявт

Ноябрянь 29-це чистэ Краснослободскоень муниципальной районсо ютась Депутатонь райононь советэнь 13-це  сессиясь. Мордовиянь Прявтонть В.Д.Волковонь кармавтоманзо коряс сессиянть роботасо примась участия Мордовиянь Правительствань Председателесь В.Ф.Сушков. Чинь повесткасонть ульнесь вейке кевкстема: райононь од прявтонть кочкамось.

Подробнее ...
 
Фан-зона

Саранскойсэ Футболонь коряс масторлангонь чемпионатонть ютавтомсто прявт ошонь куншкакуросо карми улеме фан-зона.

Подробнее ...
 
Кочкадо сехте мазый район

Саранскойсэ ютавтови онлайн-вайгелень максома, сонзэ вельде редяви, ошонь кона районось весемеде мазыйстэ наряжазь Од иень кенярксчитнес. Теде пачтясть ошонь Администрациясто.

Подробнее ...