Рубрикатор

Культура Людмила АНТИПКИНА: «ТЕАТРАСЬ – ТЕ МОНЬ ЭРЯМОМ»
Людмила АНТИПКИНА: «ТЕАТРАСЬ – ТЕ МОНЬ ЭРЯМОМ»

 

Школасо тонавтнемстэ саезь Людмила Антипкина (сестэ сон ульнесь Бабакаева) явсь мель весе кенярксчитненень. Косо эрявсь киштемс, косо – морамс. КВН, «А, ну-ка, девушки!» ды лия содамочинь ды творческой пелькстамотнесэяк зярдояк эзь аште ве ёно. Ней Людмила Антипкина малав комсь иеть важоди Мордовиянь Национальной драмань театрасо актрисакс.

Чачсь сон Саранскойсэ. Тетязо ды авазо – Кочкурбуень Вирь ало ды Пакся Тавлань эрзят. Весе эрямост перть сынь важодсть заводсо. Семиясост трясть-кастасть кавто тейтерть, конатненень максызь весе седей лембест. Тонавтсть эрямс ояксчисэ, вейке-вейкенень лездазь ды вечкемс роботанть. Весе каникулатнень ды оймсема читнень эйкакштне, нама, ютавтсть велесэ покштяст-бабаст кедьсэ. Секскак Людмила парсте содасы эрзянь келенть, спектаклясо налксемстэ стакачить а эрсить.

Людмила, кода истя лиссь, тон кочкик артистэнь профессиянть?

– Школасо тонавтнемстэ а ледстявияк, ульнесь-арасель бажамом улемс актрисакс. Весть, Тавлав буссо ардомсто монь неимим Елена Сергеевна Грачёва педагогось. Сон мерсь, сы тонавтнема иестэ национальной культурань факультетсэ (ней те Н.П.Огарёв лемсэ МГУ-нь  – Национальной культурань институт) кармить пурнамо актёронь отделениянь группа. Сон тердимим, мерсь, сак, невтьсак прят, варчасак. 11 классо тонавтнемстэ иень перть арсинь тень ланга. Прястон эзть туе сонзэ валонзо. Истя, молинь, ютынь весе колмо туртнэнь ды саимизь.

– Кода ютасть тонавтнемань иетне?

– Студентэнь шкась ливтязь ливтясь. Эзь марявояк. Ней ледстнян ды арсян, эрявсь максомс питне эрьва тевентень. Тонавтнемась пек тукшнось мелезэнь. Сеске чарькодинь – те монь. Вузсо тонавтыцянок Е.С.Грачёва ды Н.И.Пискаев тонавтсть эйсэнек ламос ды эрьва мезес. Натой, сенень, кода кортамс ломантнень марто. Группанек путокшнынек А.Островскоень «Гроза» пьесанть.

Е.С.Грачёва ульнесь строгой. Сон миненек сеске мерсь: васня тонавтнема – мейле уш пурнадо семият. Ансяк лиссь истя, омбоце курссо тонавтнемстэ лисинь мирденень. Иень ютазь чачсь эйкакшом. Декретс туемс эзь мереве. Мон пек ризнынь, кода улемс? Бажинь саемс академиянь отпуск ве иес, ансяк эштё вейке набор те отделениянтень арасель. Сюкпря Елена Сергеевнанень, лездась монень. Чачтынь ды сынь мекев тонавтнеме. Эйкакшонть марто аштесь ававтом. Ней цёрам туртов 19 иеть. Сюкпря Пазонтень, весемесь истя вана лиссь.

– Людмила, вузонь прядомадо мейле кода сыть важодеме национальной театрав?

– Тевесь ульнесь истя: 1999 иестэ дипломтнень идемадо мейле июльстэ группанек саимизь театрав. Весень. Важодеме. Истямо ладязель кармавтома. Нама, аволь весе кадовсть. Кие кочкизе актёронь тевенть, кие лияв тусь. Истя, те васень курсонть эйстэ мартон вейсэ важодить А.Кипайкин, Г.Гришуткина ды О.Надорова. Театрань коллективесь вастымизь парсте. Сюкпря тенст, сынст вановтост ало теинек васенце эскельксэнек, ламо тонавтсть эйсэнек. Минь те шкас пшкалетяно тенст превспутома мельга. Васенце режиссёронок ульнесь Ю.М.Хвостиков. Сонензэяк ули мелем ёвтамс лембе валт. Мезе теинек сцена лангсо – весе вановтонзо ало. Минь ловтано сонзэ тонавтыцякс. А.Островскоень «Доходное место» – те ульнесь васенце спектакля, конань путынек университеттэ мейле. Теде мейле театрасо кемень иень перть ульнесь режиссёрокс А.Ю.Борисов. Виев ды лезэв важодема арасель, кода путовксткак. Ды минек од шканок та-кода ютась стяко, косояк апак налксе… Мейле театрась кармась тердтнеме лия режиссёрт ды тевесь сыргась.

– Людмила, ёвтнек спектаклятнеде, косо тон налксят, кецявтат ды талновтат ваныцятнень.

– Улить эрьва кодат ролень. А.Толстоень «Алюха» путовкссонть налксян мадам Компасонь. Те комедия. Ролесь мазый ды мельстуиця. Лия истямо монь арасель. Тосо налксемстэ ёжомгак паролгады. Л.Толстоень «Власть тьмы» трагедиянь спектаклясонть, мекевланк, невтян стака образ. Матрёна героиням машты эйкакш. Сеске ёвтаса, сцена лангсто маряви ваныцятнень пельде сялдомась, берянь ёжось. Истя жо налксян К.Абрамовонь «Эрьванть эсензэ ормазо» (Маря), Н.Гоголень «Урьвакстома» (Фёкла Ивановна), Э.Портерэнь «Кенярдомань урокт» (Нэнси), К.Петровань «Ташто койсэ» (Проска), Лопе де Вегань «Чудеса пренебрежения, или женщины – это дьяволы» ды лия путовкстнэсэ. Ламо ролень эйкакшонь спектаклятнесэ. Те: И.Токмаковань «Золотое перо» (Фёкла сазорка), В. Илюховонь «Молодильные яблоки» (Яга баба), «Как Баба-Яга дочек замуж отдавала» (Докука сазорка) Е.Фридманонь «Страсти по Каштанке» (Никитишна) ды лият.

– Мезе лангсо важодят ней?

– Ней налксян М.Ладонь «Очень простая история» путовкссонть. Таго мартонок важоди Ю.М.Хвостиков. Тосо налксян скал. Васенцеде важодемасон эряви налксемс ракшат. Мелявтынь, кода налксемс? Те эдь аволь ломанень обуця! Те ракшань вановт, прянь ветямо. Режиссёрось кочкизе истямо кинть: кадымизь ломанекс, ансяк вейкень-вейкень чарькодтяно эсенек кельсэ. Ракшань элементтнэ жо улить. Ракшатнень кой-кона ёжотне ломантнеде виевть, седе пштистэ весементь марить. Весе тень эряви невтемс сцена лангсо. Сёксня карми те спектаклянть премьеразо. Садо ваномо.

– Людмила, кода марят эсь прят, зярдо эряви налксемс премьерань спектаклясо?

– Васняяк, те покш талнома ды ризнэма. Те свал. Спектаклянть анокстат, учат мезе-бути, важодят репетициясо, потмосот весе лаказь лаки. Мейле, кода налксеви – оймават. Арсят, вай, мезе седе тов? Кода эрямс? Ды поладат важодеме! Премьерадо мейле редят кодаткак муевкст. Эрьва спектаклясь кази истямо ёжо, оймень витема! Паряк, те чарькодеви ансяк актёртнэнь туртов. А содан, кода эрявлинь, бути а улевельть неть ёжомарямотне эрямосон. Театравтомо а неян эсь прям.

– Содазь, эсенек театрадо башка савкшны ардтнемс гастрольга. Кода тень лангс ваныть семиясо?

– Сюкпря мирдем туртов, сон чарькоди – те монь важодемам, эрямом. Зярс арасян, лезды, кирди кудонть, пиди-аноксты ярсамопель, ваны эйкакштнень мельга. Меельце шкане театрасонок парсте ладявсь гастролень важодемась. Сонзэ ветить театрань прявтось С.И.Дорогайкина ды ваныцятнень коряс прявтонь полавтыцясь Г.В.Горина. Минь сеедьстэ ардтнетяно республикань томбалев. Неть ардтнематне коллективенть седеяк вейсэндить. Мелят лиссь истя, понгинек гастролев Инечистэ. Кие-бути эйстэнек якась церьковав, кие-бути артсь алт. Якинек вейкенек-вейкенек туртов христосовамо. Ёжонок истямо пароль! Мейле прась тенек оймсема чи, сыргинек Рав леенть чирев. Тосо арсинек эстенек культурной программа, налксинек волейболсо ды лия пелькстамосо.

Минек театрасо ней од прявт – С.И.Дорогайкина. Те таркантень сонзэ ладямодонть мейле сеске чарькодинек: кинень-бути эрявтано. Сон минек туртов прок тиринь ава, ванстыця ды мелявтыця. Эрьванть кунсолосы, бажи чарькодемс мелявксонок. Теке эйкакшт чийтяно сонензэ стакачинек ды ризксэнек марто. Сон эрьвантень яви мель, киньгак а кады. Самай истямо прявт театранть туртов эрявияк.

– Людмила, ули кевкстеманок, конань каршо пек учотано каршо вал. Кодамо роль зярс эзить налксе ды пек бажат налксемс?

– Ули монь истямо бажамом, умонь. Ашти сон оймесэнь. Бажан налксемс военной тематика лангс путовкссо. Аволь умок Е.Исайчева сёрмадсь сценарий «Не забывай незабываемое» спектаклянть туртов. Сон мернесь тень, сёрмадан тонь кисэ. Авань роль. Шкань ютазь сценариесь витевсь-полавтовсь, мейле режиссёрось кой-кона таркатнень киртинзе-ёртынзе. Ды монь ролем тосто ёмась. Ялатеке палы потсон кемема, зярдояк сави тень налксемс военной спектаклясо. Пек бажан!

Людмила мирдензэ Евгений марто кастыть кавто эйкакшт. Сынь – кенярксост ды каштанчист. Дениснэнь 19 иеть, Верониканень – 10. Людмилань валонзо коряс, эйкакштне театрань вечкицят. Денис кемень иесэ налксесь «Пургаз» путовкссонть, сонензэ максокшность натой гонорар. Сынь якить ваномо весе спектаклятнень, содасызь весе геройтнень ды, мерьсынек, театрань-сценань салавачитнень. Актёртнэнь эйкакштне вейке-вейке марто эрить ялгаксчисэ, вастневить гримёркасо, зярс тетяст-аваст важодить. Людмила весе ютко шканзо алты эйкакшонзо туртов. Тавласо ули кудост. Путнить пире, косо кастыть эрьва кодат эмежть. Мейле покш мельсэ аноксты вареният-компотт, салты помидорт-куярт. Пек вечкевить тензэ авань истят вана тевтне. Кизна семиянек мукшныть шка ардомс оймсеме иневедь чирев, косто пурныть вийть. Людмила лезды аванзо ды сазоронзо туртов, весе сынь эрить покш ялгаксчисэ.

Людмила Антипкина – «Авань сехте вадря роленть кис» номинациясонть МР-нь Прявтонь театральной искусствань премиянь лауреат (А.Толстоень «Алюха» путовксось). Истя жо сон Е.А.Евстигнеев лемсэ эйкакшонь ды од ломанень фестивалень дипломант, Э.Портерэнь «Кенярдомань урокт» спектаклясо казезь «Авань сехте вадря роленть кис».

 

Т.Маторкина

 

Новости

43№ лицейсэ панжовсть «Героень партат»

«Единая Россия» партиянь «Од школа» партпроектэнть лувсо ушодовсь «Парты героя» проектэсь. Сонзэ вельде кепедевить минек масторонь геройтнень лемтне, эйкакштнень трямосо-кастомасо васенце таркас аравтовить патриотической ёнкстнэ.

Неть читнестэ Саранскоень 43№ лицейсэ ютась промкс, кона алтавсь «Героень партань» панжомантень. Тесэ невтезельть кавто партат, конат алтавить Советской Союзонь Героентень Виктор Николаевич Бобковнень ды Мужествань Орденэнь кавалерэнтень Владимир Иванович Ненюковнень.

Подробнее ...
 
«Единая Россия» поддерживает законопроект Минтранса о невозможности высаживать детей из общественного транспорта

Эксперты партпроекта «Единой России» «Безопасные дороги» поддерживают законопроект Минтранса, внесенный на рассмотрение в Правительство РФ, согласно которому будет запрещено высаживать детей до 16 лет из общественного транспорта. Партия поддерживает данный законопроект, и совместно с Минтрансом доработает документ перед его внесением в Государственную Думу. Об этом заявил координатор партпроекта, заместитель председателя комитета Госдумы по транспорту и строительству Владимир Афонский на заседании общественного совета партпроекта.

Подробнее ...
 
Законопроект о «22-й кнопке» позволит поддержать местные телеканалы
Включение в обязательный цифровой пакет муниципальных
телеканалов, который распространяют операторы кабельных сетей, расширит
информационное пространство для зрителей и позволит существенно
поддержать местную тележурналистику. Об этом заявил соавтор
законопроекта о «22-й кнопке» - заместитель секретаря Генерального совета
«Единой России», член комитета Госдумы по информационной политике,
информационным технологиям Евгений Ревенко. Документ предполагает
внесение изменений в статью 32 федерального закона «О средствах массовой
информации» и статью 46 федерального закона «О связи».
Подробнее ...
 
В «Единой России» предложили расширить список оснований для получения ипотечных каникул, включив в него рождение второго ребенка
     Перечень оснований, по которым банки будут обязаны вводить ипотечные
каникулы для заемщиков, должен быть максимально широким и включать в 
себя не только потерю работы, но и вторую беременность. Об этом заявила 
член общественного совета партийного проекта «Крепкая семья», депутат 
Государственной Думы Татьяна Цыбизова в ходе заседания 
внутрипартийной дискуссионной площадки партии «Единая Россия» 
«Благополучие человека» на тему «Доступная ипотека – шаг к семейному 
благополучию».
Подробнее ...
 
Ёвтасть поздоровт Геройтнень аватненень

Мартонь 8-це чистэ од ломантне содавтызь ды ёвтасть поздоровт Мордовия Республикань чавовозь Геройтнень сядо аватненень. Те паро тевенть кармасть топавтомо «Россия – страна возможностей» панжадо платформантень совиця Росмолодежень од ломанень инициативань Грантонь конкурссонть «Не бывает чужих матерей» проектэнть изнямонзо вельде.
Активисттнэ ульнесть республикань 22 районсо ды казсть Героень аватненень цецят ды казнеть. Мероприятиянть прявт тевезэ – од ломантнесэ нравственно-патриотической воспитаниянть кемекстамось ды Геройтнень аватненень лаздамось, конат ёмавтызь эсь цёраст Афганистанонь, Чечнянь ды лия локальной конфликттнэсэ воинской долгонь топавтомсто.
Проектэсь тевс нолдави 2016 иестэ саезь Мордовия Республикань Ковылкинань районсо, а 2018 иень ноябрясто саезь – республиканть келес. Од ломантне ютавтнить вастовомат чавовозь геройтнень аваст марто. Ёвтыть тенст поздоровт Мартонь 8-це чинть, Авань чинть кувалма. Лездыть тенст энялдомаст коряс.