Рубрикатор

Культура Д.Мишечкин: «ЭРЯН ЭРЬВА РОЛЬСЭНТЬ»
Д.Мишечкин: «ЭРЯН ЭРЬВА РОЛЬСЭНТЬ»

Саранскойсэ неень шкане юты «Театрань недля» фестивалесь. Сонзэ вельде кочкави сехте вадря спектаклясь, конанень максови МР-нь Прявтонь премия. Эрзянь ды мокшонь национальной драмань театрась невтизе К.Абрамовонь пьесанзо коряс «Эрьванть эсензэ ормазо» путовксонть. Главной героенть Кальдиркинэнь налкси Дмитрий Мишечкин. Умок чачсь меленек ёвтнемс тынк туртов те актёрдонть. Репетициятнень ютксо муевсь ютко шка ды минь вастовинек.

Дмитрий Мишечкин важоди Национальной театрасо 2004 иестэ саезь. Дебютокс сонзэ туртов ульнесь «Тюштя» эрзя-мокшонь эпосонть коряс спектаклясо старейшинань ролесь. Те важодеманть  марто сон ульнесь Финнэнь-угрань театратнень раськеютконь фестивальсэнть, косо критиктне ды ваныцятне паро ёндо тешкстызь налксеманзо.

Теде мейле ульнесь В.Шукшинэнь ёвтнеманзо коряс «Латось сыргась» путовксось, косо Дмитрий налксесь кавто рольть – Веня Зяблицкоень ды Глеб Капустинэнь. «Чудикень» образтнэ изнявсть апак кавтолдо! 2007 иестэ Веня Зяблицкоень роленть кисэ Д.Мишечкиннэнь максозь «Цёрань сехте вадря роль» театрань искусствасо МР-нь Прявтонь премия.

Дмитрий чачсь Саранскойсэ. Сонзэ тетязо Михаил Дмитриевич –Инсарбуень мокшо, авазо – Валентина Филипповна – Кочкурбуестэ, эрзява. Весе каникулатнень Дмитрий ялаксонзо марто ютавтсть велесэ.

Школань прядомадо мейле од цёрась мольсь тонавтнеме Н.П.Огарёв лемсэ МГУ-нь Национальной культурань факультетэв. Тосо пурнасть тонавтницят актёронь отделениянтень. Валонзо коряс, покш мелезэ арасель тов молемс, истя уш лиссь. Сон а сёпи, тонавтнемантень эзь правто. Лиясто, натой, эзь яксеяк. Ансяк вана пек вечксь налксеме студентэнь спектаклятнесэ. Бажась вейкеяк а менстямс. Налксесь М.Горькоень «На дне», В.Катаевень «Квадратура круга» путовкстнэсэ. Паро мельсэ ледстни тонавтыцянзо: Н.И.Пискаевень, Е.С. Грачёвань, В.С.Брыжинскиень, А.И. Брыжинскиень, Т.Н.Сидоркинань, С.Б.Бахмустовонь ды ламо лиятнень.

Вузсо тонавтнемстэ ушодсь яксеме «Скиф» театрань студияв, конань ветясь МР-нь народной артистэсь, искусствань заслуженной деятелесь И.Ф.Кузьмин. Тосо ульнесть зярыя сонзэ кондят од ломанть. Васня арсесь, невтьсы прянзо ды туи. Лиссь лиякс. Игорь Фёдоровичень марто сынь путнесть спектаклят, конатнень невтнесть лия ошсояк (саемга, А.Володинэнь «Две стрелы»).  Секе тев ульнесть ошонь мероприятиятнесэ, концерттнэсэ, косо, нама, эрявсь аштемс сцена лангсо.

– Те тевстэнть весе ушодовськак. И.Ф.Кузьмин тонавтсь эйсэнек, толковась, ламо ёвтнесь. Сон макссь ламо содамочить. Студиянтень яксесть Андрей Анисимов, Екатерина Исайчева, Алексей Егранов, ней минь весе вейсэ важодтяно вейке театрасо, – ёвтни Дмитрий.

Вузонть прядомадо мейле Дмитрий Мишечкин ялганзо марто зярс-бути важодсь рузонь драмань театрасо. Тосо сынь теевсть содавиксэкс истят актёртнэнь марто, кода Николай Большаков ды Сергей Адушкин. Ве шкасто Дмитрий налксесь рузонь ды национальной театрасо. Мейле ютась эрзянь-мокшонь раськень театрав. Тесэ уш ульнесть сонзэ ялганзо ды содавиксэнзэ.

Дмитрий а содасынзе эрзянь ды мокшонь кельтнень, ансяк те эзизе тандавто. Нама, васень шкастонть ульнесть стакачить. Рольтне главнойть, тексттнэ – покшт. Сынст эрявить тонавтнемс, эрьва валонть ёвтамс чарькодевиксстэ, илязо уле рузонь акцент, иляст нилеве валонь петне. Тень коряс театрасо эйсэст тонавты башка ломань. Дмитрий сонсь ламо важоди эсензэ лангсо, лиятнень коряс васенцекс тонавтнесы текстэнзэ. Бути валось стакасто ёвтавиця – сонзэ полавтсызь. Содазь, стака налксемс кавто кельсэ, ютамс вейке кельстэ омбоцентень. Эрси, рузонь кельсэ валрисьмесь нурькине, эрзякс – кувака.

– Дмитрий, кодамо спектаклясо ролесь тонь туртов сехте малавикс ды вечкевикс?

– Мезеяк а ёвтаван тень коряс…Весе рольтне вечкевикст. Сынь эрьва кодат, эрьванть лангсо ламо важодят. Монень маряви, рольтне – те прок эйкакшонь чачома. Эсеть эйкакштне свал сехте вечкевикст. Эрьва рольсэнть «эрят». Зяро бу иеть аволить важоде театрасо, ялатеке сцена лангс лисемадо икеле свал ули талнома, – корты Дмитрий.

Режиссёртнэ парсте неить, те актёронтень изнявить эрьва кодат образтнэ. Сонензэ кемить ды максыть прявт рольть. Мишечкинэнь марто спектаклятне ютыть ламо иень перть. Невтемга: Лопе де Вегань «Чудеса пренебрежения, или Женщины – это дьяволы» (Фернандо), А.Толстоень «Алюха» (Мебиус), В.Мишанинань «Кепе менельга» (Павел), истя жо Дмитрий налкси Н.Гоголень «Урьвакстома» (Кочкарев), Н.Тургеневень «Вешние воды» (Санин), К.Петровань «Ташто койсэ» (Карпа) ды лия путовкстнэсэ.

Театрань критиктнень валост коряс, сон – виевдеяк виев актёр. Ды кода а прамс мартост ве мельс? Эрьва спектаклясонть Дмитрий путы весе оймензэ, мелензэ, виензэ. Ваныцятне тень редить сеске. Обуцянь коряс сон сэтьме, прянь а шныця, ломань икелев а эци. Сцена лангсо жо налксемасонзо сеске каяви сельмс.

Дмитрий мезеяк эзь карма ёвтнеме семиядонзо. Ансяк минь содатано, сонзэ вечкевикс низэ – Екатерина Исайчева. Сон истя жо важоди Национальной театрасо актрисакс. Аволь умок чачсь Варвара тейтернест. Арсетяно сынст туртов уцяскав ды кувака эрямо, мельстуиця рольть ды паро ваныцят!

 

Т.Маторкина

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...