Рубрикатор

Культура ЭРЗЯНЬ НАЙМАНОНЬ ТЕШТЕ
ЭРЗЯНЬ НАЙМАНОНЬ ТЕШТЕ

Эрзянь Найман велесэнть, кона ашти Покш Березникень районсо, 1914 иень ноябрянь 12-це чистэ чачсь эрзянь литературань тештесь, Мордовиянь Народной сёрмадеесь, Государственной премиянь лауреатось, Почётной гражданинэсь Кузьма Григорьевич Абрамов. Сонзэ парсте содасызь кода эрзянь, истя рузонь кельсэ ловныцятне. Кузьма Григорьевичень весе сёрмадовксонзо ютасть шкань пачк ды эзть таштомо. Сынь нейгак ловновить паро мельсэ. Мерят, сёрмадозь неень шкань вешематнень лувсо.

1933 иестэ К.Г.Абрамов прядызе Ицялонь кемень иень школанть ды седе тов тонавтнеманзо поладызе Мордовиянь педагогической институтсо. Ансяк сон тесэ кувать эзь тонавтне. Васенце курсонть прядомадо мейле тонавтнеманть кадызе.

1935 иестэ саезь К.Г.Абрамов важодсь Покш Березникень райононь Косогор велень сисем иень школасо тонавтыцякс. Тесэ сонзэ ушодовсть литературас васенце эскелькстнэ. 1938-1939 иетнестэ К.Г.Абрамов важодсь Мордовиянь книгань издательствасо. Те шкастонть сёрмадсь стихотвореният, ёвтнемат, поэмат. Ансяк сонзэ творческой кинть сезизе Ине Отечественной войнась. Ламо нужань пачк савсь тензэ ютамс войнань иетнестэ. Стакасто ранязель.

 

1954 иестэ К.Г.Абрамов заочна прядызе Мордовской педагогической институтонть. Сонзэ стихень васенце пусмось лиссь эштё войнадо икеле, 1940 иестэ. К.Г.Абрамовонь литературной ёрокчизэ кармась редявомо войнадо мейле. 1951 иестэ Мордовиянь государственной театрань сценанть лангсо путозель «Од вий» пьесазо. 1952 иестэ  «Литературная Мордовия» альманахсо печатазель «Выпускница» повестезэ.

Зярыя шкань ютазь К.Г.Абрамовонь лиссть «Ратор лейга» повестезэ, «Комолявка» ёвтнемань пусмозо.

Тесэ а кода а ледстямс «Сараклыч» поэманть. Сон пек тусь ловныцятнень мельс. К.Г.Абрамов ёвтни сеть шкатнеде, зярдо раськенек тюрсь яттнэнь каршо. Кода тешкстыть литературоведтнэ, те произведениянть сёрмадомадо мейле Кузьма Григорьевич арсесь сёрмадомс покш произведения, косо невтьсы минек раськенть историянзо.

1957 иестэ Мордовиянь книгань издательствасо лиссь К.Г.Абрамовонь «Найман» трилогиянь васенце книгась. Мокшэрзянь литературасонть те ульнесь эпопейной сехте покш произведениякс. Ниле иень ютазь лиссь омбоце книгась, конань лемезэ «Ломантне теевсть малавиксэкс». Романонь колмоце книганть сёрмадеесь лемдизе «Качамонь пачк». Весемезэ трилогиянть лангсо Кузьма Григорьевич важодсь кеветее иеть.

Малав кемень иеть сёрмадеесь важодсь Степан Эрьзя ине скульптордонть трилогиянть лангсо. «Эрзянь цёра» васенце книгась лиссь 1971 иестэ. Кавто иень ютазь – омбоцесь. Колмоценть издательствась нолдызе 1977 иестэ.

1988 иестэ печатазель К.Г.Абрамовонь «Пургаз» исторической  романозо. Иень ютазь книгась лиссь Московонь «Современник» издательствасо.

К.Г.Абрамовонь перанзо алдо лиссть эштё зярыя произведеният, конатне совасть мокшэрзянь литературань сырнень фондс. Весе теде ды лиядо ёвтневсь покш промкссонть, кона алтазель К.Г.Абрамовонь чачома чистэнзэ саезь 100 иетненень. Истя уш лиссь, те чистэнть Эрзянь Найман велень эрицятне тешкстасть эштё вейке покш кенярксчи – велентень топодсть 400 иеть. Промксось ютавтозель Эрзянь Найман велень Культурань кудосонть. Тей сакшность райононь малав весе велень администрациянь прявттнэ, райононь художественной самодеятельностень артисттнэ. Холлсонть теезель «Эсь раськень морыця» выставка, косо невтневсть сёрмадеенть Кузьма Григорьевич Абрамовонь книганзо.

Промксось панжовсь Эрзянь Найман веледе моросо, конань гайневтизе «Найманочка» тейтерьавань ансамблясь. Седе тов валось максовсь те велень администрациянь прявтонтень А.И.Симдянкиннэнь:

– Течи минь ютавттано покш промкс, кона алтазь Эрзянь Найман велентень 400 иетнень топодемантень ды минек ёнксонь сёрмадеенть Кузьма Григорьевич Абрамовонь чачома чистэнзэ 100 иетненень. Велень администрациянть пельде ёвтан поздоровт, арсян весенень кеме шумбрачи, валдо менель. Свал мельсэнк кирдеде эсь тиринь ёнксонк!

Эрзянь Найман велесь – кезэрень покш веле. Сон райцентранть эйстэ ашти 13 вайгельпень тарка. 400 иеде теде икеле тей, кезэрень ёвтнематнень коряс, састь рузонь путешественниктне. Тесэнь вейке таркатнестэ сынь мусть 16 эрзянь семият. Эйстэст рузкс кортамо кияк эзь машто, ансяк вейке вал ёвтасть – «Найм». Те – семиянь покшонть лемезэ. Рузонь путешественниктне ветизь сынст се таркантень, косо ульнесть ламо лисьмапрят. Истя самай теевсь Найман эрзянь велесь. Неень шкасто те исторической таркасонть моли Николай Чудотворецэнь лемс часовнянь строямось.

400 иеть – те ламо пингень история: революция, коллективизация, Гражданской ды Ине Отечественной войнат, социализмань строямонь шка ды течинь шкась. Эрзянь Найман велень эрицятне свал ульнесть масторонть, сонзэ кажотнень ды кеняркстнэнь марто.

1898 иестэ крестьянинэнь кудосо панжозель школа. Велесэнть эрицятне важодсть ансяк эсь кардазсо. Масторсонть тевтнеде эрицятне парсте эзть сода.

XX пингесь веленть эрямонтень кандсь ламо од.  1908 иестэ В.С.Быстрицкий тонавтыцясь тейсь тонавтыцянь революционной кружок. Сон ветясь крестьянтнэнь ютксо революционной пропаганда, ютавтнесь промкст, косо мольсь инязоронь правительстванть каршо. Паряк, тень кувалма Ине Октябрянь революциянть изнямодо кулянть велень эрицятне вастызь мельспаросо.

1930 иестэ Эрзянь Наймансо теезельть кавто колхозт: «Од ки» ды «Якстере Теште». Велень эрицятнень эрямост пек полавтызе Ине Отечественной войнась. Фронтов тусть Найманонь 580 эрицят. Тиринь велев велявтсть 287 ломанть. Ледстнемгаст веленть куншкасо стявтозь кеврунго, косо  сёрмадозь сынст лемест.

– Минь а стувтнетяно сетнень лемест, кить маштовсть воинской долгост топавтомсто, – ёвтни Анатолий Иванович. – Те – Николаев Геннадий Михайлович, сон маштовсь Афганистансо, Николаев Олег Серафимович, маштовсь Северной Кавказсо.

Эрзянь Найман велесэ ламо трудонь вечкиця семиятнеде. Сынь совасть веленть историяс. Неть – Николаев Матвей Ивановичень, Беськаев Андрей Егоровичень, Сульдин Андрей Петровичень, Наумкин Павел Григорьевичень, Николаев Фёдор Васильевичень ды ламо лиятнень важодиця династиятне.

Кувать ды парсте важодеманть ды веленть социально-экономической виевгавтомасо покш путовксонть кисэ велень администрациянь прявтось А.И.Симдянкин Почётной грамотат макссь Н.А.Беськаевнень, А.Г.Четверованень, Н.А.Мизюгинанень.

– Минь мельспаросотано, – мерсь А.И.Симдянкин, – корьмаенек кастсь ламо ёроков ломанть, кить славизь эсь тиринь ёнксост. Те – Кузьма Григорьевич Абрамов. Сонзэ произведениянзо ёвтнить велень эрицятнеде, конатнень течияк ловныть мельспаросо. Тесэ жо, Эрзянь Наймансо, эрясь ды важодсь содавикс сёрмадеесь,  СССР-нь Писателень союзонь членэсь, «Сятко» журналонь литсотрудникесь, Мордкизэнь главной редакторось, Ине Отечественной войнань участникесь Василий Максимович Коломасов.

Кавто кенярксчитнень кувалма поздоровт ды ламо лембе валт ёвтасть ды казнеть макссть Покш Березникень райононь администрациянь прявтось И.И.Игонов,  МР-нь Госсобраниянь депутатось, «Спиртзавод «Вл.Марьяновский» ООО-нь прявтось В.А.Кипаев, МР-нь Национальной политикань коряс министерствань представителесь А.М.Кочеваткин, Мокшэрзянь раськень Раськеютконь общественной организациянь исполкомонь прявтось А.С.Лузгин, МР-нь Массовой информациянь ды печатень министрась В.В.Маресьев. Валерий Валерьевич мерсь, келя, тейсы весементь, штобу райононь библиотекатнесэ улезт К.Г.Абрамовонь книганзо.

Ине сёрмадейденть эсь ледстнемаст ёвтнизь МР-нь Писателень союзонь правлениянь председателесь А.М. Доронин, РФ-нь ды МР-нь культурань заслуженной роботникесь Т.М.Ковалева,   РФ-нь Писателень союзонь членэсь М.В.Маторкин.

К.Г.Абрамовонь лемензэ кундамонть кисэ велень эрицятненень ды райононь администрациянь прявтонтень покш сюкпря ёвтасть ине сёрмадеенть цёразо – исторической наукань докторось, профессорось В.К.Абрамов ды сёрмадеенть нуцьказо – филологиянь наукань кандидатось П.В.Каштанова.

– Содатадо, тетям вечкиль книгань ловномо. Тенень тонавтызе покштям. Сон ульнесь велесэ сёрмас  содыця, – ледстни Владимир Кузьмич. – Ламо ловнось ды чарькодсь политикантень. Велесэ тетянстэнь мерсть «студент». Нама, се шкане кой-кить тетянзо лангс вансть коня алга. Савсь тензэ урьвакстомс шабрань Руз. Найманонь тейтерь лангс. Секскак сон рузонь келенть кармась содамо эрзянсенть марто вейсэ. Эдь кудосо семиясь кортась кавто кельсэ.

Тешкстасынек, К.Г.Абрамовонь чачома чистэнзэ 100 иетненень районсонть ютавтозель «К.Г.Абрамов – мокшэрзянь раськенть каштанчизэ» конкурс. Тесэ пелькстасть школань тонавтницятне. Истя, школань тонавтницятнень ютксо изницякс лиссть Шугур велень средней школань 10-це классонь тонавтницясь Оля Елисеева ды      11-це классонь тонавтницясь Алексей Исаев. А мезть сёпомс, теньсэ покш таликазо тиринь келень ды литературань тонавтыцянть Н.К.Манинань. Сон покш мель яви культуранть, койтнень-кирдатнень ванстомантень. Те весе невтеви школань краеведениянь музейсэнть, конань прявтсо В.М.Арапова.

Текенень, Н.К.Манина топавты общественной тевтькак, сон – эрзянь-мокшонь раськень первичной организациянь прявт. Парсте важодемань кисэ А.С.Лузгин Нина Кузьминичнанень макссь питней казне – К.Г.Абрамовонь книганзо. Тесэ сон ёвтась истямо мель: Эрзянь Найман велесэ теемс этнокультурань центра ды максомс тензэ К.Г.Абрамовонь лементь. Те мелесь шназель.

К.Г.Абрамовонь книганзо истя жо максозь Шугур велень библиотекарентень О.В.Арискинанень. Сон лиссь конкурсонь изницякс библиотекартнень ютксо.

Тешкстасынек, кенярксчинть перть эсь ёрокчист невтизь райононь художественной самодеятельностень артисттнэ. Сынь морасть рузонь, эрзянь раськень морот. Велень эрицятне кадовсть мельспаросо.

– Мелезэнь пек тусь кенярксчись, – корты трудонь ветеранось, школань икелень прявтось В.И.Усанов. – Теньсэ, нама, покш таликаст велень администрациянь прявтонть Анатолий Ивановичень ды райононь администрациянь прявтонть Иван Ивановичень. Весемесь теезь-арсезь вадрясто. Кузьма Григорьевичень содылия пек парсте. Сон сеедьстэ сакшныль тиринь ёнксов. Сёрмадсь эрьва кодамо темас. Мон весе книганзо ловнынь.

…Позда чокшнес Культурань кудосо гайгсть моротне. Эрзянь Найман велень эрицятне ледстнесть ине сёрмадеенть Кузьма Григорьевич Абрамовонь валдо лемензэ, мартонзо вастовоматнень.

Пётр Зиновьев.

Покш Березник ёнксонь

 

Эрзянь Найман веле

 

Новости

Эрицятнень сёрмадстомантень анокстамотне ушодовсть



Малав ие кадовсь эрицятнень Весероссиянь сёрмадстоманть самс. Аволь умок МР-ва Федеральной службань государственной статистикань территориальной органсонть ютавтовсь вастовома, конанть шкасто видео-конференциянь лувсо ветявсь кортамо Росстатонь прявтонть Павел Малков марто. Вановсть сёрмадстомань шкатне ды невтевсь официальной тешксэсь.


Подробнее ...
 
В Мордовии собрано более 700 подписей на запрет «наливаек»
 
В Республике Мордовия завершились мероприятия по сбору информации и
подписей в поддержку инициативы об ограничении работы питейных заведений,
расположенных на первых этажах многоквартирных домов и придомовых
территориях в Республике Мордовия.

Подробнее ...
 
Награждение победителей акции «Здоровое питание - активное долголетие»
 
  Уже сегодня, 17 октября,  34 ученика из Мордовии отправятся на 12-ю  смену  
Международного детского центра «Артек». Победителей акции, их наставников и кураторов 
поприветствовал  секретарь Регионального отделения «Единой России» Владимир
Чибиркин. Он  подчеркнул, что пропаганда  здорового образа жизни и оздоровление нации 
являются одними из ведущих направлений деятельности «Единой России», акция 
реализуется в рамках партийного  проекта «Здоровое будущее».  Это дает свои плоды - с
каждым годом в нашей стране увеличивается  число неравнодушных людей,  которые 
начинают сами вести здоровый образ жизни и ведут за собой других.

Подробнее ...
 
В республике успешно реализуются социально значимые проекты первичных отделений «Единой России»
 
Первичные отделения поселка  Ромоданово и поселка  Зубова Поляна   успешно
реализуют на практике  свои социально  значимые проекты, удостоенные грантовой
поддержки по итогам конкурса проектов первичных отделений, инициированного 
«Единой Россией»
  Цель проекта  «Мы рядом», реализуемого в Ромоданове - помощь пожилым людям и 
инвалидам, имеющим  заболевания опорно-двигательного  аппарата.   Прокат технических 
средств реабилитации  организован на бесплатной основе для граждан пожилого возраста, не 
имеющих группы инвалидности, но,  в силу возрастных изменений или перенесенных 
заболеваний, травм, потерявших способность свободно передвигаться. В июле этого года в 
Ромодановском  местном отделении партии прошла  презентация проекта.  Открывая
презентацию,  секретарь  Ромодановского местного отделения Партии  Наталья Хомякова  
отметила, что  основная  задача проекта   помочь людям в трудный для них период 
реабилитации.


Подробнее ...
 
Баталина: Предложение Минтруда о новых правилах выплаты пособий по уходу за ребёнком создаст проблемы родителям
 
Предложение Минтруда, согласно которому претендовать на выплату 
пособия по уходу за ребенком до полутора лет может только тот, кто 
фактически ухаживает за ребенком, избыточно и может создать лишние 
проблемы родителям. Не исключено, что Фонд социального страхования при 
назначении будет требовать документально подтвердить, что именно 
заявитель (мать или отец ребенка) фактически за ним ухаживает. Об этом 
заявила первый заместитель секретаря Генерального совета «Единой России»
Ольга Баталина.
Подробнее ...