Рубрикатор

Культура КУНДЫЗЬ ИНЕ СЁРМАДЕЕНТЬ ЛЕМЕНЗЭ
КУНДЫЗЬ ИНЕ СЁРМАДЕЕНТЬ ЛЕМЕНЗЭ

Ютазь недлясто Отяжелень райононь Ламбаське велесэ ютась покш мероприятия, конась алтазель эрзянь сёрмадыцянть, те велесэнть чачозенть Яков Яковлевич Кулдыркаевень  120 иетнень топодемантень. Астяко минь лемдинек сонзэ покшокс, эдь истят вастовоматне ды лемень ледстямотне кандыть покш смусть: эрзянь раськень культурань, литературань ине ломантнень лемест вельмевтемась, сынст эрямост ды творчестваст лангс ливтемась, тонавтнемась ды тонавтомась саить покш тарка эсь раськень ванстомань ёнкссонть. Яков Яковлевич Кулдыркаевнень октябрянь 22-це чистэ топодсть 120 иеть, малав 50 иеть уш те ломанесь арась ютксонок, ялатеке сонзэ лемезэ ды произведениянзо ванстовить минек республикасо. Ламонь эрзятнень мельс-превс сон кадовсь кода «Эрьмезь» эрзянь раськеде ёвксонть (эпосонть) сёрмадыцякс. Паро, те шкас сонзэ ледстнить ды Ламбаськесэ ловить эсест велень содавикс ине ломанекс.

Эрямонь меельце иетнень сон ютавтынзе тиринь велесэнзэ, калмазьгак Ламбаське велень калмазырьс. Администрациясь, нама, весе иетнень перть ванстсь-урядась сонзэ калмамо тарканзо. Ялатеке сась шка чувтонь ташто крёстонть таркас стявтомс паро, гранитэнь кеврунго. Ды, окойники, тедедень сёксня те тевесь топавтовсь. Покш мелест одкстомтомс калмонть ульнесь аволь ансяк Ламбаське  велень администрациянь прявтонть А.П.Абросимовонь, истя жо райононь прявтонть М.А.Сурковонь, Ламбаське велень школань  прявтонть С.В.Русяевень, эрзянь келень ды литературань тонавтыцянть О.И.Антиповань, Я.Я.Кулдыркаевень роднянзо-раськензэ. Ансяк сехте покш таликазо кеврунгонть стявтомасо, нама, «Эрзянь  вайгель» общественной организациянь правлениянь прявтонть Е.Е.Ледяйкинэнь, конась ней эри Московсо (чачома ёнксозо жо минек Покш Березникень районось). Евгений  Евгеньевич марясь мелявкстонть ды явсь ине сёрмадыцянтень кеврунгонть рамамс 30 тёжат целковойть. Вейсэнь вийсэ арсезель гранитэнь плитанть артомань мелесь. Ды вана Я.Я.Кулдыркаевень чачома чинтень сон стявтозель Ламбаськень калмазырьс, сёрмадыцянть калмамо таркас. Одкстомтозельть истя жо пирявксось ды весе вакссонзо таркась.

Од кеврунгонть панжомо Ламбаськев ютазь середасто пачколесть ламо инжеть Отяжелестэ, истя жо Саранскойстэ, Московсто, Красноярскойстэ ды Самарасто.

Калмонть чиресэ пурназель апокшке митинг.  Панжизе сонзэ О.И.Антипова, эрзянь келень тонавтыцясь ды Я.Я.Кулдыркаевень лемензэ ванстомань кис «пиицясь-палыцясь». Отяжелень райононь администрациянь прявтонь финансонь коряс полавтыцясь М.С.Алёшина ёвтась сюкпря те мероприятиянть анокстыцятненень ды тешкстызе, келя, Я.Я.Кулдыркаевень лемесь ды сонзэ сёрмадовксонзо совить эрзянь литературань «сырнень фондонтень». Истя жо Отяжелень Раськень культурань ды ремеслань куншкакуросонть сонензэ явить башка тарка. Мейле вал максозель Московсто инжентень, эрзянь цёрантень, эсь раськень вечкицянтень ды сонзэ туртов лездыцянтень Е.Е.Ледяйкиннэнь. Сон ёвтась сюкпря ломантненень, конатне ушодызь те тевенть. «Кодат ярмакт иля путо, ялатеке прявттнэнь  мельтеме-лезкстэме те тевесь а  тееви», – тешкстызе Ледяйкин.

Евгений Евгеньевич ледстизе, кодамо ёжо тензэ сась, зярдо сон васенцеде ловнызе Я.Я.Кулдыркаевень «Эрьмезь» эпосонть: «Теке симинь ванькс лисьма ведте. Те ёвкссонть покш смусть, ды мон арсинь сонзэ марто содавтомс весень, кие сы варштамо калмолангозонзо. Секскак гранитэнь кеврунгонть лангс, Я.Я.Кулдыркаевень лемензэ, чачома ды кулома иедензэ башка, сёрмадозель «Эрьмезьстэнть» саевкс. Кадык лиятненьгак, неть валтнэнь неезь, потсост чачи мель ловномс те произведениянть».

Те чистэнть Я.Я.Кулдыркаевень лемензэ ледстямо ды сонзэ калмолангс цецянь путомо сакшность «Чилисема» эйкакшонь журналонь редакторонь полавтыцясь Татьяна Мокшанова, Эрзянь келень идемань фондонь прявтось Григорий Мусалев, «Эрзянь мастор» газетань прявт редакторось Евгений Четвергов, «Эрзянь правда» газетань журналистэсь Пётр Зиновьев, Самара ёнксонь эрзясь Анатолий Осипов, Красноярскойстэ Михаил Четвергов. Мейле весе инжетне тердезельть Ламбаськень школав, косо ушодовсь мероприятиянть омбоце пельксэзэ. Васняяк весенень невтезель эрзянь раськень оршамопелень ды ярсамопелень выставкась, конась анокстазель Ламбаськень эрицятнень вийсэ. Школань актовой залонтень тердезельть Ламбаське велень аватнеяк, конатне содылизь ды некшнилизь Я.Я.Кулдыркаевень.

«Яков Кулдыркаев – эрзянь  алкуксонь цёра» – истя лемдезель сонзэ чачома чинтень анокстазь вастовомась. Ветясь сонзэ О.И.Антипова. Васняяк Ламбаське велень школань тонавтницятне ёвтнизь пуромозтненень эрзянь сёрмадыцянть эрямонь-аштемань килангонзо. Чачсь-кассь Яков Яковлевич Ламбаськесэ, прядсь тесэнь школа, служась Якстере армиясо, стакасто ранязель пряс. Велявтсь Ламбаськев, ансяк аволь куватьс, тусь мейле тонавтнеме Московов счетоводонь курсав, роботась счетоводокс, бухгалтерэкс, ревизорокс. 1930-це иетнестэ фольклоронь материалтнэнь коряс (ламотнень эйстэст сон пурнынзе Ламбаськестэ) сёрмадсь «Эрьмезь» эпической поэма, конасонть ёвтневи эрзятнень ды мокшотнень кезэрень историядост. «Эрьмезень» печатамонь иекс ловови 1935 иесь, зярдо башка книгасо сонзэ нолдызе Мордкизэсь. Те произведениянть ламот эрзятнестэ стявтнить рядсек «Слово о полку Игореве» рузонь эпосонть ваксс. Ансяк аволь весенень те ёвксось туекшнесь мельс, ды Кулдыркаев лангс сёрмадозельть ламо кенгелемат, келя, сон те эпосонть вельде кепедсти «мокшэрзянь буржуазной национализманть». 1938 иень сентябрясто Кулдыркаевень те произведениянть кисэ арестовизь НКВД-шниктне, ды сон малав комсь иеть майсесь Коминь, Казахстанонь ды Новгородонь лагертнесэ. «Эрьмезесь» ульнесь саезь малав весе библиотекатнестэ. 1958 иестэ Яков Кулдыркаевень нолдызь тюрьмасто ды мерсть, келя, сон аштесь тосо чумовтомо. Яков Яковлевич велявтсь тиринь велезэнзэ, кавксо иеть эрясь тесэ роднянзо-раськензэ, ялганзо-оянзо кедьга. Стака контузиядонть сонзэ берянель шумбрачизэ ды 1966 иестэ кулось.

Ламбаськень школань эйкакштне невтсть «Эрьмезь» поэмастонть саевкст, морасть кезэрень морот, ловность С.П.Кулдыркаевень (сёрмадыцянть малавикс раськензэ) Яков Яковлевичте ледстнеманзо.

Эсь ледстнемаст Кулдыркаевде ёвтнизь Ламбаське велень сыре эрицятнеяк. Сон сынст мельс-превс кадовсь пек интеллигентной ломанекс. Натой вишка эйкакштнень икелеяк свал каилизе шапканзо ды шумбракстниль.  Оршниль Кулдыркаев аволь кода  велень эриця – кувака пальтосо, шарфсо ды шапкасо. Теньсэ пек явовиль весень эйстэ. Ламбаськес чачицясь Марина Атласова ёвтнинзе Я.Я.Кулдыркаевде патянзо ледстнеманзо, эсензэ стихотворениянзо, конань сон алтызе те чинтень.

Мейле эсь эрзянь моросост ды эряза киштемасост кенярдовтызь инжетнень Ламбаське велень тонавтницятне ды тонавтыцятне.

С.В.Русяев школань прявтось тешкстызе, келя, Я.Я.Кулдыркаевень лементь Ламбаськесэ эзизь стувтне зярдояк. 20 иеде теде икеле тесэ келейстэ тешкстазель сёрмадыцянть 100 иетнень топодемась. Ды эрьва иестэ школасонть ледстнить сонзэ чачома чинзэ. Седе тов эсь мелест-арсемаст ёвтызь инжетне. Г.Д.Мусалев тердсь а стувтнемс эсь ундокстнэнь ды ванстомс эсенек ине лемтнень. Школанть туртов сон казизе «Масторава» эпосонть. Е.В.Четвергов ризнэсь, мекс те шкас Мокшэрзянь раськень театрась а путсы эсь сценанзо лангс «Эрьмезенть». Сонгак сась казне марто ды школань библиотекас туизе «Тесэ ды тосо» книганзо. Ламо лембе валт ледстнема чинть кувалма ды сонзэ ушодомань-анокстамонь коряс ёвтасть Евгений Ледяйкин, Мария Алёшина, Татьяна Мокшанова, Евгений Кулдыркаев ды лия инжетне. Прядовсь мероприятиясь кезэрень коень-кирдань коряс ледстнемань стольсэ.

М.Девятова

 

Новости

В «Единой России» проверят состояние детских площадок по всей России
До конца июня 2019 года активисты партпроекта «Единой
России» «Народный контроль» проведут проверку состояния детских
площадок в 85 регионах - насколько они соответствуют нормативам и
безопасны для жизни и здоровья детей. Информация о выявленных
нарушениях будет передана в администрации муниципалитетов,
управляющим
компаниям,
товариществам
собственников
недвижимости с требованием устранить выявленные недостатки. Об
этом заявила координатор партпроекта «Народный контроль»,
депутат Госдумы Анна Кувычко.
Подробнее ...
 
Аршинова направила в Правительство РФ пакет предложений для включения в программу «Земский учитель»
В целях реализации Послания Президента Владимира Путина
Федеральному Собранию в регионах активисты партпроекта «Новая школа»
организовали широкое обсуждение проекта программы «Земский учитель» с
привлечением представителей профильных ведомств и институтов развития
образования, ведущих экспертов, педагогического и родительских
сообществ. По их итогам был выработан комплекс важных предложений для
включения в программу «Земский учитель», которые были отправлены на
имя вице-премьера Правительства РФ Татьяны Голиковой. Об этом заявила
координатор партпроекта «Новая школа», член комитета Госдумы по
образованию и науке Алена Аршинова.
Подробнее ...
 
Жители Мордовии обратились к главному федеральному инспектору за содействием в решении проблем

В соответствии с поручением полномочного представителя Президента России в Приволжском федеральном округе Игоря Комарова 22 мая 2019 года в приемной Президента Российской Федерации в Республике Мордовия состоялся прием граждан. Провел его главный федеральный инспектор Михаил Сезганов.


Подробнее ...
 
Госдума приняла во втором чтении поправки «Единой России», разрешающие продажу театральных билетов без кассовых аппаратов
Депутаты Государственной Думы поддержали во втором чтении
поправки, разработанные депутатами от «Единой России», в закон «О
применении контрольно-кассовой техники», которые в том числе
предусматривают освобождение распространителей театральных билетов от
обязанности использовать кассовые аппараты с 1 июля 2019 года.
Подробнее ...
 
Медведев поддержал предложения участников Форума сельских депутатов «Единой России»
Председатель «Единой России», премьер-министр Дмитрий Медведев
поддержал предложения участников Форума сельских депутатов, который
прошел 21 мая в Воронеже.
Подробнее ...