Рубрикатор

Культура ИЦЯЛ ЁНКСОНЬ КЕНЯРКСЧИНТЕНЬ САКШНОСЬ ДЕПАРДЬЕЯК
ИЦЯЛ ЁНКСОНЬ КЕНЯРКСЧИНТЕНЬ САКШНОСЬ ДЕПАРДЬЕЯК

Неть читнестэ Ицял ёнкссо тешкставсь покш кенярксчи – райононтень топодсть 85 иеть.

Те мелень витемань тевенть тешкстамонтень тосонь эрицятне анокстасть алкукс. Сыненст те чистэнть сакшность ламо инжеть: Мордовия Республикань Прявтось В.Д.Волков, МР-нь Госсобраниянь Председателесь В.В.Чибиркин, содавикс актерось, продюсерэсь Жерар Депардье, сынст ёнксонь икелень эрицясь, содавикс спортсменкась Мария Шубина.

Райононь куншкакурось ваясь эрьва тюсонь цеця потс, ломантне мазый оршамопельсэст састь кенярксчинть тешкстамо вейсэ эйкакшост марто. Вишкинетненень тейсть ламо нурямот-мезть. Эрьва косо кедьчелькев ломанень вийсэ теезь выставкат, каванямкат.

Ицял ёнксонть кувака историянзо перть ламо эрьва кодат минек ды омбо масторонь инжеть содавтызь, а вана Франциясто сазесь, ней уш Мордовиянь гражданинэсь Жерар Депардье, – васенцеде.

Республикасонок икеле молиця райононть марто содавиксэкс теевеманзо ушодызе «АгроМир» ООО-нь велень хозяйствань предприятиянть эйстэ.

Течи те ёнкссонть виевстэ важодить 19 велень хозяйствань предприятият ды 24 крестьянско-фермерэнь хозяйстват. Ютазь иестэ тесэ пурнасть 52 тёжат тоннат сюро, манынь коряс невтевксэнзэ кастозельть 101 процентс. Эрьва гектарсто сайсть 25,1 центнер сюро, манынь коряс      11 % седе ламо. Якстерькайденть пурнасть 210 тёжат тоннат, икелень коряс те культурадонть кастозь ниле проценттэ седе ламо. Виде, тенень лездасть инвестициятне, конатнень вельде рамазь компьютер марто неень шкантень ладиця техника. Ламбамо якстерькаень урожаесь кассь 484 центнерс гектарсто.

Ютазь иестэ потявтозь 21476 тоннат ловсо, вейке скалсто – 5982 килограммат, манынь коряс те цифрась кассь 114,4 %.

Те иень январень 1-це чинтень районсонть скалтнэде 4129 прят. Васенце пельиестэнть потявтозь 13580 тоннат ловсо, манынь коряс 31,8 % эли 3273 тоннадо седе ламо.

«АгроМир» ООО-сонть улемстэ Жерар Депардьень ульнесь мелезэ содамс, кода молить тевтне те икеле молиця велень хозяйствань предприятиясонть. Неень шкане тосо кирдевить ветесядт потявтовиця скалт. Сынст  андыть тоско, стадав апак пансе. Седе тов инжетне сыргасть «Жемчужина» укшномань бассейнанть панжомо, конась аволь умок стявтозь Рождествено велесэнть.

Мордовия Республикань Прявтось В.Д.Волков спортонь од объектэнть панжомсто тешкстызе «Единая Россия» партиянь программанть, кинь лезксэнзэ вельде теезель сон.

– Те минек политикась важоди раськенть шумбралгавтомга, – мерсь В.Д.Волков. – Минь парсте чарькодтяно, од ломантне шумбрат кармить сестэ, зярдо теевить оякс спортонть марто. Кемевттядызь, минь икелепелевгак поладсынек те программанть. Ицялсо тейтяно стадион искусственной вельтявкс марто.

Истя жо райононь кенярксчинть коряс поздоров марто пуромозтненень пшкадсть МР-нь Государственной Собраниянь Председателесь, Ицял ёнксонь Почетной гражданинэсь В.В.Чибиркин, инжесь Жерар Депардье, Ицялонь райононь администрациянь прявтось В.Г.Дмитриева, 1960 иень байдаркасо укшномань олимпийской чемпионкась М.Т.Шубина.

Теде мейле вере ледстязь инжетне торжественна якстере парсеень керямосо панжизь спортонь од объектэнть. Од спортсментнэ невтсть мастер-класс укшномань коряс.

Райононь куншкакуросо, Кемля поселкасо улемстэ В.Д.Волков ды Жерар Депардье васняяк ютасть Славань аллеяванть, косо теезь ледстнемань тарка Ицял ёнксонь содавикс ломантненень: Советской Союзонь Геройтненень ды Социалистической Трудонь Геройтненень.

Седе тов инжетне ютасть спортонь комплексэв, косо теевсть содавиксэкс раськень промыслань ды ремеслань выставканть, кедьчелькев ломантнень теевксэст марто. Тов совамодо икеле сыненст макссть казнеть – тумонь ды килеень тенстть ды чаекс тантей чине марто тикшеть. В.Д.Волков ды Жерар Депардье мельспаросо ванкшнызь чувтосто керсевкстнэнь, човалясо викшневкстнэнь ды истя седе тов. Башка мель явсть робототехникань пелькстамонтень, знярс сынь якасть выставкаванть, эйкакшонь искусствань школань тонавтыцятне теизь сынст портретэст.

Шкань ютазь, весе сыргасть Культурань кудов, сонзэ икеле инжетнень вастсть теке ёнксонь Ламбаське велень мазый оршамопельсэ тейтерьаватне. Сынь анокстасть раськень каванямкат: тейсть поза, пансть тантей панжакайть ды пачалксеть. Аватне мельспаросо весень каванясть тантей ярсамопельсэст.

Культурань кудонь вестибюльсэнть поладовсь минек республикасо нолдазь продукциянть марто содавиксэкс теевемась. Башка невтевсь мазый цецянь выставкась, конань пурнамс лездась тосонь предпринимателесь Л.В.Рыбалко.

Покш залсонть, ков пурнавсть райононь содавикс ломантне, икеле молиця предприятиянь прявттнэ ды ветерантнэ, ютавтовсь торжественной промкс, конась алтавсь Ицял ёнксонтень 85 иетнень топодемантень. Театральной представлениянть лувсо невтевсь райононть историязо, конась ушодовсь 1929 иестэ. Седе тов невтевсь документальной фильма, косо ёвтневсь те ёнксонь эрицятнеде, койтнеде-кирдатнеде. Кодашка сынст путовксост республикань экономикань виевгавтомантень!

Самай неть ёнкстнэде пурнавозтнень икеле кортась МР-нь Прявтось. Сонзэ валонзо коряс, те районось аграрно-индустриальной, невтевкстнэ парт кавонест ёнкстнэсэ. В.Д.Волков те ёнксонть лемдизе Мордовиянь сырань теемань прявт таркакс, тесэ нолдави иезэнзэ 8 тёжат тоннат сыра. «Оброченский» мясокомбинатсо нолдави 70 эрьва кодамо видэнь колбасань ды сывелень продукция. Россиясо «Кемлянский» спиртзаводось сови спиртэнь сехте паро нолдыцятнень юткс.

МР-нь Прявтось истя жо тешкстынзе велень хозяйствасо изнявксост. Покш сюпавчикс ёвтынзе те ёнксонь ломантнень, сехте пек одтнэнь. Астяко юбилеенть коряс тенст теезь укшномань бассейнась.

Теде башка, В.Д.Волков Ицялонь райононь администрациянь прявтонтень казсь спортонь оборудованиянь коряс сертификат ды алтась маласо шкастонть искусственной вельтявкс марто футболонь пакся.

Эрзякс «Шумбрат» вал марто пуромозтненень пшкадсь Жерар Депардье. Сонзэ мельс пек тусь, кода тесэнь ломантне маштыть важодеме моданть марто. Паро, велень хозяйствантень вечкемась максови ломантненень пингеде-пингес. Тетятне-аватне тенень тонавтыть эйкакшост-нуцькаст.

Кодамо кенярксчи казневтеме. Те чистэнть сынь ульнесть МР-нь Прявтонть ды МР-нь Госсобраниянть, Ицялонь райононь администрациянть пельде. Сценанть лангс вейке-омбоце мельга лиснесть велень хозяйствань предприятиятнесэ, образованиясо, культурасо ды лия эрявикс тевтнесэ важодицятне.

Меельцекс невтевсь мельстуиця концертэнь программа.

 

В.Юдина

 

Новости

Комиссия «Единой России» по этике провела первое заседание
 Первое заседание утвержденной XVIII Съездом «Единой России» Комиссии
по   этике   прошло   16   января.   В   его   рамках   были   избраны   председатель
Комиссии, его заместитель и ответственный секретарь.
Подробнее ...
 
Россиянь Почтань 200 клиентт теевсть миллионерэкс

Государственной лотереянь статистиканть коряс, 2018 иестэ Россиянь Почтань отделенияс якицятне рамасть 68 миллиондо ламо лотерейной билетт. Вейке миллиондо ламо целковойть налксесть 206 ломанть. Те 2,4-ксть седе ламо икельце иенть коряс, сестэ миллионертнэде ульнесть 88 ломанть.

Подробнее ...
 
Управление Министерства юстиции Российской Федерации по Республике Мордовия напоминает порядок и сроки предоставления ежегодной отчетности некоммерческими организациями.

Законодательством Российской Федерации определена обязанность некоммерческих организаций ежегодно отчитываться перед уполномоченным органом. В частности, статьей 32 Федерального закона «О некоммерческих организациях», статьей 29 Федерального закона «Об общественных объединениях», статьей 25.1 Федерального закона «О свободе совести и о религиозных объединениях».

Подробнее ...
 
Крештениянтень анокстамот

Крештениянтень Саранскойсэ арсеви теемс экшелямонь туртов 11 тарка: «Старт» стадиононь эрькесэнть (2 таркат), Гончаровонь куросо, «Вирень эрьке», «Зелёная роща» эрькетнесэ, «Огни Саранска» кафенть маласо, Макаровкасо (Иоанн Богословской цёрань монастыренть вакссо), Куликовкасо Чапаевень куросо лисьмапрясонть, Полянки велень Юбилейной куросо аштиця лисьмапрясонть, Добровольной посёлкань Дачная куросонть, Иоанн Кронштадтскоень храмонь лисьмапрясонть ды Грузинской куросо аштиця эйкакшонь парконь эрькесэнть.

Подробнее ...
 
Конкурс на участие в образовательном модуле «Единой России» «Политический лидер» составил 43 человек на место

«Прием заявок на участие в образовательном модуле «Политический лидер» Высшей партийной школы «Единой России» завершен. К настоящему моменту поступило и уже обработано модераторами более 8,5 тыс. анкет, из них было одобрено 6,5 тыс. Таким образом, конкурс на участие в стартовом модуле проекта составил 43 человек на место», – сообщила первый заместитель секретаря Генерального совета «Единой России», депутат Госдумы Ольга Баталина, подводя итоги заявочной кампании, завершившейся 15 января. До 22 января пройдет следующий отборочный этап – запись трех видеорезюме и с 22 января по 1 февраля участники должны будут пройти отборочные тесты.

Подробнее ...