Рубрикатор

Контакты
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Ошонь мэрэнтень пшкадсть микшнемань вейке куншкакуронь важодицятне. Сынь пачтясть, чокшне 22 чассто «ошонь 3-це больниця» лотксема таркастонть мейсэяк а туевить Юго-Западов. «Те кевкстемась зярыя иеде икеле уш ульнесь, – мерсь Пётр Тултаев Транспортонь управлениянь прявтонтень Игорь Белоруновнень.  – Сестэ 7-це троллейбусось ардтнесь седе куватьс. Ней, неяви, таго весемесь полавтовсь». Игорь Белорунов каршонзо мерсь, мониторингест невти, пассажиртнэде аламо. «Ломанентень эряви пачкодемс важодема таркав ды кудов общественной транспортсо, аволь тердтнемс такси. Таго мерян: 22:10-22:15 7№ троллейбусось улезэ «ошонь 3-це больниця» лотксема таркасонть. Монсь карман ваномо, кода молить тевтне, кода карми ардтнеме те маршрутось», – мерсь Пётр Тултаев.

Транспортонь управлениянь прявтось Игорь Белорунов пачтясь, январень 1-це чистэ саезь муниципальной общественной транспортсо ардомась питнии ды карми 17 целковойть.

* * *

Октябрянь 28-це чистэ Саранскойсэ ютавтови ярмунка. Теде башка, те чись – Димитриевской родительской субута. Автовокзалонть вакссто калмазырев максыть автобуст. П.Тултаев кармавтсь ванськавтомс калмоланготнень вакссо аравтозь шукшпрянь контейнертнэнь.

Истя жо Пётр Тултаев кармавтсь ванкшномс ошсо понгавтозь рекламань конструкциятнень. Ламотне эйстэст чемениясть, каладсть. Эряви муемс азорост, кармавтомс сынст витнемс эли полавтомс.

Ошонь прявтось мерсь кепедемс кевкстеманть газон ланга ардомань штрафтнеде. «Мекс Московсо тень кисэ ули ответственность, Саранскойсэ – арась?! Минь эрятано вейке масторсо», – кортась Пётр Тултаев. Маласо шкастонть Саранскоень Администрациянь административно-технической инспекциясь ванносы те кевкстеманть.

* * *

Школань тонавтницятнень туртов сёксень каникулатне ушодовить октябрянь 30-це чистэ саезь. Эйкакштнень туртов арсезь зярыя мероприятият. Саранскоень 35, 28, 8№№ школатнесэ ды эйкакшонь творчествань кудосо кармить важодеме юнармеецэнь лагерть. Тосо кармить 357 эйкакшт. Теде башка, эрьва школасо панжовить чинь лагерть. Тосо учить 1241 тонавтниця. Эйкакштнень туртов алтави образовательно-оздоровительной программа, истя жо экскурсият, театрав ды музеев якамот.

Ошонь прявтось тешкстызе, Саранскоень 38№ школань математикань тонавтыцясь Михаил Комаров невтизе прянзо «Учитель года России» заочной туронь Весероссиянь конкурссонть, кона ютась Сочисэ сентябрянь 24-це чистэ саезь октябрянь 5-це чис, эсь номинациясонзо сон совась минек масторонь сехте вадря 20 педагогтнень юткс. «Сон идесь аволь ансяк Саранскоенть честензэ, аштесь весе республиканть кисэ! Истят ломантненень эряви лездамс», – кортась Пётр Николаевич.

Октябрянь 29-це чинь 15:00 чассто 17№ средней общеобразовательной школасо – «Тавла» образованиянь центрасо – ютавтови Саранск ошонь округонь прявтонть Пётр Тултаевень вастовомазо Юбилейный проспектэнь эрицятнень марто. Промкссонть кармить кортамо микрорайононть касомадо-кемекстамодо, эрямо таркань строямодо-стявтомадо. 

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...