Рубрикатор

Вастовсть 73 иень ютазь. Вечкемадо ды кемемадо история

Те вечкемадо ды учомадо историясь, паряк, ютаволь вакскан, бути аволь интернетэсь ды социальной сеттне. Кода бу а севновлинек «одноклассниктнень», «фейсбуктнень», сынь ялатеке кой-кона ёнкстнэсэ кармасть покш лездыцякс. Сехте пек сеть ломантненень, конатне вешнесть ды вешнить те шкас эсест малавиксэст, родняст-раськест, вечкевиксэст…

 

  Те Од иенть каршо монь сельмс каявсь вейке сёрма, конань «Вконтакте» социальной сетьсэнть эсензэ лопантень сермадызе Финляндиянь Тампере ошонь тейтересь Кайсу Кейсала-Касейа эсензэ аванзо Орвокке Кейсала пельде.   Кайсу а содасы рузонь келенть, сермась васняяк сермадозель финнэнь кельстэ рузокс неень шкань Google Translate сервисэнть-ютавтыцянть вельде. Мейле келень содыцятне лездасть финнэнь тейтерентень теемс седе виде вариант. Мон арсян сонзэ пачтямс тенк педе-пес, мезеяк апак вите, эдь, неяви, авторось эйзэнзэ путызе весе оймензэ ды кемеманзо. Ёвтнемась лемдязель истя: «СССР-стэ военнопленноенть ды финнэнь тейтеренть вечкемадо история, конась эзь прядово хеппи-эндсэ». Ловнодо: «Мон вешнян эсь тетянь, конань зярдояк эзия некшне. Монень уш 73 иеть ды весе неть иетнень перть ули мелем содамс, мезе мартонзо лиссь седе тов, зярдо сонзэ ильтизь Финляндиясто военнопленноень лагерьстэ мекев СССР-в. Монь тетянь лемезэ Михаил Кузьмич Кузин. Ине Отечественной войнань шкасто, 1941 иестэ саезь 1944 иес, сон ульнесь пленсэ Финляндиясо. Тозонь понгсь 1941 иень сентябрянь 28-це чистэ. Званиязо –рядовоель. Пленс саекшнызе Финнэнь армиянь 52-це ремонтонь ротась. Васняяк Михаил саезель Пиэксямяки ошонть малас Наараярви военнопленноень 2-це № лагерев. 1944 иень маень 15-це чистэ  саезь октябрянь 15-це чис сон роботась Корпелань фермасо Киннула веленть маласо. Те фермасонть сон вастовсь Ида финнэнь од тейтеренть марто (седе виде лемезэ Анна-Лииса Воутила), конась истя жо роботась те фермасонть ды эрясь а васоло ведьгевенть эйстэ. Михаилэнь ды Идань ютксо кирвазсь вечкемась. Ида шкань ютазь пекиясь Михаилэнь пельде. Ансяк цёрантень эзь учово эйкакшонть чачомась, эдь 1944 иень октябрянь 24-це чистэ сонзэ ильтизь СССР-в. Теде ёвтнить документтнэ: сон ютызе границянть Вайниккала ошонть пунктка. Теде мейле Ида мезеяк эзь марсе Михаилдэ, кадовсь-арась сон живстэ?

Финляндиясо 1945 иень мартонь 2-це чистэ Михаил Кузинэнь чачсь Орвокки тейтерезэ. Те – мон. Ней уш сырединь ды покш мелем содамс, мезе теевсь тетянь марто СССР-в велявтомадо мейле. Вешнезь документтнэнь коряс карминь содамо: сон чачсь 1912 иестэ Мордовиясо, кассь Отяжелень райононь Манадыши велесэ. Войнадо икеле роботась пидицякс-паницякс ды ульнесь урьвакстозь. Нинзэ лемезэ – Авдотья Осиповна Кузина.

Тетядон, Михаил Кузиндэ, содан пек аламо: сон, келя, ульнесь а кежеекс, паро важодицякс ды лишмесэ ардтницякс. Финнтнэ лемдякшнызь Микко. Фермасонть сонзэ вечкилизь ды пек апаркстомсть, зярдо кармасть содамо тиринь масторов ильтямодонзо. Финнэнь велесэнть сонензэ мерсть «казак» ды содыльть, келя, тетязо ульнесь священникекс. Фермань азортнэнь вишка тейтерест Каарина, ней уш сыре ава, ледстни, кода Михаил ды монь авам пек авардсть столь экшсэ, зярдо сась туема чись ды цёранть саизь лагерев. Монь авам зярдояк мезеяк эзь ёвтне тетядон. Зярдо ушодылинь кевкстнемензэ, сестэ сон кармиль лайшеме. Авам Ида кулось 19 иеде теде икеле, весе сазорон ды лелян истя жо кулость. Весе информациянть, конась сёрмадозь те сёрмасонть, монень максызь лия роднян-раськень, фермань роботниктне ды Финдяндиянь раськень архивесь. Мон кеман социальной сетень виентень! Лездадо, инеськеть, муемс кодамояк куля тетядон эли лия роднятнеде-раськетьнеде тетянь ёндо. Орвокки Кейсала».

Сёрмантень истя жо путозельть архивень зярыя документт: военнопленнойтнень спискатне, Михаил Кузинэнь военнопленноень карточказо фермасо роботамодо трудонь договорось ды Орвокки марто Идань фотографият.

 Те сёрминесь уш ковшка яксесь аволь ансяк «контактка»  – лия сеттневаяк, ламот ваныцятнестэ тейнесть репостт ды ойме потсост кемсть ёвтневиця историянть парсте прядовомас. Алкукскак, Од иестэ эрсить ёвксонь тевть ды январень васенце читнестэ Кайсу Кейсала Касейа сёрмадсь паро куля: роднятне-раськетне муевсть!

Мон сюлмавинь Кайсу марто, пек покш мелем ульнесь содамс: кие муевсь, кода те кулянть сон ёвтызе аванстэнь, арсить-арась сынь самс Россияв мартост вастовомо?

Финнэнь тейтересь яволявтсь: «Мон содан ламо ломанть Финляндиясто, конатне вешнить эсест тетяст ды покштяст. Сынь ульнесть рузонь солдатокс. Пек чуросто роднятнеде-раськетнеде сакшныть кулят, ансяк миненек мизолдозевсь уцяскась ды минь муинек сынст. Вейке ломань покштянь шабра велестэ неизе монь сёрмам интернетстэ, кармась кевкстнеме сыре ломантнень ды сынь ёвтызь, косто ды кинь эряви вешнемс седе тов. Роднятне-раськетьне тосо ней а эрить».

Кода карминек мейле содамо малавикс роднянзо пельде, Орвокки муинзе тетянзо Михаил Кузьмич Кузинэнь кавто тейтерензэ Людмилань ды Александрань.  Сазортнэ теевсть ялгакс «Одноклассники» социальной сетенть вельде, сынь зярс ванкшныть вейкест-вейкест фотографияст, гайневтнесть скайпонть вельде. Сынь эрить ней аволь Мордовиясо, вейкесь, натой, Молдавиясо. Аватне чачсть войнадо мейле, зярдо тетяст сась фронтсто. Кайсу Кейсала Касейа сёрмадсь, келя, зярс сынь эште а кемить истямо уцяскантень, ансяк чиде-чис сынст семияст седе келейгады, аванстэнь ды Кайсунень эряви шка, штобу ютавтомс седеень пачк весе кулятнень, конатнень тетядост-покштядост ёвтнесть сазортнэ. Васенце мелесь, конась чары финнэнь аватнень мельсэ-превсэ – мартост вастовомась. Кадык сон топавтови ды Орвокки нейсынзе тетянзо масторонть, калмонть ды весе рузонь роднянзо-раськензэ.

Минек, нама, ули меленек содамс те ёвтнеманть поладксонзо, бути сонзэ геройтнень ули мелест ёвтнемс теде, эдь ялатеке те вейке семиянь история. Теке марто минь сермадынек сонзэ ушодксонзо, кадык лия вешницятнеяк а кадсызь мелест муемс тиринь ломанест ды кемить вана истямо кенярдовтыця прядовомантень.

  Ине Отечественой войнась прядовсь 73 иеде теде икеле. Самай зняро жо иеть жо финнэнь тейтересь вешнесь эсензэ тетянзо. Истят историятне таго ледстявтыть Ольга Берггольцень содавикс стихотворениясто валтнэнь:

Их имен благородных мы здесь перечислить не сможем.

Так их много под вечной охраной гранита.

Но знай, внимающий этим камням,

Никто не забыт и ничто не забыто.

 

Марина Девятова


01.02.2019

 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...