Рубрикатор

Велесь таймаскадсь, велесь соракадсь

Мекс нусмакадсь Эрьмушкань кудось
Кавксошка иеть ютасть се шкастонть, зярдо те ульнесь. Минь сестэ арсинек нолдамс Сабанцеле эрзянь покш веледенть книга, секс вастневкшнынек эрицятнень марто, пурнынек ёвтнемат-ледстнемат. Те изданиянть лангсо важодемстэ якинек Таразбуевгак, конань марто Сабанцелесь кирди кеме сюлмот. Совсинек Эрьмушканеньгак (фамилияст – Живаевть). Прязонок васняяк чаповсь те семиянть кудопотмозо. Ушосо – комсьветеешка градуст якшамо, менельстэнть пры покш лов, даволось, секень вант, пильге лангсто правттанзат, а тесэ – валдо, лембе, секс марявсь – ансяк эряк ды эрямонть шнак. Арась, кудазортнэ – Михаил Кузьмич ды Зинаида Григорьевна малавгак эзть кеняркшно, нусманяльть, вейке-омбоце марто кортасть пель вайгельсэ.
Мейле карминек содамо – Эрьмушкатнень кудопотмост истямо ульнесь аволь свал. Сынст семиясонть эйкакштнеде чачокшность байтяк – кавто цёрат ды кавто тейтерть: Саша, Толя, Нина, Таня. Зярдо сынь аламодо кассть, кармасть ветнеме кудов эсь ялгаст. Покш читнестэ сеедьстэ тов совсесть малавиксэсткак. Секс кеместэ эряви тешкстамс – эрсесть, эрсесть тесэ пеедькшнематкак, эйкакшонь шалткак, мороткак.
Весемесь полавтовсь сестэ, зярдо тусь эрямостонть Саша вечкевикс цёраст. Эрьга теевтяно содавиксэкс сень марто, кода кассь Александр Живаев.

 

Сашань эйкакшпингедензэ

Кодамокс ульнесь Саша вишка пингстэ? Те кевкстеманть минь макснинек Таразбуень сеть эрицятненень, конат содылизь сонзэ парсте. Ды вана мезе сынь тенек ёвтнесть.
Ледстни Раиса Андреевна Абрамова, кона тонавтнесь Саша Живаев марто вейке классо: «Минек велесэнть средней школа сеть шкатнестэ арасель, тесэ тонавтсть ансяк кавксо иеть, секс савсь якамс Сабанцелев. Кись тов ульнесь аволь нурькинетнестэ – колмошка вайгельбеть тов, колмошка – мекев. Теде башка, эрявсь ютамс Чурька леенть трокс, секс цёрынетне яла лездасть тенек. Монь ульнесь покш папкам, козонь путнилинь книган-тетрадень. Вана те папканть кандтнестькак минек алятне. Течи вейкесь лезды, ванды – омбоцесь. Сеедьстэ те папкась понгонесь Сашанень. Сон тень каршо эзь музгорде, мекевлангт, кежиявтнесь яла, зярдо эйсэнь ильтясь лия цёрыне.
Мон ульнинь вирьванынь тейтерь. Кизна минек семиясь яла эриль вирень кордонсо. Тов сеедьстэ тень инжекс сакшныльть школань ялган. Тесэ мерилинь Сашанень анокстамс кудонь уштомс берёмашка пенгть. Сон тень каршо пирьк эзь мерне – саиль узере ды адя керямо, лазномо.
Школасо «Зарницасо» налксемстэ сон яла покш мельсэ кундыль разведчикень тевентень. Саша бажась эрьва косо улемс васенцекс, тонавтнеськак весемеде вадрясто. Сеть цёрынетне, тейтерькатне, конат предметтнэнь содылизь лавшосто, сеедьстэ пшкадильть тензэ. Сон киньгак эзь тулкае – свал лездыль».
Ёвтни Нина Фёдоровна Сапунова: «Саша ульнесь эрьва кодамо тевень ушодыця. Ков а лисиль – перьканзо сеске яла пурнавильть сонзэ шкавань цёрынеть. Истя ве иестэнть ялганзо, шабранзо марто тейсть аэросанят.
Тонавтнемстэ весемеде парсте содылизе физиканть ды математиканть, секс Сабанцелесэ тонавтнемстэ классной руководителест Геннадий Иванович максокшнось тензэ превть кочкамс истямо профессия, кона улевель сюлмавозь неть наукатнень марто».
Сашань коряс эсь мелензэ ёвтызе икелень учителесь Надежда Михайловна Живаева: «Сон пек вечксь сокс лангсо кирякстнеме-чийнеме, секс шабратне лиясто мик пеедькшнесть лангсонзо. Тон, келя, чачитькак сокс лангсо.
Алкукскак, яла ансяк сы школасто, ярсы-теи, капшазь карси сокст ды Женя малавиксэнзэ марто адя паксява, лейчирева чийнеме».

Весе кеняркшность, авазо авардсь
Школадо мейле Живаев мольсь тонавтнеме Сызранень высшей авиационной училищав, косо кармась тонавтнеме вертолётчикекс-штурманокс.
Присягань максома чинтень тов ардсть Михаил Кузьмич ды Зинаида Григорьевна. Икеле тешкстазь часонтень училищанть ваксс пурнавсть ламо ломанть. Гайгсь музыка, офицертнэнь погоност чинть каршо палозь палсть, весе кеняркшность. Весе, ансяк аволь Зинаида Григорьевна. Сон авардсь.
– Седе паро улевель, молевлитькак тонавтнеме велень хозяйствань институтов, – яволявтсь сон. – Кармавлить улеме инженерэкс эли тосо агрономокс.
Саша кода маштсь оймавтсь эйсэнзэ. Келя, сынь тесэ леднить ансяк фанера ланга, вертолётосткак вадрясто ливтнить, илядо пеле, сынь а прыть, а сяворить!

Тонавтнемась прядовсь
Тонавтнемань иетне прок вейке чи ютасть. Курок Живаевень лавтовонзо лангс путсть лейтенантонь погонт. Отпусков сась тиринь ёнксов. Тесэ вастовсь Галина Александровна од врачонть марто ды састь мельс иень ютазь налксемс свадьба. Истя тейстькак.
1979 иень декабрясто Сашань кучизь служамо лембе ёно Осетиянь столицав – Цхинвалов (сестэ Осетиясь ульнесь Грузиянь пельксэкс). Од иенть малав сась мельганзо Галинаяк.
Воинской частьсэнть эрямо тарка тенст макссть сеске. Квартирасонть кодамояк мебель арасель, секс столенть таркас путсть чай алдо ящик, табуреткань – комавтозь ведрат.
Истят стакачитне ёжост эзть кола – од ломантне арсесть – курок весемесь полавтови ды сынь кармить эрямо од лувсо.
Арась, истя эзь лисе. 1980 иень январень сисемеце чинь вестэнть частенть кепедизь тревогань коряс. Штабсто кудов Саша сась талакадозь. Афганистандо кортамо эзь карма, ансяк мерсь пурнамс чемодан. Мейле Галина лездась оршамс, кенкш вакссо кутмордасть-паласть, кутмордасть-паласть меельцеде…
Ковонь ютазь Саша кучсь нинстэнь сёрма, косо тешкстазель – келя, сыргак Отяжелев. Частьсэ ялгатне лездыть теть пурнамс ки лангов. Туемань тувталось чарькодевиль – Кавказонь эрицятне сестэяк рузтнэнь аволь пек вечксть.
           Саша ней арась…
… Се чинть Галина прок онсонзо ютавтызе. Сонзэ тердизь Отяжелень райкомс ды яволявтсть тензэ, келя, тынк мирденк – старшей лейтенантось Живаев Александр Михайлович чавовсь Афганистансо Джелалабад ошонть маласо 1980 иень февралень кемголмовоце чистэ.
Неть валтнэнь марямодо мейле од пешксесэ аванть превензэ чополк мерсть…
Мейле военнойтне ёвтнизь, кода те весе ульнесь. Содазь, Афганистансо сыньгак леднесть, сынст лангскак леднесть. Саша колоньгемень котоксть парсте ливтнесь, колоньгемень сисемецестэнть афганецтнэ вастызь покш калибрань пулемёт марто. Чавовсь аволь ансяк экипажось. Вертолётсонть ульнесть лия солдатткак. Истя весемезэ пряст путызь кемголмово од цёрат.
***
Зярдо кандолазтнэнь ускизь Таразбуев, эрямо те таркась ве чис педе-пес полавтовсь. Весесь таймаскадсь, велесь соракадсь.
Ине Отечественной войнадонть мейле колоньгемень вете иеть велесь эрясь мирсэ-ладсо. Ды вана ней таго кундасть леднеме, таго кандолазт ускить.
Сашань меельце ки лангов ливтеме якасть аволь ансяк Таразбуень, Сабанцелень эрицяткак. Мейле сынь ёвтнесть калмамонь тевтнеде истя. Келя, офицерэнть тетязо – Михаил Кузьмич – сайсь узере ды мерсь: «Паряк, тосо аволь монь цёрамгак мадезь ашти, молян панжсынь кандолазтнэнь!»
Неть валтнэнь марязь, сонзэ икелев стясь Отяжелень райононь военной комиссарось ды яволявтсь: «Только через мой труп!».
***
– Таразбуесэ ульнесь траур, – ледстни велень прявтось М.М.Свойкина. – Ломантне эрьва мезть кортасть. Келя, паряк, тозонь мода каясть. Те моданть ланга ацызь лётчикенть форманзо ды паро.
Эрицятне мелест полавтызь, зярдо цёратне кепедизь кандолазтнэнь лавтов лангс. Вансызь, кандыцятнестэ вейкенть – П.И.Сюваевень ашо перчатканзо якстерьгадсть. Лисни, тосто верь чуди, лисни, тосо алкукскак Саша путозь.
А.Тикшайкин


28.11.2018

 

Новости

Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...
 
В рамках приема граждан Председатель ЕР поддержал социально значимые инициативы

Ряд социально значимых поручений дал Председатель «Единой России», премьер-министр Дмитрий Медведев в ответ на обращения, поступившие в рамках прима граждан, который прошел 30 ноября в Центральной общественной приемной Партии.

Подробнее ...