Рубрикатор

Сергей Рузанкин: «Свал эряви ваномс икелев»

Сергей Иванович Рузанкин – «Тепличное» АО-нь прявт инженер, сон сеть ломантнестэ, кона эсь сельмсэнзэ неизе, кода ютазь пингень 70-це иетнень прядовомсто ушодовсь теплицатнень строямось, ды аволь ансяк неизе, эсензэ кедьсэ ушодызе те велень хозяйствань покштояк покш предприятиянть историянть. Ансяк весемеде мельга-мельцек.

Чачсь-кассь те эрзянь цёрась Кочкурова ёнксонь Кочкур велесэ 1948 иень октябрянь 12-це чистэ. Тетязо-авазо трясть-кастсть вете эйкакшт. Войнадо мейлень шкатне, нама, аволь шождальть, ансяк Сергей Иванович эсь эйкакшпорадонзо ледстни мельспаросо. Сехте пек се шкастонть дивавтызе кудотнес электроэнергиянть ветямось. Коптиця керосинэнь лампатнень таркас кудотне валдомтозельть вишкине лампочкасо. Сестэ тензэ ульнесть малав кемень иеть. Сергей сеске редизе, электричестванть ролезэ эрямосонть пек покш ды сыця шкатнестэ седеяк карми касомо, секскак школадо мейле бажась тонавтнемс электрикекс. Вейке газетасто несь яволявтома, келя, Казахстанонь Темиртау ошсо тонавтыть промышленной оборудованиянь эксплуатациянь ды ремонтонь электрикекс. Те специальностесь се шкастонть пек эрявиксэль, кода ней меревельть бу – «престижнойкс», ды тонавтнемстэ эште пандыльть натой 36 целковойть стипендия. Общежитияяк максыльть, ды Сергей, кувать апак арсе, 17 иесэ сыргась васоло килангов. Тонавтнемадо мейле Рузанкин аламошкас роботась электромонтёрокс Карагандань металлургической заводсо ды сёксня сонзэ саизь армияв. Служась Сергей Рузанкин Северной флотсо электрикекс кавто иеть ды пек тошнакадсь тиринь ёнксонть кисэ, секскак шкань апак таргсе 1969 иестэ велявтсь Мордовияв.
Саранскойсэ од специалистэсь ве чияк эзь аште роботавтомо, сеске саизь электромонтёрокс кабелень заводов. Се шкастонть урьвакстсь, ды эрямо таркань арасьчинь мелявксось ветизе «Светотехника» заводов, седе тов ютась важодеме «Саранский» совхозов. Теке марто Сергей Иванович эзь стувтне эсензэ содамочитнень кастомадояк: тонавтнесь васняяк Кемлянь совхозсо-техникумсо, мейле прядызе Н.П.Огарёв лемсэ университетэнь «Механизация сельского хозяйства» факультетэнть ды тензэ максозель инженерэнь дипломось. 1977 иестэ Сергей Иванович сась важодеме «КПСС-нь 25 съездэнть лемсэ» совхозов эмежень кастыцянь цехень электрикень бригадирэкс. Се шкатнестэ те совхозось ульнесь содавикс весе Советской Союзонть келес ды ульнесь сехте покштнень ютксо. 1970-це иетнень прядовомсто сонзэ прявттнэ арсесть строямс зярыя теплицат од технологиятнень коряс, рамазельть од котёлт ды лия оборудования. Тепличницатнень кучокшнызь натой Пензав тонавтнеме, кода кастомс эмежть.
Сергей Ивановичень совхозонть пельде кучизь теплицань комбинатонь строямо. Сон васняяк тесэ топавтсь электрикень тевтнень. Од комбинатонтень ветясть электричества, нолдасть газ, кармась уштомо котельной, строясть кавто теплицат, конатнес васенцекс, варчамонь кисэ, путсть капстань видьмекст. 1979 иень декабрянь 31-це чистэ, те шкас Рузанкин ледстни те чинть, теплицатненень сась официальной мерема панжомадост. Зяро ризнэмат-арсемат ульнесть се шкасто, зяро талномат! Сергей Иванович эсь лавтов лангсонзо кандсь покш канст, теке марто комбинатонть стявтомась-кепедемась ансяк ушодовкшнось. Сон марявсь ансяк чачозь эйкакшокс, конань эрявсь эште ламо иеть трямс-кастомс ды ливтемс покш килангов. Кассь мартонзо Рузанкингак, электрикстэ сон кепедезель старшей инженерэкс-электрикекс, мейле котельноень прявтокс, эмежень кастомань цехень старшей инженерэкс ды седе тов тепличной комбинатонь старшей инженерэкс-энергетикекс. Кода мерить, те ломанесь ютынзе весе профессиональной кузтематнень: алдо седе верев ды верев ды, тешкстама, ансяк эсензэ вийсэ-превсэ. Кодаткак лездамот ве ёндо, кодаткак сюпав тетят-ават арасельть – ансяк чинек-венек важодема.
1991 иестэ Рузанкин ладязель «Тепличное» совхозонь механизациянь цехень прявтокс, мейле производствань коряс прявтонь полавтыцякс. 2014 иестэ саезь течинь чис Сергей Иванович – «Тепличное» АО-нь прявт инженер. Ламо ведь чудсь 40 иес, зярыяксть предприятиясь полавтнизе эсь лемензэ, ансяк Сергей Иванович весе неть иетнень перть вестькак эзизе кадно тиринь роботамо тарканзо. Весе эрямозо, ловт, ютась тесэ, ды а мезть сёпомс, «Тепличноесь» – те сонзэ эрямось ды вечкемась!
Сергей Иванович весе эрямонзо перть бажи тонавтнемас, сон свал ваны икелев, сыця шкантень, ды неть ёнкстнэ, арсян, ветитькак изнямос. Кода превей прявт, сон пек чуросто корты верьга вайгельть, свал васняяк кунсолосы пшкадицянть ды мейле максы виде превс путома. Рузанкинэнь пек ламо казнензэ, сон велень хозяйствань заслуженной роботник, аволь умок, юбилейдензэ икеле, тензэ максозель эште вейке покш тешкс – Славань III степенень орден, ялатеке, кода корты прявт инженерэсь, сон важодсь ды важоди те шкас аволь сынст кисэ. Сергей Иванович весе виензэ ды оймензэ максы тиринь предприятиянтень, сон свал эсензэ боевой постсонзо ды седе товгак бажи теемс весементь, ансяк вечкевикс предприятиясь эрязо ды касозо-кемекстазо!
Меельцекс тешкстама, «Тепличное» АО-нь прявтось А.М.Живаев ды важодицятне ёвтыть седейшкавань поздоровт С.И.Рузанкиннэнь чачома чинзэ кувалма, арсить кеме шумбрачи, паро мельть ды уцяскав эрямо!
Марина Девятова


24.10.2018

 

Новости

Комиссия «Единой России» по этике провела первое заседание
 Первое заседание утвержденной XVIII Съездом «Единой России» Комиссии
по   этике   прошло   16   января.   В   его   рамках   были   избраны   председатель
Комиссии, его заместитель и ответственный секретарь.
Подробнее ...
 
Россиянь Почтань 200 клиентт теевсть миллионерэкс

Государственной лотереянь статистиканть коряс, 2018 иестэ Россиянь Почтань отделенияс якицятне рамасть 68 миллиондо ламо лотерейной билетт. Вейке миллиондо ламо целковойть налксесть 206 ломанть. Те 2,4-ксть седе ламо икельце иенть коряс, сестэ миллионертнэде ульнесть 88 ломанть.

Подробнее ...
 
Управление Министерства юстиции Российской Федерации по Республике Мордовия напоминает порядок и сроки предоставления ежегодной отчетности некоммерческими организациями.

Законодательством Российской Федерации определена обязанность некоммерческих организаций ежегодно отчитываться перед уполномоченным органом. В частности, статьей 32 Федерального закона «О некоммерческих организациях», статьей 29 Федерального закона «Об общественных объединениях», статьей 25.1 Федерального закона «О свободе совести и о религиозных объединениях».

Подробнее ...
 
Крештениянтень анокстамот

Крештениянтень Саранскойсэ арсеви теемс экшелямонь туртов 11 тарка: «Старт» стадиононь эрькесэнть (2 таркат), Гончаровонь куросо, «Вирень эрьке», «Зелёная роща» эрькетнесэ, «Огни Саранска» кафенть маласо, Макаровкасо (Иоанн Богословской цёрань монастыренть вакссо), Куликовкасо Чапаевень куросо лисьмапрясонть, Полянки велень Юбилейной куросо аштиця лисьмапрясонть, Добровольной посёлкань Дачная куросонть, Иоанн Кронштадтскоень храмонь лисьмапрясонть ды Грузинской куросо аштиця эйкакшонь парконь эрькесэнть.

Подробнее ...
 
Конкурс на участие в образовательном модуле «Единой России» «Политический лидер» составил 43 человек на место

«Прием заявок на участие в образовательном модуле «Политический лидер» Высшей партийной школы «Единой России» завершен. К настоящему моменту поступило и уже обработано модераторами более 8,5 тыс. анкет, из них было одобрено 6,5 тыс. Таким образом, конкурс на участие в стартовом модуле проекта составил 43 человек на место», – сообщила первый заместитель секретаря Генерального совета «Единой России», депутат Госдумы Ольга Баталина, подводя итоги заявочной кампании, завершившейся 15 января. До 22 января пройдет следующий отборочный этап – запись трех видеорезюме и с 22 января по 1 февраля участники должны будут пройти отборочные тесты.

Подробнее ...