Рубрикатор

Сергей Ганюшкин: «Кинологонь тевесь - те призвания»

Мордовия Республикава МВД-нь кинологонь службань центрась ашти сэрей пирявкс удало, косто малав свал маряви кискань онгома. Минек самонок марто онгомась седеяк виевгадсь, нать, кискатне редизь, састь асодавикст. Самай те шкане ютавтовсь немецень овчарканть Империя Ста Рысень дрессировкась. 

– МВД-нь кинологонь службанть прявт тевезэ – те общественной сэтьмечинть ванстомась кода республиканть келес, истя жо сонзэ томбале, – ёвтни МР-ва МВД-нь Кинологонь службань центрань прявтось Сергей Владиславович Ганюшкин. – Минек сотрудниктне служебной кискатнень марто истя жо ардтнить командировкав, ламоксть ульнесть Северэнь Кавказонь регионтнэсэ, невтить ёрокчист эрьва кодамо пелькстамотнесэ ды саить казнень таркат. Сотрудникесь ды кискась – те аявовиця пелькс, лиякс меремс, кинологось свал эсензэ кисканть марто вейсэ топавтыть икелест путозь тевтнень. 

 

С.В.Ганюшкин МР-ва Внутренней тевень министерствасонть службанзо ушодызе 1998 иестэ патрульно-постовой службань кинологокс. Кавто иень ютазь поладызе важодеманть служебной кискань кирдемань центрасонть. Ютынзе важодемань весе кузтематнень, младшей сержантсто саезь кассь кинологонь службань центрань прявтокс.
– Вишка шкасто саезь монь свал ульнесть кискан. Сеедьстэ ульнинь кискань кирдемань центрасонть, пек мельстуицякс марявсь тень неть сотрудниктнень важодемаст, – ледстни Сергей Владиславович. – Пограничной войскасо службадонть мейле, зярдо велявтынь кудов, теезель патрульно-постовой службань кинологонь взводось, ды, шкань апак ёмавтне, молинь тов важодеме. Те службась монень пек векеви, те, алкукскак, монь призваниям. Кинень вечкеви важодемс следователекс, машинань ветницякс, лецицякс. Монень жо пек вечкеви кинологонь тевесь. Минь – чуросто вастневиця профессиянь ломанть, прявт тевенек – кандомс ломантненень уцяска.
– Ламо кискат кинологонь службань центрасонть?
– Минек центрасонть кирдевить патрульно-постовой ды кинологонь службань центрань кискатне. Сынст лезксэст вельде топавтови важодема общественной сэтьмечинть ванстомга, вешневить кулявтомо ёмазетне, ветявить розыскень тевтне. Истя жо улить конвоень службань кискат, сынь топавтыть чумондовицятнень конвоированиянть, судс пачтямост, лиякс меремс, эрьва кискась важоди вейке башка ёнксонть коряс. Ламот эрицятне чарькодить минек важодеманть «Комиссар Рекс» кинонть коряс, косо кискась машты тееме эрьва мезе. Те а виде, те ансяк художественной арсевкс. Минек важодемась седе видестэ невтезь «Ко мне, Мухтар!» киносонть, косо налкси Юрий Никулин. Те вана классика, сон седе малавикс минек кискатнень алкуксонь важодемантень.
– Сергей Владиславович, кодамо породань кискат улить центрасонк?
– Седе ламотне эйстэст немецень овчаркат, истя жо улить ризеншнауцерт ды лабрадорт. Койсэнь, те сехте виевстэ важодиця ды кемевикс кискатне.
Минек кинологонь центранть юрсо ули кискань левксыявтомань (разведение) группа, теде башка, топавтовить кискань целевой рамамот, явовить ярмакт ды башка-башка рамавить кискат важодемань эрявикс ёнкстнэнь коряс.
Эряви тешкстамс, кискатне, кода ломантнеяк, аволь вейкеть, эрьванть эсензэ обуцязо. Ды эрьва специалистэсь башка кочки эсензэ туртов «ниле пильгесэ лездыцянть». Эрьва сотрудникентень вечкевить башка породань кискатне, важодемасо кинень мельс тукшныть атяка, кинень жо авака кискатне. Койсэнь, сотрудникенть а эряви кармавтомс, кадык кинологось кочкасы «ниле пильгесэ оянть» эсензэ мелензэ-вановтонзо коряс. Невтемакс, мон свал важодинь атяка киска марто. Обуцянь коряс сынь монень седе пек ладясть, сень лангс апак вано, авакатне седе кунсолыцят. Мондень икеле кинологонь службань центранть прявтсо ульнесь А.Н.Бойков, сонензэ жо седе пек вечкевсь важодемс авака кискатнень марто.
Эряви тешкстамс, малав весе сотрудниктне полавтнить породатнень, те лезды виевгавтомс маштомачитнень. Эдь эрьва кисканть марто весе важодеманть эряви ушодомс одс, эрьва кискась эсензэ койсэ топавты икелензэ путозь тевтнень. Веенстнэ кунсолыцят, лиятне бажить невтемс эсест каштан обуцяст. «Ниле пильгесэ лездыцятне» аламо мейсэ явовить ломантнень эйстэ.
– Кодамо шкасто ушодови кинологонь службас кискань анокстамось?
– Минь вадрясто содатано, бути эйкакшонть вишкинестэ нолдасынек вановтонок икельде, ды сон касы а кунсолыцякс, аксунокс – теньсэ ансяк минек чумось. Паряк каршо путомась казямо, ансяк кискалевкстнэнь кастомасояк истя. Бути нолдасынек кискалевксэнь кастоманть вановтонок алдо, кие соды, мезекс сон касы: пек кежеекс, эли, мекевланк, пелицякс. Секскак кискалевксэнть кочкамо минь ушодтано сестэ, зярдо тенст ансяк кавто ковт. Минь вантано мельганзо ды стамбарнэ ушодсынек «покш эрямос» сонзэ совавтоманть. Эрьва чистэ зярыя часонь перть ютавтовить тренировкат, якатано мартост ошонь куротнева, ламо ломанень пурнавома таркатнева, лавкатнева, усксетяно транспортсо – истя ушодтано анокстамо службантень. Те совавтомань пелькс. Зярдо жо кискантень топоди ие, сестэ ушодови виев дрессировкась.
Неень шкань кодамояк техникась ды аппаратурась а полавтсы кискань судонть. Куш кодамо техникась калады, максы аволь виде куля. Кискатне жо тень коряс пек кемевикст. Служебной кискатнень таликаст преступлениятнень панжомасо покштояк покш. Те ракшанть судозо – лия ёнов а молиця инструмент, конась ломанень судонть коряс реди кементь тёжадо седе ламо эрьва кодат чинеть. 


Кинологонь тевесь мельстуиця, минь лездатано панжомс ламо преступленият. Кискась – те универсальной средства, конань мереви анокстамс важодемань куш кона ёнксонтень, эряви ансяк видестэ ладямс дрессировканть.

– Сергей Владиславович, бути кискась ормалгады?
– Минек центрасонть ули ветеринарной врач. Эрьва чистэ, валске ды чокшне сон ванны кискатнень. Теде башка, иезэнзэ весть «ниле пильгесэ лездыцятне» ютыть диспансеризация, саевить анализт, ваннови сынст ёжост, ды, бути эряви, карми ветявомо лецямо. Зярс жо стака ормат эзть редявкшно.
Сергей Владиславович толковизе, сынст подразделениясонть арась кадратнень сеедьстэ полавтнемась. Те важодеманть сотрудниктне кочкить вадрясто арсезь, тей а понгить ве ёндонь ломанть.
– Минек подразделениянтень кадратнень кочкамось пек казямо. Тесэ важодить цела династият: тетят, эйкакшт, паряк, маласо шкастонть сыть нуцькатнеяк. Коллективесь виев, кеме. Миненек а понгить мельде-валдо. Эдь важодемась пек стака, эряви топавтомс аволь ансяк полицейскоень тевтнень, истя жо муемс кель-вал кисканть марто. Тень машты малавгак аволь эрьвась. Ломаненть ды ракшанть ютксо вейке-вейкень чарькодеманть апак муе – важодемасонть вадря невтевкст а саевить. «Ниле пильгесэ лездыцянть» марто «вейсэнь келенть» муемга, кинологонтень эряви чарькодемс ракшанть, сонзэ улест сатышка содамочинзэ, сотрудникесь илязо пеле, улезэ виевекс, кемевиксэкс, цидярдыцякс ды, нама, вечкевлизе кисканть. Те ракшанть марто видестэ важодемась – цела искусства.
Монь сотрудниктне важодить весе оймесэст, виест апак вансто. Ней вана пенсияв туить кавто виев сотрудникть. Вейкесь эйстэст, полициянь капитанось Эдуард Константинович Максимкин, важодсь кинологонь службань центрасонть 25 ламо иеть. 20 иеде ламо те важодемантень алтась Олег Викторович Новиков. Монь полавтыцям, Петр Геннадьевич Ушанов, кинологонь службасонть – 26 иеть. 20 иеть важоди Сергей Николаевич Челышов.
Сотрудниктнень пенсияв туемаст кувалма минь вешнетяно од кадрат. Те тевенть истя жо кирдтяно вановтонок ало. Кадратнень анокстамонь прявт кузницясь – патрульно-постовой службась, тосо теезь кинологонь взвод. Неяви, кода сотрудникесь важоди кисканть марто, сонзэ уш улить содамочинзэ-ёрокчинзэ, те пек питней.
Важодемань башка ёнксонть коряс кинологонь тевенть ломанесь кочки парсте арсезь, весементь чарькодезь. Секскак минек подразделениястонть кияк а тукшны лияв. Кинологонь тевесь – те призвания, минь важодтяно аволь тештетнень ды казнетнень кисэ, минь эсенек таркасо кандтано лезэ!

Т.Аксенова



 

Новости

«Единая Россия» возьмет на контроль реализацию закона о паллиативной помощи

Партия «Единая Россия» поддержит парламентский мониторинг за реализацией закона о паллиативной помощи. Об этом заявил член общественного совета партпроекта «Единой России» «Здоровое будущее», член комитета Государственной Думы по охране здоровья Юрий Кобзев. 

Подробнее ...
 
150 человек пройдут обучение в рамках модуля «Политический лидер» Высшей партийной школы «Единой России»

Первые занятия стартуют 25 февраля

Экспертной группой первого модуля Высшей партийной школы «Единой России» «Политический лидер» по итогам всех испытаний из более чем 6,6 тысяч участников были отобраны 150 слушателей. Из них 50 приступят к учебе уже с 25 февраля, еще 100 пройдут обучение в Высшей партийной школе в следующих потоках в марте-апреле. Конкурс на участие в проекте составил 44 человека на место.

Подробнее ...
 
Республикадонть – социальной сетьсэ

Печатень кудонь Пресс-центрасо аволь умок ютавтовсь мероприятия, конанть лувсо невтевсь социальной сеттнесэ Мордовия Республикань официальной аккаунтось. Пилотной нолдамось ульнесь уш даволковонь 1-це чистэ, секскак васень подписчиктне уш ванызь контентэнть вадрячинзэ.

Подробнее ...
 
Ловонть ускома шкастонзо

Неть читнестэ Саранскоень Администрациясо ютавтозь промкссонть башка мель явовсь ошсонть эйсюротнень, эенть ды ловонть урядамонь кевкстемантень. Ленинской райононь прявтось Александр Юткин ёвтнесь, управляющей компаниятне тагояк рамасть сал китнень ды ютамо таркатнень почодомс. «Эйсюротнень урядамонь коряс роботатне ветявить эрьва чистэ. Тевенть топавтыть верьга якицят ды специализированой техника», – пачтясь Александр Юткин.

Подробнее ...
 
Автобусонь од маршрут

Ошонь прявтось сонсь ловны эрицятнень сёрмаст, конат кучовить сонзэ лемс. Мэрэнть кедьсэ промкссонть Пётр Тултаев пшкадсь Транспортонь управлениянь прявтонь полавтыцянтень Елена Потапованень: «Сась пеняцямо, конасонть тешкстави, автобуссо эли троллейбуссо ардоманть кис карточкасо пандомадонть мейле ярмактне саевить аволь сеске эли аволь зняро эряви. Ломантне арсить те «Горэлектротранс» муниципальной предприятиянть вановтост ало. Ёвтадо: кие чумось ды ков пшкадема?»

Подробнее ...