Рубрикатор

Кочкизе аволь авань тевенть

Чевте, ёжомариця ды лембе седей тейтерь-аватне умок уш лововить аволь ансяк эсь кудотнесэ сэтьмечинь ванстыцякс. Течи сынь эрязасто топавтыть сеть профессиятнень, конат икеле лововсть ансяк цёрань, ды теить покш изнявкст.

Вера Васильевна Чалдаева (тейтерькс Анюшина) чачсь Орданьбуе ёнксонь Кеченьбие велесэ. Чачсь покш семиясо – патят-ялакст эйстэст ульнесть кавксо. Тейтересь уш вишка пингстэ эрязаль ды ёроков. Някинесэ налксемась свал ульнесь аволь сонзэ мелень коряс. Вадря оякс ловсь цёрынькатнень ды сынст марто вейсэ чинь-чоп чийнесь лейтнева-латкотнева. Вера, кода се шкань ламот тейтерькатне, зярдояк эзь арсе улемс тонавтыцякс. Превсэнзэ свал чарась мель: вана тонавтни криминалистэкс ды карми панжомо эрьва кодат зыянов тевть. Касозь, вановтось эрямонть лангс аламодо полавтовсь, ды тейтересь кочкась эстензэ пек паро тев – идемс ломанень эрямот. Школадо мейле прядызе Саранск ошонь медицинской училищанть ды тосо получазь профессиянть марто чалгась покш эрямонтень.

Од тейтересь эзь арсеяк, кодат стакачить сонзэ учить те покш эрямосонть. Мирдень экшс лисемась уцяска тензэ эзь кандо, ды Вера кадовсь ськамонзо вишка цёрыньканзо марто. Велявтсь тиринь велев, тетянстэнь-аванстэнь. Ансяк велесэ эрямось ульнесь аволь сонзэ туртов. Сон свал содась, эряви молемс икелев ды ламолгавтомс эсь содамочитнень. Арсизе-решизе получамс высшей образованиянть ды мольсь тонавтнеме Мордовской университетэнь филологиянь факультетэв. Ансяк вана семиянь тевтнень кувалма прядомс сонзэ эзь саво.

 – Ульнесть 90-це иетне, – ледстни Вера Васильевна. – Истя ламо эрьва кодат стакачить лангозон прасть, весемесь а ёвтневияк. Ве шкане жо ульнесь пек берянь! Сестэ идимим цёрань Казанской Ключевской пустынень прявтось Илларион. Те вастовомадонть мейле монь эрямом пек полавтовсь – ламо шкань перть ульнинь монастырьсэ послушницакс. Мейле Юрий лелям саимим эстензэ Ульяновскоев ды тосо эрямом тагояк велявтовсь мекевлангт. 24 иесэ мон сонзэ, эряви меремс, ушодыя одс.

Тейтересь кармась роботамо дворникекс, общежитиясто тензэ явсть комната. Кизэнь вейке чокшнестэ, зярдо сон тенсесь тензэ максозь кудонть перька тарканть, малазонзо лоткась вейке пара: вадря-паро генерал ды мазыйка тейтерь (кода мейле лиссь, низэ). Сынь кевкстизь, мезе истямо од ды мазый авинесь теи тесэ. Вера Васильевнань те кевкстемась пек токизе седеензэ ды сон неть а содавикс ломантненень ёвтнизе весе эрямонзо.

 – Ютась ковшка ды таго неть ломантнень вастынь, ансяк ней сынст монень ульнесь тевест – тердимизь служамо 104-це гвардейской воздушно-десантной дивизиянь (сестэ те дивизиясь ульнесь Ульяновскойсэ) вейке полков, конань командирэкс ульнеськак монень паронь арсицясь, вадря ломанесь ды тевень содыця генералось Вадим Иванович Орлов. Мон те тердеманть примия покш мельсэ. Дворникень зарплатась ковгак а сатыль, пек стака ульнесь. Полксонть карминь роботамо медицинской сестракс ды получия старшей сержантонь званиянть. Ды васенцеде, меельце зярыя иетнень перть, мон алкукс ульнинь уцяскав: перькан од ломанть, робота ды а берянь зарплата, – ёвтни Вера Васильевна.

1994-це иень декабрястонть весе масторонть сорновтызе берянь куля – Чечнясо ушодовсть тюремат. Вера Чалдаева сёрмадсь рапорт ды уш аштесь Чечняв кучовицятнень списканть ушодкссо. Тесэ сась приказ – вишка эйкакш марто аватнень войнав а саема. Авась сестэ покордавськак, теке шкастонть седеезэ кенярдсь, эдь кодамо покш илязо уле мелесь топавтомс воинской долгонть, ансяк пелемась седе покшоль. Ды васняяк те пелемась ульнесь тетянзо-аванзо, вишка цёрыньканзо кисэ.

 – 1995-це иенть ушодовомсто мон васенцеде кирнявтынь парашют марто ды топавтыя спортонь программанть (кото кирнявтомат). Ушодовсть стакадояк стака шкат. Эрьва чистэ сыль «Груз 200», ды минь меельце килангов ильтилинек сетнень, кие марто ансяк исяк аштинек ве стройсэ. Сестэ мон эстень кемекстынь, карман служамо седе тов. Чечнясто сазь апаро кулятнень марязь, мон эзинь цидярдо ды туинь служамо.

Кавксть ульнинь Чечнясо. Ёвтнемс, кода ютавтовиль эрьва чись, пек стака. Шкась мольсь. Вадря службанть кисэ ютавтымизь масторонть келес содавикс 345 полконтень, конась дислоцировась Абхазиясо. Тов уш мон Женя цёрамгак саия.

Абхазиянь Гудаутась. Вана косо алкуксонь мазычитне: певтеме иневедь, пандот, Рица эрькесь. Ансяк те мазычинть коласть грузинэнь-абхазонь тюрематне, конат ветявсть Галльской районсонть. Школанть, косо тонавтнесь Женя цёрам, ванстсть разведчикть. Сонзэ туртов те ульнесь эсь койсэ налксемакс – маскасо ды автомат марто цёрат эрьва валске озавтылизь БТР машинас, ускилизь школав ды мейле мекев кудов, – ледстни Вера Чалдаева.

Кавто иень перть, зярс полконть эзизь калавто, В.В.Чалдаева ульнесь Гудаутасо. Мейле эсь службанть поладызе Псковсо. Тесэ сонзэ таго учось од эрямо ды од вечкема. 1999-це иестэ тюрематне ушодовсть Югославиясо, ды Чалдаева таго васенцетнень ютксоль.

 – Службань иетнень шкасто эрьва мезе марто савкшнось вастовомс, – корты Вера Васильевна. – Перьканок тюремат, минь жо миротворецт, мезескак эцнемс а мереви. Медицинань лезкс максокшнынь аволь ансяк эсь оятненень-ялгатненень, гражданской эрицятнененьгак. Весть натой савкшнось чачтовтомс од сербка. Нама, кодаткак условият тень туртов арасельть. Покш сюкпря Орданьбуень реанимациянь отделениянь тейтертненень, конатнень марто савкшнось тень а кувать роботамс. Весе, мезентень сынь монь тонавтымизь, пек тень маштовсь. Сербканть чачсь цёрыньказо ды лезксэнть кисэ монень казсть мазылгавтомка – сырнень лишмине.

Свалшкас мелезэнь кадови вейке тев, кона лисекшнесь Чечнясо. Весть минань сезевемадо мон ёртовинь БТР-нть эйстэ зярыя метрань тарка ды ёжос самодонть мейле маластон эзинь нее ялган. Вана сынст кисэ сестэ пек тандадынь. Покш сюкпря Пазонтень, сестэ весе лиядсть живстэ.

Армиянть Вера Чалдаева лови эрямонь пек вадря школакс, сон ламо мезес тонавты.

 – Войнась – те покш ризкс ды сэредькс. Ансяк сон монь тонавтымим вечкеме ломантнень, эрямонть, тонавтымим улемс видекс эсень икеле ды кенярдомс эрьва минутантень, конань миненек максы Пазось. Теке марто войнась пек полавтымимгак. Мон ней уш аволь истямо чевте. Истя жо меревлинь, армиясо служамось — аволь авань тев. Тейтерь-авась – те чевтедеяк чевте ломань, омбоце сёлмине вечкевиксэнть туртов ды ванстомс сонензэ эряви ансяк эсь эйкакштнень! Мон жо мездеяк а янксян, эдь службанть шкасто вастынь пек ламо паро ломанть, конатнестэ ламотне теевсть алкуксонь оякс, – кемекстызе Вера Васильевна.

Миротворческой войскатнень юрсо эсь службанть кисэ Вера Васильевна Чалдаева казезь «За отвагу» медальсэ. Прядызе эсь службанть Тулань дивизиянь госпитальсэ реанимациянь отделениясо медицинань сестракс-анестезиологокс.

Службанть прядомадо мейле зярыя шкань ютазь Вера Васильевна сась тиринь Кеченьбие велев. Ломанесь сон ёроков ды тевтеме аштеме эзь тонадо. Самай се шкастонть велень советэнь администрациясь лиядсь прявттомо, Вера Васильевна арсизе варчамс прянзо те тевсэнть ды 2017 иень сентябрястонть сонзэ аравтызь те таркантень. Эсь тевентень сон кундась покш мельсэ. Самонзо марто, мерят, велеськак вельмесь. Малав эрьва кенярксчистэ ютавтовить концертт ды пелькстамот, теленть перть велень весе куротнесэ киланготне урядавить ловонть эйстэ (мезенть икеле теильть пек чуросто). Тень кисэ эрицятне прявтонтень ёвтыть покш сюкпря. Вера Васильевна жо ёвты сюкпря Пазонтень,  мартонзо роботыть ды лездыть тензэ истят ёроков ломанть, кода Л.М.Теплякова библиотекаресь, Е.П.Головина культурань отделэнь прявтось,  Е.Ю.Забелина од специалистэсь, В.В.Слепцова ды Т.В.Артамонова велень активисттнэ.

– Неть ломантне – монь командам. Сынтемест мон вейкеяк тев а ушодан ды а теян. Весе масторонь авань чиденть икеле сыненст ды Кеченьбие велень весе аватненень мон арсян кеме шумбрачи, уцяска ды кадык сынст сельмесэст свал цивтёрды кенярксонь валдось, –  кемекстызе Вера Чалдаева.

Минь жо эсь пельде ёвтатано лембе поздоровт Вера Васильевнанень. Кадык топавтовить весе меленк-бажамонк, тевенк молить ансяк парсте ды вакссонк свал кармить малавиксэнк!

 

Ю.Еремина

 

 

Новости

Повышение уровня занятости на селе – один из приоритетов «Единой России»
На XVIII Съезде «Единая Россия» предложила дать возможность расширения
рынков сбыта для личных подсобных хозяйств (ЛПХ).
 В рамках обсуждения на дискуссионной площадке XVIII Съезда Партии, 
посвященной вопросам сельского хозяйства, было предложено дать 
возможность применения добровольной патентной системы 
налогообложения для крупных личных подсобных хозяйств (ЛПХ). Тех, что 
намеренны выйти на более широкие рынки сбыта, нежели фермерские 
ярмарки.  «Но для этого им сейчас нужно оформляться в качестве 
фермерского хозяйства или индивидуального предпринимателя. Это уже 
другая отчетность и налогообложение.  подача деклараций и заполнение 
нескольких видов отчетностей. Мы предлагаем дать  возможность 
владельцам ЛПХ, которые этого захотят, приобрести патент. Если у вас есть 
личное подсобное хозяйство, вы реализуете излишки, и не планируете 
выходить на уровень более широкой торговой деятельности, то и 
приобретать патент не нужно», - пояснил заместитель Председателя
Госдумы, руководитель фракции «Единая Россия» Сергей Неверов.
Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...