Рубрикатор

Сергей Кержеманкин: «Прявт тевенек – ванстомс эрицятнень сэтьмечист»

Ошонь куротнесэ сэтьмечинть коряс эрицятне максыть питне правань ванстомань весе органтнэнь важодемантень. Ломантнень сэтьмечист ды парсте эрямост кисэ ответственностесь ашти истямо подразделениянть лангсо, кода патрульно-постовой службась (ППС).

Патрульно-постовой службань важодицятне аштить общественной сэтьмечинть ванстомасо, самай сынст эрицятне эрьва чистэ неить ошонь ульцятнестэ. Те службань сотрудниктне эсь тевсэст невтить важодеме, ломантненень служамо, сынст эрямост ды сэтьмечист ванстомо маштомачинть. Топавтыть тевест эрьва кодамо шкасто: цят якшамосто, валонь пиземе ало ды пси чистэ, чинек-венек.

Сергей Егорович Кержеманкин старшей лейтенантось патрульно-постовой службасо важоди уш 23 иеть. Весе те шканть перть вансты Саранск ошонь Пролетарской ёнксонь эрицятнень сэтьмечист.

 

– Сергей Егорович, косо  чачиде-касыде?

– Мон чачинь Ташто Шайгова ёнксонь Поруб велесэ. Тетям-авам – Егор Иванович ды Нина Яковлевна – трясть-кастсть кото эйкакшт: ниле цёрат ды кавто тейтерть. Весе сынь эрить эсенек ёнкссо, ансяк вейке сазоронок эри Архангельской областень Мирный ошсо, лиссь мирденень военноень экшс. Поруб велесэ колмо класстнэнь прядомадо мейле мон карминь якамо шабра велень школав. Зярдо ульнинек вишкинекс, тетям-авам тонавтсть минек: малавикстнэнь, тиринь масторонь вечкемась максы эрямосо ламо вийть ды ломантненень свал эряви кандомс лезэ.

Школань прядомадо мейле тонавтнинь Краснослободскоень совхоз-техникумсо, конась ульнесь Учхоз посёлкасонть. Сеске дипломонть марто монень макссть повестка армияв. Васенце кото ковтнестэ тонавтнема ютынь Волгоградской областень Урюпинск ошсо – КамАЗ-нь ветницякс, мейле жо вейке ие ды пель служинь Вологодской областень Тотьма ошсо кинь строямонь батальонсо.

Кодамо иестэ Тынь ушодыде важодеме патрульно-постовой службасонть?

– Армиясто велявтомадо мейле кавтолдынь-арсинь: ков молемс важодеме. Малавиксэнь бажасть лездамс тень те а шожда кочкамосонть. Патям кортавтсь эйсэнь молемс вневедомственной охранав, авам жо мерсь: «Цёрам, кадовт мартонок зярскак, лездат кудоютконь тевтнесэ, тонськак оймсят». Истя кавто иеть важодинь шабра велень совхозсо. Тесэ ушодовсть стака 90-це иетне: каладсть-ёмасть совхозтнэ, колхозтнэ, техника арасель, зарплатат эзть пандово…

Эсень жо седеем талнось, вишкапингстэ саезь эдь бажинь улемс милиционерэкс, ванстомс ломантнень зыянонь кандыцятнеде. Арсинь-теинь ды сыргинь уцясканть вешнеме. Покш мелем ульнесь понгомс СОБР-в. Сёрмадынь яволявтома ды молинь подразделениянь прявтонтень, тонась мерсь: «Минь сайтяно ансяк анокстазь сотрудникть, тон васняяк мольть патрульно-постовой службав, пурнак содамочить, мейле эстенек сайтядызь». Те ульнесь 1993 иесь. Се шкань вешематнень коряс пельие якинь кандидатокс, васенце приказось монь коряс лиссь 1994 иень мартонь 10-це чистэ ды ансяк сестэ получия васенце зарплатам. Те шкастонть уш ютасть 23 иеть! Ды ве чияк эзинь янксе кочказь тевенть коряс.

– Сергей Егорович, кодат прявт тевть путовить патрульно-постовой службань важодицятнень лангс?

Сехте прявтось минек эрьва чинь тевсэнть – ванстомс эрицятнень сэтьмечист, общественной порядканть, шкастонзо редямс ды а нолдамс зыянонь тевтнень ды административной правань коламотнень, «пси эскелькстнэнь коряс» зыянонь теицятнень кундамось. Теде башка, ламо тевть путовить лангозонок покш мероприятиятнестэ ламо ломанень пурнавома таркатнесэ общественной сэтьмечинть ванстомга. Патрульно-постовой службань эрьва важодицянть мельга кемекстазь башка участка, койсэнь, те лезды седе вадрясто содамс тосо эрицятнень, мезе пельдест учомс.

23 иетнень перть, зярс мон важодян патрульно-постовой службасонть, савкшнось вастневемс эрьва кодамо правань коламо марто. Ледстнеса, ютазь иенть ушодовомсто напарникень марто ансяк лисинек постс, сась ориентировка: Солнечной ульцясонть вейке кудонь подъездстэ саласть эйкакшонь салазкеть, ёвтызь ардтнемапелень башка ёнкстнэньгак. Минь саинек ёвтазенть мельс ды сыргинек районганть якамо, домкасто ваннынек эрьва курыненть. Кемень-кеветее минутань ютазь рединек: ушосо, подъезд икеле, аштить кавто од цёрат, копордыть иредстиця симемапельде. Молинек малазост, рединек, вакссост неть салазкетне, башка тешкстнэяк весе ладить. Куроксто тердинек патруль ды саинек од ломантнень райотделэв, документэнь ванномо. Ансяк тосо сынь видькстасть: лиссть инжестэ, неизь подъездсэнть салазкетнень ды салызь.

Лиякс меремс, эрьва кодамо тев марто вастневтяно: тюремат, саламот, покордамот. Ней сеедьстэ лиснить зыянонь тевть банконь картатнестэ ярмактнень саламост марто, ёжовсто топавтыть апаро тевест мошенниктне. Эрицятненень эряви улемс седе мелень явицякс, а максомс пряст манямс. Ушова ютыцятненень тень толковатано.

Мельспаросо ёвтаса, меельце иетнестэ редявиксстэ кассь ломантнень кемемаст полициянь важодицятненень. Сат тердемас эли ютат кудо вакска, весе шумбракстнить, пшкадить талновтыця кевкстема марто. Кенярдовты, покш мель явить одтнэ. Кевкстнить: кода понгомс важодеме полицияв. Мелетькак натой витеви неть кортамотнень эйстэ. Нама, сы шкастонть минек учи покш важодема, васняяк, те сюлмавозь Саранскойсэ 2018 иень Футболонь коряс масторлангонь чемпионатонь матчтнень ютавтомаст марто. Кемтяно, весемесь юты вадрясто.

Патрульно-постовой службань важодицятне ванстыть сэтьмечинть аволь ансяк эсенек республикасо. Сыненст сеедьстэ савкшны ардтнемс служебной командировкав Северэнь Кавказонь регионтнэс. Сергей Егорович аволь весть якась командировкав. Васенцесь ульнесь Дагестансо васоло 1996-1997 иетнестэ, кавто ковт тосо ульнесть. 2000 иестэ патрульно-постовой службань сотрудниктне якасть Чечня Республикань Гудермес ошов. Ульнесть тосо колмо ковт. Сергей Егорович видькстась, тосто неезденть састь покш тандадомас: весе ульцятне яжазельть бомбасо, кудотнень таркас кадовсть лондадкст, машинатне палозь… Череть дубушки стить неезденть.

2001 иестэ С.Е.Кержеманкин якась служебной командировкав Владикавказов, ульнесь тосо пельие.

– Командировкасо ульнинь, гайневтсть тень кудосто: тетям пек ормалгадсь, ульнесь покш мелезэ неемс весе эйкакшонзо. Монь нолдымизь кудов кемень чис. Сестэ меельцеде неия тетянь живстэ, сон стакасто сэредсь. Туемадон мейле недлянь ютазь сон кулось, – ледстни Сергей Егорович. 

Эштё вейке командировкась С.Е.Кержеманкинэнь туртов одс кандсь покш ёмавкс. 2003-2004 иетнестэ сон таго ульнесь служебной командировкасо. Авазо те шкастонть сыргась инжекс тейтеренстэнь Архангельской областев. Тосо ормалгадсь ды апак учо тусь эрямостонть.

– Сергей Егорович, тиринь велев пачколитядо?

– Седейсэ сэредькс марто ледстнян чачома веледень, ней тосо арась вейкеяк эриця, ёмась велесь. Меельце иетнестэ тозо кадовкшность зярыя сыре ломанть, весе сынь тусть эрямо шабра велев: Ташто Теризморгав ды лияв. Кизэнь шкане ансяк тосо эри вейке цёра, кирди мекшть. Кудотне аштить, а вана эрицят арасть. Седеесь пицезь пици чаво кудотнень лангс ванозь. Ютат ульцяванть – эрьва кува бастыль касы. Ялатеке седеесь терди тиринь велев, тетянь-авань кудов. Лелят-сазорт пурнавтано ды ардтано велев, бажатано иезэнзэ кавксть: Инечиде мейлень ледстнема чистэнть ды Троицясто. Мольтяно калмолангов, соватано кудов.

– Сергей Егорович, Тынк аволь шожда важодемась саи ламо шка ды вийть. Малавиксэнк чарькодить тень, а мурнить?

– Виде, лиясто важодемс савкшны ветькак, оймсема- ды кенярксчитнестэ. Ним, Светлана Анатольевна, весементь чарькоди, тень коряс пелькстамонок арасельть. Лиясто кудов сан валскень 5 чассто, ним зярс уды. Стян – сон уш важодема таркасо. Эрси, телефононь пачк гайневттяно, ладятано мартонзо чи ды шка, зярдо вастовтано. Седе стака ульнесь сестэ, зярдо тейтеренек ульнесь вишкине, сестэяк бажинь муемс седе ламо шка ды ютавтомс сонзэ вечкевикс семиям марто. Ней уш Дарья покш, якстере диплом марто прядызе Н.П.Огарёв лемсэ МГУ-нь юридической факультетэнть, заочна тонавтни магистратурасо ды важоди Октябрьской райононь судсо секретарекс.

Сергей Егорович, сюкпря кортамонть кисэ.

 

Т.Аксенова

 

Новости

Повышение уровня занятости на селе – один из приоритетов «Единой России»
На XVIII Съезде «Единая Россия» предложила дать возможность расширения
рынков сбыта для личных подсобных хозяйств (ЛПХ).
 В рамках обсуждения на дискуссионной площадке XVIII Съезда Партии, 
посвященной вопросам сельского хозяйства, было предложено дать 
возможность применения добровольной патентной системы 
налогообложения для крупных личных подсобных хозяйств (ЛПХ). Тех, что 
намеренны выйти на более широкие рынки сбыта, нежели фермерские 
ярмарки.  «Но для этого им сейчас нужно оформляться в качестве 
фермерского хозяйства или индивидуального предпринимателя. Это уже 
другая отчетность и налогообложение.  подача деклараций и заполнение 
нескольких видов отчетностей. Мы предлагаем дать  возможность 
владельцам ЛПХ, которые этого захотят, приобрести патент. Если у вас есть 
личное подсобное хозяйство, вы реализуете излишки, и не планируете 
выходить на уровень более широкой торговой деятельности, то и 
приобретать патент не нужно», - пояснил заместитель Председателя
Госдумы, руководитель фракции «Единая Россия» Сергей Неверов.
Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...